Read Grebo, Northern 1 Kwnɛtiɛ̌ 11 Bible Online

1 Kwnɛtiɛ̌ 11 - Grebo, Northern bible

1 Kwnɛtiɛ̌ 11

¹Dɛɛ doà Ě nii Ě sɛ̀ lěe Tentǎn Jǔu fì le nɛ̀ ba nu a sàě ně fì le.

²Ě pe aa nyneǎ le keǒ ně tè bi diǒ aa wlò jleě be tǐ wùɛ mɔ̀ klee noǎà Ě tee amoo ba diǒ i bo tù wòje ke Ě nu i amoo teea.

³Ě jlɛ̌ ba kɔn ɛ jijiɛ ɛ̈ moo Tentǎn Jǔ Nɔ̀ moo Dlǒ keǒ jbɛju wùɛ mɔ̀. È jbɛju nɔ̀ moo dlǒ keǒ nynɔ mɔ̀. È Nyesoa Nɔ̀ moo Dlǒ keǒ Tentǎn Jǔ mɔ̀.

⁴Jbɛju wùɛ ɔ̈ miěe Nyesoa mɔ̀ boɔba klee ɔ̈ mii Nyesoaa win boɔba ɔ̈ mii dɛ dlǒ tùba, è nyuǒ moo ɔɔ Dlǒ Nɔ̀ǒ ɔ seǒ tù.

⁵Dɛɛ doǒ nɛ̀ ɛ mono, nynɔ wùɛ ɔ̈ miěe Nyesoa mɔ̀ boɔba ɔ̀ɔ̌ ɔ̈ mii Nyesoaa win boɔba ɔ̈ see dɛ dlǒ tùba mu, è nyuǒ moo ɔɔ dlǒ nɔ̀ǒ ɔ seǒ tù. È ɔ jě lɛ ɛ̈ moo ɔ klee ɔ̀ boae kɛn. Dɛɛ doǒ nɛ̀ ɛ mono, nynɔà mi ɔɔ chɛ̀ɛ dlǒ chlěba ɛ moo tònwe dɛ keǒ ɔ mɔ̀.

⁶Bɛ̌ nu bo nynɔ bɔ̌ se dɛ dlǒ tù, è bɔ chlě ɔɔ dlǒǒ. Kɛɛ ke ɛ toon jleě mǒ bo ɛ̌ monoo tònwe dɛ keǒ nynɔ bɔ chlě ɔɔ moamoa dlǒ, bɔ tù dɛ dlǒ.

⁷Jbɛju se je blɛɛ le bɔ tù dɛ dlǒ klě Nyesoaa wɛ̀ sàla mǒ. Mɛ kɔɔ̌n tèǒ joo nɛ̀ moo Nyesoa nu jbɛju ɔɔ kmɔ̌ bɛ wǒ Ɔ je plě klee Ɔɔ tè jǐ boaboǎ. Kɛɛ nynɔ nɔ̀ moo tè jǐ boaboǎ keǒ jbɛju mɔ̀.

⁸Mɛ kɔɔ̌n tèǒ joo nɛ̀ moo Nyesoa seaě jbɛju nynɔ mǒ sà, kɛɛ nynɔ nɔ̀ Ɔ sà lě jbɛju mǒ.

⁹Plě Nyesoa sea jbɛju nu keǒ bɔ miǎǒ nynɔ dɛ bo po, kɛɛ nynɔ nɔ̀ nuua keǒ bɔ mǐaǒ jbɛju dɛ bo po.

¹⁰Dɛǒ nɛ̀ kɔn tè nynɔ bɔ tù dɛ dlǒ klě Nyesoaa wɛ̀ sàla mǒ ɛ mǐ ɛ tee le ɛ̈ moo ɔ neeě jbee kbě bobo. Bɔ nu dɛ ɛ mǐ jboo dɛ tù keǒ najiǒpò mɔ̀.

¹¹È kaǒ klě nynɔ klee jbee Nyesoa dɛ nunuɛ mǒ, nynɔ kpae ɔɔ jbe wlò, è jbe kpae ɔɔ nynɔ wlò.

¹²Mɛ kɔɔ̌n tèǒ joo nɛ̀ moo nynɔ sɔnaě jbɛju mǒ, è nynɔ nɔ̀ kmàe jbɛju, noǎ wùɛǒ i sonwɛě mǒ Nyesoa mɔ̀.

¹³Aa chɛ̀ a chechlǎ lɛ a mǐ ɛ jě, ɛ wɛɛn kɛǒ le keǒ nynɔ bɔ keě Nyesoa mɔ̀ boɛ bɔ se dɛ dlǒ tùe?

¹⁴Tùonyuu kmɔ̌ nɛ̀ tee ɛ ɛ̈ moo ɛ moo tònwe dɛ keǒ jbɛjuu moamoa dlǒ bɛ tmɔ le,

¹⁵kɛɛ ɛ mooǒ tùtuɛ keǒ nynɔɔ moamoa dlǒ bɛ tmɔ.

¹⁶È bɛ̌ nu bo nyu wùɛ bɔ̌ jlɛ̌ bɔ chɛtlǐi liǐ jè keǒ ɛmo dɛǒ jleě mǒ, dɛ Ě kɔn bo sèsae ɔɔ wlòmo nɛ̀ moo ämoà klee Nyesoa wǎn tùu ä se blětà dɛ tɛ̀ɛ kɔn bɛ̈ nee dɔ̌ keǒ ɛmoǒ kɛn.

¹⁷È klě tee noǎà tìià wlòmo Ě se aa nynɛ̌ le po. Mɛ kɔɔ̌n tèǒ joo nɛ̀ moo aa Nyesoaa wɛ̀ sèsa ɛɛ̌ nu nyopò tùu kàan dɛ mǒ, kɛɛ ɛ sǐ u mǒ bo.

¹⁸Nyane dɛ Ě wɔ̌nʼɔ nɛ̀ moo bǎ bò le klě a Nyesoaa wɛ̀ sàla mǒ, a plee ɛ tàkpɛ̌ ǎ wònwɛɛ je, è Ě po i mǒ kàan tè tèà Ě wɔ̌nʼɔ ii tìe moo kàan tè.

¹⁹Ě wɔ̌n dɛà ɛ̈ moo a jě lɛ ɛ̈ moo ɛ wɛɛnʼǒ le ba nuu ɛ tàkpɛ̌ ɛ̈ di ɛɛ numa nyopòǒ kɔnʼǒo tùtuɛ klě a slè ɛ mǐ ɛ tee le.

²⁰Tèǒ nì kɔn tè bɛ̌ nu bǎ bò le, a jě lɛ ɛ̈ moo Koɔnʼɔ wìti didi dɛǒ a di, kɛɛ sɛjesɛ ɛ se Koɔnʼɔ wìti dɛ aǎ di ɛ.

²¹Mɛ kɔɔ̌n tèǒ joo nɛ̀ moo bo tǐ bǐ nyniǒ keǒ ba di Koɔnʼɔ wìti dɛǒ aǎ fofoo lo ǎ di dɛ, ii tè sàno ke tìe ni, è tìe tùu nmɔ ke u ni.

²²A se kɛ keǐ kɔn ï kɔn bobo ba diěe dɛ a miǐ nǎ le? Mɛ kɔɔ̌n tè a sɛ̀ɛ leě kɛǒ Nyesoa koǔu tè le, nyopòà see dɛɛ sàla kɔn ǎ bɛtɛ̌ɛ leě u je? È mi a je bo boɔɔ̌ kɛ keǒ a jleě mǒ? Bo po kɛ aa nyneǎ le keǒ dɛ a nii ɛɛ tè mɔ̀ le? Ě se ɛ numa mu!

²³Mɛ̌oǒ joo nɛ̀ moo dɛǒ nɛ̀ sɔnʼě Koɔn mɔ̀ mǒ Ě chěn plě Ě tee amo ɛ̈ moo tǒn jlǒ waěǒ kɔn mɔ̀ u sàea lěe äa Koɔn Jùsu bo demǒ, Ɔ dǔa flɔ̌ɔ tìe mǒ

²⁴Ɔ̌ pea Nyesoa tàto keǒ ɛ mɔ̀ Ɔ̌ klǎla ɛ wan le, è kě Ɔ dǎla Ɔɔ mɔ̀ cheěn nyo je Ɔ je, “Dɛà nɛ̀ moo Ně fǒ ɛ̈ kɔnʼǒ a mɔ̀, a di ɛ ɛ̈ di ɛɛ numa Ně tè miě a wlòmo be.”

²⁵Tà u wɔ̀laa wìti dɛ le, dɛɛ doǒ nɛ̀ Ɔ nua Ɔ̌ dǔa mǒ naě kàe mǒ ɛ̈ jǐa lěe, kě Ɔ dǎla Ɔ je, “Mǒ naě kàeà nɛ̀ moo Nyesoaa kuo win jajle Ɔ poo keǒ tùonyopo wùɛ mɔ̀ ï Ně nymɔ poo loo kòo kɛn. Tǐ wùɛ mɔ̀ ba nǎ nɛ Ně tè miě a wlòmo be.”

²⁶Tǐ wùɛ mɔ̀ bǎ di flɔ̌ɔǒ bǎ naě kàeǒ mǒ, nɛ̀ tmɛɛ̌ nyopò wùɛ le ke Koɔn nuu kokoɛ̌ ɛ mǐ ɛ kpa kpa Ɔ miǎ de di.

²⁷Tèǒ nì kɔn tè nyu wùɛ ɔ̈ mii flɔ̌ɔǒ diba plě ɔ̈ mii Koɔnʼɔ kàeǒ mǒ naěma klě slě ɛ mɔ̀ kɔn tǔn wlòmo, kpni kukwǐi tè jɛɛa nɛ̀ neǒ ɔ kɛn keǒ Koɔnʼɔ fǒ klee Ɔɔ nymɔ jleě mǒ.

²⁸Nyu wùɛ bɔ chechlǎ ɔɔ chɛ̀ teěn teěn plě ɔ mǐ flɔ̌ɔǒ ɛɛ tìe di plě ɔ mǐ Koɔnʼɔ kàeǒ mǒ naě ne.

²⁹Mɛ kɔɔ̌n tèǒ joo nɛ̀ moo nyu wùɛ ɔ̈ mii flɔ̌ɔǒ diba ɔ̈ mii kàeǒ mǒ naěma klě slě ɛ mɔ̀ kɔn tǔn wlòmo plě ɔ̈ slěe Koɔnʼɔ fǒo tè mɔ̀ kɔn, bɔ̌ nu ɛmo dɛǒ, è Nyesoaa tè tùtuɛǒ ɔ jɛ lɔɔ chɛ̀ bobo.

³⁰Dɛǒ nɛ̀ ni ɛ aa dɛ fòfoa kbě wɛ̀ a ja le plě aa tìe kmɛ plě aa tìe kwekwěe le.

³¹Bɛ̌ nu bä chechlǎ äa chɛ̀ klekle, è Nyesoa se ä tè jɛɛba mu.

³²Kɛɛ bɛ̌ nu bo Nyesoa Bɔ̌ maěǒ äa plɔ tu kɛn bo klě tǐà wlòmo, è Ɔ peǒ ä mɔ̀le snǔ wòje Ɔɔ jlǔ panpě ɛ̈ di ɛɛ numa Ɔɔ̌ diǎ ä nyopòà see Nyesoa ji kɛn bo mǎ Ɔɔ̌ diǎ ä kokǒ wun kɛn bɛ̌.

³³Tèǒ nì kɔn tè ně bǐì Tentǎn Jǔu wǎn ane, bǎ bò le keǒ ba di Koɔnʼɔ wìti dɛ, a fofoo lo.

³⁴Bɛ̌ nu aa nyu sàno bɛ̌ ke ɔ ni, bɔ di dɛ klě koǔ bo ɛ̈ di ɛɛ numa bǎ bò le, Nyesoa Ɔɔ̌ seǒ ɔɔ plɔɔ tu kɛn bo maě ne. Bɛ̌ nu bo diǎ a jebo chèba, Ě miǎ a tee noǎ tìi tmɔɔ̌ma.