Read Grebo, Northern Wlǔmɔ 12 Bible Online

Wlǔmɔ 12 - Grebo, Northern bible

Wlǔmɔ 12

¹Tèǒ nì kɔn tè ně bǐì Tentǎn Jǔu wǎn ane, ke ɛ toon jleě mǒ bo Nyesoa kɔnʼɔ wɔle je jbojbɛ keǒ a mɔ̀, Ě bɛ̀te ale, a nyee aa chɛ̀ Nyesoa wòje chɔ̀no ɛ̈ nee ngmà je plě ɛ̈ blee Ɔɔ plɔ. Dɛǒ nɛ̀ moo Ɔɔ konkwa ɛ̈ a blɛɛ je ba nuu.

²Aǎ ne kmɔ̌ kukǔà nyopò tùu nee, kɛɛ aa dlǒ le sìɛnsiɛn bɛ bitǐ bo plě aa de nu kmɔ̌ bɛ bitǐ bo ɛ̈ di ɛɛ numa a mǐ dɛǒ monoo Nyesoaa kɛn wɔɔn dɛ ji klee dɛ monoo kàan klee dɛ ɛ̈ blee Ɔɔ plɔ plě ɛ̈ snǎ lěe mɔ̀le kpǎkpǎ.

³Nyesoa nyeě nyee dɛ ɛ̈ moo Ɔɔ mǒ noɛnoɛ keǒ aa wùɛ mɔ̀. Tèǒ nì kɔn tè Ě tmɛɛ̌ amo, aa nyu ně jě ɔɔ chɛ̀ nyu mǒ chɔɔ ɛɛ̌ sìnʼǒ le. Kɛɛ nyu wùɛ bɔ jě ɔɔ chɛ̀ɛ tǔnʼǒ ɔ neěe wlòmo, ɔɔ wlò bɛ bloo ɛ kɛn, ɛ klee tè wlò popoɛǒ Nyesoa nye amoo bi wonwɔɔ kɛn.

⁴Äa do do ä kɔn blǒ fě ï kɔnʼɔ noǎ klɔkwlě, è ii dɛɛ do kɔn ɛ blěe konkwa ɛ nii.

⁵Dɛɛ doǒ nɛ̀ ɛ mono, äa fòfoa ü poo Tentǎn Jǔu tè kàan tè ä wǒ je fǒo do, äa do do ä kpokpae wlò wòje keǒ fǒo noǎ klɔkwlě nuu ǐ kpokpa lee wlò.

⁶Ä kɔn dɔ̌ɔdɔ̌ konkwa bä nuu wòje ɛ̈ Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ nye ämoo. Tèǒ nì kɔn tè bɛ̌ nu wnɔ sèsa bɛ̌ nyee mò, è bò sà wan keǒ nè tè wlò popoɛ nuě ɛɛ wòwɔ.

⁷Bɛ̌ tù bò nùǒ bìì konkwa jleě mǒ bɛ̌ nyee mò, è nɛ̀ bò nu. Bo teea bɛ̌ nyee mò, è bò tee le.

⁸Nyopò tùu kbě ja le popoɛ bɛ̌ nyee mò, è bò po u kbě ja le. Bɛ̌ nu nyu dɛ nyenyeɛ bɛ̌ nyee mò, è bò nmɔ kwa. Bɛ̌ nu dɛɛ dlǒ jleě neneɛ bɛ̌ nyee mò, è nɛ̀ bò nu klě kbě le popoɛ mǒ. Bɛ̌ nu bo wɔle je jbojbɛ bɛ̌ nyee mò, è bò nu ɛ klě plɔɔ bloo tǔn wlòmo.

⁹A noɛɛ nyopò tùu mǒ aǎ niǒ ně kɛn le. È a faen dɛ kukǔ a miǒ kàan dɛ mɔ̀ kwa blě.

¹⁰A nonoɛɛ měne keà Nyesoa nyo klee a tùtuuǒ ble chɔɔ.

¹¹A poě kbě a nu konkwa aǎ fnɛ̀, nu dɛ keǒ Nyesoa mɔ̀ klě aa kbě kɛn ne sùsu mǒ.

¹²Aa plɔ bɛ blo keǒ wlò je kunkuɛn mǒ. Bɛ̌ nu bo tǐ jakě bǐ diě, a kɔn wlò dbadbǎ tǐ wùɛ mɔ̀ a boɔě Nyesoa mɔ̀.

¹³Dɛǒ a kɔnʼɔ a sàǒ ɛ kɛn a nye Nyesoaa nyopò ü see dɛɛ sàla kɔn. A kme nyopò jebo ü miě aa tà diba.

¹⁴Nyopò bǔ ke aa tè mɔ̀ tè, a po u ngmna mɔ̀. Aǎ pe u chlǒ mɔ̀, kɛɛ a po u ngmna mɔ̀.

¹⁵Nyopòà kwɛnʼɛ plɔɔ bloblɛ, a be u kɛn a kɔn plɔɔ bloblɛ. Nyopòà chìnʼi sònwɛ a be u kɛn a chìn sònwɛ.

¹⁶Win měne wonwɔ̌ɔa bɛ neɔ a slè. De jaě sùsu bɛɛ̌ neɔ a slè, kɛɛ nyopòà tìeǒ uu chɛ̀ ja u klee amoo sɔ̌n ba nenaa mǒ, aǎ jě lɛ ɛ̈ moo a kɔn tɔ̀n chɔɔ.

¹⁷Aǎ sɛ̀ dɛ kukǔu kpa keǒ dɛ kukǔ mɔ̀. A tɛ̀n ɛ mǒ keǒ ba nu noǎ ïà nyopò wùɛ jěe ɛ̈ moo i moo kàan.

¹⁸A nu noǎ wùɛ a wɔ̀le je ba nuu a mǐ ně bo wnawna kɔn keǒ nyu wùɛ mɔ̀.

¹⁹Ně nenawa, aǎ sɛ̀ kpa, nɛ Nyesoaa jlo bɛ nu ɛ keǒ a mɔ̀ ɛ̈ kɔn Koɔn win dɛ̌ bòo ɛ̈ moo, “Ně doà Mǒ blě kpě keǒ Bɔ̈ sà kpa. Nyopòǒ ɛ blɛɛ lee je nù kɔn plɔ Ě miǒ tu kɛn bo maěma.” (Deut 32.35)

²⁰Tèǒ nì kɔn tè kě Nyesoaa win nu ɛ boɔboɔ ɛ̈ moo, “Bo sàno bɛ̌ ke nè jlae nyu ni, nye ɔ didi dɛ, bɛ̌ nu nenǎ to bɛ̌ ke ɔ ni, nye ɔ bɔ nǎ. Bò ke ɛmo dɛǒ ni, è tònweǒ pe ɔ̀ měne.” (Prov 25.21-22)

²¹Nè sonwɛǒ dɛ kukǔ mɔ̀ mǒ ɛɛ̌ duiì wan, kɛɛ nu kàan dɛ keǒ bò du dɛ kukǔ wan.