Read Grebo, Northern Ǎkè 5 Bible Online

Ǎkè 5 - Grebo, Northern bible

Ǎkè 5

¹Kɛɛ jbɛjuǒ u dɛaa Ɛnenaeǎ klee ɔɔ nynɔ Sofaeǎ nù ploa uu blǒ tìe,

²è wlěǒ ɛ jěaa ɔ kpala ii tìe klě Nyesoaa tuposà kpa nyo mɔ̀, è wlěe tìeǒ siaǒo nì ɔ tùa bo. Ɔɔ nynɔ jia dɛǒ ɔ nuaa ɛɛ tè měne. Tà ɔ nyeaa wlěǒ Nyesoaa tuposà kpa nyoǒ,

³è kě Pitɛ̌ dɛ̌a ɔ je ɔ je, “Ɛnenaeǎ, mɛ kɔɔ̌n tè sɔ̀ɔ̌n kɛǒ Setɛ̀n ɔ̈ moo kǔ sìsii klɔ̀ba mɔ̀ mǒ ɔ boo loǒ mò, è tmɛɛ̌ něeě Ngmà Je Ne Sùsu sen jele, è tùǔ wlěǒ ii tìe bo ï nè blǒ jěe plě jè nyèe Nyesoa?

⁴Tà kɔna ɛmoo blǒ tìeǒ ɛ mooa nè konkɔn dɛ keǒ bò tùa ɛ bo, plě tà ploa lɛɛ, ɛɛ wlěǒ mò i beaě kwete mǒ, deě ɛ se ke ɛ nuu? Mɛ kɔɔ̌n tè sìɛn neě kɛ dɛ taeǒ dlǒ mɔ̀le? Ɛ se ämo tùonyopo sè sen jele tmɔɔ̌ no, kɛɛ Nyesoaǒ tmɔ̀ɔ̌ sen jele!”

⁵Tà Ɛnenaeǎ wɔ̌naa winʼǒ, è nɔ̀ǒ bea wɔ̀ɔn ɔ̈ kǒa. Nyopǒ wùɛǒ wɔ̌naa tèǒ fano jaěa uu fě dlǐ.

⁶È nyengmèe tìe dǔa Ɛnenaeǎ mǒ ǔ finfiɛ̌ɛa ɔ dalo ǔ sàlaě ɔ dě fòɛǒ wlòmo ǔ mua ɔ bo tùba.

⁷Tà tǐ tìi sìnʼaa ɛ̈ blɛɛa àwɛɛ tan mɔ̀, è ɔɔ nynɔ nɔ̀ǒ dia lě ɔ̈ pala koǔ bo, ɔ sea dɛǒ kpalaa tùɔn ji.

⁸È Pitɛ̌ dǔa wlěǒ jemǒ ɔ̌ gbàla ɔ wan ɔ je, “Tmɔɔ̌ mǒ, wlě wùɛ aa blǒ tìeà a plo kɛɛ i jěe nìà le?” Ɔ je, “Uuǔn, ii wùɛ nìǒ.”

⁹È kě Pitɛ̌ dɛ̌a ɔ je ɔ je, “Mɛ kɔɔ̌n tè aa sɔ̌n wùɛ a chlàǎ kɛ li keǒ ba tɛ̀n lěe Koɔn Nyesoaa Sùsu měne? Tanàle, jbɛjluà ü tù nèe jbe bo nùǒ neě wànwie, è u miì kpaba ke.”

¹⁰Tǐi doo tǐ jleě è nɔ̀ǒ bea wɔ̀ɔn keǒ Pitɛ̌ jemǒ ɔ̈ kǒa. Tà nyengmèǒ u palaa koǔ bo u jěa lɔɔ ɔ kǒaa, u dǔa ɔ mǒ ǔ kpala ɔ bo tùba keǒ ɔɔ jbe gbàa.

¹¹Kàan tè po nyo wùɛ klee nyopò wùɛǒ wɔ̌na imoo tèǒ fano jaěa uu fě dlǐ.

¹²Nyesoaa tuposà kpa nyoǒ u nia wlòlekaen noǎ fòfoa klee wan bo kàe noǎa klě nyopòǒ slè. È Tentǎn Jǔu wǎn wùɛ u wɛ̀a pnɔ de klě Nyesoaa kǎ fòɛ bo ɛ̈ u dɛɛ Sanemɔ̌ɔ Wànwie.

¹³Nyu wùɛ nɔ̀ sea ɛ kponkpɛ blě keǒ bɔ̈ konwaěa u le, kɛɛ nyu wùɛ nyeaǒ u tùtuɛ fòɛ.

¹⁴Klě tǐǒ wlòmo jbɛjlu klee nyno ü poaa Koɔn Jùsuu tè kàan tè u bebeea kɛn le.

¹⁵Nyesoaa tuposà kpa nyo nia wlòlekaen noǎ fòfoa, nɛ̀ kɔn tè nyopò kpɛaě kmakma nyo sniǎ fòe mɔ̀ ü u bleěaǒ chèan klee kɛn bo pɛn gbàgbɛ kɛn ɛ̈ di ɛɛ numa Pitɛ̌ bɔ̌ keaǒ tàǒ sìin ni, ɔ mǐa u le tǒ ɔ̀ɔ̌ ɔɔ sùsu miǎ u kɛn taen ne sosǒ, uu kweǎ miǎ dɛ bɔ̌.

¹⁶Diblɛ̌ fòfoa sonwɛa deěǒ tbɛɛaa Jlǔsnɛ dǐ kɛn měne ke ǔ jɛaě kmakma nyo klee nyopòà kǔ sìsi tùiaa sònwɛ klě Nyesoaa tuposà kpa nyo mɔ̀, uu pɛpɛ wùɛǒ ǔ jěa peanpean.

¹⁷Nyesoaa bodiɔ klee ɔɔ nenawa ü mooa Sadesǐi wǎn nù nia chea keǒ Nyesoaa tuposà kpa nyoǒ mɔ̀, ii tè u mua

¹⁸ǔ kmea nu ǔ kpalaě u klě tàa klɔ̀ peeěe nyopò wùlo ǔ poa u wùlo.

¹⁹Kɛɛ klě tǒn jlǒ waěǒ wlòmo, Koɔnʼɔ najiǒpòi dia lě ɔ̌ sàlaǒ wùloo pně chnuǒ ɔ̌ jala lɔ u plomǒ ɔ̌ tmɔɔ̌a nu

²⁰ɔ je, “A muě Nyesoaa kǎ fòɛ bo a miǐ jè nyopò kmɔ̌ sie fònfnoo tè tmɔɔ̌ no.”

²¹Ii tè tà chnɛ̀ tɛ̀ɛ gbàlaa le ɛɛ kènta gbìi, u tùaǒ ɔɔ win bo ǔ muaě klě Nyesoaa kǎ fòɛ bo ǔ teea nyopò. Klě tǐi doǒ wlòmo Nyesoaa bodiɔ klee ɔɔ nenawa dala Ǐsòwɛ̌ kwɛɛnʼɛ bòlibo wùɛ klee Jùwɛ nyoo tè tù nyo snǎ mǒ. È u dboa jbɛjlu klě wùlo pola mǒ ǔ blala Nyesoaa tuposà kpa nyoǒ.

²²Kɛɛ tà u mua lěe, ù sea u jě. Ii tè u tbaea je ǔ muaě blilǐ tùla mǒ ǔ sèsaea u wlòmo

²³u je, “Ä muě wùloǒ lo, ɛɛ chnu pooǒ lo ǔ po ɛ ti kɛn le kpankpa plě ɛɛ jǐ mɔ̀ tù nyo nynaǒ ɛɛ wànwie bo. Kɛɛ tà ä sàǒo chnu ä slě nyuu doo chɛ̀ jě.”

²⁴Tà Nyesoaa kǎ fòɛɛ jǐ mɔ̀ tù tabɔ̀ǒ uu jǐgbàdiɔ klee Nyesoaa kpatòapoo fòe wùɛ wɔ̌naa dɛǒ, ɛ̀ kɛɛnʼa u le wlò dɛ tae bɛ̈ diaa tùɔn kpa keǒ u jleě mǒ.

²⁵È nyu tɔ̀ɔ nɔ̀ dia lě ɔ̈ tmɔɔ̌a nu ɔ je, “A jè nyopòà a poaa wùlo nùǒ neě Nyesoaa kǎ fòɛ bo ü tee nyopò klě tǐà wlòmo!”

²⁶Tǐi doo tǐi jleě jǐgbàdiɔ klee ɔɔ tabɔ̀ mua ǔ blala u, u sea u kpě mǒ nu. Mɛ̌oǒ joo nɛ̀ moo u pea fano u je bo nyopò buǔ dbaěa u seɛ̌ jleě.

²⁷Tà u jalaǒ uu tè tù nyo jemǒ, è kě Nyesoaa bodiɔ nia u wan le gbògba

²⁸ɔ je, “Ä sea kɛ a saěn tba ɛ̈ moo baǎ teea kɛ̀ nyopò Jùsuu tè le? Kɛɛ Jlǔsnɛ wùɛà nɛ̀ a wɔ̀ɔ Ɔɔ tè dlǒ. A ni ɛ ämoà ä mǐ tè jɛɛa kɔn keǒ Ɔɔ kokoɛ̌ mɔ̀!”

²⁹Pitɛ̌ klee Nyesoaa tuposà kpa nyo tùuǒ u tùa u kɛ̀ɛn u je, “Dɛ kɔn tè kmaa chɔɔ nɛ̀ moo keǒ bä tùǒ Nyesoa, ɛ̀ sìnʼǒ bä tùǒ tùonyugbe.

³⁰A kɔlaǒ Jùsu pète bɛ̌ tu jleě ǎ dbǎla Ɔ, kɛɛ äa gbeǐpòo Nyesoa dǔa Ɔ jemǒ de Ɔ̌ sàlaě Ɔ kǒla mǒ

³¹Ɔ̌ kpalaě Ɔ Jɔkɛn Ɔ̌ tùaě Ɔ Ɔ̀ɔ chɛ̀ɛ dilǎ son mɔ̀ bo ɛ̈ monoo tùɔn fòɛ ɛ̈ kɔnʼǒo tùtuɛ, Ɔ mǐ Chì Kpa Ämo klee Gblàgbla Nyu tù keǒ Ǐsòwɛ̌ kwɛɛn mɔ̀ ɛ̈ di ɛɛ numa u mǐ uu wlè bo bitǐ, Ɔ mǐ uu tè wlò le poo lo.

³²Ä klee Ngmà Je Ne Sùsuà Nyesoa nyee nyopòà ü tùiǒ Ɔɔ bo ämoà tmɛɛ̌ nyopò tùu noǎà ii tè.”

³³Tà Jùwɛ nyoo je si nyoǒ u wɔ̌naa tèǒ, è nùǒ bea jlo měne chɔɔ ǔ poa ɛ ble bu dbǎla u,

³⁴kɛɛ Fɛlesǐi wǎnpòi u dɛɛa Kamilìa ɔ̈ mooa tè tù nyoo nyuu do nɔ̀ nynana bo ɔ̈ tmɔɔ̌a nyopò bu piěaǒ Nyesoaa tuposà kpa nyoǒ plomǒ klě tǐ gbei wlòmo. Kamilìaǒ ɔ mooa teteǎà Nyesoa nyeaa Mɔ̀sě ii tee nyu, è nyopò wùɛ jěa ɔ mǒ nyu.

³⁵Tà u piěaǒ uu plomǒ, è kě Kamilìa dɛ̌a ɔɔ bǐì tè tù nyo je ɔ je, “Ně bǐì Ǐsòwɛ̌ kwɛɛn ane, a tùě jǐ bo keǒ dɛ ä mii nyopòà mǒ numa mɔ̀.

³⁶Ɛ kɔna tǐ tìi tà jbɛju tɔ̀ɔ ɔ̈ kɔn nynɛ̌ moo Tudasì nɔ̀ nua ɔɔ chɛ̀ nyefòɛ mǒ, ɔɔ nynɛ̌ jɛ̌a, jbɛjluà bea ɔɔ kɛn u blɛɛa mɔ̀ hɔ̀ndlowɛɛ hɛ̀n. Kɛɛ tà u dbǎla ɔɔ, è ɔɔ mɔ̀ na nyo wùɛ nùǒ gbɛ̀tɛɛa le, ɔɔ tàkpɔ̌ǒ ɛ̌ wɛ̀a bo.

³⁷Tà ɛmo dɛǒ ɛ sìnʼaa, klě tǐǒ u slèaa nyopò wlòmo, jbɛju tɔ̀ɔ ɔ̈ kɔn nynɛ̌ mooa Jùdǎse ɔ̈ sɔnaěe Jàlalǐi wakǎ kɛn mǒ nɔ̀ bòa nyopò fòfoa le ǔ wɛ̀nʼa kòngmna je. Kɛɛ tà u dbǎla ɔɔ ke, è ɔɔ mɔ̀ na nyo nùǒ gbɛ̀tɛɛa le.

³⁸Tèǒ nì kɔn tè klě tǐà wlòmo dɛ ně dlǒ jěe nɛ̀ moo bä tɛ jbɛjluà bo bu mu. Bɛ̌ nu dɛǒ u nii bɛ̌ moo uu chɛ̀ɛ ble po dɛ, u mi seaba,

³⁹kɛɛ bɛ̌ sɔnʼě Nyesoa mɔ̀ mǒ, a slě wɔ̀ ba kan u je. È a mi ɛ jěba aa chɛ̀ ɛ̈ moo Nyesoaǒ a wɛ̀n je.” Dɛǒ ɔ boɔlaa nɛ̀ sàlaǒ uu dlě snǔ mɔ̀.

⁴⁰Ii tè ǔ dala Nyesoaa tuposà kpa nyoǒ klě tè tùla mǒ ǔ bea u plě ǔ tmɔɔ̌a nu bu bɔ̌aa kɛ̀ Jùsuu nynɛ̌ɛ tè boɔboɔ ǔ sɔnaǒ u mɔ̀ mǒ ǔ mua.

⁴¹È nùǒ sɔnaě tè tùla mǒ ü nia chǒn ü mia keǒ Nyesoa Bɔ dia u kàan dɛ mǒ jě keǒ bu jěa sònwɛ nyopò bu poa u fla wan keǒ Jùsuu tè boɔboɔ mɔ̀.

⁴²Chnɛ̀ jlǒ waě wùɛ mɔ̀ u mia dlǒ mɔ̀ ǔ teea nyopò ǔ boɛa nyopò Nyesoaa tè je klě Nyesoaa kǎ fòɛ bo klee klě nyopòo keǐ bo ble le ɛ̈ moo, “Jùsu Nɔ̀ moo Tentǎn Jǔ Ɔ̈ Nyesoa peea lěe Bɔ dboaa.”