Read Grebo, Northern Jɔ̀ɔ̌n 8 Bible Online

Jɔ̀ɔ̌n 8 - Grebo, Northern bible

Jɔ̀ɔ̌n 8

¹È klě ɛmo tǐi doǒ wlòmo Jùsu muaě togbeeǒ moo Ɔlè dlǒ klě Ɔ sìnʼaě tǒn jlǒ waě.

²Tà chnɛ̀ tɛ̀ɛ gbàlaa le ɛ kènta gbìi, è Nɔ̀ǒ tbaea je Ɔ̈ muaě klě Nyesoaa kǎ fòɛ bo. È nyopò fòfoa diaě Ɔ mɔ̀, ii tè Ɔ̌ nea bo Ɔ̌ teea lu.

³È tà Ɔ kea luu tee le, teteǎ tee nyo klee Fɛlesǐi wǎnʼa tìe jalaě nynɔ tɔ̀ɔ ɔ̈ u kmeaǒo wlawle nuna mǒ, nɔ̀ u nynaeaǒ klɔ̀ slè bo.

⁴È kě u dɛ̌a Jùsu je u je, “Tee Nyu, nynɔà tàà ɔ ke wlawle ni ä kme ɔ.

⁵Nyesoaa teteǎà Ɔ nyeaa Mɔ̀sě i tmɔɔ̌a ämo ɛ̈ moo nynɔɔ ka bɛ̌ ne bo je, è bä bee ɔ seɛ̌ ɔ mǐ kǒ. Tǐà jleě mɛ jlɛ̀ bä nuǔ ɔ mǒ?”

⁶U boɛa ɛmo dɛǒ keǒ bu tɛ̀na Jùsu mǒ ɛ̈ di ɛɛ numa u mǐa dɛ kɔn ɛ̈ kɔn tè bu wǒa Lɔɔ le. Kɛɛ Jùsu chlìa bo keǒ blǒ mɔ̀ Ɔ̌ nia chìjoɛɛ Ɔ̌ chlěa klě pǔpu slè.

⁷Tà u keěa jè Lɔɔ wan le gbɛ̀, Ɔ dǔa jemǒ, è kě Ɔ dɛ̌a Ɔ je, “Nyu wùɛ bɔ̈ neě a slè bɔ̈ sěɛlǎ dɛ kukǔ ni nɔ̀ bɔ̈ kɛn nya bɔ̈ tba ɔ seɔ̌.”

⁸È Nɔ̀ǒ chlìa bo de Ɔ̈ chlěa klě pǔpu slè.

⁹È uu wùɛǒ ü wɔ̌na imoo winʼǒ, è nùǒ tùngmaea le mumuua, sɔɔnʼě uu fòe mɔ̀ mǒ ɛ̌ kpala ɛ kpa ɛ̌ siaǒ Jùsuu do klee nynɔǒ.

¹⁰È Jùsu dǔa jemǒ Ɔ̌ gbàla nynɔǒ wan Ɔ je, “Nynɔ, è tà u muǔ kɛ, uu nyu wùɛ se kɛɛ̀ kokǒ wun kɛn bɛ̌ le?”

¹¹È ɔ tùa Ɔ kɛ̀ɛn ɔ je, “Uuǔn, Koɔn.” È kě Jùsu dɛ̌a ɔ je Ɔ je, “Ně chɛ̀à Ě seè kokǒ wun kɛn bɛ̌ba mu, kɛɛ mu, nè niǎ kɛ̀ kpni kukwǐ de.”

¹²Ɛ kɔna tà tɔ̀ɔ u wǒaǒo de Jùsu boɛaěe nyopòǒ mɔ̀, kě Ɔ dɛ̌a Ɔ je, “Mǒà Mǒ moo Pepě keǒ kmɔ̌ ne tùonyopo mɔ̀, nyu wùɛ ɔ̈ mi Mǒo mɔ̀ nama ɔ seǎě kwijlě slè le nama mu kpe, kɛɛ ɔ mi Pepě kɔnma ɛ̈ nyee nyu kmɔ̌ siee fònfno.”

¹³Tèǒ nì kɔn tè kě Fɛlesǐi wǎn dɛ̌a Ɔ je u je, “Nè chɛ̀ ni Dìee sàse dɛ, ii tè tèǒ bòɛɛ i se kàan tè.”

¹⁴È Jùsu tùia u kɛ̀ɛn Ɔ je, “Ě ji tà Ě sɔnʼě mǒo no plě Ě ji tà Ě miěe ne, kɛɛ aa nyu wùɛ nɔ̀ se tà Ě sɔnʼě mǒo plě Ě miěe ji, ii tè baǎje Bo ke Ně chɛ̀ɛ sàse dɛ ni, tèà Ě boɛɛ i moo kàan tè.

¹⁵A tùi aa bǐì tè klě tùonyugbe tǔn wlòmo, kɛɛ Mǒà Ně tù nyu wùɛɛ tè.

¹⁶Ě se do ne, Ně Gbeǐà dbo Mǒo Nɔ̀ mǎǎ debo, ii tè bɛ̌ nu Bo ke nyopòo tè tùi, Ně tè tùtuɛ slɛɛ̌ mǒ no.

¹⁷È plě kě aa teteǎ dɛ̌ ɛ̈ moo, ‘Bɛ̌ nu tàii sɔ̌n uu sàse win bǐ nu dɛɛ do, è tèǒ i moo kàan tè.’

¹⁸Ě sèsɛɛ Ně chɛ̀ɛ tè kɛn le plě Ně Gbeǐà dbo Mǒo Ɔ̌ sèsɛɛ Ně tè kɛn le.”

¹⁹È u gbɛ̀a Ɔ wan u je, “È tà Gbèǐ neě kɛ?” È Jùsu tùa u kɛ̀ɛn Ɔ je, “A se Mǒ klee Ně Gbeǐ ji. Bɛ̌ nu bǎ jii Mǒ, è a mii Ně Gbeǐ jiba ke.”

²⁰Tà Jùsu kea luu tee le klě Nyesoaa kǎ fòɛ bo, klě Ɔ boɛɛa imo tèà, Ɔ konwaěa nyee noǎa blɔ̀kun le. Nyu wùɛ sea Ɔ kme. Mɛ̌oǒ joo nɛ̀ moo ɛ sěɛɛ̌la jè tǐ ni keǒ bu kmea Nɔ.

²¹Ɛ kɔna tǐ tìi tà kě Jùsu dɛ̌a Jùwɛ nyoǒ je de Ɔ je, “Ě mi niò, a miǐ le pɔ̀nmaò, kɛɛ tàà Ě miěe aa nyu slě wɔ̀ bɔ muě, nɛ̀ kɔn tè a miě aa kpni kukwǐ slè koǒba.”

²²Tèǒ nì kɔn tè kě Jùwɛ nyoo nyefòapo dɛ̌a u je, “Dɛmo Ɔ se Ɔɔ chɛ̀ dbǎba muò? Deě tè kɔn tè Ɔ je Ɔ mi kɛɛ tà muma ä se Ɔɔ jěba muà?”

²³È kě Ɔ dɛ̌a u je Ɔ je, “Amoà kě a sɔnʼɔ kmɔ̌ɔ mɔ̀ mǒ, kɛɛ Mǒà Ě sɔnʼě mǒ jɔkɛn. Amoà kě a sɔnʼɔ kmɔ̌ɔ mɔ̀ mǒ, kɛɛ Mǒà Ě seɔ mǒ sɔn.

²⁴Tè kɔn tè Ě tmɔɔ̌ amoo ɛ̈ moo a miě aa kpni kukwǐ slè koǒba nɛ̀ moo bɛ̌ nu bǎ se i kàan tè po ɛ̈ moo Ě moo Nyuà Ě je Ě monoo, è dɛǒ nɛ̀ mi tùɔn kpaba.”

²⁵Tèǒ nì kɔn tè u gbɛ̀a Ɔ wan u je, “Sɛje mɔ mònoǒ kɛ?” È Ɔ tùa u kɛ̀ɛn Ɔ je, “Plě Ě mǐ a kɛ̀ɛn tù, Ě kɔn dɛ Bo tmɔɔ̌ amoo klekle.

²⁶Ě kɔn noǎ fòfoa ï kɔn tè Bo boɔɔ keǒ a jleě mǒ plě ï kɔn tè Bo jɛɛ amoo. Sɔ̌noka, Ě tmɛɛ̌ kmɔ̌ ne tùonyopo sosǒ dɛǒ Ě wɔ̌nʼɔ klě Nyuà Ɔ̈ dbo Mǒo mɔ̀, plě Ɔ tmɛɛ̌ neě kàan tè.”

²⁷È tùonyopo uǔ jboa ɛ le ɛ̈ moo tèǒ Jùsu boɛaa i kwɛɛaǒ Ɔɔ Gbeǐ Nyesoa jleě mǒ bo.

²⁸Ii tè kě Ɔ dɛ̌a u je Ɔ je, “Bǎ keǎ Jbɛjuu Jǔà jemǒ duǐ keǒ pète bɛ̌ tu jleě, è a miǎ ɛ jiba ɛ̈ moo Mǒà Mǒ moo Jbɛjuu Jǔà, è a mi ɛ jiba ɛ̈ moo Ně nu dɛ keǒ Ně chɛ̀ɛ kpě wlòmo, kɛɛ dɛà Ně Gbeǐ tee Mǒo nɛ̀ kɔn do Ě boɛ.

²⁹Noǎ wùɛà Ě nii i blee Nyuà dbo Mǒo Ɔɔ plɔ lo, ii tè kě Ɔ neàǎ gbàa Ɔɔ̌ siǒǒ bo.”

³⁰Nyopò fòfoa ü wɔ̌naa tèǒ Ɔ boɛaa u poa Ɔɔ tè kàan tè.

³¹È kě Jùsu dɛ̌a Jùwɛ nyoǒ poa Ɔɔ tè kàan tè je Ɔ je, “Bɛ̌ nu bǎ keǒ winʼà Ě tee amoo bo tùi, è sɛjesɛ amo moo Ně mɔ̀ na nyo.

³²È a mi kàan dɛ jiba plě kàan dɛǒ ɛ mǐ a gblà.”

³³È u tùa Lɔ kɛ̀ɛn u je, “Ämoà ä moo Eblɛ̌hɛ̀moo jlǔu jlǔ, ä sěɛlǎ nyu wùɛɛ kèi dɛ ni. Mɛ kɔɔ̌n tè bòɛɛ̌ kɛ i ämo je ɛ̈ moo ä mi gblàeba?”

³⁴È kě Jùsu dɛ̌a u je Ɔ je, “Ě tmɛɛ̌ a kàan tè, nyu wùɛ ɔ̈ moo dɛ kukǔ nu nyu ɔ neeě kpni kukwǐi kpě bobo.

³⁵Kèi slě tùgba slè kɔn, ɔ moo konkwa nuɔ sosǒ, kɛɛ wlòmo sà jǔ nɔ̀ kɔnʼě tùgbaǒ slè tǐ wùɛ mɔ̀.

³⁶Tèǒ nì kɔn tè bɛ̌ nu bo Nyesoaa Jǔ Bɔ̌ gblà amo klě kpni kukwǐi kèdɛ̌ mǒ, è a gblàa le kpǎkpǎ.

³⁷Ě ji ɛle a moo Eblɛ̌hɛ̀moo jlǔu jlǔ, kɛɛ a tɛ̀n ɛ mǒ kaǒ keǒ ba dbǎ Mǒ. Mɛ̌oǒ joo nɛ̀ moo aǎ jbo winʼà Ě tee amoo le.

³⁸Ě tmɛɛ̌ ane keǒ noǎà Ě jěe klě Ně Gbeǐ mɔ̀ ii tè. Tèǒ nì kɔn tè ba nu noǎ a wɔ̌nʼɔ ï sɔn lě Ɔɔ mɔ̀ mǒ klě tǐà wlòmo.”

³⁹U tùa Ɔ kɛ̀ɛn u je, “Eblɛ̌hɛ̀mo moo äa gbeǐ.” È kě Jùsu dɛ̌a u je Ɔ je, “Bɛ̌ nu sɛjesɛ bǎ moo Eblɛ̌hɛ̀moo jlǔ, è a mii noǎǒ ɔ niaa numa.

⁴⁰Kɛɛ tà Ě tmɛɛ̌ amoo kàan tèà Ě wɔ̌nʼɔ ï sɔn lěe Nyesoa mɔ̀ mǒ, è a tɛ̀n ɛ mǒ keǒ ba dbǎ Mǒ. Eblɛ̌hɛ̀mo sěɛlǎ dɛ taeǒ ni.

⁴¹Noǎ aa gbeǐ nii nì a ni.” È u tùa Ɔ kɛ̀ɛn u je, “Ä se gblà nynoo jlǔ! Äa Gbeǐi do ä kɔnʼɔ sosǒ Nɔ̀ moo Nyesoa!”

⁴²È kě Jùsu dɛ̌a u je Ɔ je, “Bɛ̌ nu sɛjesɛ Nyesoa Bɔ̌ moo aa Gbeǐ, è a mii Mǒ mǒ noɛɛma. Mɛ̌oǒ joo nɛ̀ moo Nɔ̀ kɔn mɔ̀ Ě sɔnʼě mǒ Ě neà tàa. Ě slě di keǒ Ně chɛ̀ mɔ̀, kɛɛ Nɔ̀ dbo Mǒ.

⁴³È mɛ kɔɔ̌n tè aǎ jboǒ kɛ tèà Ě boɛɛ le? Dɛ nu ɛɛ nɛ̀ moo a slě wɔ̀ ba po Ně win nɔkǔ jebo.

⁴⁴Aa gbeǐ moo kǔ, è dɛ ɔ jlɛ̌ ba nuu nɛ̀ a ni. Sɔɔnʼě ɛɛ wlò tùla mǒ nɔ̀ moo mnùngma bo po nyu, kàan dɛ slě ɔ mǒ ne, nɛ̀ kɔn tè ɔ sěɛlǎ kàan tè boɛ. Ɔ moo sen le tmɔ̌ nyu plě ɔ̌ moo senʼe gbeǐ, ii tè bɛ̌ nu bɔ̌ ke sen tmɛ̌, è dɛǒ ɔ tùaa wlò le nɛ̀ǒ ɔ ni.

⁴⁵Kɛɛ bɛ̌ nu Bo tmɔɔ̌ a kàan tè aǎ po i kàan tè.

⁴⁶È aa nyu tae wɔ̀le je bɔ̈ sèsae leě kɛ dɛɛ do kɛn le ɛ̈ monoo tè wlawlǎ keǒǒ jleě mǒ? Bɛ̌ nu Boǒ ke a kàan tèà tmɛɛ̌ ne, è mɛ kɔɔ̌n tè aǎ poǒ kɛ Ně tè kàan tè?

⁴⁷Nyesoaa jlǔ wɛ̌n tèǒ Nyesoa boɛɛ le. Kɛɛ a se Nyesoaa jlǔ, nɛ̀ kɔn tè aǎ po Ɔɔ win nɔkǔ jebo.”

⁴⁸È dɛ Jùwɛ nyo tùiaa Jùsu kɛ̀ɛn nɛ̀à u je, “Dɛà ä boɔlaa ɛ nynanaǒ bo ɛ̈ moo Mòo Sìmɛ̌lia Nyu plě kǔ sùsu neěè ja.”

⁴⁹È Jùsu tùa u kɛ̀ɛn Ɔ je, “Kǔ sùsu seɔɔ̌ ja ne, Ě tùiǒ Ně Gbeǐ, kɛɛ amo sɛ̀ɛǒ Ně tè le.

⁵⁰Ně pɔ̀n Ně chɛ̀ɛ tè jǐ boaboǎ le. Nyuà Ɔ̈ pɛ̀ɛn tè jǐ boaboǎ le Nɔ̀ moo Nyesoa plě Nɔ̀ moo Blilǐ Tùɔ̌ ke.

⁵¹Kàan tè nìà Ě boɛ a je, nyu wùɛ ɔ̈ miǒo winʼà Ě boɛɛ bo tùba ɔ seǎ kǒ kpe.”

⁵²È Jùwɛ nyo tùia Ɔ kɛ̀ɛn u je, “Kèke ä jiǐ ɛ kàan tè ɛ̈ moo kǔ sùsu neěè ja. Eblɛ̌hɛ̀mo klee Nyesoaa wnɔsàɔpo wùɛ u kǒ lo, kɛɛ kě dɛ̀ ä je ɛ̈ moo nyuà ɔ̈ miǒo winʼà bòɛɛ bo tùba ɔ seǎ kǒ kpe.

⁵³Nè tè se kun i seǒ äa gbeǐ Eblɛ̌hɛ̀mo klee Nyesoaa wnɔsàɔpo ü kǒo mǒ sìn! Mɔ Nè wlò je mònoǒ kɛ?”

⁵⁴È Jùsu tùia u kɛ̀ɛn Ɔ je, “Bɛ̌ nu Bo ke Ně chɛ̀ tè jǐ boaboǎ nye, ɛmo tè jǐ boaboǎǒ ɛ se dɛ kɛn bo nyna. Kɛɛ Ně Gbeǐ Ɔ̈à a je Ɔ moo aa Nyesoa Nɔ̀ nyeě tè jǐ boaboǎǒ.

⁵⁵A se Ɔ ji, kɛɛ Ě ji Ɔlo. Bɛ̌ nu Bo ke bò dɛ̌ ɛ̈ moo Ě se Ɔ ji, è ɛ moo sen Ě tmɛ̌ ni, kɛɛ Ě ji Ɔlo plě Ě tùiǒ Ɔɔ win bo.

⁵⁶Aa gbeǐ Eblɛ̌hɛ̀mo nia le chǒn keǒ bɔ jěa Mǒ Bo dia lě. Tà ɔ jěa Mǒo, ɛ̀ blooa ɔɔ plɔ lo.”

⁵⁷È kě Jùwɛ nyo dɛ̌a Ɔ je u je, “Mòà se kɛɛ jlě wlèe sɔ̌n tùo pùu chɛ̀ kɔn Mò je Ɔ̈ jě Eblɛ̌hɛ̀mo le?”

⁵⁸È Ɔ tùia u kɛ̀ɛn Ɔ je, “Plě Eblɛ̌hɛ̀mo mǒ kɔnʼɔ no Ě ne kmɔ̌.”

⁵⁹Tà u wɔ̌naa dɛǒ, u dǔa seɛ̌ mǒ u mǐa ni Ɔ̀ bee le u mǐa Ɔ dbǎ. Mɛ̌oǒ joo nɛ̀ moo u je Nyesoaǒ Ɔ pea fla wan, kɛɛ Jùsu wɛ̌a Ɔ̌ sɔnaě kǎ fòɛǒ bo mǒ.