Read Grebo, Northern 1 Kwnɛtiɛ̌ 15 Bible Online

1 Kwnɛtiɛ̌ 15 - Grebo, Northern bible

1 Kwnɛtiɛ̌ 15

¹Ně bǐì Tentǎn Jǔu wǎn ane, Ě jlɛ̌ bi beě a wlò jleě Nyesoaa kàan tuposàà Ě poa amoo je plě a blěaǒo mɔ̀ kwa ɛ̈ a nynaa kɛn bo klě tǐà wlòmo.

²Bɛ̌ nu bǎ kmeǒ dɛǒ Ě boɔla amoo je mɔ̀ bo kaǒ, è a wa le klě kpni kukwǐi plɔɔ tu kɛn bo maěa bobo. Bɛ̌ nu bǎ se ɛ nu, è aa tè wlò popoɛǒ ɛ se dɛ nynɛ̌ sɛ̀nma mu.

³Dɛà kɔn tè kmaa u sèsae mǒo wlòmo plě Ě sèsaea amoo wlòmo nɛ̀ moo Tentǎn Jǔ kǒa keǒ äa dɛ kukǔ mɔ̀ wòje keǒ Nyesoaa win nu nii boɔboɔ.

⁴È u tùa Ɔ bo plě Nyesoa dǔa Ɔ jemǒ klě chnɛ̀ jlǒ wěe tan nenɛ wlòmo keǒ Nyesoaa win dɛ̌ɛ.

⁵Ɔ woǒa Pitɛ̌ je, è Ɔ woǒa Ɔɔ mɔ̀ cheěn nyoo pù tùo sɔ̌n wùɛ je.

⁶Plě Nyesoa nyo ü neaǒo tàa do ü sìnʼaa hɔ̀ndlowɛɛ m̀m kɛn nù Ɔ woǒa je. Uu dɛ fòfoa neě jè kmɔ̌, kɛɛ uu tìe kǒ lo.

⁷È Jìmǐse jěa Ɔlo plě Nyesoaa tuposà kpa nyo wùɛ ǔ jěa Lɔ ke.

⁸Demǒ bɔɔ̌ dɛ nɛ̀ moo ɛ sea wlò tɔɔn no wòje keà nynɔ kwɛnʼɛ jijlǎeà ɔ̈ kɔn dǐa di tǐ seǒo nyni, kě Ɔ nuaǎ je woǒa ke.

⁹Mǒà ně tè se kma i seǒ Nyesoaa tuposà kpa nyo wùɛ tùuǒ mǒ sìn plě Ě seǒ le wɛɛn ne keǒ bu dae leě Nyesoaa tuposà kpa nyuu chɛ̀. Mɛ kɔɔ̌n tèǒ joo nɛ̀ moo Ě tèa Nyesoa wǎnʼa tè mɔ̀.

¹⁰Kɛɛ Nyesoa noɛɛ neě mǒ no, tèǒ nì kɔn tè Ɔ poěě tǔnʼà wlòmo. Ɔɔ mǒ noɛnoɛ nu dɛ fòɛ keàǎ jleě mǒ, nɛ̀ kɔn tè Ě peě kbě bo nu konkwa jakǎ bɛ sìnʼǒ Nyesoaa tuposà kpa nyo wùɛ tùuǒ mǒ. Sɛjesɛ ɛ se mǒ ně nu konkwaǒ, ɛ moo Nyesoa Ɔ̌ noɛɛ neě mǒ Ɔ̌ ni konkwaǒ klěě mǒ.

¹¹Ii tè bɛ̌ nu bo ke imo winʼǒ boɛ ɔ̀ɔ̌ bɛ̌ moo Nyesoaa tuposà kpa nyo tùuǒ bǔ ke i boɛ, ä boɛɛ kɛn dɛɛ do, è nɛ̀ kɔn tè a po kàan tè.

¹²Ke ɛ toon jleě mǒ bo ä boɛɛ Nyesoaa win ɛ̈ moo Tentǎn Jǔ dǔǎ jemǒ Ɔ̌ sɔnaě kǒla mǒ, è mɛ kɔɔ̌n tè aa tìe tùu je nyu bɔ̌ kǒǒ kɛ ɔ seǎa jemǒ dǔba mu?

¹³Bɛ̌ nu bo kokǒ nyopò bǔ seǎ jemǒ dǔba mu, è ɛ sɛ̀n nynɛ̌ Tentǎn Jǔ sea jemǒ dǔ.

¹⁴Bɛ̌ nu Tentǎn Jǔ Bɔ̌ sea jemǒ dǔ, è winʼà ä boɛɛ i moo chɔǔchɔǔ ä boɛ lɛ. È aa tè wlò popoɛ nu flo ke.

¹⁵Bɛ̌ nu sɛjesɛ bo Nyesoa Bɔ̌ seeǎ kokǒ nyo jeměne dǔba mu plě bä boɔ li ɛ̈ moo Nyesoa dǔa Tentǎn Jǔ jemǒò, è tè kme ä ne keǒ senʼǒ ä tmɛ̌ɛ mɔ̀ keǒ Nyesoa jleě mǒ.

¹⁶Mɛ kɔɔ̌n tèǒ joo nɛ̀ moo bɛ̌ nu bo Nyesoa Bɔ̌ seǎ kokǒ nyo jemǒ dǔba mu, è Ɔ sea Tentǎn Jǔ jemǒ dǔ ke.

¹⁷È bɛ̌ nu Tentǎn Jǔ Bɔ̌ sea jemǒ dǔ, è aa tè wlò popoɛ se dɛ kɛn bo nyna plě a mǎaǎ jè le klě aa dɛ kukǔ slè.

¹⁸È dɛ ɛmoǒ ɛ sɛ̀nʼɛ nynɛ̌ ke nɛ̀ moo Tentǎn Jǔu kàan tè po nyoǒ kǒaa u mǎ ne.

¹⁹Bɛ̌ nu aa Tentǎn Jǔ wlò je kuuan bɛ̌ nu kàan kělɔ kmɔ̌à ä neɔɔ mɔ̀ sosǒ plě bo kmɔ̌ tɛ̀ɛ bɛ̌ seǎě diba mu, è ämo Tentǎn Jǔu wǎn wɔle bi nu ämo ɛ miǒ nyopò tùu mǒ sìn.

²⁰Kɛɛ dɛà nɛ̀ moo kàan tè ɛ̈ moo Tentǎn Jǔ dǔa jemǒ Ɔ̌ sɔnaě kǒla mǒ. Nɔ̀ moo klekle Nyu Ɔ̈ sɔnaě kǒla mǒ plě ɛ̌ tee ɛ ɛ̈ moo nyopò wùɛ ü kǒo u mi jemǒ dǔba ke.

²¹Nyuu do nɔ̀ jaě kokoɛ̌ keǒ nyopò wùɛ mɔ̀, dɛɛ doǒ nɛ̀ ɛ mono, Nyuu do Nɔ̀ jaě je měne duduɛ̌ keǒ nyu bɔ sɔnʼě kǒla mǒ keǒ nyopò wùɛ mɔ̀.

²²È keǒ ɛ nuu nyopò wùɛ ü kwɛ lěe Ɛdɛ̌mo mǒ bo ǔ kǒo, dɛɛ doǒ nɛ̀ ɛ mono, nyopò wùɛ ü kwɛ lěe Tentǎn Jǔ mǒ bo Ɔ miǎ u numa u miǎ kmɔ̌ ne.

²³Kɛɛ nyu wùɛ miǎ jemǒ dǔba klě mɔ̀le kenkɛɛ tǔn mǒ. Tentǎn Jǔ Nɔ̀ mooa klekle Nyu Ɔ̈ sɔnaě kǒla mǒ, Bɔ̌ diě de, Ɔ miǎ Ɔɔ mɔ̀ na nyo wùɛ jemǒ dǔba.

²⁴È plě kmɔ̌à ɛɛ dlǒ chlɛ̀chlɛ miǎǒ nyni. Klě tǐǒ wlòmo Tentǎn Jǔ miǎ win kwa kɔn sìsi wùɛ klee sìsiǒ kpě neěe kwete mǒ wan duba Ɔ miǎ Ɔɔ deplěǒ Nyesoa nye Ɔ̈ moo Ɔɔ Gbeǐ.

²⁵Tentǎn Jǔ kɔn Bɔ kɔn win kwa ɛ mǐ ɛ kpa kpa Nyesoa miǎ Ɔɔ jlae nyo wùɛ nu u miǎě Ɔ bobo be.

²⁶Demǒ bɔɔ̌ jlae nyu Ɔ miǎa gbè sùeba nɔ̀ moo kokoɛ̌.

²⁷Nyesoaa win je Nyesoa miǎě Ɔ noǎ wùɛ bobo poba, ɛmoǒ ɛ gbàe kɛn le chnɛ̀ ɛ̈ moo, “Noǎ wùɛ i beě Ɔ bobo,” (Ps 8.6) ɛ̈ see nynɛ̌ sɛ̀n ɛ̈ moo Nyesoa be noǎ wùɛǒ kɛn Ɔ̈ poě i Tentǎn Jǔ bobo.

²⁸Bɛ̌ nu noǎ wùɛ bǐ beě Nyesoaa Jǔ bobo, è Ɔ miǎě Ɔɔ chɛ̀ Nyesoa bobo poba Ɔ̈ poě Ɔɔ noǎ wùɛ bobo ɛ̈ di ɛɛ numa Nyesoa mǐǎ noǎ wùɛ win kwa kɔn.

²⁹Bɛ̌ nu ɛmo dɛà bɛ̌ se kàan tè, è mɛ nyopò miǐ kɛ lě ɛ wlòmo sàba keǒ bu poo ně dlǒ keǒ kokǒ nyo mɔ̀? Bɛ̌ nu sɛjesɛ bo kokǒ nyo bǔ seǎ je měne dǔba mu, è mɛ kɔɔ̌n tè u pee leě kɛ ně dlǒ keǒ u mɔ̀?

³⁰A tanà ämo Nyesoaa tuposà kpa nyo mɔ̀le, mɛ kɔɔ̌n tè ä peě kɛě äa chɛ̀ jǐlenymi noǎ slè tǐ wùɛ mɔ̀?

³¹Ně bǐì Tentǎn Jǔu wǎn ane, keǒ sɛje ɛ nuu kàan tè pooa ɛ̈ moo Ě kun le kɛn keǒ aa tè mɔ̀ klě Tentǎn Jǔ Jùsu mǒ äa Koɔn, kě Ě ni a wlòmo sèsae ɛ̈ moo kokoɛ̌ poo loǒ je ja klě chnɛ̀ jlǒ waě wùɛ wlòmo.

³²Bɛ̌ nu bɛ̌ moo ně chɛ̀ɛ ble po dɛ keǒ boǒ wɔ̀n kpnii jǐlenymi nyo mɔ̀ wòje soa kělɔ dě fòɛà moo Ɛfèse wlòmo, bo jě kàan dɛ ɛ miǒ mǒo bo poba? È bɛ̌ nu kokǒ nyo bǔ seǎ je měne dǔba mu, è a nɛ bä nu äa chɛ̀ɛ kmɔ̌. Mɛ̌oǒ joo nɛ̀ moo kànʼǒ di kàn lěe ä mi kàn kǒba. (Is 22.13)

³³Aǎ sonwɛǒ nyu wùɛ mɔ̀ mǒ ɔɔ̌ bee a mǒ. Nyopò kukwǐi mɔ̀ nena ɛ nymii tùonyugbee kàan kmɔ̌ jǐ le.

³⁴A di aa chɛ̀ mɔ̀ a mǐ kpni kukwǐ bɔ̌. Aa tìe tùu ni dɛ wòje keà nyu see Nyesoa ji, Ě boɛ ili ɛ miǒ a tònwe je po.

³⁵Tǐ tìi tà nyu tɔ̀ɔ mi i wan gbàba ɛ̈ moo, “È ke kokǒ nyo miǎa kɛ je měne duduɛ̌ numa? È fǒ tae u miǎǎ kɛ kɔnma?”

³⁶Chlachlǎ be taeǒ i moo kokǒ plɔɔ wan le gbà noǎa. Bɛ̌ nu bò dɔ̌ tu joɛ̌ɛ, ɛ kɔn bɛ po kɔnǒ plě ɛ mǐ wǒ.

³⁷Joɛ̌ɛǒ dòɛ̌ɛ ɛ moo kou joɛ̌ɛ sosǒ ɔ̀ɔ̌ dodɔ̌ joɛ̌ɛ tɛ̀ɛ, ɛ se tuǒ ɛ seǎ kunma mu.

³⁸Nyesoa Nɔ̀ tùǒ ɛ fǒ taeǒ jleě mǒ ɛ̈ Ɔ jlɛ̌ bɛ kɔnʼɔ. Ii tè joɛ̌ɛ wùɛ kɔn ɛ blěe fǒ.

³⁹Fě wùɛ i seǒ tàa do ne, tùonyopo kɔn u blěe fǒ, nekpetaǐpò kɔn i blěe fǒ, noe kɔn i blěe fǒ plě smì kɔn i blěe fǒ.

⁴⁰Jɔ mǒ kɔn ɛ blěe fǒ, è kmɔ̌à ɛ kɔn ɛ blěe fǒ. Fǒǒ neěe jɔ mǒ ɛ blěe jǐlenmɔnmɔ ne dɔ̌, è fǒà neɔɔ kmɔ̌ɔ mɔ̀ ɛ blěe jǐlenmɔnmɔ ne dɔ̌ ke.

⁴¹Wɛnʼɛ fonfɔn ne dɔ̌ keǒ sòbae klee jɔtnèe fonfɔn mɔ̀. Jɔtnèe chɛ̀ǒ ii fonfɔn ne le dɔ̌ɔdɔ̌.

⁴²Kě kokǒ nyoo je měne duduɛ̌ɛ ka kɔn bɛ ne je. Bɛ̌ nu äa fǒ bɛ̌ kǒ bǔ tù ɛ bo, ɛ sònwɛ ne, kɛɛ bɛ̌ keǎ je měne duǐ, ɛ miǎ fǒà ɛɛ̌ kǒo jemǒ duǔba.

⁴³Bǔ ke fǒ bo tùi ɛ nymi le jǐ, kɛɛ bɛ̌ keǎ jemǒ duǐ ɛ miǎ jǐ le nmɔma. Bǔ ke fǒ bo tùi, ɛ se kbě kɔn, kɛɛ bɛ̌ keǎ jemǒ duǐ, ɛ miǎ kbě mǒ nema.

⁴⁴Bɛ̌ nu bǔ ke ɛ bo tùi, ɛ moo kmɔ̌ mɔ̀ fǒ, kɛɛ bɛ̌ nu bɛ̌ keǎ jemǒ duǐ, ɛ miǎ Sùsuu fǒ mooma. È ke ɛ toon jleě mǒ bo blǒ fǒ neǒo, Sùsuu fǒ neǒ ke,

⁴⁵wòje keǒ ɛ nuaa chleěa klě Nyesoaa win wlòmo ɛ̈ moo, nyane jbɛju ɔ̈ moo Ɛdɛ̌mo u nua nɔ ɔ̌ moo kmɔ̌ ne tùonyu, è demǒ bɔɔ̌ Ɛdɛ̌mo tɔ̀ɔ Nɔ̀ moo Nyesoaa Sùsu Ɛ̈ nyee nyopò fònfno.

⁴⁶Sùsuu fǒ se nya kɛn, kɛɛ blǒ fǒ nɛ̀ moo klekle plě Sùsuu fǒ ɛ̌ diě.

⁴⁷Nyesoa nua fnò ɔ̌ nua nyane jbɛju. Sɔ̌n nonɔ Jbɛju moo Koɔn Ɔ̈ sɔnaěe jɔkɛn mǒ.

⁴⁸Keǒ nyane jbɛjuǒ u nuua fnò ɔɔ de nu kmɔ̌ nee, kě nyopò wùɛ ü neěe blǒ fǒ mǒ uu ka ne je. È keǒ sɔ̌n nonɔ Jbɛjuǒ Ɔ̈ sɔněe jɔkɛn mǒ Ɔɔ kmɔ̌ nee je, kě Nyesoaa nyopò wùɛ uu kmɔ̌ ne.

⁴⁹Tèǒ nì kɔn tè keà ɛ nuu äa fǒ wǒo je jbɛjuǒ ɔ̈à nuuaa fnò, a nɛ äle kmɔ̌ bɛ wǒ je Jbɛjuà Ɔ̈ sɔn lěe jɔkɛn mǒ.

⁵⁰Ně bǐì Tentǎn Jǔu wǎn ane, Ě tmɛɛ̌ ane, fǒà ɛ klee nymɔ i slě wɔ̀ bi neě Nyesoaa deplě slè, dɛà ɛ̈ kɔnʼɔ sònsɔn ɛ slě wɔ̀ bɛ moo dɛà see sònsɔn kɔn.

⁵¹A po nɔkǔ bo, Ě jlɛ̌ boǒ sèsae a je wɛ̌ tè wlòmo. Ɛ se nyopò wùɛ u se kǒba mu, kɛɛ nyopò wùɛ mi sàeba.

⁵²Bɛ̌ nu bo demǒ bɔɔ̌ kànmu bɛ̌ boɔlǎ, è keà nyu kɛpǒo jǐ, kokǒ nyo miǎ fǒà ɛ̈ɛ̌ kǒo je měne duǔba. È äa wùɛ ä miǎ sàeba.

⁵³È sònsɔn fǒà ɛ kɔn bɛ beǎ lě ně sɔ̀n fǒ wlòmo, è fǒà ɛ̈ kɔnʼɔ kokoɛ̌ ɛ kɔn bɛ beǎ lě ně kǒ tǔn wlòmo.

⁵⁴È ɛmo dɛǒ bɛ̌ kpalǎ tùɔn, è dɛà Nyesoaa win boɔɔ ɛ̈ jaěǎǒ lo ï dɛ̌ bòo ɛ̈ moo, “Kokoɛ̌ sùe gbè, ä kɔn duduɛ! (Is 25.8)

⁵⁵Kokoɛ̌, bo jě kɛ nè dudu kpě kɔ̀nʼɔ? Kokoɛ̌, bo jě kɛ nè kpěà ï sǐi nyu mǒ bo?” (Hos 13.14)

⁵⁶Kokoɛ̌ɛ kbě sonwɛě mǒ kpni kukwǐ mǒ. È kpni kukwǐ sɛ̀ě ii kbě klě Nyesoaa teteǎ mǒ.

⁵⁷Äa Koɔn Jùsu Tentǎn Jǔ Nɔ̀ nu ɛ ɛ̌ wɔ̀le ɛ keǒ bä du kokoɛ̌ wan, ɛmo duduɛǒ Nyesoa Nɔ̀ nye ɛ ämo. Ä pe Ɔ tàto keǒ ɛ mɔ̀!

⁵⁸Ii tè ně kàan bǐì Tentǎn Jǔu wǎn ane, a nyna bo kpankpa, aǎ wě tùɔn mǒ klě aa tè wlò popoɛ mǒ. Tǐ wùɛ mɔ̀ a poě kbě le a nu Nyesoaa konkwa. Ba kɔn ɛ jijiɛ ɛ̈ moo aa konkwa a nii keǒ Koɔn mɔ̀ ɛ se putu.