Read Grebo, Northern Ǎkè 7 Bible Online

Ǎkè 7 - Grebo, Northern bible

Ǎkè 7

¹È Nyesoaa bodiɔ gbàla Stimǐ wan ɔ je, “Noǎà ï pee kɛ mòo dlǒ le i moo kɛ kàan tè le?”

²Stimǐ tùa lɔ kɛ̀ɛn ɔ je, “Ně mɔ̀niapo ale klee ně gbeǐpò ale, a po nɔkǔ bo, tǐǒ jleě äa gbeǐ Eblɛ̌hɛ̀mo nea lěe Mɛsepotemìa blǒ kɛn plě ɔ mǐa lě Halàn diě wlòmo tǐnma mu, tè jǐ boǎ Nyesoa sàla Ɔɔ chɛ̀ tàmo keǒ ɔ mɔ̀

³Ɔ̌ tmɔɔ̌a nɔ Ɔ je, ‘Sɔn nɔ nè chɛ̀ɛ blǒɔ wlòmo kělɔ nè kmɔ̌ wǒ nyo slè, muě blǒǒ Ě mi mòo teeba kɛn.’ (Gen 12.1)

⁴Ii tè Eblɛ̌hɛ̀mo sɔnaě Kadìa nyoo blǒ kɛn mǒ ɔ̌ mua lě Halàn tǐnma. È tà Eblɛ̌hɛ̀moo gbeǐi kokǒ dɛ sìnʼaa, Nyesoa tmɔɔ̌a nɔ bɔ dia lɔ blǒɔ kɛn ɛ̈ kɔn wlòmo a ne kekɛɛ lɔɔ.

⁵Klě tǐǒ wlòmo Nyesoa sea Eblɛ̌hɛ̀mo blǒà ɛɛ peǎn gbee chɛ̀ nye ɔ mǐa kɔn, kɛɛ Nyesoa peeaě ɛ Bɔ nyea nɛ ɔ̀ klee ɔɔ jlǔu jlǔ. È klě tǐǒ wlòmoo chɛ̀ Eblɛ̌hɛ̀mo sěɛɛ̌la jè jǔu doo chɛ̀ kwɛn. (Gen 12.7, 13.15, 15.2,18, 17.8, 24.7, 48.4)

⁶Nyesoa tmɔɔ̌a Eblɛ̌hɛ̀mo ɛ̈ moo, ‘Nè jlǔu jlǔ miǎě dakɔ̌ tùu blǒ kɛn nema u miǎ kèiapo tù, u miǎ u tǐ jakě kɛn kpa klě jlěe hɔ̀ndlowɛɛ hɛ̀n wlòmo.

⁷Dɛǒ bɛ̌ sìn, è dakɔ̌ǒ miǎ nuu kèiapo mǒ numa, Ě miǎǒ uu plɔ tu kɛn bo maěma plě u miǎě ɛmo blǒǒ wlòmo sɔn plě u miǎě di u miǎ Ně wɛ̀ sà kěà tùɔnʼɔ doà kɛn.’ (Gen 15.13-14, Ex 3.12)

⁸È Nyesoa poa kuo win klě Eblɛ̌hɛ̀mo mɔ̀, kuo winʼǒ ii jboo dɛ nɛ̀ mooa foeě bebɛ̌. Tèǒ nì kɔn tè tà Eblɛ̌hɛ̀mo kɔnaa Aesěè, ɔ bɛ̌a ɔ foeě keǒ chnɛ̀ jlǒ wěe nnyɛɛ̀ nenɛ mɔ̀ ï Aesěè sìnʼaa kmɔ̌. Dɛɛ doǒ nɛ̀ Aesěè nua ɔɔ jǔ Jèkɔ̌po mǒ, Jèkɔ̌po mua ke ɔ̌ bɛ̌a ɔɔ jbɛjlu wùɛ foeǐ, nù moo kekɛɛ äa gbeǐpò ü moo Ǐsòwɛ̌ kwɛɛnʼɛ dakɔ̌ dlěe pù tùo sɔ̌n.

⁹Äa gbeǐpò dlěe tàii pù tùo do ü sɔna lěe Jèkɔ̌po wlòmo u nia chea keǒ uu mamǔ tɔ̀ɔ mɔ̀ ɔ̈ mooa Jòsɛ̌fo, ii tè u plooa lɔ nyopò tùu mɔ̀ ɔ̌ mooa kèi ǔ kpala ɔ Ǐjɛ̀te blǒ kɛn, kɛɛ Nyesoa neeaǒ ɔ mɔ̀

¹⁰Ɔ̌ nyea ɔ tɔ̀n plě Ɔ̌ nua Fɛ̀lǒte ɔ̈ mooa Ǐjɛ̀te nyoo klɔ̀ba Jòsɛ̌foo kmɔ̌ neneɛ kɔna ɔ tǒn, dɛǒ nɛ̀ kɔn tè ɔ nua Jòsɛ̌fo bɔ kɔna Ǐjɛ̀te blǒ win kwa klee nyopò wùɛ ü mooa ɔɔ konkwa mɔ̀ nuu nyo klě klɔ̀ba kǎ fòɛ bo, dɛǒ nɛ̀ kɔn mǒ klě Nyesoa gblàeaě Jòsɛ̌fo tǐ jakě wùɛǒ slè.

¹¹Tà dɛǒ ɛ sìnʼaa, è dodopà nɛ̀ beaě Ǐjɛ̀te blǒ wùɛǒ ɛ klee Kenɛ̀ blǒ kɛn, ii tè dɛɛ wan le popa fòɛ beaě blǒǒ wlòmo. È äa gbeǐpò sea dɛɛ sàla kɔn u mǐaa di.

¹²Tèǒ nì kɔn tè tà Jèkɔ̌po wɔ̌na nii ɛ̈ moo, ‘Digbaǐ neě Ǐjɛ̀teò,’ ɔ dboa ɔɔ jbɛjujlu ü mooa äa gbeǐpò, dɛǒ nɛ̀ mooa nyane dɛ keǒ bu muaě Ǐjɛ̀te bu mua digbaǐ tɔ̀nma.

¹³Jòsɛ̌foo mamǔ jbɛjluǒ u jia lɛ ɛ̈ moo ɔ kǒaa kɛ̀ le. Kɛɛ tà u kpala lěe sɔ̌n nenɛ waě, Jòsɛ̌fo sàla ɔɔ chɛ̀ tàmo keǒ u mɔ̀ plě Fɛ̀lǒtee chɛ̀ wɔ̌na Jòsɛ̌foo tùgbaǒ uu tè.

¹⁴Tà dɛǒ ɛ sìnʼaa, Jòsɛ̌fo dboa nyopò bu blala ɔɔ gbeǐ Jèkɔ̌po klee ɔɔ koǔ bo kwɛɛn wùɛ bu jalaě u batle klě Ǐjɛ̀te. È umo koǔ bo kwɛɛn wùɛ u nea nyopòo wlèe tan tùo pù pù tùo m̀m.

¹⁵Jèkɔ̌po mua batle klě Ǐjɛ̀te klě ɔ klee äa gbeǐpò dlě wùɛ u koǒě

¹⁶ǔ jala uu kokǒ dɛ de kělɔ Kenɛ̀ blǒ wlòmo klě Sichɛ̀ diě kɛn, u tùa u bo klě blǒ tìeǒ Eblɛ̌hɛ̀mo tɔ̀naa ɛɛ sɛklɛ bǐtìe wan. Ɔ tɔ̀na ɛ je wlě fòfoa klě Hamɔ̀ɔ jbɛjujlu mɔ̀ ɔ̈ nea lěe Sichɛ̀.

¹⁷È tà tǐ konwɛɛ̌aa le keǒ dɛǒ Nyesoa peea lěe Eblɛ̌hɛ̀mo bɛ jaěaǒ, ɛ̈ mooa Bɔ nyea ɔɔ jlǔu jlǔ Kenɛ̀ blǒ, è äa nyopò bebeea le kɛn ǔ fòa chɔɔ klě Ǐjɛ̀te.

¹⁸È klɔ̀ba tɔ̀ɔ beaě klɔ̀ba kpǎta wlòmo klě Ǐjɛ̀te ɔ̈ seaa Jòsɛ̌fo ji. (Ex 1.7-8)

¹⁹Nɔ̀ sàlaě uu kàan tǐǒ u kwɛnaa snǔ mɔ̀ klě nyopòǒ slè ɔ̌ nia nu taka, ɔ niia u kbě ǔ pea uu jijlǎi ně měne ɛ̈ di ɛɛ numa u mǐa kǒ.

²⁰Tǐǒ nì kɔn wlòmo u kɔɔnʼaě Mɔ̀sě, Nyesoaa plɔ blooa ɔ kɛn, ii tè Mɔ̀sěe koǔ bo kwɛɛn tùia ɔ jǐ mɔ̀ tɛɛ tɛɛ klě sòbaii tan wlòmo.

²¹È tà u sàlaěe Mɔ̀sě koǔ bo, Fɛ̀lǒtee nynejuju nɔ̀ dǔa ɔ mǒ ɔ̈ nua nɔɔ chɛ̀ɛ konkɔn jǔ mǒ ɔ̌ sàlaě ɔ.

²²U teea Mɔ̀sě Ǐjɛ̀te nyoo tɔ̀n wùɛ ɔ̌ mooa nyefòɛ keǒ dɛ ɔ boɛaa plě klee ɔɔ nunu dɛ mɔ̀.

²³Tà ɔ kɔnaa jlě wlèe sɔ̌n, ɔ poa ɛ ble keǒ bɔ mua ɔɔ nyopò Ǐsòwɛ̌ kwɛɛn jebo chè.

²⁴Klě uu jebo chèchɛ wlòmo Mɔ̀sě jěa Ǐjɛ̀te nyu tɔ̀ɔ ɔ̌ nia Ǐsòwɛ̌ kwɛin tɔ̀ɔ dɛ kukǔ mǒ, ii tè ɔ̌ wěa Ǐsòwɛ̌ kwɛinʼǒ kɛn le ɔ̌ dbǎla Ǐjɛ̀te nyuǒ.

²⁵Ɔɔ wlò jěa lɛ ɛ̈ moo ɔɔ nyopò mia ɛ le jboba ɛ̈ moo ɔmoǒ nɔ̀ Nyesoa mia numa Ɔ mǐa u kè dbǔ mɔ̀ bɛ̌, kɛɛ u sea ɛ le jbo.

²⁶Tà chnɛ̀ tɛ̀ɛ gbàlaa le, Mɔ̀sě jěa ɔɔ nyopòǒ uu tàii sɔ̌n ǔ wɛ̀nʼa, ii tè ɔ tɛ̀na ɛ mǒ bɔ sàlaǒ slɛ̀ǒ slè, ně bo wnawna mǐaǒ u slè ne, ɔ̌ tmɛɛ̌a nu ɔ je, ‘Ně mɔ̀niapo ale, a se kɛ mamǔpò le? Mɛ kɔɔ̌n tè a jlɛ̌ ba tetbae leě kɛ noǎ le?’

²⁷Kɛɛ nyuǒ tòalaa slɛ̀ǒ ɔ pooa Mɔ̀sě son kwa, è kě ɔ dɛ̌a ɔ je, ‘Mɔ nuǔ kɛ mò äa je siɔ klee tè tùɔ̌ mǒ?

²⁸Deě jlɛ̀ kɛ bò dbǎ mǒ wòje keǒ nùtěe è dbǎtěe Ǐjɛ̀te nyu?’ (Ex 2.13-14)

²⁹Tà Mɔ̀sě wɔ̌naa tèǒ, è nɔ̀ǒ plùa ɔ̈ sɔnaě blǒǒ wlòmo ɔ̈ mua lě blǒǒ u dɛɛ Medìɛn kɛn, klě ɔ kɔɔnʼaě jbɛjujluu sɔ̌n.

³⁰Tà jlě wlèe sɔ̌n sìnʼaa, è Najiǒpòi Nɔ̀ sàla Ɔɔ chɛ̀ tàmo keǒ Mɔ̀sě mɔ̀ klě napèpɛlo slè ɛ̈ nea lěe tu pòpotua ja ɛ̈ wneaa klě kpatekpǎ blǒǒ kɛn ɛ̈ konwaěaa togbeeǒ moo Sanàe le. (Ex 3.2)

³¹Tà Mɔ̀sě jěaa wnewne naǒ klě tu pòpotuaǒ ja, ì kàea ɔ le wan, ii tè ɔ̌ kèklaeaǒ ɛ gbàa ɔ mǐa ɛ ji dɛ tae kpɛaa tùɔn. È ɔ wɔ̌na Koɔnʼɔ win ï dɛ̌ bòo,

³²‘Mǒà Mǒ moo Nyesoa keǒ aa gbeǐpò dlě mɔ̀, Mǒ moo Eblɛ̌hɛ̀mo klee Aesěè klee Jèkɔ̌poo Nyesoa.’ Tà Mɔ̀sě wɔ̀naa dɛǒ, ɔ̀ɔ fě senʼa le ɔ̌ pea fano, ɔ seaa kɛ̀ lě wɔ̀ bɔ tanaě wnewne naǒ mɔ̀ le de.

³³È kě Koɔn dɛ̌a ɔ je Ɔ je, ‘Sà nè nyɔkòɛběǒ be měne ɛ̈ di ɛɛ numa nè di ɛmo tùɔnʼà fla wan po. Mǒà neà tùɔnʼà kɛn, tèǒ nì kɔn tè tùɔnʼà ɛ ne je ngmà.

³⁴Ě dǔa Ně nyopò jejeɛ̌ mǒ seela ke u ni nuu sònwɛ tùtuɛ klě Ǐjɛ̀te. È Ě wɛ̌n uu sònwɛ jejeɛ̌ɛ klukwlɛǒ lo, tèǒ nì kɔn tè Ě sɔnʼě jɔkɛn mǒ Ě mǐ u kè dbǔ mɔ̀ bɛ̌, ii tè diě Bo dbo mò, mu de klě Ǐjɛ̀te.’ (Ex 3.7-10)

³⁵Bi beě a wlò jleě Ǐsòwɛ̌ kwɛɛn sàla Mɔ̀sě jleě mɔ̀ ǔ dɛ̌a bò ɔ je ɛ̈ moo, ‘Mɔ nuǔ kɛ mò äa je siɔ klee tè tùɔ̌ mǒ?’ Kɛɛ Nyesoaa chɛ̀ Nɔ̀ tbala Mɔ̀sěe doǒ ɛ̈ Ɔ nuua lěe najiǒpòiǒ mǒ ɔ̈ sàla ɔɔ chɛ̀ tàmo klě kwlǎ slè keǒ Mɔ̀sě mɔ̀ keǒ ɔmo Mɔ̀sěǒ bɔ mooa uu nae nyu klee gblàgbla nyu.

³⁶Mɔ̀sě nɔ̀ mooa nyu ɔ̈ nia wlòlekaen noǎ klee wan bo kàe noǎa klě Ǐjɛ̀te plě ɔ̌ sàlaě u Ǐjɛ̀te ɔ̌ bɛɛ̌a u Jbǒ Chǒ tìe plě ɔ̌ bɛɛ̌aě u kpatekpǎ blǒ kɛn tìe klě jlě wlèe sɔ̌n wlòmo.

³⁷Ɔɔ doǒ nɔ̀ tmɔɔ̌a Ǐsòwɛ̌ kwɛɛn ke ɛ̈ moo, ‘Nyesoa miǎě a Wnɔsàɔ slè sàba Nɔ̀ Ɔ miǎ dboba wòje keà ně ka nee je.’ (Deut 18.15)

³⁸Tà najiǒpòi boɔlaě ɔɔ mɔ̀ klě togbeeǒ moo Sanàe dlǒ, ɔ nyea ɔ win bɔ tmɔɔ̌a ämoo ke bä nuu kmɔ̌ neneɛ. Tǐǒ jleě ɔ neaě kpatekpǎ blǒ kɛn ɔ klee Ǐsòwɛ̌ kwɛɛn tàkpɔ̌ ü moo äa gbeǐpò.

³⁹Kɛɛ äa gbeǐpò sea wɔn keǒ bu tùaǒ ɔɔ win bo, ɛ̀ sìnʼǒ dɛɛ do u nuaa nɛ̀ moo u sàla ɔ jleě mɔ̀, è klě uu chɛ̀ wlè jleě u jlɛ̌ bu tbaea je klě Ǐjɛ̀te.

⁴⁰Tǐǒ jleě Mɔ̀sě maea lěe Sanàe togbee dlǒ, kě u dǎla Ewnɔ̀ je u je, ‘Ä se dɛ kpaa tùɔn ji keǒ Mɔ̀sě jleě mǒ ɔ̈ nae ämoo ɔ̈ sàě ämoo Ǐjɛ̀te blǒ kɛn, ii tè nu ä nyesoe le i mǐ äa nae nyopò tù.’ (Ex 32.1,23)

⁴¹Tǐǒ nì kɔn wlòmo u nua nǔkpuɔ̌ ǔ poaě ɛ blǐ bòtoo tǔn wlòmo ǔ piea ɛ chɔ̀no je. U pia wlewle digbaǐ ǔ kwɛna de ngmnengmnɛ̌ keǒ dɛ uu chɛ̀ɛ nuaa mɔ̀.

⁴²Tèǒ nì kɔn tè Nyesoa tbɛa u kɛn bu nua jɔtnèe wɛ̀ sèsaa konkwa wòje ke ɛ nuu chleěa klě Ɔɔ win wlòmo ɛ̈ Ɔɔ wnɔsàɔ chlěaa seela ɛ̈ moo, ‘Ǐsòwɛ̌ kwɛɛn, tǐǒ jleě a nea lěe kpatekpǎ blǒ kɛn klě jlěe wlèe sɔ̌n wlòmo, a nyea kɛɛ̌ nyenye noǎ klee chɔ̀no le?

⁴³Ɛ sea bò nu, a kpɛa aa nǔkpuɔ̌ǒ a dɛaa Molakè ɔɔ ble klee aa nǔkpuɔ̌ jɔtnàeǒ a dɛaa Wlefɔ̀n, imoǒ nì mooa nǔkpuǐ a nua, nì kɔn wɛ̀ a sɛ̀a. Tèǒ nì kɔn tè Ě miě a kèdɛ̌ slè kpaba, a miě mɔ̀ tmɔma klě blǒǒ moo Babòlɔn demǒ.’ (Amos 5.25-27)

⁴⁴È tà äa gbeǐpò nea lěe kpatekpǎ blǒ kɛn, u kɔna ble fòɛ ɛ̈ teea lɛɛ ɛ̈ moo Nyesoa nea kɛn tùɔn klě u slè. U poa bleǒ teěn wòje ke Nyesoa nua nɛɛ Mɔ̀sě jǐ kɛn ble popoɛ plě Ɔ̌ teea lɔ ke bɔ nua nɛɛ nunuɛ.

⁴⁵Äa gbeǐpò sèsae ɛ kwete měne ke uu gbeǐpò dlě nuǒ mɔ̀le kokwɛɛa ǔ jalaě ɛ tà Jàsuwě nɛɛa luu u sàlaa dakwɛ̌ǒ neaǒo blǒǒ kɛn blǒ měne ü Nyesoa nua nɛɛ u plùaa mɔ̀le. Kě ɛ neaě u slè ne ne Dèběse be klɔ̀ba dɛ mǒ.

⁴⁶Jèkɔ̌poo Nyesoa noɛɛa Dèběse mǒ no. Tèǒ nì kɔn tè Dèběse gbàla Nyesoa wan Bɔ sɔnaǒ ɔ mɔ̀ mǒ bɔ poa koǔ keǒ Ɔ mɔ̀.

⁴⁷Sanemɔ̌ nɔ̀ moo nyu sɛje ɔ poa Nyesoaa koǔǒ,

⁴⁸kɛɛ Ja Tmɔ Nyesoa Ɔɔ̌ neě koǔà tùonyugbe poo bobo wòje ke Ɔɔ wnɔsàɔ dǎa ɛ̈ moo,

⁴⁹‘Kě Koɔn dǎ ɛ̈ moo, “Jɔkɛn nɛ̀ moo Ně klɔ̀ba gbèsɛɛ plě blǒà nɛ̀ moo Ně be kɛn bo tù dɛ, bä jě koǔ tae a mi kɛɛ poba ɛ̈ kɔn bobo Ě miěe nema? À tùɔn tae a miǐ kɛ mɔ̀le wɔ̀ba ɛ̈ kɔn kɛn Ě miǒo fɛɛba?

⁵⁰Ɛ se kɛ Ně chɛ̀ Ě se noǎ wùɛà nu le?” ’ ” (Is 66.1-2)

⁵¹È Stimǐ kpɛa ɔɔ win dlǒ mɔ̀ ɔ je, “Amo dlě jakě nyoà, a se kàan tè popoɛ kɔn plě aǎ po kàan dɛ nɔkǔ jeboo chɛ̀! Tǐ wùɛ mɔ̀ a wɛ̀n Ngmà Je Ne Sùsu je wòje dɛɛ teěn aa gbeǐpò nia pnɔɔ!

⁵²A wɔ̀le je ba sà kɛě Nyesoaa wnɔsàɔpoo nyuu doo nynɛ̌ ɔ̈ kɔn tè aa gbeǐpò seaa mɔ̀ tè le? U dedbǎe nyopòǒ le ü tmɔɔ̌a nuu seela tǐ jleě ɛ̈ kwɛɛǒo Nyesoaa Jebo Siǐn Nyu Ɔ̈ mia lěe diba Ɔɔ tè jleě mǒ bo. È tà Ɔmo Nyuǒ Ɔ diěe, a mu ǎ sàě Ɔ bo demǒ ǎ poo Ɔ mnùngma.

⁵³Amo moo nyopò najiǒpò jala Nyesoaa teteǎ, kɛɛ a seaǒ i tù!”

⁵⁴Tà Jùwɛ nyoo tè tù nyo wùɛǒ u wɔ̌naa tèǒ, è nùǒ bea jlo měne ǔ tùia ɔ sadoě.

⁵⁵Kɛɛ Ngmà Ne Sùsu Nɛ̀ jǐa Stimǐ je ɔ̌ tɛnaě jɔkɛn le ɔ̌ jěa Nyesoaa tè jǐ boaboǎ klee Jùsu Ɔ̌ nynana bo klě Nyesoaa dilǎ son mɔ̀.

⁵⁶È kě ɔ dɛ̌a u je ɔ je, “A tanʼě tàě le! Ě jě jɔkɛn ɛ̌ kna je, è Jbɛjuu Jǔà Ɔ̌ nynaě Nyesoaa dilǎ son mɔ̀ bo!”

⁵⁷Tǐi doo tǐ jleě è Jùwɛ nyoo tè tù nyo nùǒ jɛɛ̌aě win ü pea slɛ̀ le ke u nuaě ɛɛ wòwɔ, è nùǒ kana uu chɛ̀ɛ nɔkwǐ uu wùɛ ǔ kpɛaě ɔ jǐ mǒ chìnchin

⁵⁸ǔ sàlaě ɔ dě fòɛǒ wlòmo ǔ poaě ɔ dɔwun jleě u mǐa ɔ seɛ̌ bee le, u mǐa ɔ dbǎ. Stimǐi tè jɛɛ nyo sàla wlawlě fòe měne ǔ poaǒ i nyemò tɔ̀ɔ be wɔ̀ɔn bo ɔ̈ kɔn nynɛ̌ mooaa Sɔ̀ɔ̌, tà u keaa Stimǐ seɛ̌ǒ bee le, Sɔ̀ɔ̌ nɔ̀ u nyea uu daleǒ bɔ̈ tùa i jǐ mɔ̀.

⁵⁹Tà u kea lɔɔ seɛ̌ǒ bee le, è ɔ bɛ̀tea Nyesoa, kě ɔ dɛ̌a ɔ je, “Koɔn Jùsu, blě ně sùsu kwaò!”

⁶⁰È klù è nɔ̀ǒ kɔa kwne bo ɔ̌ pnǎna dɛ jleě ɔ je, “Koɔn, uu dɛ knǎǒ u nii Nè jɛɛ ɛɛ tè ù!” Tà ɔ wɔ̀laa tèǒ boɔboɔ mɔ̀, è nɔ̀ǒ ngmnana fònfno.