Read Grebo, Northern Ǎkè 12 Bible Online

Ǎkè 12 - Grebo, Northern bible

Ǎkè 12

¹Klě tǐǒ wlòmo klɔ̀ba Hɛwlǒ tùngmaea Tentǎn Jǔu wǎnʼa tìee tè mɔ̀ tèteɛ.

²Ɔ̌ kmea Nyesoaa tuposà kpa nyu u dɛɛ Jìmǐse ɔ̈ mooa Jɔ̀ɔ̌nʼɔ mamǔ jbɛju ɔ̌ nua pan ɔ̌ bɛ̌a ɔɔ dlǒ je.

³Tà ɔ jěa lɛɛ ɛ̈ moo, “Dɛà Ě nuu ɛ bloo Jùwɛ nyoo plɔ loò,” è ɔ kmea Pitɛ̌ ke. Ɛmo dɛǒ ɛ kpala tùɔn tǐǒ jleě u kwɛnaa Ně Jǎ Flɔ̌ɔ de ngmnengmnɛ̌.

⁴Tà Hɛwlǒ kmeaa Pitɛ̌ ɔ poa lɔɔ wùlo, ɔ dboaě tabɔ̀ɔ pù tùo m̀mɔdo keǒ bu tùa ɔ jǐ mɔ̀, u nia hɛ̀n hɛ̀n ǔ peaǒ ɛ le keǒ jǐ mɔ̀ tùtuɛ mɔ̀. Hɛwlǒ poa ɛ ble keǒ bɔ jalaǒ Pitɛ̌ klɔ̀ jemǒ ɔ mǐa ɔ blilǐ mɔ̀ tù bo Dlǒ Mǒ Sìin Didi Dɛɛ de ngmnengmnɛ̌ bɛ̌ sìnʼa.

⁵Ii tè kě u nuaě Pitɛ̌ wùlo bo tùtuɛ, è Tentǎn Jǔu wǎn mǎnaě sèn bo ǔ bɛ̀tea Nyesoa keǒ ɔɔ tè mɔ̀.

⁶È tǒn jlǒ waěǒ bɛ̈ sìnʼaa plě Hɛwlǒ mǐa lěe Pitɛ̌ ja ɔ mǐa ɔɔ blilǐ tù, Pitɛ̌ pɛna bo ɔ̌ mɛa klě tabɔ̀ɔ sɔ̌n pǎnpe, chěenʼe sɔ̌n nì u pea ɔ sonwe le. È tabɔ̀ neaǒ wùlo pola mǒo ngmìi wànwu jleě ǔ tùia jǐ mɔ̀.

⁷Tà ɔ muaǒo bo chèba, è keà nyu kɛpǒo jǐ, è Koɔnʼɔ najiǒpòi nɔ̀ǒ wǒaǒ ɔ mɔ̀, è pepě fɛnʼa ne. Najiǒpòiǒ ɔ̌ tepěa Pitɛ̌ le keǒ ɔ wakǎ mǒ bɔ sɔna mǒ, kě ɔ dɛ̌a ɔ je ɔ je, “Nu jǐ měne, dǔ jemǒ!” È tǐi doo tǐ jleě chěenʼe sɔ̌n nìǒ bloaě ɔ sonwe le.

⁸È kě najiǒpòiǒ ɔ dǎla ɔ je ɔ je, “Po dale měne mì nè nyɔkòɛběǒ be měne po.” Tà Pitɛ̌ wɔ̀la ɛɛ nunuɛ mɔ̀, kě najiǒpòiǒ ɔ dɛ̌a ɔ je, “Nè wlawlǒ fòɛǒ finfiɛ̌ɛ ɛ dìe, naǎ de bä mu.”

⁹Pitɛ̌ beaǒ ɔ demǒ ǔ pěaě wùlo koǔ bo, kɛɛ Pitɛ̌ sea dɛǒ sɛje ɛ̈ kpɛaa tùɔn ji ɛ̈ǒ najiǒpòiǒ ɔ niaa, ɔɔ wlò jěa lɛ ɛ̈ moo slèeǒ ɔ jěa.

¹⁰Ǔ sìnʼa klekle tabɔ̀poi le klee sɔ̌n nonɔ tabɔ̀poi ü tùiaa jǐ mɔ̀, è nùǒ nyniaǒ keǒ wlɔ̀ dɔwunʼǒ ɛɛ pně chnu gbàa ɛ̈ u pɛɛǒ jleě bǔ keě dǐa mi. Chnuǒ ɛɛ chɛ̀ knana, è nùǒ sɔnaě wùlo mǒ ü nɛa diěǒ ɛɛ snǔ fòɛ mɔ̀. Keà nyu kɛpǒo jǐ è najiǒpòi nɔ̀ǒ sɔnaǒ Pitɛ̌ jemǒ.

¹¹Plě ɔ̌ keěa kɛ̀ ɔɔ chɛ̀ mɔ̀ di, è kě ɔ dɛ̌a ɔ je, “Kèke Ě jiǐ lɛ ɛ̈ moo i moo kàan tè Koɔn Nyesoa Nɔ̀ dbo Ɔɔ najiǒpòi ɔ̌ gblà mǒ klě Hɛwlǒ kwete mǒ klee noǎ wùɛà Jùwɛ nyo poo ble u je ï mi mǒo numa.”

¹²Tà ɔ dia lɔɔ chɛ̀ mɔ̀, è nɔ̀ǒ muaě nynɔǒ mooa Mɛwlě ɔɔ koǔ bo ɔ̈ mooa Jɔ̀ɔ̌nʼɔ naǎ, Jɔ̀ɔ̌nʼɔ doǒ u dɛɛa Mǎkè ke. Klě nyopò fòfoa bòoa lě ǔ boɛaě Nyesoa mɔ̀.

¹³Tà Pitɛ̌ wǒaǒo koǔu ngmìi chnu kɛn ɔ bea lɛɛ, è na wien po nyneju u dɛɛa Wlodà nɔ̀ dia lě ɔ mǐa ɔ kɛ̀ɛn tù.

¹⁴È tà ɔ jboaa Pitɛ̌ɛ win, chǒn sosǒ tè ɔ seaǒ chnu sà, kɛɛ ɔ kpala de plùplɛ klě u slè ɔ̌ poa i blǒ mǒ ɛ̈ moo, “Pitɛ̌ nɔ̀ǒ nynaě plomǒ boò!”

¹⁵È kě u dɛ̌a ɔ je u je, “Nè dlǒ sɔnʼǒ mɔ̀ mǒ snǔ!” Kɛɛ ɔ mɛɛ̌aǒ wun bo kaǒ ɔ je, “I moo kàan tè!” Ii tè u je, “Ɛ kɔn bɛ moo Pitɛ̌ɛ najiǒpòi.”

¹⁶È klě tǐǒ wlòmo Pitɛ̌ beěa jè chnuǒ no. Tà u sàlaǒo chnuǒ u jěa lɔɔ, ì kàea u le wan.

¹⁷È ɔ poa u son je ɔ je bu poa kpee ɔ̌ sèsaea u wlòmo ke Koɔn nuaě ɔɔ wùlo sèsa. Tà ɛmoǒ ɛ sìnʼaa, è kě ɔ dɛ̌a ɔ je, “A mu, a tmɔɔ̌ Jìmǐse klee Tentǎn Jǔu wǎn tùuǒ,” è nɔ̀ǒ sɔna mǒ ɔ̈ muaě tà tɔ̀ɔ.

¹⁸Tà chnɛ̀ gbàlaa le, jale jejǎea fòɛ nɛ̀ bea blǒ mǒ klě tabɔ̀ǒ slè klě wùlo pola mǒ ɛ̈ kwɛɛaǒo dɛ kpalaa tùɔn keǒ Pitɛ̌ jleě mǒ bo.

¹⁹Hɛwlǒ nua nu ǔ pɔ̀na Pitɛ̌ le, kɛɛ u sea ɔ jě. Ii tè ɔ gbɛ̀a u chlachlǎ be wan le ɔ̌ nyea nyopò kpě bu dbǎla tabɔ̀ǒ. È Hɛwlǒ nɔ̀ǒ sɔnaě Jùdǐa wakǎ kɛn mǒ ɔ̌ muaě dě fòɛǒ moo Sesawlià kɛn, klě ɔ sìnʼa lě mòngmɛ wě.

²⁰Hɛwlǒ pea jlo chɔɔ keǒ deě fòee sɔ̌nʼǒ mɔ̀ ï mooa Taè klee Saedɛ̀n. Imo deěe sɔ̌nʼǒ i sɛ̀aě Hɛwlǒo blǒ wlòmo digbaǐ nɛ̀ i teea kɛn. Tèǒ nì kɔn tè u sàla mòngmɛ nyo ǔ muaě Hɛwlǒ mɔ̀ u klee ɔɔ sɔ̌n mǐa ně bo wnawna kɔn ɛ̈ di ɛɛ numa ɔɔ̌ dia u digbaǐ nyenyeɛ bɔ̌. È u beeaě Blasetɔ̀ mǒ ɔ̈ mooa Hɛwlǒo kòngmnaa nyefòɛ ɔ kuunʼaa wlò je keǒ bɔ mǎnaǒ u mɔ̀ tèǒ i mǐaǒ slè mǒ sɔn.

²¹Chnɛ̀ jlǒ waěǒ kɔn wlòmo u mia imoo tèǒ tùba, Hɛwlǒ poa ɔɔ klɔ̀ba wlawlǒ pɛ̀tu mǒ ɔ̌ nea bo klě ɔɔ klɔ̀ba gbèsɛɛ kɛn, è nɔ̀ǒ boɛa klě nyopòǒ mɔ̀ ü sɔnaa Taè klee Saedɛ̀n deě kɛn mǒ,

²²è nyopò wùɛ u pnɛ̌a dɛ jleě le ǔ jɛɛ̌aě win u je, “Ɛ moo Nyesoa chɛ̀ Ɔ̌ boɛò, ɛ se tùonyu ɔɔ̌ boɔò!”

²³Tǐi doo tǐ jleě Koɔnʼɔ najiǒpòi tbala ɔ dɛ, è nɔ̀ǒ bloaǒ jɔ mǒ. Mɛ kɔɔ̌n tèǒ joo nɛ̀ moo Nyesoa Nɔ̀ ɔ sea tè jǐ boaboǎ nye. Sɔnpě nì dia lɔ ɔ̌ kǒa.

²⁴È Nyesoaa win nìǒ gbɛ̀tɛɛa blě kɛn le, è nyopòà poa ii kàan tè è nùǒ bebeea kɛn le.

²⁵Tà Banàbɔ klee Sɔ̀ɔ̌ blěe konkwa u niaa klě Jlǔsnɛ ɛ chlɛ̀aa dlǒ, è nùǒ tbaea je ü mua Ɛntìa, è u kpaea Jɔ̀ɔ̌n Mǎkè snǔ mǒ.