Read Grebo, Northern 1 Kwnɛtiɛ̌ 10 Bible Online

1 Kwnɛtiɛ̌ 10 - Grebo, Northern bible

1 Kwnɛtiɛ̌ 10

¹Ně bǐì Tentǎn Jǔu wan ane, Ě jlɛ̌ bi beě a wlòmo ke äa gbeǐpò ü nanaa Mɔ̀sě de uu wùɛ Nyesoaa nukpǎ nia uu jǐ mɔ̀ tùtuɛ ǔ bɛ̌aa Jbǒ Chǒ tìe tɛɛ tɛɛ.

²Klě nukpǎǒ ɛ klee Jbǒ Chǒo tǐǒ wlòmo uu wùɛ u klee Mɔ̀sě nua dɛɛ do.

³Uu wùɛ nù dia Sùsu digbaǐi doǒ.

⁴Uu wùɛ nù nǎna Sùsu něe doǒ. Mɛ kɔɔ̌n tèǒ joo nɛ̀ moo klě sùsu Seɔ̌ǒ wlòmo klě ně sɔnaě mǒ nɛ̀ uu wùɛ u nǎna. Ɛmo Seɔ̌ǒ Nɛ̀ nɛa u de, è Seɔ̌ǒ Ɛ moo Nyesoaa Tentǎn Jǔ.

⁵Kɛɛ Nyesoaa wlò sea uu dɛ fòfoa kɛn bloo lo, ii tè Ɔ dbǎla u klě kpatekpǎ blǒ kɛn.

⁶Noǎǒ kpalaa tùɔn nì tmɛɛ̌ kekɛɛ ämo ɛ̈ di ɛɛ numa äǎ di noǎ kukwǐi dlǒ le sìɛnsiɛn doǒ kɔn wòje ke u nuaa.

⁷Tèǒ nì kɔn tè baǎ sɛ̀ nǔkpuǐi wɛ̀ wòje ke uu tìe niaa plě wòje ke ɛ nuu chleěa klě Nyesoaa win wlòmo ï dɛ̌ bòo ɛ̈ moo, “U nea bo ǔ dia dɛ ǔ nɛ̌na ǔ duǐa jemǒ ǔ nia se wòn mɔ̀c wɛ̀ kmɔ̌ keǒ nǔkpuǐ jemǒ.” (Ex 32.6)

⁸Ä se kɔn bä poě äa chɛ̀ klě gblà kmɔ̌ taeǒ slè wòje ke uu tìe nuaa ii tè uu taslěwɛɛ wlò tùo tan (23,000) kǒaa klě chnɛ̀ jlǒ waěe do wlòmo.

⁹Ä se kɔn bä tɛ̀nʼě Koɔnʼɔ wlò dbadbǎ měne wòje keǒ uu tìe nuaa, ii tè smea dedbǎea uu le.

¹⁰Baǎ boboɛɛ wan le wòje ke uu tìe niaa, ii tè Nyesoa dboaa kokoɛ̌ɛ najiǒpòi ɔ̌ sùea uu gbè.

¹¹Noǎǒ ï kpalaa tùɔn keǒ u jleě mǒ nì moo ɛɛ jboo dɛ keǒ ä mɔ̀ plě ï chleěa ï mǐ ä wlò je wa ke bä nuu kmɔ̌ neneɛ ɛ̈ kɔn kmɔ̌ dii dlǒ chlɛ̀ba.

¹²Tèǒ nì kɔn tè bɛ̌ nu nyu wùɛ bɔ̌ jě lɛ klě ɔɔ chɛ̀ mǒ ɛ̈ moo ɔ nyna bo klě tè wlò popoɛ mǒ, è bɔ gbɛ̀ɛ le ɔɔ̌ se wɔ̀ɔn be.

¹³Měne tèntɛnʼǒ bee amoo jebo ɛ se aa do, ɛ wlɛǒ bo keǒ nyopò wùɛ mɔ̀ ke, kɛɛ Nyesoa moo wlò kpae Nyesoa keǒ a mɔ̀. È Ɔ slě měne tèntɛnʼà ɛ̈ a slě wɔ̀ ba nynaa jebo mɔ̀ mǒ sɔnma mu ɛ se a jebo beeba mu. Sɔ̌noka, měne tèntɛn wùɛ ɛ̈ miěe diba Ɔ mi ɛ numa a mǐ snǔ jě a miě ɛ slè mǒ sɔn ɛ̈ di ɛɛ numa a miě ɛ wɔ̀ keǒ ba nyna ɛ jebo.

¹⁴Tèǒ nì kɔn tè ně mǒ noɛɛ nyopò ane, a siǒ aa nǔkpuǐi wɛ̀ sèsaǒ bo.

¹⁵Ě boɛě a mɔ̀ wòje tɔ̀n kɔn nyo. A chechlǎ dɛà Ě boɛɛ klě aa chɛ̀ wlò jleě.

¹⁶Mǒ naě kàeǒ ä naee mǒ keǒ Koɔnʼɔ wìti dɛ dila mǒ ɛ̈ kɔn tè ä pee Nyesoa tàto, a se kɛ i ji ɛ moo Tentǎn Jǔu nymɔǒ ä sèsɛɛ ɛ kwete měne le? È flɔ̌ɔǒ ä waa ä dii, a se kɛ i ji ɛ moo Tentǎn Jǔu blǒ fǒǒ ä sèsɛɛ ɛ kwete měne le?

¹⁷Ke ɛ toon jleě mǒ bo ɛ̌ monoo flɔ̌ɔ kloo do, è äa wùɛà ä moo blǒ fǒo do. Mɛ̌oǒ joo nɛ̀ moo flɔ̌ɔ kloo doǒ nɛ̀ ä ple klě äa chɛ̀ slè.

¹⁸A tanʼǒ Jùwɛ nyoà Nyesoaa Sùsu slě mǒ ne mɔ̀le. Bɛ̌ nu bǔ ke chɔ̀no digbaǐǒ di, è u kɔnʼǒ chɔ̀no tògbeǒ wakǎ jleě mǒ.

¹⁹È mɛ Ě sɛ̀ɛ̌n kɛ nynɛ̌? Ɛ sɛ̀n kɛ nynɛ̌ dɛ u sɛ̀ɛ lee nǔkpuǐ bɔ̀ je ɛ kwɛě jǐ mǒ dɛ le ɔ̀ɔ̌ deě imo nǔkpuǐi chɛ̀ǒ i kwɛě jǐ mǒ dɛ?

²⁰Òooǒn, dɛ Ě boɛɛ nɛ̀à, noǎǒ u pie lee chɔ̀noǒ, ɛmo chɔ̀noǒ u pie ɛ je sìsi kukwǐ ɛ̈ see Nyesoa, è ně jlǎ ba be u kɛn ba kɔnʼě i wakǎ jleě mǒ keǒ sìsi kukwǐǒ mɔ̀!

²¹A slě wɔ̀ ba ke Koɔnʼɔ mǒ naě kàeǒ mǒ nɛɛ ně plě ba naě kǔ sìsii kàe mǒ ke klě tǐi doǒ wlòmo. A slě wɔ̀ ba di dɛ keǒ Koɔnʼɔ di fuo kɛn plě klě tǐi doǒ wlòmo ba di dɛ keǒ kǔ sìsii di fuo kɛn.

²²Ä tɛ̀n kɛ ɛ mǒ keǒ bä poě Koɔn chea mǒ le? Ä ne kɛ mǒ kbě ä sìnʼǒ Ɔ mǒ le?

²³È kě a dɛ̌ ɛ̈ moo, “Fɔ̌ nyee äne keǒ bä nu dɛ wùɛ,” kɛɛ ɛ se noǎ wùɛ i se kàan nu keǒ nyopò tùu mɔ̀. I moo kàan tè fɔ̌ nyee äne keǒ bä nu dɛ wùɛ, kɛɛ ɛ se noǎ wùɛ iǐ sɛ̀ɛ nyopò tùu mɔ̀ keǒ bu kun klě tè wlò popoɛ mǒ.

²⁴Nyu wùɛ se je blɛɛ le bɔ wɔ̀ɔn ɔɔ chɛ̀ɛ kàan dɛɛ tè kɛn. Ɔ blɛɛ je bɔ wɔ̀ɔn nyopò tùu tè kɛn.

²⁵È ɛɛ jboo dɛ nɛ̀à, a di nmi wùɛ u plee klě soaa plooa mǒ, aǎ gbɛ̀ wan le ɛ̈ moo, “Deě nmiǒ ɛ sàe kɛ nǔkpuǐ bɔ̀ je le?” Plě aǎ sonwɛǒ aa wlè mɔ̀ mǒ iǐ sɛkɛ jǐ měne.

²⁶Mɛ kɔɔ̌n tèǒ joo nɛ̀ moo kě Nyesoaa win dɛ̌ i je, “Kmɔ̌à klee noǎ wùɛà neɔ ɛɛ mɔ̀, Koɔn Nɔ̀ kɔn ni.” (Ps 24.1)

²⁷Bɛ̌ nu nyuà see Nyesoaa tè kàan tè po bɔ̌ da a dɛ diba klě ɔɔ tà, bǎ jlɛ̌ lɛ è ba muě, a di dɛ wùɛ ɔ miǒ amoo jemǒ bo tùba aǎ gbɛ̀ wan le ɛ̈ moo, “Deě dɛà ɛ sàe kɛ nǔkpuǐ bɔ̀ je?” Plě aǎ sonwɛǒ aa wlè mɔ̀ mǒ iǐ sɛkɛ jǐ měne.

²⁸Kɛɛ bɛ̌ nu nyu wùɛ bɔ̌ tmɔɔ̌ amo ɛ̈ moo, “Nmià tàà u sàe ɔ nǔkpuǐ bɔ̀ jeò,” è baǎ di ɛ keǒ nyuǒ tmɔɔ̌ amoo ɔɔ kàan dɛ klee ɔɔ tè le jbojbɛɛ tè mɔ̀.

²⁹Ɛ se aa tèe de jbojbɛɛ tè ně boɔ li, kɛɛ ɔmoǒ ɔɔ tèe de jbojbɛ nɛ̀ kɔn tè Ě boɛɛ kɛn. Tǐ tìi tà dɛà nɛ̀ aa nyu mi mǒ chɛtlǐiba ɛ̈ moo, “Mɛ kɔɔ̌n kɛ tè nyuà kɔn tè le jbojbɛ wɛ̀ɛ kbě kɛn ɔ kɛɛ̌n kɛ mǒ je bo bɔ̌ɔɔ̌ dɛà Ě jii ɛ̈ nynaǒo bo nunuɛ?

³⁰È bɛ̌ nu bo pe Nyesoa tàto keǒ dɛà Ě dii mɔ̀, è mɛ kɔɔ̌n tè Ě sonwɛɛ̌ kɛǒ ně chɛ̀ mɔ̀ mǒ u pe mǒo mɛ le keǒ didi dɛà kɔn tè Ě pee Nyesoa tàto mɔ̀?”

³¹Ii tè dɛ wùɛ a mii diba klee a mii nǎma plě a mii numa a nu ii wùɛǒ i mǐ Nyesoa tè jǐ boaboǎ nye.

³²Aǎ ni dɛ ɛ̈ mii nyopò tùu snǎma, jà Jùwɛ nyo klee kuodakwɛ̌ plě klee nyopòà ü kɔn lěe Nyesoa wǎn slè.

³³A nu dɛɛ doà Ě nii. Noǎ wùɛà Ě nii Ě tɛ̀n ɛ mǒ keǒ bo bloo nyu wùɛɛ plɔ. Ně wɔ̀ɔn ně chɛ̀ɛ kàan dɛɛ tè kɛn, kɛɛ Ě wɛ̀ɛn kàan dɛɛ tè kɛn keǒ nyopò tùu mɔ̀ ɛ̈ di ɛɛ numa u mǐ wa klě kpni kukwǐi plɔɔ tu kɛn bo maěa bobo.