Read Grebo, Northern Ǎkè 16 Bible Online

Ǎkè 16 - Grebo, Northern bible

Ǎkè 16

¹Pɔ̀ɔ̌ klee Salě tèea je ǔ muaě deě fòeǒ mooa Dabè klee Lesètla kɛn. Ɛ kɔna Jùsuu mɔ̀ na nyu tɔ̀ɔ ɔ̈ kɔn nynɛ̌ mooa Timɛtě nɔ̀ neaě Lesètla. Ɔɔ naǎ mooa Jùwɛ Nyesoa nynɔ, kɛɛ ɔɔ gbeǐ nɔ̀ mooa Kwlǐki jbɛju.

²Tentǎn Jǔu wǎnʼǒ nea lěe deě fòeǒ moo Lesètla klee Akonìa kɛn u boɛa Timɛtěe kàan nynɛ̌.

³Pɔ̀ɔ̌ jlɛ̌ bo Timɛtě bɔ nana u de, ii tè ɔ nua nɔ ɔ̌ bɛ̌a foeě. Mɛ̌oǒ joo nɛ̀ moo Jùwɛ nyo wùɛǒ nea lěe u jia ɛle ɛ̈ moo Timɛtěe gbeǐ mooa Kwlǐki jbɛju, ii tè bɔ̌ sea foeě bɛ̌ bɔ̌ kea tè boɛ, u sea ɔ nɔkǔ jebo poba mu.

⁴Ke u niaa deěǒ kɛn le nena kě u nia Tentǎn Jǔu wǎn tmɔɔ̌a noǎ mooa teteǎ ï tuposà kpa nyoǒ ü nea lěe Jlǔsnɛ klee Tentǎn Jǔu wǎnʼa bòlibo pooa kòo kɛn nyu wùɛ bɔ tùaǒo bo.

⁵Ii tè Tentǎn Jǔu wǎnʼǒ nea lěe uu tè wlò popoɛ bea kbě ja le plě ǔ bebeea kɛne chnɛ̀ jlǒ waě wùɛ mɔ̀.

⁶Pɔ̀ɔ̌ klee ɔɔ nenawa nymaea Flejìa klee Kalesìa wakě mǒ. Mɛ̌oǒ joo nɛ̀ moo Ngmà Je Ne Sùsu nua nɛ ǔ sea Nyesoaa win boɔ klě Esìa wakǎ kɛn.

⁷Tà u nynia lěe Masià wakǎa tnòa kɛn, u tɛ̀na ɛ mǒ keǒ bu muaě Batanìa wakǎ kɛn, kɛɛ Jùsuu Sùsu seaǒ u mɔ̀ mǒ sɔn u sea ɛ nu.

⁸Ii tè u nana Masià wakǎ kɛn ǔ tèea je ǔ muaě dě fòɛǒ mooa Tloasì kɛn.

⁹Tǒn jlǒ waě tɛ̀ɛ mɔ̀ Pɔ̀ɔ̌ jěa Nyesoaa slèe ɛ̈ kɔn mǒ ɔ jěa lěe jbɛju tɔ̀ɔ ɔ̈ sɔnaa Masedonìa wakǎ kɛn mǒ. Jbɛjuǒ nɔ̀ nynana bo ɔ̈ bɛ̀tea Pɔ̀ɔ̌, kě ɔ dɛ̌a ɔ je, “Diě kělɔ Masedonìa wakǎ kɛn mò ä mǒ sɛ̀ɛ le!”

¹⁰Tà slèeǒ ɔ jěaa ɛɛ dɛ sìǐnʼa bòo, è ämoǒ wɛ̀a mɔ̀le u mǐaě Masedonìa wakǎ kɛn mu. Ä jia ɛle ɛ̈ moo Nyesoa dɛa äle keǒ bä poa Ɔɔ kàan tuposàǒ klě wakǎǒ kɛn.

¹¹Tà ä sɔna lěe Tloasì mǒ, ä bea měe wan ä nua fǒn ä muaě dě fòɛǒ mooa Samotlasì kɛn. Tà chnɛ̀ tɛ̀ɛ gbàlaa le, è ämoǒ muaě dě fòɛǒ mooa Niapòla kɛn.

¹²Tà ä sɔnaě mǒo, ä naea bo jleě ä muaě dě fòɛǒ moo Flepà kɛn ɛ̈ mooa diě ɛ̈ Wlǔmɔ nyo tǐnʼa lěe kɛn. Nɛ̀ mooa Masedonìa blǒ wakǎǒ ɛɛ dě fòɛ. Ä sìnʼaě chnɛ̀ jlǒ wě ǐ tmɔa jleě mǒ bo.

¹³Tà Nyesoaa defɛ chnɛ̀ jlǒ waě wǒaǒo, è ämoǒ muaě ně sakaě tɛ̀ɛ wien ɛ̈ seaa wlɔ̀ dɔwun mɔ̀ tmɔɔ no, ä pɛ̀nʼa tùɔn le ɛ̈ kɔn kɛn Jùwɛ nyo wɛ̀ɛǒo de ǔ boɛ lěe Nyesoa mɔ̀. È ä jěa tùɔnʼɔ do, ä nea bo ä boɛaě nynoǒ wɛ̀ɛa de mɔ̀ keǒ tùɔnʼǒ kɛn.

¹⁴Nynoǒ peaa nɔkǔ bo u nyuu doo nynɛ̌ mooa Ledèa. Ɔ sɛ̀a Nyesoaa wɛ̀ plě ɔ̌ mooa manǐwlù dalee pɛlě po nyu, ɔ sɔnaě mǒ dě fòɛǒ moo Taetawlà kɛn. Koɔn knana ɔɔ wlò je keǒ bɔ poa tèǒ Pɔ̀ɔ̌ boɛaa kàan tè.

¹⁵È tà ɔ klee ɔɔ koǔ bo kwɛɛn poaa ně dlǒ, ɔ dala ämo klě ɔɔ koǔ bo ɔ je, “Bɛ̌ nu bǎ jě ɛ ɛ̈ moo Ě po Koɔnʼɔ tè kàan tè, è ba diě ně koǔ bo a miě ne.” Ɔ neaǒ ä demǒ ä mua lě.

¹⁶Ɛ kɔna tǐ tìi ä miaě tùɔnʼǒ kɔn kɛn ä boɛɛě Nyesoa mɔ̀, ä jěa kèi nyneju ɔ̈ kǔ sùsu nea lěe ja, ɛ nia nɔ bo tè bǐ kɛ̀nʼě nya bo ɔ̌ boɛ li. Dɛǒ nɛ̀ ɔ nia ɔ̌ jɛla ɔɔ chì kpa ämopò wlě fòfoa mɔ̀.

¹⁷Ɔ beaǒ ä klee Pɔ̀ɔ̌ demǒ ɔ̌ pea tùe le, kě ɔ dɛ̌a ɔ je, “Ja Tmɔ Nyesoaa nyebajle nùà, nù tmɛɛ̌ ämo dɛ bä nuu plě ä mǐi wowa dɛ jě!”

¹⁸Dɛǒ nɛ̀ ɔ kpala chnɛ̀ jlǒ wě fòfoa mɔ̀, ɛ kpala ɛ kpa kpa chnɛ̀ jlǒ waě tɛ̀ɛ mɔ̀ feanfeǒ beaě Pɔ̀ɔ̌ mǒ ɔ̌ bitǐa bo ɔ̌ chèa ɔ ja, è kě ɔ dɛ̌a ɔ je, “Kǔ sùsu, klě Jùsu Tentǎn Jǔu nynɛ̌ wlòmo Ě tmɛɛ̌ neè nè sɔnʼě ɔ ja mǒ.” Tǐi doo tǐ jleě è sùsu nɛ̀ǒ tɛa nynejuǒ bo.

¹⁹Tà nynejuǒ ɔɔ chì kpa ämopò jěa lɛɛ ɛ̈ moo uu wlò je kuun dɛ ɛ̈ kɔn mǒ u sɛ̀a pnɔ lěe wlě ɛ mu nuò, u chlìa Pɔ̀ɔ̌ klee Salě le ǔ kpalaě u klě blilǐ tùla mǒ klě pɛlě plooa mǒ.

²⁰U kpalaě u Wlǔmɔ nyoo tè tù nyo jemǒ, kě u dɛ̌a u je, “Nyopòà tàà u moo Jùwɛ nyo plě nù diě ü jɛě jale jejǎea kělɔ äa dǐa.

²¹U tee Jùwɛ nyoo blětà noǎ keǒ bä kme i bo plě bä nu ni, kɛɛ imo noǎǒ i wɛ̀n ämo Wlǔmɔ nyoo teteǎ je!”

²²Nyopò fòfoa bea uu dɛǒ kɛn ǔ jěa Pɔ̀ɔ̌ klee Salě tè le. Ii tè tè tù nyo nua nɛ ǔ keklǎea uu dale wan le plě ǔ sàla u fǎe kɛn.

²³Tà u wɔ̀la uu fǎe kɛn sèsa mɔ̀, è nùǒ u poa wùlo ǔ tmɔɔ̌a wùlo jǐ mɔ̀ tùɔ̌ bɔ tùa u jǐ mɔ̀ tɛɛ tɛɛ.

²⁴Wùlo jǐ mɔ̀ tùɔ̌ nana uu winʼǒ de ɔ̌ poaě u klě wùloo de ɔ̌ pea u kwa kun kpe be le.

²⁵È tà ɛ blɛɛa tòtoo kɛn mǒ wuleea mǒ mɔ̀, Pɔ̀ɔ̌ klee Salě boɛaě Nyesoa mɔ̀ ǔ bleea Nyesoa mɔ̀le klě Ɔɔ nynɛ̌ le popoɛ mǒ, è nyopò tùuǒ nea lěe wùloǒ u pea uu win nɔkǔ jebo.

²⁶Keà nyu kɛpǒo jǐ, è kpě kɛn ne blǒ sèke kpě nì dia lě nì tɛkɛ̌a wùlo koǔǒ le klee ɛɛ kǎngmàa chɛ̀. Klě tǐi doǒ wlòmo è wùlo koǔu chni wùɛ nìǒ knana. È nyopò wùɛǒ nea lěe wùlo uu chěen u pea uu sonwe le nìǒ bloa u sonwe le.

²⁷Tà wùlo jǐ mɔ̀ tùɔ̌ dǔaa jemǒ ɔ jěaa chni wùɛ i knanaa, ɔ jěa lɛ ɛ̈ moo wùlo po nyo wùɛ u plùa le, ii tè ɔ sàlaě ɔɔ pan bɔ mǒ ɔ mǐa ɔɔ chɛ̀ dbǎ.

²⁸Kɛɛ Pɔ̀ɔ̌ pnǎna dɛ jleě ɔ je, “Nè pe dìe dɛ ja, äa wùɛ ä ne kɛn tùɔn!”

²⁹È wùlo nyo jǐ mɔ̀ tùɔ̌ dala nyopò bu jalaě nǎpe ɔ̌ kpalaě wùlo plùplɛ, è ɔɔ fě wùɛ neaǒ ɔɔ fǒ mǒ i nia wlɛwlɛ ɔ̌ kɔaǒ Pɔ̀ɔ̌ klee Salě kwne jemǒ bo.

³⁰È nùǒ ɔ sàlaě koǔǒ bo ɔ̌ kpalaě u pànto mǒ ɔ̌ gbàla u wan ɔ je, “Selǐjlu ale, mɛ bo nuǔ kɛ Ě miǐ wowa dɛ kɔn?”

³¹U tùa lɔ kɛ̀ɛn u je, “Mò klee nè koǔ bo kwɛɛn ba po Koɔn Jùsuu tè kàan tè, aa wùɛ a mǐ wowa dɛ kɔn.”

³²È u boɛa jbɛjuǒ ɔ klee ɔɔ koǔ bo kwɛɛn wùɛ Koɔn Jùsuu tè je.

³³Kàan tè tǐ sìnʼa ne klě tǒn wlòmo, wùlo nyo jǐ mɔ̀ tùɔ̌ǒ ɔ dǔa u mǒ ɔ̌ kpalaě u ně sakaě wien ɔ̌ pnèa noǎ wùɛǒ u tbaea uu le. Tǐi doo tǐ jleě tà dɛǒ ɛ sìnʼaa, è ɔ klee ɔɔ koǔ bo kwɛɛn wùɛ nùǒ u poa ně dlǒ.

³⁴È jǐ mɔ̀ tùɔ̌ dǔa u mǒ ɔ̌ kpalaě u ɔɔ chɛ̀ɛ koǔ bo ɔ̌ nyea u didi dɛ ǔ dia dɛ. Klě chnɛ̀ jlǒ waěǒ wlòmo ɔɔ koǔ bo kwɛɛn wùɛ poa Nyesoaa tè kàan tè, ii tè chǒn jǐa u jele.

³⁵Tà chnɛ̀ tɛ̀ɛ gbàlaa le, è Wlǔmɔ nyoo tè tù nyo dboa kɔsěblìpoo bu mua wùlo nyo jǐ mɔ̀ tùɔ̌ǒ tmɔɔ̌ no bɔ tɛa Pɔ̀ɔ̌ klee Salě bo.

³⁶È jǐ mɔ̀ tùɔ̌ tmɔɔ̌a imo winʼǒ Pɔ̀ɔ̌, kě ɔ dǎla ɔ je, “Wlǔmɔ nyoo tè tù nyo dbo win u je bä tɛ a bo ba mu, ii tè ba mu klě tǐà wlòmo, a kɔn ně bo wnawna.”

³⁷Kɛɛ kě Pɔ̀ɔ̌ dɛ̌a kɔsěblìpoǒ je ɔ je, “Kàan tè ä kɔn nɔ Wlǔmɔ nyo slè, kɛɛ u se äa tè tùu chɛ̀ ǔ bea ämo keǒ klɔ̀ slè ǔ poa ä wùlo. È klě tǐà wlòmo u jlɛ̌ bu tɛ kɛ ä bo klě je wɛ̌ tǔn wlòmo le? Òooǒn, ɛ se bò numa mu! Uu chɛ̀ bu diě u mǐ äa son kwa blě u mǐɔ ä wùlo sà.”

³⁸Kɔsěblìpoǒ ǔ mua de ǔ tmɔɔ̌a tè tù nyoǒ, è tà u wɔ̌na nii ɛ̈ moo u mooa Wlǔmɔ nyoò, ù pea fano u je Pɔ̀ɔ̌ bɔɔ̌ nua nu buǔ maěaǒ uu plɔ tu kɛn bo.

³⁹Ii tè uu chɛ̀ mua ǔ nyea Pɔ̀ɔ̌ klee Salě kɛ̀ɛn ǔ kmea u son jleě ǔ sàlaě u wùlo ǔ tmɔɔ̌a nu bu sɔnaě uu dě fòɛǒ wlòmo.

⁴⁰Tà u sɔnaěe wùlo mǒ, è u muaě klě Ledèaa koǔ bo, klě u jɛɛa lě uu bǐì Tentǎn Jǔu wǎnʼa tìe, è Pɔ̀ɔ̌ klee Salě poa u kbě ja le plě ǔ sɔnaǒ mǒ ǒ mua.