Read Grebo, Northern Ǎkè 14 Bible Online

Ǎkè 14 - Grebo, Northern bible

Ǎkè 14

¹Ɛmo dɛɛ doǒ nɛ̀ kpala tùɔn de klě Akonìa diě wlòmo. U muaě Jùwɛ nyoo Nyesoa koǔ bo ǔ boɔa Nyesoa win ǐ pàea chnɛ̀ le, ii tè Jùwɛ nyo klee kuodakwɛ̌ fòfoa nù poa ii tè kàan tè.

²Kɛɛ Jùwɛ nyoo tìeǒ neaǒo ü niaa dlǒ jakǎ ü je ü seaa winʼǒ kàan tè po nù nyenynǎea kuodakwɛ̌ ǔ nymiia uu wlè jǐ le keǒ Tentǎn Jǔu wǎnʼǒ jleě mǒ.

³Tèǒ nì kɔn tè Pɔ̀ɔ̌ klee Banàbɔ sìnʼaǒ tàǒ tǐ pɛ̀ti. U kunʼa jele ǔ boɔɔa Koɔnʼɔ tè kɛn Ɔ̈ nynanaǒ uu demǒ bo keǒ uu tuposà u peaa mɔ̀ ɛ̈ kwɛɛaǒo Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ jleě mǒ bo Ɔ̌ nyea u kpě ǔ nia wan bo kàe noǎa klee wlòlekaen noǎ.

⁴Nyopòǒ neaěe dě fòɛǒ wlòmo u plooa ɛ wakěe sɔ̌n, tìe ngmɛ̀ɛaě Jùwɛ nyo mɔ̀, è tìe ngmɛ̀ɛaě Jùsuu tuposà kpa nyo mɔ̀.

⁵Ɛ kpala ɛ kpa kpa kuodakwɛ̌ɛ tìe klee Jùwɛ nyoo tìe klee uu nyefòapoo tìe beaǒ tàa do ǔ poa ɛ ble keǒ bu kpala u tǐ jakě kɛn klee bu beea u seɛ̌ bu dbǎla lu.

⁶Kɛɛ tà Jùsuu tuposà kpa nyoǒ u jěa lɛɛ, è u plùua u je ǔ muaě wakǎǒ u dɛɛ Laekonìa kɛn klě ɛɛ deěǒ moo Lesètla klee Dabè klee blěǒ tbɛɛaǒo tàǒ dǐ.

⁷Klě u kpɛaě Nyesoaa kàan tuposàǒ ɛɛ popoɛ dlǒ mɔ̀.

⁸Ɛ kɔna jbɛju tɔ̀ɔ ɔ̈ nea lěe dě fòɛǒ mooa Lesètla kɛn ɔ̈ jalaa bo klɔ̀ɔa dǐa plě ɔ sěɛlǎ nɛ. Chnɛ̀ jlǒ waě tɛ̀ɛ mɔ̀ ɔ nea bo

⁹ɔ̌ pea Pɔ̀ɔ̌ɔ boɔboɔ win nɔkǔ jebo. Tà Pɔ̀ɔ̌ chèaě ɔɔ mɔ̀ bo ɔ jěa lɔɔ ɛ̈ moo ɔ kɔna tè wlò popoɛ ɛ̈ bɛ pean nɔɔ,

¹⁰ii tè ɔ pnaěaě jɔ mǒ ɔ je, “Nyna nè beǒ jleě bo!” È jbɛju nɔ̀ǒ ngmnana ɔ̈ nynana bo ɔ̈ tùngmaea le nena.

¹¹Tà diblɛ̌ǒ u jěaa dɛǒ Pɔ̀ɔ̌ nuaa, è nùǒ pnɛ̌a dɛ jleě le klě uu Laekonìa win wlòmo u je, “Nyesoeà diɔ wɔ̀ɔn kělɔ ä mɔ̀ klě tùonyugbee tǔn wlòmo!”

¹²Tà ɛ tùu Pɔ̀ɔ̌ nɔ̀ boɛa wien le chɔɔ klě u slè, ii tè u dɛɛa ɔ Hɔ̀misi, è Banàbɔ nɔ̀ u dɛɛa Siɔsì.

¹³Siɔsìi kǎ fòɛ konwaěa diě le, è bodiɔǒ niaě ɛmoo koǔǒ bo konkwa ɔ klee diblɛ̌ jalaě bliǎ beě klee tichɛblee punɔ̌ klě dɔwun jleě u mǐa Jùsuu tuposà kpa nyoǒ chɔ̀no je pie.

¹⁴Kɛɛ tà Banàbɔ klee Pɔ̀ɔ̌ ü mooa Jùsuu tuposà kpa nyo u wɔ̌naa dɛ u wɛ̀aa mɔ̀ bu nuaa, è nùǒ keklǎea uu chɛ̀ɛ dale wan le ɛ̈ teea lɛɛ ɛ̈ moo u pea jlo keǒ dɛ u niaa mɔ̀ ǔ kpalaě diblɛ̌ǒ slè plùplɛ ǔ pnɛ̌a dɛ jleě le,

¹⁵kě u dɛ̌a u je u je, “Amo nyopòà, mɛ kɔɔ̌n kɛ tè a niǐ dɛà? Ämoà ä moo tùonyopo sosǒ wòje keà aa ka nee je! Ä diě ä mǐ a Nyesoaa kàan tuposàà je po ɛ̈ di ɛɛ numa noǎà see konkwa kɔn a mǐ i kɛn tbɛ a mǐ kmɔ̌ sie Nyesoa ja chè Ɔ̈ nuu jɔ klee blǒ klee jbǒ plě klee noǎ wùɛ ï neɔ ii wlòmo.

¹⁶Klě tǐà bee de wlòmo Nyesoa sɔnaǒ dakɔ̌ wùɛ mɔ̀ mǒ ǔ nia uu chɛ̀ɛ kɛn wɔɔn dɛ,

¹⁷kɛɛ tǐ wùɛ mɔ̀ Nyesoa ni kàan noǎ ï moo sàse ɛ̈ moo Ɔ ne kmɔ̌. Ɔ nye a nǔ ɛ̌ dbɛ klee Ɔ ni aa dodɔ̌ noǎa ǐ kwin klě ii tǐ wlòmo klee Ɔ̌ nye a digbaǐ fòfoa plě Ɔ̌ ni amo a ni chǒn le!”

¹⁸Tà Pɔ̀ɔ̌ wɔ̀laa tèǒ boɔboɔ mɔ̀ɔ chɛ̀, ɛ mooa dɛ jakǎ keǒ bu kana diblɛ̌ǒ je bu bɔ̌a chɔ̀noǒ pipiɛ.

¹⁹È Jùwɛ nyoo tìeǒ sɔnaa deě fòeǒ moo Ɛntìa klee Akonìa kɛn mǒ nù nyenynǎea diblɛ̌ǒ bu wɔ̀na Pɔ̀ɔ̌ je, ii tè u beea ɔ seɛ̌ ǔ chlìa ɔ le ǔ sàlaě ɔ diěǒ wlòmo, uu wlò jěa lɛ ɛ̈ moo ɔ kǒa le.

²⁰Kɛɛ tà Tentǎn Jǔu mɔ̀ na nyo wɛ̀aa de keǒ ɔ dlǒ mǒ u tbɛɛa ɔɔ dǐ, è nɔ̀ǒ dǔa jemǒ ɔ̈ mua de klě diěǒ wlòmo. Tà chnɛ̀ tɛ̀ɛ gbàlaa le, Pɔ̀ɔ̌ klee Banàbɔ sɔnaě diěǒ wlòmo ǔ muaě Dabè diě kɛn.

²¹Tà u boɔlaa Nyesoaa kàan winʼǒ klě diěǒ wlòmo plě u nuaa nyopò fòfoa u beaǒo Tentǎn Jǔ demǒ, è nùǒ tbaea je ü muaě deěǒ mooa Lesètla klee Akonìa klee Ɛntìa kɛn de

²²keǒ bu poa Jùsuu de na nyoǒ kbě ja le bu kpaea uu tè wlò popoɛ u kɔnaa nya, è u tmɔɔ̌a nu u je, “Ä kɔn bä jě sònwɛ fòfoa plě Nyesoa mǐ ä win kwa kɔn.”

²³Pɔ̀ɔ̌ klee Banàbɔ tbala nyefòapo klě Tentǎn Jǔu wǎnʼa koǔ wùɛ bo bü mooa Tentǎn Jǔu wǎnʼa bòlibo, ǔ chìnʼa plě ǔ bàtea ɛ̈ mooaě nyopòǒ Koɔn kwete mǒ popoɛ.

²⁴Tà u wɔ̀laa Pisedìa wakǎǒ kɛn nena mɔ̀, è u muaě Panfelìa wakǎ kɛn.

²⁵Tà u boɔlaa Nyesoaa win klě dě fòɛǒ moo Pɔkà wlòmo, è nùǒ tèea je ü mua lě dě fòɛǒ mooa Atalìa kɛn.

²⁶Tà u sɔnaě mǒo, è nùǒ bea měe wan ü mua de klě Ɛntìa diě kɛn, tà u pooaě uu Nyesoa kwete mǒ keǒ Ɔɔ konkwa ɛ̈ u chlàlaa dlǒ mɔ̀.

²⁷Tà u nynia lěe Ɛntìa wlòmo, u dala Tentǎn Jǔu wǎn ǔ bòa u le keǒ tàa do ǔ sèsaea u wlòmo ɛ̈ kwɛɛaǒo noǎ wùɛ Nyesoa nuaa klě u mǒ jleě mǒ bo plě ke Nyesoa nuaa kuodakwɛ̌ tè wlò popoɛɛ chnu je sèsa.

²⁸Tà ɛ wɛ̀aa mɔ̀, è Pɔ̀ɔ̌ klee Banàbɔ sìnʼaě u mɔ̀ tǐ pɛ̀ti.