Read Grebo, Northern 1 Kwnɛtiɛ̌ 9 Bible Online

1 Kwnɛtiɛ̌ 9 - Grebo, Northern bible

1 Kwnɛtiɛ̌ 9

¹Mǒà Ě wan mǒ dbǐ keǒ teteǎ mɔ̀. Ě moo Nyesoaa tuposà kpa nyu. È a ji ɛle ɛ̈ moo äa Koɔn Jùsu woǒaǎ je. Konkwaà Ě nuu dɛ sɔnʼě ɛɛ wlòmo nɛ̀ moo amoà ü poo kàan tè.

²Baǎje nyopò tùu se li kàan tè po ɛ̈ moo mǒà Ě moo Nyesoaa tuposà kpa nyu, sɛjesɛ amoà amo po li kàan tè! Aa tè wlò popoɛ tee ɛ ɛ̈ moo Ě moo Nyesoaa tuposà kpa nyu ɔ̈ nii Koɔnʼɔ konkwa.

³Bɛ̌ nu bo nyopò bǔ keě jele tbɛ, Ě tùi u kɛ̀ɛn kě Ě dɛ̌,

⁴deě ɛ se kɛǒ bo nyna keǒ ämoà moo Nyesoa tuposà kpa nyo bu nye ä digbaǐ klee nenǎ noǎa keǒ äa konkwaà mɔ̀le?

⁵Bä ke blě kɛne nɛ, ɛ se kɛǒ bo nyna bä kpae äa nyno snǔ mǒ ü moo Tentǎn Jǔu wǎn ɛ̈ di ɛɛ numa Tentǎn Jǔu wǎn miě äa tè mɔ̀ kɔn le wòje dɛɛ doǒ u nii Nyesoaa tuposà kpa nyo tùuǒ mǒ klee Koɔnʼɔ mamǔ jbɛjlu plě Pitɛ̌?

⁶È mǒ klee Banàbɔɔ sɔ̌nʼà ämo kɔn bü nu kɛ konkwa keǒ äa chɛ̀ɛ kmɔ̌ neneɛ mɔ̀le?

⁷Mɔ neě kɛě tabɔ̀ slè ɔ̈ keě ɛ ni plě ɔ sɛ̀ɛ̌ ɔɔ chɛ̀ snǒ? Mɔ niǐ kɛ jlǒ plě ɔɔ̌ diǐ ɛɛ dɛ? Mɔ peě kɛ blableǎ plě ɔɔ̌ diǐ ii dɛ?

⁸Dɛà Ě boɛɛ ɛ̈ moo kɛ tùonyugbee tè le jbojbɛ sosǒ le? Deě Nyesoaa teteǎ se kɛ bò dǎ?

⁹Ä slè ɛle klě Nyesoaa teteǎ Ɔ nyeaa Mɔ̀sě wlòmo ï dɛ̌ bòo ɛ̈ moo, “Bliǎǒ bǐ ke nè kou sosoɛ, nè pìin i wien.” (Deut 25.4) Tà Ɔ dǎla bòo, ɛ sɛ̀nʼa kɛ nynɛ̌ bliǎa doǒ nì kɔn tè Ɔ kɔnaě mɔ̀le?

¹⁰Sɛjesɛ ɛ sea kɛ ämo Ɔɔ̌ boɔlaě ä mɔ̀ le? I chleěa le i mǐa ɛ tee le ɛ̈ moo bɛ̌ nu bä nu konkwa, ä pɛ̀n le dɛ miě ɛɛ wlòmo sɔnma.

¹¹Bɛ̌ nu bä poaě a Nyesoaa Sùsuu kmɔ̌ neneɛ ja ɛ̈ a kɔnʼɔ, a jě kɛ lɛ ɛ̈ moo ɛ seǒ le wɛɛn ne ba nye ä dɛ le?

¹²Bɛ̌ nu bɛ̌ nynaǒ bo keǒ nyopò tùu bu pɔ̀ɔnʼě a dɛ ja le, è ɛ nynaǒ bo chɔɔ dɔ̌ɔ chɛ̀ keǒ bä pɔ̀ɔnʼě a dɛ ja le. Sɔɔnʼě ɛmo tǐǒ wlòmo bò jɛ tǐà, äǎ kmee a kwa jakě bo keǒ ba nye ä dɛǒ blɛɛ ämoo je. Kɛɛ ä nynɛ wlò le popala wùɛ jebo ɛ̈ di ɛɛ numa Nyesoaa kàan tuposàà kwɛɛǒo Tentǎn Jǔ jleě mǒ bo ɛ mǐ le gbɛ̀tɛɛ le klě tà wùɛ.

¹³A se kɛ i ji ɛ̈ moo nyopòà niěe Nyesoaa kǎ fòɛ bo konkwa klě kǎ fòɛǒ bo klě u sèě u blěe didi dɛ ǔ di le? È a se kɛ i ji de ɛ̈ moo nyopòǒ neǒo chɔ̀no tògbee kǒngmà kɛn, noǎǒ neǒo kǒngmàǒ kɛn keǒ u sɛ̀ǒ u blěe didi dɛ ǔ di le?

¹⁴Dɛɛ doǒ nɛ̀ ɛ mono, Koɔn Nyesoa boɔ ili Ɔ je, nyopòà kpɛɛ Nyesoaa kàan tuposàà u blɛɛ je dɛǒ sonwɛ lěe tuposàǒ wlòmo nɛ̀ u kɔnʼǒ wakǎ jleě mǒ.

¹⁵È kaǒo chɛ̀ blěe wakǎǒ blɛɛ mǒo je ně feenʼǒ a jleě mǒ keǒ ba nye ɛ mǒ plě ɛ se bo chlě chněedɛ̌à ɛ̈ di ɛɛ numa a mǐ ɛ nu keǒǒ mɔ̀. Mǎà je ɛ miǒ le wɛɛnmaa chɛ̀ bo kǒ ɛ̀ sìnʼǒ bo jě snǒ sàe dɛ plě bo nyu tɔ̀ɔ bɔ nu dɛà kɔn tèà Ě pee wan le bɛ moo flo.

¹⁶Bɛ̌ nu bo ke Nyesoaa tuposàà pe, ɛ se dɛ kɔn tè boǒ poo wan le. Ě kɔn boǒ po ɛmo tuposàǒ. Bɛ̌ nu bo bɔ̌ ɛmo tuposàǒ popoɛ, bɛ moo chlǒ keǒǒ mɔ̀.

¹⁷Bɛ̌ nu bɛ̌ moo noo mǒ bo chlàa li keǒ bo poo ɛmo tuposàà, Ě blɛɛ lee je bo jlǎa snǒ sàe dɛ. Bɛ̌ nu baǎje bɛ̌ se mǒ bo se konkwaǒ jlǎ keǒ bo nu ɛ, Nyesoa nye ɛɛ̌ ne keǒ bo nu ɛ.

¹⁸Ii tè mɛ monoǒ kɛ ně snǒ sàe dɛ? Ɛ moo chǒn ɛ̈ Ě sà lěe Nyesoaa win boɔboɔ wlòmo ɛ̈ see bo ploo i nyu mɔ̀ plě ɛ̈ se boǒ feenʼǒ a jleě mǒ keǒ dɛ blɛɛ mǒo je mɔ̀.

¹⁹Kàan tè Ě moo nyu ɔ̈ wanʼa dbǐ mǒ plě Ě se kèi keǒ nyu wùɛ mɔ̀, kɛɛ Ě nu ně chɛ̀ wòje kèi keǒ nyu wùɛ mɔ̀ ɛ̈ di ɛɛ numa Ě mǐ nyopò fòfoaa wlè bo bitǐ keǒ Nyesoa mɔ̀.

²⁰Bɛ̌ nu bo neě Jùwɛ nyoo blě, Ě pe u ně chɛ̀ slè ɛ̈ di ɛɛ numa Ě mǐ uu wlè bo bitǐ keǒ Nyesoa mɔ̀. Kàan tè Ě slě uu teteǎ bobo ne, kɛɛ bɛ̌ nu boǒ neě nyopòǒ neěe teteǎ bobo slè, Ě pe u ně chɛ̀ slè ɛ̈ di ɛɛ numa Ě mǐɔ u Nyesoa mɔ̀ jae le ke.

²¹Kàan tè Ě neě Tentǎn Jǔu teteǎ bobo plě Ě slě Nyesoaa teteǎ bobo mǒ sɔn, kɛɛ bɛ̌ nu mǒ klee kuodakwɛ̌ ü see Nyesoaa teteǎ kɔn bä neǒ tàa do, Ě pe u ně chɛ̀ slè ɛ̈ di ɛɛ numa Ě mǐɔ u Koɔn mɔ̀ jae le.

²²Bɛ̌ nu mǒ klee nyopòà kɔnʼɔ tè wlò popoɛ see kbě kɛn ne bä neǒ tàa do, Ě pe u ně chɛ̀ slè ɛ̈ di ɛɛ numa Ě mǐɔ u Koɔn mɔ̀ jae le. Nyu wùɛ ɔ̈ klee mǒ miǒo tà paǎnma, tǔnʼǒ ɔ neěe wlòmo nɛ̀ Ě peě ně chɛ̀ wlòmo ɛ̈ di ɛɛ numa sɛjesɛ Ě mǐɔ ɔmo nyuǒ Nyesoa mɔ̀ jae le.

²³Ě ni noǎ wùɛ keǒ kàan tuposàà ɛɛ popoɛɛ tè mɔ̀ ɛ̈ di ɛɛ numa ngmnaǒ neě ɛɛ wlòmo Ě miǒ ɛ wakǎ jleě mǒ kɔn.

²⁴A se kɛ i ji ɛ̈ moo plùplɛɛ blala mǒ mu nyopò wùɛ nù plì le, kɛɛ nyuu do sosǒ nɔ̀ sìnʼǒ ɔ jě ɛɛ snǒ sàe dɛ. Keǒ u nuu ǔ poě kbě le, kě ba nu ke ɛ̈ di ɛɛ numa Nyesoa mǐ a kòo kɛn poo lo.

²⁵Nyu wùɛ ɔ̈ monoo jǎgbàiple ɔ peě kbě ɔ̌ chěn gbàe wònwɔn ɛ̈ di ɛɛ numa ɔ mǐ duduɛ kɔn. Bɛ̌ nu bɔ̌ du u nye ɔ dudu flɛ̌ ɛ̈ see wlɛ̀ɛba mu, kɛɛ ämoà dɛ ä wɛ̀ɛn nee kɛn nɛ̀ moo duduɛ ɛ̈ see bo wèwɛ kɔn.

²⁶Tèǒ nì kɔn tè Ě wǒ je plùplu nyu ɔɔ̌ plùěe le sosǒ plě Ě wǒ je jǎgbàiple ɔɔ̌ poěe kpni le sosǒ.

²⁷Ě ni ně fǒ ɛ̌ kwinkwii měne klee Ě tee ɛ ɛ miǒǒ tù ɛ̈ di ɛɛ numa bo da nyopò tùu keǒ bä mu plùplɛɛ blala mǒ, ně chɛ̀à ně diě blalaǒ slè sàe le.