Read Grebo, Northern Ǎkè 4 Bible Online

Ǎkè 4 - Grebo, Northern bible

Ǎkè 4

¹Tà Pitɛ̌ klee Jɔ̀ɔ̌n kea lěe nyopòǒ mɔ̀ boɛ, è Nyesoaa kpatòapoo fòe klee Nyesoaa kǎ fòɛɛ tabɔ̀ɔ jǐ mɔ̀ tù nyoo jǐgbàdiɔ klee Jùwɛ nyo tùu u dɛɛ Sadesǐi wǎn nù diaě u mɔ̀.

²U beea Pitɛ̌ klee Jɔ̀ɔ̌n jlo měne keǒ tà u teeaa nyopòǒ plě klee tà u boɛa uu Nyesoaa win je ɛ̈ moo, “Aa nyu bɔ̌ kɔn tè wlò popoɛ klě Jùsu mǒ, è keǒ Nyesoa nuaa Ɔ̌ dǔa Ɔɔ jemǒ Ɔ̌ sɔna lěe kǒla mǒ kě Ɔ miǎ nyuǒ numa ke.”

³Tèǒ nì kɔn tè u kmea nu, tà tǐ sìnʼaa, nɛ̀ kɔn tè u poa u wùlo klě u sìnʼaě tǒn jlǒ waěǒ chnɛ̀ tɛ̀ɛ gbàea u kɛn le.

⁴Kɛɛ nyopò fòfoaǒ wɔ̌naa winʼǒ u boɔlaa, u poa ii tè kàan tè. Ii tè uu wùɛǒ ü poaa Jùsuu tè kàan tè u blɛɛa mɔ̀ taslěwɛɛ m̀m.

⁵Tà chnɛ̀ tɛ̀ɛ gbàlaa le, Jùwɛ nyoo je si nyo klee bòlibo klee teteǎ tee nyo bòa le klě dě fòɛǒ moo Jlǔsnɛ wlòmo.

⁶È nyopò wùɛ ü neaa tùɔn kɛn nùà, Anǎse ɔ̈ mooa Nyesoaa bodiɔ klee Keafɛ̀ plě Jɔ̀ɔ̌n tɔ̀ɔ klee Ɛlesandɔ̌ plě klee jbɛjlu tùu ü kɔna lěe bodiɔɔ tùgba slè.

⁷È Pitɛ̌ klee Jɔ̀ɔ̌n nùǒ u jalaǒ u jemǒ ǔ chlɛ̌a lu u je, “À kpě tae klee nynɛ̌ tae kɔn wlòmo a nuuěe dɛà?”

⁸È Ngmà Je Ne Sùsu jia Pitɛ̌ je, kě ɔ dɛ̌a u je ɔ je, “Blǒo je si nyo klee blǒo bòlibo,

⁹bɛ̌ nu bǎ ke ä chlachlǎ be wan le gbɛ̀ kekɛɛà keǒ tà ä sɛ̀ɛ lee bo klɔ̀ɔ jbɛjuà mǒ klee ke ɔɔ dɛ nuu dɛ bobɔ̌,

¹⁰è aa wùɛà klee Ǐsòwɛ̌ kwɛɛn wùɛ a kɔn ɛ jijiɛ ɛ̈ moo jbɛjuà ɔ̈ nynanàa tàa bo ɛ mooě Jùsuu nynɛ̌ wlòmo Ɔ̈ kɔn lěe Nǎsòwɛ̌ dǐa Ɔ̈ a kɔaǒo pète bɛ̌ tu jleě, kɛɛ Ɔ̈ Nyesoa dǔaa jemǒ Ɔ sàla lěe kǒla mǒ

¹¹wòje ke Nyesoaa win dɛ̌ɛ keǒ Jùsu jleě mǒ ɛ̈ moo, ‘Ɔ wǒ je sakpae tiblě ɛ̈ amo keǐ po nyo a sàlaa jleě mɔ̀, kɛɛ klě demǒ bɔɔ̌ tǐ wlòmo Nɔ̀ moo Tiblě Ɛ̈ kɔn tè kmaa chɔɔ dɔ̌.’ (Ps 118.22)

¹²Nyu wùɛ slě wɔ̀ bɔ nye nyu tɔ̀ɔ wowa dɛ, ɛ̀ sìnʼǒ Jùsuu do. Mɛ̌oǒ joo nɛ̀ moo ɛ se nynɛ̌ wùɛ kɔn kělɔ kmɔ̌ɔ mɔ̀ ɛ̈ Nyesoa nyee tùonyugbe bɛ̈ wa ämoo klě äa kpni kukwǐi plɔɔ tu kɛn bo maěa slè.”

¹³Tà u jěaa Pitɛ̌ klee Jɔ̀ɔ̌nʼɔ kponkpɛ u kɔnaa, ì kaenʼa u le wlò, sɛjesɛ tà u wɔ̌na nii ɛ̈ moo u sea chněedɛ̌ ji plě nyu sea u tee le, è u jboa ɛle ɛ̈ moo u klee Jùsu nɛa pnɔ.

¹⁴Kɛɛ tà u jěaa jbɛjuǒ ɔ nynanaǒo Pitɛ̌ klee Jɔ̀ɔ̌n gbàa bo ɔɔ kwɛ̌ bɔ̌aa dɛ, u seaa kɛ̀ dɛ kɔn u mǐaa boɔ.

¹⁵Ii tè tè tù nyo tmɔɔ̌a uu sɔ̌nʼǒ bu pěaǒ plomǒ. Tà u pěaa, è dɛǒ u je tàii sɔ̌nʼǒ u nuaa nɛ̀ǒ u pepeaě měne,

¹⁶kě u dɛ̌a u je, “Mɛ a jlɛ̌ bä nuǔ kɛ jbɛjluà mǒ? Nyopò wùɛà neɔɔ Jlǔsnɛ u ji ɛle ɛ̈ moo u nu wlòlekaen dɛ plě ä slě wɔ̀ bä chnɛ̀ ɛɛ tè mǒ!

¹⁷Kɛɛ dɛ bä nuu imo tèà iǐ dii le gbɛ̀tɛɛ le nɛ̀ moo bä pooě u fano měne uǔ di nyu wùɛ Jùsuu tè je boɔ de.”

¹⁸Ii tè ǔ dala Pitɛ̌ klee Jɔ̀ɔ̌n de klě blilǐ tùla mǒ ǔ pooaě u fano měne u je buǔ boɛa wien plě buǔ teea dɛ wùɛ ɛ̈ kwɛɛǒo Jùsuu nynɛ̌ jleě mǒ bo.

¹⁹Kɛɛ Pitɛ̌ klee Jɔ̀ɔ̌n tùa u kɛ̀ɛn u je, “Aa chɛ̀ a chechlǎ lɛ bɛ̌ nu bɛ̌ wɛɛnʼǒ le keǒ Nyesoa jemǒ keǒ bä po aa win nɔkǔ jebo, ɛ̀ sìnʼǒ bä po Nyesoaa win nɔkǔ jebo.

²⁰Ä se nyopò tùu tmɔɔ̌a bɔ̌ba mu keǒ noǎà ä jěaa plě noǎà ä wɔ̌naa ii tè mɔ̀.”

²¹Tà u wɔ̀laě uu fano měne pooa mɔ̀, è nùǒ u tɛa bo. Uǔ jěa dɛ wùɛ bu nuaa u mǐaě uu plɔ tu kɛn bo maěa ne. Mɛ kɔɔ̌n tèǒ joo nɛ̀ moo nyopò wùɛ pea Nyesoaa nynɛ̌ le keǒ dɛǒ kpalaa tùɔn mɔ̀.

²²Jbɛjuǒ ɔ̈ u peanaa klě wlòlekaen tǔnʼǒ mǒ ɔɔ jlě sìnʼa kɛn wlèe sɔ̌n, ii tè tè tù nyoǒ u seaě wɔ̀ bu chnɛ̀a i mǒ ɛ̈ moo Jùsuu kpěǒ peana ɔ.

²³Tà u tɛaa Pitɛ̌ klee Jɔ̀ɔ̌n bo, è nùǒ muaě uu bǐì mɔ̀ ǔ tmɔɔ̌a u dɛ Nyesoaa kpatòapoo fòe klee bòlibo boɔa uu je.

²⁴Tà uu bǐìǒ u wɔ̌naa tèǒ, è uu wùɛ nùǒ bɛ̀tea Nyesoa keǒ tàa do u je, “Chì Kpa Ämo, Mòà Mò nu jɔkɛn klee blǒ klee jbǒ plě klee noǎ wùɛ ï neɔ ii mɔ̀.

²⁵Mò boɔɔaě Nè nyebajlo Dèběse mǒ ɔ̈ moo äa gbeǐpòo nyuu do klě Ngmà Je Ne Sùsu mǒ ɛ̈ moo, ‘Mɛ kɔɔ̌n tè dakwɛ̌à u jɛɛ̌ lěeě kɛě uu chɛ̀ le? È mɛ kɔɔ̌n kɛ tè uu ble po noǎ seě kɛ kàan dɛ mǒ ne?

²⁶Kmɔ̌ɔ klɔ̀bapoo miǎ de wɛ̀ba plě kmɔ̌ɔ je si nyo miǎǒ tàa do beba, u miǎ Koɔn Nyesoa klee Ɔɔ Tentǎn Jǔ je wɔ̀n.’ ” (Ps 2.1-2)

²⁷U kpɛɛa uu win nya u je, “Dɛɛ teěn nɛ̀à kpa tùɔn, klɔ̀ba Hɛwlǒ klee klɔ̀ba Pɔntìɔ Pàlɛ̌te beǒ tàa do kělɔ dě fòɛà wlòmo u klee kuodakwɛ̌ klee Ǐsòwɛ̌ kwɛɛn ǔ po dɛ kukǔ ble keǒ Nè Ngmà Je Ne Nyebajloà dbòo jleě mǒ Ɔ̈ moo Jùsu.

²⁸Dɛ wùɛ nɛ̀ u nua Ɔ mǒ wòje ke Nè kpě klee kɛn wɔɔn dɛ nua lɛɛ ble popoɛ bɛ nuaa tùɔn kpokpa.

²⁹Klě tǐà wlòmo Koɔn jě ke u niě ämoo fano měne pooa, nye ä kpě ä miě ɛ wɔ̀ plě ä mǐ kponkpɛ kɔn keǒ bä po Nè tuposàà.

³⁰Nye ä Nè kpě ɛ̈ di ɛɛ numa ä mǐ nyopò pean klee ä mǐ wlòlekaen noǎ klee wan bo kàe noǎa nu klě Nè ngmà je ne Nyebajlo Jùsuu nynɛ̌ wlòmo.”

³¹Tà u wɔ̀laa bàtea mɔ̀, è tùɔnʼǒ ɛ tutuǒa bo, uu wùɛ Ngmà Je Ne Sùsu jǐa u je Ɛ̈ nua nɛɛ ǔ kɔnaa kponkpɛ ǔ boɛaa Nyesoaa win.

³²Tentǎn Jǔ Jùsuu kàan tè po nyo wùɛ uu wlè klee dlǒ le sìɛnsiɛn nua dɛɛ do. Nyuu do ɔɔ̌ klɛ̀a ɔɔ chɛ̀ɛ konkɔn noǎ je, kɛɛ uu wùɛ u sèsɛɛa konkɔn noǎǒ kwete měne.

³³Nyesoaa tuposà kpa nyo kpɛa Ɔɔ sàse winʼǒ dlǒ mɔ̀ klě kpě wlòmo ǔ boɛa Koɔn Jùsuu jemǒ dǔ tè keǒ Bɔ sɔnaě kǒla mǒ. Nyesoa pea uu wùɛ ngmna fòfoa mɔ̀.

³⁴È dɛ wùɛ uu nyu sòɛlaa ɔ kɔna ɛ le. Mɛ kɔɔ̌n tèǒ joo nɛ̀ moo nyopòǒ kɔnaa blǒ klee keǐ bǔ plo li ii wlejoɛ̌ɛǒ i jěe

³⁵nɛ̀ u kpɛaě tuposà kpa nyoǒ mɔ̀. È u pleea ɛ nyopò měne wòje dɛǒ nyu wùɛ sòɛaa.

³⁶Ɛɛ bò měne po nyu nɔ̀ mooa Jòsɛ̌fo ɔ̈ kɔna lěe dakɔ̌ǒ moo Lifàe nyo slè ɔ̈ sɔna lěe dě fòɛǒ moo Saeplɔ̀ kɛn mǒ. Tuposà kpa nyo dɛɛa ɔ Banàbɔ ɛ̈ sɛ̀nʼɛ nynɛ̌ Jbɛju Ɔ̈ Pee Nyopò Tùu Kbě Ja Le.

³⁷Ɔmo Jòsɛ̌foǒ nɔ̀ ploa ɔɔ blǒ tìe, ɛɛ wlě wùɛǒ ɔ̌ nyea i tuposà kpa nyoǒ.