Read Grebo, Northern 1 Kwnɛtiɛ̌ 3 Bible Online

1 Kwnɛtiɛ̌ 3 - Grebo, Northern bible

1 Kwnɛtiɛ̌ 3

¹Ně bǐì Tentǎn Jǔu wǎn ane, Ě seaě wɔ̀ bo boɔaě a mɔ̀ wòje keà Ě niaě nyopòà kɔnʼɔ Nyesoaa Sùsu mɔ̀ boɔboɔ. Ě boɛaě a mɔ̀ wòje nyopòà Nyesoaa Sùsu slě ja ne wòje jijlǎe klě Tentǎn Jǔu tè wlò popoɛ mǒ.

²Ě pea a tuposà je ɛ̈ see wan kma a mǐa ɛ měne wɔ̌n, ně poa a tuposà je ɛ̈ kɔn měne wonwɔ̌n kmaa wan keǒ ba mooa Tentǎn Jǔu wǎn. Mɛ̌oǒ joo nɛ̀ moo a sěɛa mɔ̀le wɛ̀ keǒ tuposà taeǒ mɔ̀. È klě tǐà ä neěe wlòmoo chɛ̀ a sěɛ mɔ̀le wɛ̀ keǒ ɛ mɔ̀.

³Mɛ kɔɔ̌n tèǒ joo nɛ̀ moo Nyesoaa Sùsu Ɛɛ̌ nae amo. Bɛ̌ nu bǎ ke chea mɔ̀ ninii ni, bǎ ke chɛtlǐi li klee bǎ ke je wònwɛɛ ne, è Nyesoaa Sùsu Ɛɛ̌ nae amo plě a ni dɛ wòje nyopòà Nyesoaa Sùsu slě ja ne.

⁴Bɛ̌ nu aa tìe bǔ ke bò dɛ̌ ɛ̈ moo, “Ämoà ä moo Pɔ̀ɔ̌ɔ mɔ̀ na nyo,” plě aa tìe bǔ ke bò dɛ̌ ɛ̈ moo, “Ämoà ä moo Apolòo mɔ̀ na nyo,” è ɛ se kɛ nyopòà Nyesoaa Sùsu slě ja ne uu kmɔ̌ aǎ nu kɛ lɛ le?

⁵Ɛɛ chɛ̀ǒ mɔ monoǒ kɛ Apolò plě mɔ monoǒ kɛ Pɔ̀ɔ̌? Ämoà ä moo Nyesoaa nyebajle ä tee a tè wlò popoɛ keǒ Nyesoa mɔ̀. Ä ni dɛà Nyesoa nye ämoo äa do do bä nuu sosǒ.

⁶Ě dɔ̌ tè wlò popoɛɛ jɔ̌ǒ lo Apolò po i ně le, kɛɛ ɛ moo Nyesoa Ɔ̌ ni ni ǐ kwin.

⁷Nyuǒ doɛ̌ɛ jɔ̌ǒ klee nyuǒ pe lii ně le uu tè se kma chɔɔ, kɛɛ sɛjesɛ Nyesoaǒ ni nii ǐ kwinʼi Nɔ̀ kɔn tè kma.

⁸Nyuǒ dɔ̌ɔ jɔ̌ǒ klee nyuǒ po lii ně le uu sɔ̌nʼǒ u niiǒ tàa do konkwa, kɛɛ keǒ u nuu konkwa nunuɛ, kě uu do do kɔn bu nu uu chɛ̀ɛ snǒ sàe dɛ jejeɛ̌.

⁹Ä niiǒ tàa do konkwa klě Nyesoaa chè fòɛ mǒ ɛ̈ mooě amoo slè. È plě de aa chɛ̀ǒ a moo Nyesoaa koǔ.

¹⁰Kběà Nyesoa nye mǒo nì Ě ni Ě ni konkwa wòje kǎ poɔ ɔ̈ kɔnʼɔ slɛ̌ plě Ě po aa tè wlò popoɛɛ kǎngmàà ble. Nyopò tùu nù peeǒ ɛ koǔ kɛn, kɛɛ nyu wùɛ blɛɛ je bɔ tùě jǐ bo ke ɔ miǒo koǔǒ pooa numa.

¹¹Nyu tɔ̀ɔ nɔ̀ slě wɔ̀ bɔ̈ po kǎngmà tɛ̀ɛ ble ɛ̀ sìnʼǒ ɛɛ doà ɛ̈ poo loo ble ɛ̈ wɛ̀ɛ mɔ̀le ɛ̈ monoo Jùsu Tentǎn Jǔ.

¹²Bɛ̌ nu nyu wùɛ ɔ̈ miǒo kǎngmàǒ kɛn klò pooba klee sěbla klee jǐlenmɔ seɛ̌ ï pee wlě fòfoa klee ti klee chnà plě sɛfle,

¹³Nyesoa Nɔ̀ miǎ ɛ pepě mǒ poba keǒ nyu wùɛɛ konkwa nee. Klě ɛ wlòmo Ɔ miǎ na numa Ɔ miǎ ɛ fle kɛn le sà. Na nɛ̀ miǎ nyu wùɛɛ konkwa mǒ tɛ̀nma ɛ miǎ ɛ tee le konkwa tae ɔ niaa.

¹⁴Bɛ̌ nu ɔɔ konkwaǒ ɔ nuu bɛ̌ nynanǎ naǒ jebo, è Nyesoa miǎ ɔ snǒ sàe dɛ nyema.

¹⁵Kɛɛ bɛ̌ nu ɔɔ konkwaǒ bɛ̌ sinʼǎ, è ɔɔ snǒ sàe dɛ miǎ mǎma. Ɔɔ chɛ̀ miǎ waba, kɛɛ ɔ miǎ klě jěba keà nyu bɛɛ̌ě na slè tìe.

¹⁶A se kɛ i ji ɛ̈ moo a moo Nyesoaa kǎ fòɛ plě Ɔɔ Sùsu neě a mǒe?

¹⁷Amo moo Nyesoaa ngmà je ne kǎ fòɛǒ, ii tè aa nyu wùɛ ɔ̈ mi Ɔɔ kǎ fòɛǒ gbè sùeba, Ɔ mi ɔ gbè sùeba ke.

¹⁸Aǎ gbee aa chɛ̀ mǒ. Bɛ̌ nu aa nyu bɔ̌ jě ɛ ɛ̈ moo ɔ kɔn tɔ̀n klě kmɔ̌ɔ de jijiɛ mǒ, è ɔ kɔn bɔ moo plɔɔ kokǒ nyu klě kmɔ̌ɔ de jijiɛǒ mǒ ɛ̈ di ɛɛ numa ɔ mǐ tɔ̀n kɔn klě Nyesoa jǐ kɛn.

¹⁹Kmɔ̌ɔ tɔ̀nʼà ɛ moo plɔɔ kokoɛ̌ klě Nyesoa jǐ kɛn wòje ke Ɔɔ win dɛ̌ɛ ɛ̈ moo, “Nyopòà je ü kɔnʼɔ tɔ̀n uu kplakplǒ kmɔ̌ǒ nɛ̀ Nyesoa kmee u jleě.” (Job 5.13)

²⁰Nyesoaa win boɛ ɛ le ke ɛ̈ moo, “Koɔn ji dɛǒ nyopòǒ u sìɛn nee dlǒ mɔ̀le ne ü je ü kɔnʼɔ tɔ̀n plě Ɔ̌ ji ke uu tɔ̀nʼǒ ɛ see dɛ kɛn bo nynanyna nu ɛ̈ u je u kɔnʼɔ.” (Ps 94.11)

²¹Ii tè nyu wùɛ nɔ̀ se je blɛɛ le bɔ kun kɛn le keǒ tùonyugbee nunu dɛɛ tè mɔ̀. Sɛjesɛ dɛ tɛ̀ɛ neǒo de nɛ̀ moo noǎ wùɛ kɔnʼǒ a mɔ̀.

²²Baǎje Pɔ̀ɔ̌ ɔ̀ɔ̌ Apolò ɔ̀ɔ̌ Pitɛ̌ ɔ̀ɔ̌ kmɔ̌à ɔ̀ɔ̌ fònfno ɔ̀ɔ̌ kokoɛ̌ ɔ̀ɔ̌ tǐà ä nee kɛn plě klee tǐǒ neěe nya ii wùɛǒ amo kɔn ni.

²³Kɛɛ aa wùɛ a kɔnʼǒ Tentǎn Jǔ mɔ̀ plě Tentǎn Jǔ kɔnʼǒ Nyesoa mɔ̀, ii tè a kun kɛn le klě Nyesoa mǒ.