Read Grebo, Northern Ǎkè 24 Bible Online

Ǎkè 24 - Grebo, Northern bible

Ǎkè 24

¹Tà chnɛ̀ jlǒ wěe m̀m sìnʼaa, è Nyesoaa bodiɔ ɔ̈ moo Ananaeǎ nɔ̀ǒ tèea je ɔ̈ muaě dě fòɛǒ moo Sesawlià wlòmo ɔ klee Jùwɛ nyoo bòliboo tìe klee teteǎ jiɔ tɔ̀ɔ u dɛɛ Tɛtulɔ̀ ǔ poaǒ noǎǒ kɔn tè u wǒaa Pɔ̀ɔ̌ le keǒ kòngmna nyefòɛ jemǒ bo.

²Tà u dalaa Pɔ̀ɔ̌ ɔ palaa, è Tɛtulɔ̀ tùngmaea ɔɔ blilǐi win kwlǎ mǒ sèsa klě Felesè mɔ̀, kě ɔ dɛ̌a ɔ je, “Nè tɔ̀n kɔn win kwa konkɔnʼà ä neɔɔ bobo ä kwɛnʼě ɛ ně bo wnawna mǒ klě plɔɔ blo tǔn wlòmo kělɔ blǒɔ wlòmo klě tǐ pɛ̀ti wlòmo plě klee blǒo je knakna fòɛ ɛ̈ neɔɔ äa blǒɔ wlòmo.

³Nyefòɛ Felesè, ä klìi imo noǎ taeǒ lo tǐ wùɛ mɔ̀ klě wakě wùɛ kɛn le plě ä peè tàto chɔɔ.

⁴Ě se jlǎ bo di nè tǐ fòfoa, ii tè Ě bɛ̀teè le po äa winʼà nɔkǔ jebo doɛɛ gbe.

⁵Ä jě ɔmo jbɛjuà ɔ̌ pe noǎ kukwǐ blǒ měne. Ɔ tù jale jejǎea wlò klě Jùwɛ nyo slè kělɔ kmɔ̌ wùɛ mɔ̀ plě nɔ̀ moo je siɔ keǒ Nǎsòwɛ̌ɛ wǎn mɔ̀.

⁶Ɔ tɛ̀n ɛ mǒ keǒ bɔ wlǎ äa Nyesoaa kǎ fòɛɛ chɛ̀à ɛɛ tetě, ii tè ä kme ɔ. Ä jlɛ̌ bä tùu ɔ blilǐ mɔ̀ wòje ke äa teteǎ nu ɛɛ ble popoɛ,

⁷kɛɛ tabɔ̀ɔ jǐgbàdiɔ ɔ̈ moo Lasiasè nɔ̀ diě ɔ̈ kpae ä kbě ɔ̈ sà lɔ ä kwa.

⁸È ɔ tmɔɔ̌ ämo keǒ bä diɔɔ̀ mɔ̀. Bɛ̌ nu bò chlǎ ɔmo jbɛjuà, mì ɛ jiba ɛ̈ moo tèà ä boɛɛ ï kwɛɛǒo noǎ wùɛà ä po ɔɔ dlǒ le ii tè jleě mǒ bo i moo kàan tè.”

⁹Jùwɛ nyo tbalaě Tɛtulɔ̀ bo demǒ bo ǔ pooa noǎ wùɛǒ ɔ boɔlaa kòo kɛn.

¹⁰Tà kòngmna nyefòɛ poaa Pɔ̀ɔ̌ son je bɔ boɔlaa, è kě Pɔ̀ɔ̌ dɛ̌a ɔ je ɔ je, “Ě ji ɛle dùa blǒà ɛɛ blilǐ tùtuɛ mǒ seela klě jlě fòfoa wlòmo, ii tè ně plɔ blo lo keǒ bo diàà jemǒ di keǒ boǒ sèsae ně chɛ̀ɛ tè kɛn le.

¹¹Tǐǒ jleě Ě muaa Jlǔsnɛ Ě mǐaa Nyesoaa wɛ̀ sà, ɛ sěɛ chnɛ̀ jlǒ wěe pù tùo sɔ̌nʼɔ chɛ̀ kpɛ, è ɛ se mǒ kma keǒ bò jě sàsepo kělɔ nyopòà slè keǒ ɛmo dɛǒ jleě mǒ.

¹²Tèǒ u boɔɔ i se kàan tè ɛ̈ moo mǒà mǒ u jě ɔ̈ klee nyopò chɛtlǐi li klě Nyesoaa kǎ fòɛ bo klee ɔ̈ tùngmaea nyopò nunuɛ ǔ jejɛ̌ɛě ja le klě ämo Jùwɛ nyoo Nyesoa koǔ wùɛ bo klee klě diěe wakǎ wùɛ mɔ̀

¹³plě noǎ wùɛà kɔn tè u wǒ mǒo le u slě wɔ̀ bu po ii dɛ pepě mǒ keǒò jemǒ.

¹⁴Ě wɛɛn i je kěàà jemǒ ɛ̈ moo Ě niiě äa gbeǐpòo Nyesoa bobo konkwa, Ě moo wǎnʼǒ u dɛɛ Koɔn Jùsuu Snǔ Ɛɛ nyuu do Ɛ̈ u je Ɛ̈ monoo jǐlenymi dɛ, kɛɛ Ě po noǎ wùɛ ï neěe Nyesoaa teteǎ wlòmo klee noǎ wùɛ Nyesoaa wnɔsàɔpo chlěaa seela tǐ jleě ii tè kàan tè.

¹⁵Plě Ě kɔn wlò je kunkuɛn ɛ̈ moo nyu wùɛ, jà kàan nyu klee dɛ kukǔ nyu, u miǎ jemǒ dǔba klě kǒla mǒ. Noǎa doǒ nì kɔn tè u po kàan tè ke.

¹⁶Ii tè tǐi pɛpɛ mɔ̀ Ě tɛ̀n ɛ mǒ keǒ bo nu ně tè le jbojbɛ bɛ snǎě mɔ̀le keǒ Nyesoa klee tùonyopo jemǒ.

¹⁷Ě sɔnaě Jlǔsnɛ mǒ seela ɛ̌ kpa mòngmɛ jlě, è tè kpaě mǒo nɛ̀ moo Ě kpaě wlejoɛ̌ɛ keǒ sònwɛ nyo mɔ̀ klě ně chɛ̀ɛ nyopò mɔ̀ plě klee Ě mǐ chɔ̀no pie keǒ Nyesoa mɔ̀.

¹⁸Dɛǒ nɛ̀ Ě nia ǔ jěa mǒ klě Nyesoaa kǎ fòɛǒ bo. Tà Ě wɔ̀ɔ̌la bòo mɔ̀le snasnǎa de ngmnengmnɛ̌ǒ mɔ̀, nyopò fòfoa seaǒ ne plě slɛ̀ wùɛ nɛ̀ sea bo be.

¹⁹Ɛ kɔna Jùwɛ nyoo tìe ü sɔnaa Esìa wakǎ kɛn mǒ ü neaa tùɔn kɛn. Bɛ̌ nu bǔ kɔn ii dɛ keǒǒ jleě mǒ, uu chɛ̀ǒ u kɔn bu diàà jemǒ u mǐì tmɔɔ̌ no noǎǒ kɔn tè u wǒ mǒo le.

²⁰Ɔ̀ɔ̌ nɛ jbɛjluà nee tùɔn kɛn bu tmɔɔ̌ mò, tà Ě neaǒo Jùwɛ nyoo tè tù nyo jemǒ, tè wùɛ seaǎ kme.

²¹U se dɛ wùɛ kɔn keǒǒ jleě mǒ, ɛ̀ sìnʼǒ bɛ̌ tù tà Ě nynanaǒ uu jemǒ bo Ě pnɛ̌aa dɛ jleě le ɛ̈ moo, ‘Tè kɔn tè u tùi mǒo blilǐ mɔ̀ nɛ̀ moo Ě po i mǒ kàan tè ɛ̈ moo Nyesoa miǎ kokǒ nyo je měne dǔba.’ ”

²²Felesè jia Tentǎn Jǔu wǎnʼǒ uu tè měne chɔɔ, ii tè ɔ bǎla blilǐǒ bo, è kě ɔ dǎla ɔ je, “Bɛ̌ nu tabɔ̀ɔ jǐgbàdiɔ Lasiasè bɔ̌ diě, Ě mi aa blilǐǒ je bɛ̌ba.”

²³È ɔ nyea kɔsěblìpoi snǒ bɔ tùa Pɔ̀ɔ̌ jǐ mɔ̀, kɛɛ bɔ nua nɔ bɔ nana le plě bɔ̌ kea dɛ sòɛ bɔ sɔnaǒ ɔɔ mɔ̀niapo mɔ̀ mǒ bu kɔnaě ɔɔ tè mɔ̀.

²⁴Tà mòngmɛ chnɛ̀ jlǒ wě fòfoa sìnʼaa, Felesè klee ɔɔ Jùwɛ nynɔ Dluselà dia lě ǔ dboa Pɔ̀ɔ̌ mɔ̀ ǔ poa ɔɔ win nɔkǔ jebo ɔ̌ boɛa ke nyu bɔ nuu tè wlò popoɛ konkɔn klě Tentǎn Jǔ Jùsu mǒ.

²⁵Kɛɛ tà Pɔ̀ɔ̌ tùngmaeaa jebo siǐan klee ke nyu bɔ nu ɔɔ chɛ̀ win kwa konkɔn plě klee Nyesoaa blilǐ tù chnɛ̀ jlǒ waěe tè kɛn boɔɔa, è Felesè bea mǒ fano, kě ɔ dɛ̌a ɔ je ɔ je, “Noǎǒ bòɔɔ i nu seɔɔn klě tǐà wlòmo! Mu, bɛ̌ nu boǒ wɛ̀ mɔ̀ de, Ě miì daba.”

²⁶Klě ɛmo tǐi doǒ wlòmo ɔ pɛ̀na ɛ le bo Pɔ̀ɔ̌ bɔ kaenʼa ɔ wlejoɛ̌ɛ jǐ ɔ mǐa ɔ bo tɛ, ii tè bɔ̌ neǒ bo ne, ɔ̀ da Pɔ̀ɔ̌ ɔ klee ɔɔ sɔ̌n tmɛ̌.

²⁷Tà jlěe sɔ̌n sìnʼaa, è Pɔsiɔ̀ Fɛtɔ̀ nɔ̀ beaǒ Felesè pènmo ɔ̈ mooa kòngmna nyefòɛ jajlo. Klě tǐǒ wlòmo Pɔ̀ɔ̌ mooa bo tɛ nyu ke teteǎ nua ɛ ble popoɛ, kɛɛ Felesè jlɛ̌a bɔ blooa Jùwɛ nyoo plɔ, ii tè ɔ siaě ɔ wùlo.