Read Grebo, Northern Ǎkè 20 Bible Online

Ǎkè 20 - Grebo, Northern bible

Ǎkè 20

¹Tà jale jejǎeaǒ ɛ bɔ̌aa dɛ, è Pɔ̀ɔ̌ dala Tentǎn Jǔu mɔ̀ na nyo keǒ tàa do ɔ̌ poa u kbě ja le, è nùǒ ɔ kpala wlu ɔ̌ bea snǔ mɔ̀ ɔ̌ mia Masedonìa wakǎ kɛn.

²Tà ɔ nɛaa wakǎǒ kɛn le, ɔ boɛa noǎ fòfoa keǒ bɔ poa Tentǎn Jǔu wǎn kbě ja le. È nɔ̀ǒ muaě Kwlǐsi wakǎ kɛn

³klě ɔ sìnʼaě sòbaii tan. Tà ɔ wɛ̀aa mɔ̀ keǒ bɔ beaa měe wan bɔ mua lěe Siwlìa wakǎ kɛn, è ɔ wɔ̌na dɛ ɛ̈ moo Jùwɛ nyo pea dɛ kukǔ ble keǒ ɔ jleě mǒ, ii tè ɔ poa ɛ ble bɔ mua de bɔ sìinʼaě Masedonìa wakǎ kɛn.

⁴Ɔɔ nyopò nɛa nɔɔ de nù mooa Sopatɔ̀ ɔ̈ mooa Paewlàa jǔ ɔ̈ kɔna lěe Bowlià diě kɛn, è Awletakɔ̀ klee Sekundù ü kɔna lěe Tɛslonikà diě kɛn, è Kèɔse ɔ̈ kɔna lěe Dabè diě kɛn klee Timɛtě plě klee Tekèkɔ klee Tlofamɔ̀ ü kɔna lěe Esìa wakǎ kɛn,

⁵nù kɛ̀naě ä nya ü muaě dě fòɛǒ moo Tloasì kɛn klě u fooaě ämo.

⁶Tà Ně Jǎ Flɔ̌ɔ ɛɛ de ngmnengmnɛ̌ sìnʼaa, è ämoǒ bea měe wan ü sɔnaě dě fòɛǒ moo Flepà kɛn mǒ. Ä sìnʼa chnɛ̀ jlǒ wěe m̀m snǔ mɔ̀ plě u klee ämoo sɔ̌n ä jejɛɛa kɛn le klě Tloasì klě ä sìnʼaǒ chnɛ̀ jlǒ wěe nyiɛta.

⁷Tà ɛ nuaa Sɛ̌ɛ̀dee wìtie, ä bòa le ä mǐa Koɔnʼɔ wìti didi dɛ di. Ke ɛ toon jleě mǒ bo Pɔ̀ɔ̌ miaa muma bo chnɛ̀ bɛ̌ gbàlaa le, ɔ boɔa nyopòǒ Nyesoaa win je boɔ boɔ tòto wuleea kɛn mǒ.

⁸Nǎpea fòfoa neaě blòǒ kɔn wan ä bòoa lěe klě koǔǒ ja.

⁹Koǔǒ ɛ kɔna dlǒ mǒ ble nenee kpɛɛ tan. È ɛ kɔna nyemò tɔ̀ɔ ɔ̈ kɔn nynɛ̌ mooa Utèkɔ, nɔ̀ nea bo keǒ koǔǒ ɛɛ bòwɔnʼɔ do jleě ɔ̈ pea Pɔ̀ɔ̌ nɔkǔ jebo, kɛɛ tà Pɔ̀ɔ̌ boɔlaa boɔboɔ, è nyemòǒ nɔ̀ǒ tùngmaea je ble kokɔ, ɔ kɔla je ble kokɔ ɔ̌ bea momnɔ mǒ ɔ̌ bloaě koǔǒ ɛɛ kpɛɛ tan nenɛɛ bòwɔn jleě ɔ̌ bea wɔ̀ɔn. Tà u dǔa lɔɔ jemǒ, ɔ̀ kǒa le.

¹⁰Kɛɛ Pɔ̀ɔ̌ tèa lɔ wɔ̀ɔn ɔ̌ sloa ɔɔ chɛ̀ keǒ nyemòǒ kɛn ɔ̌ mǎna nɔ ɔɔ chɛ̀ wulee bo, è kě ɔ dɛ̌a ɔ je, “A bɔ̌ fano pepeɛ ɔ neě jè kmɔ̌!”

¹¹È Pɔ̀ɔ̌ nɔ̀ǒ jǎlaě koǔ dlǒ de ǔ dia Koɔnʼɔ wìti didi dɛǒ. U klee ɔ̀ tmɔ̌a tmɔtmɔ̌ chnɛ̀ gbàla le, è nɔ̀ǒ dǔa jemǒ ɔ̈ mua.

¹²È nyemò nɔ̀ǒ u kpalaě koǔ bo ɔ̈ neaa kmɔ̌, ɛ tùaě uu wùɛǒ wlò wlòmo ble chɔɔ.

¹³Ä kɛ̀naě Pɔ̀ɔ̌ nya ä muaě měe wlòmo, ä muaě dě fòɛǒ moo Asɔsè kɛn klě bä nynia lě plě ä mǐa Pɔ̀ɔ̌ měe wan po. Pɔ̀ɔ̌ɔ chɛ̀ nɔ̀ naea blǒ je, dɛǒ nɛ̀ ɔ poa ble keǒ ä mɔ̀.

¹⁴Tà ɔ jɛɛaě ämoo Asɔsè, è nɔ̀ǒ ä poa měe wan ä muaě dě fòɛǒ moo Metalanì kɛn.

¹⁵Tà chnɛ̀ tɛ̀ɛ gbàlaa le, ä bea měe wan ä sɔnaǒ tàǒ mǒ, è ämoǒ nyniaě dě fòɛǒ moo Chèɔsi ɛɛ wà kɛn. Tà chnɛ̀ tɛ̀ɛ gbàlaa le ä bɛ̌a jbǒ tìe ä muaě Samosì diě kɛn, è chnɛ̀ jlǒ waě tɛ̀ɛǒ neaǒ ɛɛ demǒ ämoǒ nynia Mɛnetɔ̀ dǐa.

¹⁶Pɔ̀ɔ̌ nia jǐ měne ɛ̈ di ɛɛ numa bɛ̌ wɔ̀laě ɛ ɔ mǐa Jlǔsnɛ nyni plě Pɛntèkɔ ɛɛ de ngmnengmnɛ̌ɛ waě mǐaǒ nyni. Ii tè ɔ poa ɛ ble ɛ̈ moo ɔ mia Ɛfèse diě wɔ̀ɔn sìinma ɛɛ̌ dia ɔ tǐ fòfoa le sìɛn klě Esìa wakǎ kɛn.

¹⁷Tà Pɔ̀ɔ̌ wǒaǒo Mɛnetɔ̀, ɔ̀ dboa win klě Tentǎn Jǔu wǎnʼa bòlibo mɔ̀ ü nea lěe Ɛfèse keǒ u klee ɔ bu mɔɔa klě Mɛnetɔ̀.

¹⁸Tà bòliboǒ u nyniaa, kě ɔ dɛ̌a u je ɔ je, “Sɔɔnʼě tǐǒ kɔn jleě Ě nynia lɔɔ Esìa wakǎ kɛn, aa chɛ̀ a ji ně kmɔ̌ no tǐ wùɛà Ě sìnʼɔ amoo slè.

¹⁹Ě tìeǒ ně chɛ̀ chɔɔ Ě nu Koɔnʼɔ konkwa, me tèe leě jǐ wɔ̀ɔn le, Ě jě sònwɛ chɔɔ keǒ dɛ Jùwɛ nyo poo ble keǒǒ jleě mǒ mɔ̀.

²⁰Aa chɛ̀ a ji ɛle Ě se be de le po keǒ boǒ nu dɛ wùɛ ɛ̈ moo aa mǒ sèsɛ, Ě boɔ a Nyesoaa win je plě Ě tee amo klě klɔ̀ slè plě klee klě aa chɛ̀ɛ keǐ bo ble le.

²¹Ě tba Jùwɛ nyo klee kuodakwɛ̌ saěn keǒ bu bitǐ uu wlè bo u mǐ tè wlò popoɛ kɔn klě äa Koɔn Jùsu Tentǎn Jǔ mǒ.

²²Klě tǐà wlòmo ɛ moo Ngmà Je Ne Sùsuu win Ě tùiǒ i bo keǒ bo mu Jlǔsnɛ plě Ě se dɛ mii tùɔn kpaba ji kěàǎ jleě mǒ.

²³Dɛɛ do Ě jii nɛ̀ moo diě wùɛ ä nyniǒo kɛn Ngmà Je Ne Sùsu wɛɛ̌ wlò je ɛ̈ moo, ‘Wùlo popoɛ klee tè mɔ̀ tèteɛ nì neěě nya.’

²⁴Kɛɛ ke ɛ mii jleě mǒ bo tonma, bɛ̌ nu boǒ wɔ̀le je boǒ wɔ̀ ně konkwa mɔ̀ ɛ̈ Koɔn Nyesoa nye mǒo keǒ bo po Ɔɔ kàan tuposàà ɛ̈ kwɛɛǒo Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ jleě mǒ bo keǒ tùonyopo wùɛ mɔ̀, mǒà Ě se ně chɛ̀ɛ fònfno dɛ mǒ jě.

²⁵Ě muě aa wùɛ slè Ě boɔɔ Nyesoaa win kwa konkɔn tè kɛn, kɛɛ Ě jboo kɛ̀ ɛ le tɛɛ ɛ̈ moo nyu wùɛ nɔ̀ see kɛ̀ɛ̌ jěba mu de.

²⁶Tèǒ nì kɔn tè Ě tmɛɛ̌ amo kekɛɛà, bo aa nyu wùɛ bɔ̌ se tè wlò popoɛ kɔn klě Jùsu mǒ, ɛ se ně tè jɛɛa.

²⁷Ě tmɔɔ̌ a Nyesoaa kɛn wɔɔn dɛ wùɛ le, Ě se ii dɛ bo si.

²⁸A tù aa chɛ̀ jǐ mɔ̀ a mǐ aa bǐì Tentǎn Jǔu wǎn jǐ mɔ̀ tù ü Ngmà Ne Je Sùsu poě amoo kwete mǒ ba tùu jǐ mɔ̀. Ba moo jǐ mɔ̀ tù nyo keǒ Tentǎn Jǔu wǎn mɔ̀ ü Nyesoa nu Ɔɔ chɛ̀ɛ nyopò mǒ keǒ Ɔɔ Jǔu kokoɛ̌ kɛn.

²⁹Ě ji ɛle bo sɔnʼà mǒ nyopòà kɔn kpni nymii jǐ le ü wǒo je chìa u miɔ a slè diba, u se aa nyu wɔle je jboba mu.

³⁰Nyopò miě a slè mǒ sɔnma u mǐ a sen wan le tmɔɔ̌ no ɛ̈ di ɛɛ numa u mǐ Jùsuu mɔ̀ na nyo nu u mǐ uu tè wlò popoɛ kɛn tbɛ u mǐ u de na.

³¹Tèǒ nì kɔn tè a gbɛ̀ɛ aa chɛ̀ plě bi beě a wlò jleě Ě fìn aa fìɛn chnɛ̀ jlǒ waě wùɛ mɔ̀ plě Ě tee aa wùɛ klě jlěe tan wlòmo, Ě sea seasea kɔn.

³²Klě tǐà wlòmo Nyesoa Nɔ̀ Ě poě a kwete mǒ klee Ɔɔ winʼà ï kwɛɛǒo Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ jleě mǒ bo keǒ a mɔ̀ ï wɔ̀le je bï nu aa tè wlò popoɛ bɛ kuun plě bï nye amoo noǎ Ɔ peeě Ɔɔ nyopò.

³³Ě sěɛlǎ nyu wùɛ chea mɔ̀ ni keǒ ɔɔ wlě klee dalee tè mɔ̀.

³⁴Aa chɛ̀ a ji ɛle ɛ̈ moo ně chɛ̀ Ě dǔa konkwa nunuɛ mǒ, Ě sɛ̀a noǎ tàmo ï mǒ klee ně nyopò ä sòɛaa.

³⁵Dɛ wùɛ Ě mii numa Ě tee ɛ ale ɛ̈ moo bä poě kbě bä nu konkwa plě bä sɛ̀ɛ sònwɛ nyo měne, è plě bi beě a wlòmo, dɛà nɛ̀ Tentǎn Jǔ Jùsuu chɛ̀ boɔ ɛ̈ moo ɛ moo ngmna fòɛ keǒ nyu bɔ sà dɛ kwete mǒ bɔ nye ɛ nyu ɛ̌ sìnʼǒ nyopò bu nye ɔ noǎ mǒ.”

³⁶Tà Pɔ̀ɔ̌ wɔ̀laa tèǒ boɔboɔ mɔ̀, è nɔ̀ǒ kɔa kwne bo u klee ɔ̀ uu wùɛ ǔ boɛaě Nyesoa mɔ̀.

³⁷Tà u kea lɔɔ klìi li u nyoěa ɔɔ wun, ùu wùɛǒ nùǒ fìnʼa, è nɔ̀ǒ u kpala wlu.

³⁸Tè sɛjesɛ i poa uu wɔle měne nì moo ɔ tmɔɔ̌a nu ɛ̈ moo uu nyu seaa kɛ̀ ɔ jěba mu de. È nɔ̀ǒ u kpala snǔ mǒ klě měe wlòmo.