Read Grebo, Northern Wlǔmɔ 16 Bible Online

Wlǔmɔ 16 - Grebo, Northern bible

Wlǔmɔ 16

¹Ě tùiě a Fibǐ kwete mǒ ɔ̈ moo äa mamǔ nyneju ɔ̈ nii konkwa klě Nyesoa koǔǒ bo ɛ̈ neěe diěǒ moo Sɛnkwlìa kɛn.

²Keà Nyesoa nyo blɛɛ je bu nuu jebo kmeea, kě ba nu ɔ jebo kmekmɛ tɛɛ klě Koɔnʼɔ nynɛ̌ wlòmo. Ɔ sɛ̀ɛ nyopò fòfoa měne jà ně chɛ̀à, ii tè a sɛ̀ɛ ɔ mǒ dɛ wùɛ ɔ mii sòaba.

³Ě gbà Pliselǎ wan klee ɔɔ jbe Akwelǎ ü moo něe bǐì konkwa nu nyo keǒ Tentǎn Jǔ Jùsu mɔ̀,

⁴üà poǒ uu chɛ̀ɛ fònfno blǒ mɔ̀ bo ně tè. Ɛ se ně do ně pe u tàto, kuodakwɛ̌à moo Tentǎn Jǔu wǎn uu wùɛ u pe u tàto ke.

⁵Ě gbà Nyesoa nyo wan le ü gbèe le klě Pliselǎ klee Akwelǎa koǔ bo ke. Ě gbà ně tè kma mɔ̀nai Epaenɛ̀tu wan ɔ̈ mooa nyane nyu klě blǒ wakǎǒ monoo Esìa kɛn ɔ̈ poaa Tentǎn Jǔu tè kàan tè.

⁶Wan le gbògba keǒ Mɛwlě mɔ̀ ɔ̈ nuaa konkwa chɔɔ keǒ a mɔ̀.

⁷Wan le gbògba keǒ Andlonakà klee Juniasè mɔ̀ ü moo něe bǐì Jùwɛ nyo ü klee mǒo sɔ̌n u poaa wùlo. Tentǎn Jǔu tuposà kpa nyoo tàii pù tùo sɔ̌n ji ulu tɛɛ plě nù poa Jùsuu tè kàan tè seela plě ɛ mǐ ně tǐ kɛn jɛɛ le.

⁸Wan le gbògba keǒ Apleàtɔ mɔ̀, ně kàan mɔ̀nai klě Koɔn mǒ.

⁹Wan le gbògba keǒ Obanɔ̀ mɔ̀ ɔ̈ moo äa bě konkwa nuɔ keǒ Tentǎn Jǔ mɔ̀ plě klee ně kàan nenawai Satakì.

¹⁰Wan le gbògba keǒ Apɛlèse mɔ̀ ɔ̈ tee ɛɛ ke ɔ nuǒ ɔɔ chɛ̀ Tentǎn Jǔ bobo paea. Wan le gbògba keǒ nyopòǒ mɔ̀ ü sɔn lěe Awletablɔ̀ɔ tùgba mǒ.

¹¹Ě gbà Hɛwlodìɛn wan ɔ̈ moo něe bě Jùwɛ nyu. Ě gbà nyopò wùɛ wan le ü moo Tentǎn Jǔu wǎn ü neěe Nɔsesèe tùgba slè.

¹²Wan le gbògba keǒ Tlafinà klee Tlofosà mɔ̀ ü moo nyno ü peěe kbě ü nii konkwa keǒ Koɔn mɔ̀. Wan le gbògba keǒ ně kàan mɔ̀nai Pasè mɔ̀ ɔ̈ moo nynɔ tɔ̀ɔ ɔ̈ peěe kbě ɔ̈ nii konkwa keǒ Koɔn mɔ̀ ke.

¹³Wan le gbògba keǒ Wlufɔ̀ mɔ̀ ɔ̈ Nyesoa sàlaǒo keǒ Ɔɔ konkwaà ɛɛ nunuɛ mɔ̀ plě klee ɔɔ naǎ ɔ̈ nuu kàan wòje naǎ keǒǒ mɔ̀ ke.

¹⁴Wan le gbògba keǒ Asenklìtɔ klee Flekɔ̀n klee Hɔ̀misi klee Patlobà klee Hɔ̀mase plě klee Nyesoa nyopò tùu wùɛ mɔ̀ ü neě uu mɔ̀.

¹⁵Wan le gbògba keǒ Felolòka klee Julìa klee Nɛwliɔ̀ klee ɔɔ mamǔ nyneju Olenpà plě klee Nyesoa nyo wùɛ mɔ̀ ü neě uu mɔ̀.

¹⁶A gbògbaa wan le keà Tentǎn Jǔu wǎn. Tentǎn Jǔu wǎn wùɛ u gbà a wan leò.

¹⁷Ně bǐì Tentǎn Jǔu wǎn ane, bo tlikaeě a chìjoɛɛ nɔkǔ mǒ, a gbɛ̀ɛ nyopòà ü jɛ lěe dɛɛ ploplɛ keǒ noǎà ä tee amoo mɔ̀ ï kwɛɛǒo Tentǎn Jǔ jleě mǒ bo. U tɛ̀n ɛ mǒ keǒ bu nu ɛ nyopò tùu bu kplɛɛǒ uu tè wlò popoɛ kɛn, nyopò taeǒ ba tmɔɔ u mɔ̀.

¹⁸Nyopò doǒ uǔ nu Tentǎn Jǔu konkwa Ɔ̈ moo äa Koɔn. U ni uu chɛ̀ɛ wlòo ble po dɛ ǔ bee nyopò mǒ klě uu chɛtlǐi boɔboɔ win mǒ klee mǒ boo nynɛ̌ kɛn popoɛ win mǒ.

¹⁹Nyopò wùɛ ji ɛle ɛ̈ moo a tùiǒ Nyesoa bo, tèǒ nì kɔn tè ně plɔ blo lo keǒ a jleě mǒ, kɛɛ Ě jlɛ̌ ba ne tɔ̀n mǒ keǒ kàan dɛɛ tè mɔ̀ plě ně jlǎ ba nu dɛ kukǔ.

²⁰Nyesoaà nye ämoo ně bo wnawna Ɔ mi Setɛ̀n ɔ̈ monoo kǔ sìsii klɔ̀ba le waeba pase klě a bobo. Nɛ äa Koɔn Jùsuu wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya.

²¹Timɛtě ɔ̈ klee mǒo sɔ̌n nii konkwa ɔ dbo wan le gbògba klě a mɔ̀. È dɛɛ doǒ nɛ̀ ně bǐì Jùwɛ nyo Lusiǎ klee Jesɔ̀n klee Sosepetà nu.

²²Mǒ Tɔsìɔà ɔ̈ chlěe chněedɛ̌à keǒ Pɔ̀ɔ̌ mɔ̀, Ě gbà a wan le klě Koɔnʼɔ nynɛ̌ wlòmo.

²³Kèɔse dbo wan le gbògba ke klě a mɔ̀, nɔ̀ kɔn mɔ̀ Ě paeà plě kělɔ ɔɔ tà kě Tentǎn Jǔu wǎn wùɛ ü gbèeɔ, è uu chɛ̀ǒ u dbo wan le gbògba ke klě a mɔ̀. È Iwlasètɔ ɔ̈ moo dɛ bo tùɔ̌ keǒ diě mɔ̀ ɔ gbà a wan le. Dɛɛ doǒ nɛ̀ äa bě Kwatɔ̀ nu.

²⁴Nɛ bo äa Koɔn Jùsu Tentǎn Jǔu wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya.

²⁵A nɛ bä po Nyesoaa nynɛ̌ le Ɔ̈ nye amoo kbě ǎ nee kmɔ̌ wòje keǒ kàan tuposà klee tuposàà Ě pee keǒ Tentǎn Jǔ Jùsu jleě mǒ nu ɛɛ boɔboɔ. Tentǎn Jǔ mooa Je Wɛ̌ Dɛ klě jlě fòfoa wlòmo plě Nyesoa po Ɔ pepě mǒ.

²⁶Klě tǐà wlòmo Nyesoa po Ɔ mǒ pepě klě chlechlě win wlòmo ï Ɔɔ wnɔsàɔpo chlěaa plě kmɔ̌ sie Nyesoa tmɔɔ̌ ämo bä nu dakwɛ̌ wùɛ bu ji Ɔɔ tè měne ɛ̈ di ɛɛ numa u mǐ Ɔɔ tè kàan tè po u miǒ Ɔɔ win bo tù.

²⁷Nyesoaa do sosǒ Nɔ̀ kɔn tɔ̀n wùɛ, a nɛ bä bìse Ɔɔ nynɛ̌ le tǐ wùɛ mɔ̀ klě Tentǎn Jǔ Jùsu mǒ, kě bɛ ne!