Read Grebo, Northern 1 Kwnɛtiɛ̌ 16 Bible Online

1 Kwnɛtiɛ̌ 16 - Grebo, Northern bible

1 Kwnɛtiɛ̌ 16

¹Klě tǐà wlòmo Ě jlɛ̌ boǒ boɔ dɛǒ ɛ̈ kwɛɛǒo wlě tentɛ̌n tè jleě mǒ bo keǒ Nyesoa nyoǒ neěe Jùdǐa wakǎ kɛn uu mǒ sèsɛ mɔ̀. A nu dɛɛ doǒ Ě tmɔɔ̌ noo Nyesoa nyoǒ neěe Kalesìa wakǎ kɛn bu nuu.

²Keǒ Nyesoaa defɛ chnɛ̀ jlǒ waě wùɛ mɔ̀, wlěǒ aa nyu wɔ̀lee tentɛ̌n bɔ jaě i a mǐ i bo tù ɛ̈ di ɛɛ numa bo diě aǎ dii kɛ wlě tìi tɛ̌n.

³Bɛ̌ nu bo diě, Ě mi nyopò dboba ü aa plɔ bloo loo kɛn, Ě mi u chněenoǎ nyema ï mi nuu kwlǎ mǒ sàba klee aa nyee dɛǒ u mǐ ɛ Tentǎn Jǔu wǎnʼǒ neěe dě fòɛǒ moo Jlǔsnɛ wlòmo kpa.

⁴Bɛ̌ nu bɛ̌ wɛɛnʼǒ le keǒ bo mu, è u miǐ de nama ä mǐ mu.

⁵Ě po ɛ ble keǒ boǒ sìinʼě blǒǒ moo Masedonìa kɛn, boǒ sɔnʼě u mɔ̀ mǒ plě Ě miě a mɔ̀ nyni.

⁶Bɛ̌ nu bɛ̌ wɔ̀le ɛ, Ě miě a mɔ̀ tǐ gbei sìnma plě klee wìtaa tǐ wùɛǒ ɛ̈ di ɛɛ numa a miǐ snǔ mɔ̀ tu tà wùɛ Ě miǒ muma.

⁷Kèkeà Ě se jlǎ boǒ chè a jebo sosǒ klě tǐ gbei wlòmo. Bɛ̌ nu bo Koɔn Bɔ̌ sàǎ bo je, Ě jlɛ̌ boǒ sìnʼě a mɔ̀ dɛ pɛ̀tu.

⁸Ě miě dě fòɛǒ moo Ɛfèse wlòmo bo nema ɛ mǐ ɛ kpa kpa ɛ mǐ kou bɛ̌ tǐ bi wɛ̀ǒ le ɛɛ de ngmnengmnɛ̌ǒ ɛ̈ moo Pɛntèkɔ kɛn jɛɛ le.

⁹Kàan tè nyopò fòfoa wɛ̀nʼɛ̌ je, kɛɛ fɔ̌ fòɛ kna je keǒ boǒ nu Nyesoaa konkwa.

¹⁰Bɛ̌ nu bo Timɛtě bɔ̌ diě a mɔ̀, a jě ɛ aǎ peeě ɔ fano měne keǒ bɔ neě a slè. Koɔnʼɔ konkwaa doà Ě nii nɛ̀ ɔ ni ke.

¹¹Nyu wùɛ nɔ̀ bɔɔ̌ bɛtɛ̌ɛ ɔ je, kɛɛ ba sɛ̀ ɔ mǒ ɔ mǐ de di klě ně bo wna tǔn mǒ ɛ̈ di ɛɛ numa ɔ mǐɔɔ̌ mɔ̀ di. Mɛ kɔɔ̌n tèǒ joo nɛ̀ moo Ě pɛ̀n ɔ mɔ̀le snǔ keǒ bɔ diě ɔ klee Tentǎn Jǔu wǎn tùu.

¹²Äa bě Tentǎn Jǔu wǎnpòi Apolò Ě pe ɔ kbě ja le klě tǐ fòfoa wlòmo keǒ bɔ na ɔɔ bǐì de u miě a mɔ̀ di, kɛɛ ɔɔ̌ wɔɔn ɛ kɛn keǒ bɔ diě klě tǐà wlòmo. Ii tè bɛ̌ nu bɛ̌ wɔ̀le ɛ, ɔ miě diba.

¹³A gbɛ̀ɛ le, a mǐ bo nyna kpankpa klě aa tè wlò popoɛ mǒ ɛ̈ a kɔn lěe Tentǎn Jǔ mǒ. A kɔn kponkpɛ plě a ne kbě mǒ.

¹⁴È ba nu noǎ wùɛ klě mǒ noɛnoɛ mǒ.

¹⁵Aa chɛ̀ a ji ɛle Tifanà klee ɔɔ koǔ bo kwɛɛn nù moo klekle u kɔn wowa dɛ klě blǒǒ moo Akeàa wlòmo plě ǔ peě kbě le ǔ ni dɛ wùɛ keǒ Nyesoa nyoo tè mɔ̀. Ně bǐì Tentǎn Jǔu wǎn ane, Ě pɛnʼǒ a jemǒ bo,

¹⁶a nyeǒ u tùtuɛ plě klee nyu wùɛ ɔ̈ kɔn ka mi nuu je wǒba ɔ̈ nii Nyesoaa konkwa.

¹⁷Ně plɔ blo lo keǒ bo Tifanà klee Fɔtunatɔ̀ klee Akaekɔ̀ bu diě di kělɔɔ̌ mɔ̀. Mɛ kɔɔ̌n tèǒ joo nɛ̀ moo nù niiǒ a noǎ pènmo

¹⁸plě nù mǎǒǒ mɔ̀ plě Ě wɔ̀le je boǒ fɛ doɛɛ gbe wòje keǒ u nu amoo mǒ sèsɛ. Nyopò taeǒ ba po uu nynɛ̌ le.

¹⁹Tentǎn Jǔu wǎn wùɛ ü neɔɔ blǒɔ monoo Esìa wlòmo u gbà a wan le. Akwelǎ klee Pliselǎ klee Tentǎn Jǔu wǎn ü gbèe le klě uu koǔ bo u gbà a wan le ke.

²⁰Tentǎn Jǔu wǎn wùɛ ü neɔɔ u gbà a wan le. A dodboo wan le gbògba mɔ̀le a mǐ gbìgblii li.

²¹Mǒ Pɔ̀ɔ̌ɔ chɛ̀à sɛ̀ ně dɛ chlě nyu pěnsnètuà kwa ɔ̈ chlě chněedɛ̌à ɛɛ wɔ̀ɔn po winʼà.

²²Bɛ̌ nu bo nyu bɔ̌ se Koɔn mǒ noɛɛ ne bɛ moo chlǒ keǒ ɔ mɔ̀! Äa Koɔn diě le!

²³Nɛ äa Koɔn Jùsuu mǒ noɛnoɛ keǒ ä mɔ̀ bɛ muu nya.

²⁴Ně mǒ noɛnoɛ neǒ nyopò wùɛ mɔ̀ ü nii Tentǎn Jǔ Jùsuu konkwa, kě bɛ ne.