Read Grebo, Northern Wlǔmɔ 6 Bible Online

Wlǔmɔ 6 - Grebo, Northern bible

Wlǔmɔ 6

¹È ke ä miǐ kɛ dǎ? Deě ä ni kɛ a nɛ bä nee kpni kukwǐ kmɔ̌ ɛ̈ di ɛɛ numa Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ ä mɔ̀ ɛ mǐ kɛn le bebee lee?

²Ɛ se bò nu! Bɛ̌ nu bo kpni kukwǐ bǐ see kɛ̀ ä win kwa kɔn, è mɛ kɔɔ̌n tè ä neě kɛě i slè bo kaǒ?

³A se kɛ li ji ɛ̈ moo tà ä pooa ně dlǒ klě Jùsuu nynɛ̌ wlòmo Ɔɔ kokoɛ̌ɛ kàan noǎ wùɛ nì ä kɔna le?

⁴Bɛ̌ nu bä poo ně dlǒ, ɛ wǒ je keà ä kǒo plě u mǎna ämoo Tentǎn Jǔ kɛn bo u tùa ämoo bo. Dɛǒ nɛ̀ nu ɛ keǒ Tentǎn Jǔ nuaa äa Gbeǐ Nyesoaa kpě sàlaě Ɔɔ kǒla mǒ, kě ɛ nu ke ä mi kmɔ̌ jajlo nema.

⁵Bɛ̌ nu ä klee Jùsu bä nyenymae mǒ wòje klě Ɔɔ kokoɛ̌ mǒ, è sɛjesɛ keǒ Ɔ nuaa Ɔ̌ dǔaa jemǒ kě ä miǎ numa ke.

⁶È ke ä nu ɛɛ jijiɛ nɛ̀ moo ä jaě äa kpni kukwǐ kmɔ̌ dakěà ǐ kɔɔǒ pète bɛ̌ tu jleě i klee Tentǎn Jǔu sɔ̌n ɛ̈ di ɛɛ numa ä mǐ kpni kukwǐ fǒ měne sà äǎ dii kɛ̀ kèiapo tù keǒ i mɔ̀.

⁷Nyu wùɛ ɔ̈ bɔ̌ lɔɔ kmɔ̌ dakǎ, ɔ gblàe le klě kpni kukwǐ slè.

⁸Ke ɛ toon jleě mǒ bo äa kmɔ̌ dakǎǒ ɛ klee Jùsuu sɔ̌n kǒo, ä po i kàan tè ä miǎě Ɔ mɔ̀ nema ke.

⁹Ɛ̈ kɔn ämo ji lii ɛ̈ moo Nyesoa dǔ Tentǎn Jǔ Jùsu jemǒ Ɔ̌ sàě Ɔ kǒla mǒ, Ɔ see kɛ̀ kokoɛ̌ kɔn, ɛ̈ sɛ̀nʼɛ nynɛ̌ kokoɛ̌ see kɛ̀ Ɔ win kwa kɔn de.

¹⁰Tà Ɔ kǒaa, Ɔ kǒa waěe do Ɔ̌ sɔnaě kpni kukwǐi kpě bobo mǒ. È kmɔ̌ǒ Ɔ nee kɛ̀ɛ, Ɔ ne kmɔ̌ keǒ Bɔ nu Nyesoaa konkwa.

¹¹Kě ba nu aa chɛ̀ jejeɛ̌ klě wakǎa doǒ wlòmo ɛ̈ moo a see kɛ̀ lě kpni kukwǐi kpě bobo ne, kɛɛ a kɔn tè wlò popoɛ klě Tentǎn Jǔ Jùsu mǒ ɛ̈ nu ɛɛ ǎ nii Nyesoaa konkwa.

¹²Tèǒ nì kɔn tè aǎ sonwɛǒ kpni kukwǐ mɔ̀ mǒ iǐ kwɛn a win kwa keǒ ba po noǎ kukwǐǒ aa wlò jlɛ̌ɛ nɔkǔ jebo.

¹³Aǎ sonwɛǒ aa chɛ̀ mɔ̀ mǒ keǒ dɛ kukǔ nunuɛ mɔ̀, bǎ ke ɛ ni, è kpni kukwǐi wakǎ kɛnʼǒ a wɛ̀ɛnʼě. Kɛɛ a wɔ̀ɔnʼě Nyesoaa wakǎ kɛn, è ba nye aa chɛ̀ Nyesoa a mǐ jebo siǐn noǎa nu keà nyu tɔ̀ɔ mii numa ɔ̈à Nyesoa sà lěe kǒla mǒ ɔ̈ nee kmɔ̌.

¹⁴Tè kɔn tè kpni kukwǐ ně kwɛn aa kmɔ̌ neneɛ win kwa nɛ̀ moo a slě teteǎ bobo ne, a neeě Nyesoaa wlòo jlajlǎ dɛ bobo ɛ̈ɛ̌ sà Ɔɔ wlò kǔ mǒ keǒ a mɔ̀.

¹⁵Klě tǐà wlòmo ä neě Nyesoaa wlòo jlajlǎ dɛ ɛ̈ɛ̌ sàa wlò kǔ mǒ bobo ä slě teteǎ bobo ne, ɛ sɛ̀n kɛ nynɛ̌ nɛ̀ kɔn tè ä mǐ kpni kukwǐ nu le? Ɛ se bò nu!

¹⁶A se kɛ i ji ɛ̈ moo bɛ̌ nu bǎ wɔɔn ɛ kɛn keǒ ba nuu nyu konkwa mɔ̀ klee ba tùǒ ɔ bo, a moo nyuǒ ɔɔ kèi le? Bɛ̀ ba moo kpni kukwǐi kèiapo a mǐ kǒ ɔ̀ɔ̌ ba moo Nyesoaa nyebajle a mǐ jebo siǐn nyo tù.

¹⁷Tǐ gbeià sìnʼaa a mooa kèiapo keǒ kpni kukwǐ mɔ̀, kɛɛ ä pe Nyesoa tàto keǒ ba di aa wlè wùɛ kwlǎ mǒ sà ba diǒ Ɔ bo tù, ba mǒ jebo siǐn kmɔ̌ǒ u teea amoo ne.

¹⁸A pe Nyesoa tàto Bɔ di a bo jle klě kpni kukwǐ slè, ii tè klě tǐà wlòmo a moo jebo siǐn kèiapo.

¹⁹Winʼà aa wùɛ a pee nìà Ě pe Ě tmɛɛ̌ amo. Mɛ̌oǒ joo nɛ̀ moo a se kbě ja ne. Klě tǐà sìin wlòmo a nyea aa chɛ̀ kpni kukwǐ ǎ mooa ii kèiapo keǒ dɛ kukǔ nunuɛ mɔ̀ ǎ wala Nyesoaa teteǎ. Dɛɛ doǒ nɛ̀ ɛ mono a nye aa chɛ̀ Nyesoa ba moo Ɔɔ kèiapo, a mǐ kàan noǎ nu keǒ jebo siǐan mɔ̀ ɛ̈ di ɛɛ numa a mǐ ngmà je ne.

²⁰Tà a mooaa kpni kukwǐi kèiapo, jebo siǐan sea a win kwa kɔn.

²¹Mɛ ɛ peě kɛǒ a bo keǒ ba nu imo noǎ kukwǐǒ ï klě tǐà wlòmo ï nii amoo tònwe? Noǎ kukwǐi nunuɛɛ dlǒ chlɛ̀chlɛ moo kokoɛ̌!

²²È klě tǐà wlòmo Nyesoa sà a kpni kukwǐi kpo bo Ɔ̌ gblà amo ǎ moo Ɔɔ kèiapo. Bɛ̌ nu bǎ ne ngmà je ne kmɔ̌, ɛ miǒ a dɛ bo poba ɛ̈ kɔn dlǒ chlɛ̀chlɛ mi amoo kmɔ̌ sie fònfno nyema.

²³Kokoɛ̌ nɛ̀ moo snǒ sàe dɛ kpni kukwǐ mi a nyema. Kɛɛ Nyesoaa nyee dɛà Ɔ nye ämoo ɛ̈ see dɛ po nɛ̀ moo kmɔ̌ sie fònfno ɛ̈ diiě Tentǎn Jǔ Jùsu mǒ Ɔ̈ moo äa Koɔn.