Read Grebo, Northern Wlǔmɔ 11 Bible Online

Wlǔmɔ 11 - Grebo, Northern bible

Wlǔmɔ 11

¹Ii tè boǒ gbà ɛ wanʼò, Nyesoa po kɛě Ɔɔ nyopòà mǒ plǒ le? Sɛjesɛ ɛ se bò nu! Ně chɛ̀à Ě moo Ǐsòwɛ̌ kwɛin, Ě moo Eblɛ̌hɛ̀moo jlǔu jǔ, Ě sɔnʼě mǒ dakɔ̌ǒ moo Bɛ̀chemɛ̌ nyo slè.

²Nyesoa seǒ Ɔɔ nyopò plomǒ po ü Ɔ sàlaǒo seela tǐ jleě. A se kɛ i ji dɛǒ Nyesoaa win boɛɛ klě Ilaejɔ̀ɔ tɔ̀n tè wlòmo le? Ɔ bɛ̀tea Nyesoa le keǒ Bɔ sùea Ǐsòwɛ̌ kwɛɛn gbè, kě ɔ dɛ̌a

³ɔ je, “Koɔn, u dbǎ Nè wnɔsàɔpo ǔ wlǎ Nè chɔ̀no tògbee kǒngmà blǒ mǒ, ně doà mǒ siǒ, è u pɛ̀nʼɛ̌ le u miǐ dbǎ!” (1 Kgs 19.10,14)

⁴Mɛ Nyesoa tùu luǔa kɛ ɔ kɛ̀ɛn? Ɔ tùa ɔ kɛ̀ɛn Ɔ je, “Nyopòo taslěwɛɛ nyiɛta nù Ě mǎ son kɛn bo ü kɔnʼɔ tè wlò popoɛ klěě mǒ plě ü see nǔkpuɔ̌ǒ moo Beɛ̀ɛ wɛ̀ sà.” (1 Kgs 19.18)

⁵Klě tǐà ä neěe wlòmo dɛɛ doǒ nɛ̀ ɛ mono, mòngmɛ nyo nù Nyesoa tba klě Ɔɔ wlòo jlajlǎ dɛ wlòmo ɛ̈ɛ̌ sà Ɔɔ wlò kǔ mǒ keǒ u mɔ̀.

⁶A kɔn ɛ jijiɛ ɛ̈ moo Nyesoa tba ulu klě Ɔɔ wlòo jlajlǎ dɛ wlòmo ɛ̈ɛ̌ sà Ɔɔ wlò kǔ mǒ ɛ̈ see konkwa u nuu ɛɛ tè. Bɛ̌ monoo ɛ, è Ɔɔ wlòo jlajlǎ dɛǒ ɛ̈ɛ̌ sàa wlò kǔ mǒ ɛ̀ see kɛ̀ dɛ nynɛ̌ sɛ̀nma mu.

⁷Dɛ ɛ sɛ̀nʼɛ nynɛ̌ nɛ̀ moo Ǐsòwɛ̌ kwɛɛn se dɛǒ u pɛ̀nʼaa le jě, kɛɛ nyopòà Nyesoa sàǒo nù kɔn do kɔn jebo siǐanʼǒ. Nyopò tùuǒ siǒo uu dlě jakǎ le,

⁸kě Nyesoaa win dɛ̌ i je, “Nyesoa nu ɛ uu tè le jbojbɛɛ sùsu dɔ. Klě tǐà ä neěe wlòmoo chɛ̀ u kɔn jǐ, kɛɛ uǔ jě le kaǒ, u kɔn nɔkwǐ, kɛɛ uǔ wɔ̌n le.” (Deut 29.4, Is 29.10)

⁹È dɛ klɔ̀ba Dèběsee chɛ̀ boɔlaa nɛ̀à ɔ je, “Nɛ bo u chɛ̀ɛ ngmna bɛ moo chlǒ keǒ u mɔ̀ u mǐ wɔ̀ɔn le be u mǐ plɔɔ tu kɛn bo maěaǒ blɛɛ uu je jě.

¹⁰Nɛ uu jǐ bi be kwijlě kɛn uǔ di le jě. È nɛ bu jě sònwɛ ke kmɔ̌ mii jleě mǒ bo tonma.” (Ps 69.22-23)

¹¹Ii tè boǒ gbà ɛ wanʼò, tà Jùwɛ nyoà u bò kɛɛ bojoɛɛ ii tè u mǎ kɛ le kpǎkpǎ le? Sɛjesɛ ɛ se bò nu! U nu dɛ kukǔ, nɛ̀ kɔn tè Nyesoa sà Ɔɔ wowa dɛ kwlǎ mǒ klě kuodakwɛ̌ mɔ̀ ɛ̈ di ɛɛ numa ɛ miě umo Jùwɛ nyo chea wlò jleě po.

¹²Bɛ̌ nu uu kpni kukwǐ bǐ jaě ngmna fòɛ keǒ kmɔ̌ɔ nyopò tùu mɔ̀ klee dɛǒ u mǎa bɛ̌ jaě ngmna fòɛ keǒ kuodakwɛ̌ mɔ̀, è bɛ̌ nu umo Jùwɛ nyo wùɛ bǔ bitǐ uu wlè bo, ba jě ke ɛ mii ngmna fòɛ tùtuɛ numa ne.

¹³Klě tǐà wlòmo amo kuodakwɛ̌ amo Ě boɛě mɔ̀. Ke ɛ toon jleě mǒ bo Ě monoo Nyesoaa tuposà kpa nyu keǒ a mɔ̀, Ě kun le kɛn keǒ ně konkwaa tè mɔ̀.

¹⁴Klě wakǎ tɛ̀ɛ wlòmo Ě kuun ɛ je wlò ɛ̈ moo ɛmoǒ nɛ̀ Ě ni ně chɛ̀ɛ Jùwɛ nyo ǔ ni chea keǒ a mɔ̀ klee Ě mǐ uu tìe wa.

¹⁵Tà Nyesoa sàla uu jleě mɔ̀, nɛ̀ nu ɛ Ɔɔ nenatùmo dɛ ne tà keǒ kmɔ̌ɔ nyopò tùu mɔ̀. È ba nae ɛ wlò kɛn le, bɛ̌ nu Bɔ̌ kme u bo, è ke ɛ miǐ kɛ je nema? Ɛ mi wlòlekaen dɛ numa wòje keà nyopò duǐi jemǒ u sonwɛ lěe kǒla mǒ.

¹⁶Bɛ̌ nu bo smìi do bɛ̌ nu kàan, è smì wùɛ i kɔn bi nu kàan. Dɛɛ doǒ nɛ̀ ɛ mono, bɛ̌ nu bo tuu boǒ neěe wlò bɛ̌ nu kàan, è tu baěǒ neǒo tuǒ ja i mi kàan numa ke.

¹⁷Nyesoa bɛ̌ tu baěǒ ii tìe jele, è amoà monoo tu baě ü sɔn lěe dɔ̌ tu ja mǒ Nyesoa poǒ ii pènmo. È klě tǐà wlòmo a kwɛn plɔɔ bloblɛ klě kmɔ̌à jǐi ngmna fòfoa jele mǒ ɛ̈ Jùwɛ nyo kwɛn pnɔɔ.

¹⁸Tèǒ nì kɔn tè aǎ sɛ̀ɛǒ nyopòǒ uu tè le ü wǒo je tu beěǒ Nyesoa bɛ̌ǒo. Bi beě a wlòmo ɛ se amo a seě tu boǒ ɛɛ tè mɔ̀ kɔn, kɛɛ ɛmo tu boǒ nɛ̀ kɔnʼě aa tè mɔ̀. Bɛ̌ nu bǎ ke wun fòɛ le pe

¹⁹bǎ ke bò dɛ̌ ɛ̈ moo, “Nyesoa bɛ̌ǒ ti baěǒ lo ɛ̈ di ɛɛ numa Ɔ miǒ a po,”

²⁰kàan tè nìǒ a boɔ, Ɔ bɛ̌ǒ u lu, kɛɛ Ɔ bɛ̌ǒ u keǒ uu se kàan tè popoɛ kɔn mɔ̀. Bo bǎ kɔn tè wlò popoɛ sosǒ, a miǒ tàǒ a neǒ bo nema. Tèǒ nì kɔn tè aǎ jɛɛ̌ě aa chɛ̀ le, kɛɛ bo tùtuɛ bɛ neě a mǒ.

²¹Mɛ̌oǒ joo nɛ̀ moo bo Nyesoa Bɔ̌ seeaǒ Jùwɛ nyo wun mɔ̀ sà ü wǒo je tu baěǒ, è bǎ se tè wlò popoɛ kɔn, aa wlò je Ɔ mi kɛǒ a wun mɔ̀ sàbaa chɛ̀ le?

²²Klě ɛmoǒ mǒ ä jě Nyesoaa nunu kmɔ̌ kplěe sɔ̌n ï neě Ɔɔ mǒ, kàan klee wan jakǎ dɛ ï Ɔ nii. Ɔɔ dɛ jakǎ wan keǒ nyopòà mɔ̀ ü bee wɔ̀ɔn, kɛɛ bɛ̌ nu bò kme Ɔɔ kàan dɛ nunuɛǒ bo, Ɔ ni kàan keǒò mɔ̀. Nɛ̀ bò se nu, mìǒ Ɔ jleě mǒ sɔnma.

²³È bɛ̌ nu Jùwɛ nyo bǔ sɔnʼě uu se kàan tè popoɛǒ slè mǒ, è Nyesoa mi u de jaeba keǒ uu tùɔnʼǒ u ne pnɔǒo kɛn. Nyesoa kɔn kpě Bɔ poǒ u le de.

²⁴Ke ɛ toon jleě mǒ bo ǎ sɔnʼǒo dɔ̌ tuà woǒěe kwlǎ slè jleě mǒ, bo Nyesoa Bɔ̌ kɔǒ a Ɔɔ dodɔ̌ tu jleě ɛ̈ kɔn jleě a se pnɔǒo woǒ lo, è ɛ mi dɛ jɔpɔ̌ numa keǒ Bɔ tùǒ tu baěǒ de ï Ɔ sà pnɔǒo ɛɛ naǎ jleě.

²⁵Ně bǐì kuodakwɛ̌ ü moo Tentǎn Jǔu wǎn, Ě jlɛ̌ ba ji je wɛ̌ dɛǒ ɛ̈ di ɛɛ numa aǎ di aa chɛ̀ nyu mǒ jě chɔɔ. Nyesoa nu Jùwɛ nyoo tìe ǔ ni dlǒ jakǎ ɛ mǒ ɛ kpa kpa kuodakwɛ̌ tìen taeǒ Ɔ jlɛ̌ bü diiɔ Lɔɔ mɔ̀ u miě je wɛ̀.

²⁶È Jùwɛ nyo wùɛǒ siǒo u mi waba ke wòje ke ɛ nuu chleěa klě Nyesoaa win wlòmo ɛ̈ moo, “Wowa Nyu miě diba, Ɔ miě Sàna dǐa mǒ sɔnma Nɔ̀ miě Jèkɔ̌poo jlǔu jlǔ kmɔ̌ kukǔǒ ja sàba.

²⁷Bɛ̌ nu Boǒ poo uu kpni kukwǐi tè wlò le, dɛǒ nɛ̀ moo kuo win Ě mi poba keǒ u mɔ̀.” (Is 59.20-21)

²⁸Jùwɛ nyo sà Nyesoaa kàan tuposà jleě mɔ̀, tèǒ nì kɔn tè u moo Ɔɔ jlae nyo, è ɛmoǒ nɛ̀ peǒ a dɛ bo, kɛɛ Nyesoa Nɔ̀ sàǒ u, tèǒ nì kɔn tè Ɔ noɛɛ neě jè u mǒ keǒ uu gbeǐpò dlěe tè mɔ̀.

²⁹Nyesoa ně sà win de keǒ nyu mɔ̀ ɔ̈ Ɔɔ chɛ̀ sàǒo Ɔ poo ngmna mɔ̀.

³⁰Amo kuodakwɛ̌ a sea pnɔǒ Nyesoa tù, kɛɛ Jùwɛ nyo seǒ Ɔ tù ke, tèǒ nì kɔn tè klě tǐà wlòmo Nyesoa kɔn wɔle je jbojbɛ keǒ a mɔ̀.

³¹Dɛɛ doǒ nɛ̀ ɛ mono, klě tǐà wlòmo Jùwɛ nyo ně tùǒ Nyesoa bo nɛ̀ nu ɛ Ɔ̌ kɔn wɔle je jbojbɛ keǒ a mɔ̀ ɛ̈ di ɛɛ numa ɛɛ̌ diǒo wlɛ̀ Nyesoa mǐi wɔle je jbojbɛ kɔn keǒ u mɔ̀ de.

³²Nyesoa nu nyopò wùɛ bo tùtuɛ seě u ja ne, dɛǒ nɛ̀ nu ɛ Ɔ̌ mi wɔle je jbojbɛ kɔnma keǒ uu wùɛ mɔ̀.

³³Nyesoa nmɔ kwa chɔɔ plě Ɔɔ tɔ̀n klee de jijiɛ ǐ tmɔ mǒ. Ɛ se nyu kɔn ɔ̈ wɔ̀le je bɔ̈ sèsae Ɔɔ tè tùtuɛ kɛn le plě bɔ̈ jboo ke Ɔ nii noǎ nunuɛ le.

³⁴Kě Nyesoaa win dɛ̌ i je, “Mɔ jiǐ kɛ dɛ Koɔn Nyesoa sìɛn nee dlǒ mɔ̀le? Mɔ wɔ̀le je bɔ monoǒ kɛ Ɔɔ tɔ̀n měne po nyu?

³⁵Mɔ sàǎla kɛǒ dɛ ɔ nyeěa ɛ Nyesoa ɛ̈ di ɛɛ numa Ɔ mǐiǐa ɛ nyuǒ de nye?” (Is 40.13, Job 15.8, 41.11, Jer 23.18)

³⁶Noǎ wùɛ klě i sonwɛě Ɔ mɔ̀ mǒ, Nɔ̀ nu ni plě nɔ̀ kɔn ni. Nɛ Ɔɔ nynɛ̌ bɛ poo le tǐ wùɛ mɔ̀, kě bɛ ne.