Read Grebo, Northern 1 Kwnɛtiɛ̌ 4 Bible Online

1 Kwnɛtiɛ̌ 4 - Grebo, Northern bible

1 Kwnɛtiɛ̌ 4

¹Nyopò bu jě ämo Nyesoaa tuposà kpa nyo wòje Tentǎn Jǔu na wien po nyebajle ü moo Nyesoaa je wɛ̌ dɛà ɛɛ jǐ mɔ̀ tù nyo.

²Dɛ Nyesoa pɛ̀ɛnʼěe nyopòǒ Ɔ nyee konkwaǒ ja le nɛ̀ moo bu wɔ̀le wlò kpaea.

³Tèǒ nì kɔn tè ɛɛ̌ tùǔ kèjle keǒ ba tùǒǒ tè fǒ měne klee kmɔ̌ɔ tè tù nyo bu tù ně tè. Ně tùǒ ně chɛ̀ tè jleě mǒo chɛ̀.

⁴Ně tè le jbojbɛ ɛ̈ neɔ mǒo mǒ ɛ pàe kɛn le chnɛ̀, kɛɛ ɛ se ɛ nynɛ̌ sɛ̀n ɛ̈ moo Ě moo jebo siǐn nyu. Koɔn Nɔ̀ moo Nyu Ɔ̈ miǐ tè mɔ̀ tùba.

⁵Tèǒ nì kɔn tè baǎ tùi aa bǐì tè mɔ̀ plě tǐ miǒ nyni, a fo Koɔn Jùsuu de di tǐ, Nɔ̀ miě noǎ wùɛà wɛ̌ɛ klě kwijlě slè pepě mǒ jaba plě noǎ wùɛà tùonyuu wlò poo ble Ɔ miǒ i pepě mǒ poba. È klě tǐǒ wlòmo Nyesoa miǎ nyu wùɛ le bìseba ɛ̈ blɛɛ ɔmoo nyuǒ je.

⁶Ně bǐì Tentǎn Jǔu wǎn ane, noǎ wùɛà Ě boɛɛ ï kwɛɛǒo mǒ klee Apolò jleě mǒ bo, Ě boɛ ili keǒ aa kàan dɛɛ tè mɔ̀ ɛ̈ di ɛɛ numa a mǐ ä mɔ̀ cheěn ne a miǒ Nyesoaa win bo tù. Dɛǒ nɛ̀ mi ɛ numa aǎ di kɛn le kpǒ ɛ̈ kwɛɛǒo nyuà nɔ̀ Ě nɛ de jleě mǒ bo, ɔ̀ɔ̌ ɔɔ bě tɔ̀ɔà nɔ̀ Ě nɛ de.

⁷Mɔ nuǔ kɛ mò nè tè kmaǎ ɛ̌ sìnʼǒo nyu tɔ̀ɔ mǒ? Plě mɛ kɔ̀ɔ̌n kɛ ɛ̈ Nyesoa seě mò nye? Bɛ̌ nu bɛ̌ nyee mò, è mɛ kɔɔ̌n tè kpǒǒ kɛ kɛn le wòje keà nè chɛ̀ sɛ̀ɛ dɛ tàmo ɛ se mòo nyee ne?

⁸A kɔn kɛ noǎ wùɛ a jlɛ̌ɛ le ɛ̌ wɛ̀ mɔ̀lee? Deě a pàn ne ɛ̌ wɛ̀ mɔ̀le? A moo kɛ klɔ̀bapoo ä se a debo mǎ le? Sɛjesɛ Ě mii ɛ mǒ noɛɛma ba monoo klɔ̀bapoo a klee ämo ä mǐi win kwa kɔn.

⁹Ämoà monoo Nyesoaa tuposà kpa nyo ä wǒ je keà Nyesoa poě ämoo demǒ bɔɔ̌ tùɔn kɛn wòje nyopòà u bɛ̌ɛ kokǒ wun kɛn u mii dbǎba klě klɔ̀ slè. Ä neǒ klɔ̀ jemǒ ɛ̈ di ɛɛ numa najiǒpò klee nyopò mi ä jě.

¹⁰Ä moo plɛɛ kokǒ nyo klě kmɔ̌ ne tùonyopo jǐ kɛn keǒ Tentǎn Jǔu tè mɔ̀, kɛɛ aa chɛ̀ a jě ɛ ɛ̈ moo a moo Tentǎn Jǔu wǎn ü kɔnʼɔ tɔ̀n klě Tentǎn Jǔ mǒ. Ämoà kpě slě ä ja ne, kɛɛ a jě ɛ ɛ̈ moo kpě neě a ja. Nyopò bɛtɛ̌ɛ ä je, kɛɛ u tùiǒ a bo.

¹¹Sɔɔnʼě ɛɛ wlò tùla mǒ bò jɛ chnɛ̀ jlǒ wěà, ä se didi dɛ kɔn, sàno ni ämo plě nenǎ to ni ämo plě ä pe dale blɛbli fǒ měne, nyopò be ämo plě ä se nena kɔn.

¹²Äa chɛ̀ɛ sonweà nì ä ni ä ni konkwa jakǎ. Nyopò bǔ cheaě ä le, ä pe u ngmna mɔ̀. Bɛ̌ nu bǔ tè äa tè mɔ̀, ä nynɛ ɛ je bo.

¹³Bɛ̌ nu bǔ cheaě ä le, ä pe pɛɛ pɛɛ win ä tùi u kɛ̀ɛn. Sɔɔnʼě ɛɛ wlò tùla mǒ bò jɛ chnɛ̀ jlǒ wěà, u ni ämo wòje wɔ̀te makuɔ̌ klee plàwlɛ u tlii be kɛn le.

¹⁴Ě se chněedɛ̌à chlě keǒ boǒ po a tònwe měne, kɛɛ Ě ni ɛ keǒ bo poǒ a snǔ mɔ̀le wòje ně jlǔ Ě noɛɛ mǒo.

¹⁵Tǐ tìi tà a mi tɔ̀n měne po nyo fòfoa kɔnma ü miǒ amoo mɔ̀ mǎma keǒ ba naa Tentǎn Jǔ de, kɛɛ a se gbeǐpò fòfoa kɔn ü ja lɔ amoo wowa dɛɔ slè. Tà Ě poa amoo Nyesoaa kàan tuposàà je, è mǒ Tentǎn Jǔ Jùsu nu aa gbeǐ mǒ.

¹⁶Tèǒ nì kɔn tè Ě bɛ̀te ale, a sàě ně fì le.

¹⁷Dɛǒ nɛ̀ kɔn tè Ě dbe Timɛtě, ně mǒ noɛɛ jǔ ɔ̈ moo wlò je kuun nyu keǒ Koɔn mɔ̀, nɔ̀ miě i a wlòmo poba ke Ě nuu Tentǎn Jǔ Jùsuu konkwa nunuɛ, ɛɛ doǒ nɛ̀ Ě tee nyopò wùɛ klě uu Nyesoa keǐ bo ble le.

¹⁸Aa tìe tùu jě ɛ ɛ̈ moo Ě seě diba mu, nɛ̀ kɔn tè u jɛɛě uu chɛ̀ le.

¹⁹Kɛɛ Nyesoa Bɔ̌ wɔɔn ɛ kɛn Ě miě diba pase, sɛjesɛ Ě mǐ noǎǒ a nii jě ɛ̈ see noǎǒ kɔn tè a jɛɛě aa chɛ̀ le.

²⁰Nyesoaa win kwa konkɔn se boɔboɔ win sosǒ, kɛɛ ɛ moo kbě le popoɛ.

²¹Ii kplěe sɔ̌nʼà mɛ a jlɛ̌ ba sàǒo? Bo ke kɛ lě a mɔ̀ di bo jaě jlo tǔn le, deě boǒ jaě mǒ noɛnoɛ klee tbotbǒ sùsu?