Read Grebo, Northern 2 Kwnɛtiɛ̌ 2 Bible Online

2 Kwnɛtiɛ̌ 2 - Grebo, Northern bible

2 Kwnɛtiɛ̌ 2

¹kɛɛ Ě chlà lɛ keǒ bo bɔ̌ě a mɔ̀ didiɛ ɛ̈ di ɛɛ numa ně di a wlò wɔ̀ɔn bebeɛ tɛ̀ɛ nye de.

²È bɛ̌ nu bo po kɛ aa wlè wɔ̀ɔn, mɔ mi mǒǒ wlò wlòmo ble tùba, ɛ̈ sìnʼǒ aa doà amo mi ɛ numa?

³Ě chleěa a mɔ̀ noǎa doà ii tè ɛ̈ di ɛɛ numa a mǐaǒǒ tùtuɛ nye, amoà blɛɛ je bü nu mǒo bo nuu chǒn le aǎ di ně wlò wɔ̀ɔn po. Ě kuunʼa a je wlò ɛ̈ moo a miaǎ numa Ě mǐa chǒn le nu.

⁴Ě kea fìn klě wɔle le nunuɛ fòɛ slè klee feanfeǒ ɛ̈ neaě mǒo wlò jleě Ě chleěa a mɔ̀. Ě sea a mɔ̀ chleě le keǒ bo poa a wɔle měne, kɛɛ Ě nua ɛ a mǐa ɛ ji ke Ě nu amoo mǒ noɛɛa chɔɔ.

⁵Nyuà poo nyu tɔ̀ɔ wɔle měne ɔ se ɛɛ̌ mǒ nu, kɛɛ aa wùɛǒ ɔ nu ɛ mǒ klě wakǎ tɛ̀ɛ wlòmo, plě ɛ se boǒ boaěě i wan le.

⁶Plɔɔ tu kɛn bo maěaǒ aa dɛ fòfoa nyea nɔɔ ɛ wɛ̀ mɔ̀ no.

⁷È ɛ nu tǐ keǒ ba poo ɔɔ tè wlò le, è ba tùě ɔ wlò wlòmo ble ɛ̈ di ɛɛ numa ɔɔ wlò wɔ̀ɔn bebeɛ ɛɛ̌ diǒ le sìn chɔɔ ɛɛ̌ se ɔɔ tè wlò popoɛ kbě ja le wɔ̀.

⁸Ii tè Ě bɛ̀te ale a tee ɛ lɔ ɛ̈ moo a noɛ ɔ mǒ no.

⁹Dɛǒ nɛ̀ kɔn tè Ě chleěa a mɔ̀ ɛ̈ di ɛɛ numa Ě mǐa ɛ jě ke aa kmɔ̌ neneɛ nuu klee Ě mǐ ɛ ji bɛ̌ nu noǎ wùɛà Ě boɛ amoo je bǎ keǒ i bo tùi.

¹⁰Bɛ̌ nu bǎ poo nyu wùɛɛ tè wlò le, è Ě poo ɔɔ tè le wlò ke. Tǐ wùɛ boǒ poo aa tè wlò le, Ě poo i wlò le keǒ Tentǎn Jǔ jemǒ

¹¹ɛ̈ di ɛɛ numa kǔ ɔ̈ moo Setɛ̀n ɔɔ̌ diě ɛ wɔ̀ keǒ bɔ kɔn ä kpě win kwa ɛ̈ kɔn ämo ji ɔɔ ble po dɛ.

¹²Tà Ě mua lěe dě fòɛǒ moo Tloasì kɛn Ě muaa kàan tuposàà poba ɛ̈ kwɛɛǒo Tentǎn Jǔu tè jleě mǒ bo, Koɔn knana fɔ̌ je keǒǒ mɔ̀, Ě wɔ̀laě ɛ keǒ bo poa tuposàǒ klě tàě.

¹³Kɛɛ tà Ě sea lěe ně bě Taetɔ̌ jɛɛ le, ně wlò sea blo, ii tè umoǒ nea lěe Ě kpala u wlu, è mǒǒ mua Masedonìa wakǎ kɛn.

¹⁴Ä pe Nyesoa tàto tǐ wùɛ mɔ̀ Ɔ̈ nɛɛ ämoo klě Ɔɔ dudu kpě mǒ ï neěe Jùsu Tentǎn Jǔ mǒ plě Ɔ̈ ni ämoo ä gbɛ̀tɛɛ Ɔɔ win blě kɛne wòje dɛà pee sonsnǒ.

¹⁵Äa tuposà nu kàan wòje sonsnǒ dɛ, nɛ̀ Tentǎn Jǔ nyee Nyesoa keǒ nyopòà waa klee nyopòà see wa slè.

¹⁶Keǒ nyopòo tìeà see wa mɔ̀, äa tuposàà ɛ se kàan nu wòje kokǒ dɛ ɛ̈ pee nǒ keǒ u mɔ̀, kɛɛ keǒ nyopòo tìeà waa mɔ̀ ɛ nu kàan wòje sonsnǒ dɛ plě ɛ̌ pe kmɔ̌ sie fònfnoo sàe keǒ u mɔ̀. Bo Nyesoaa kpě bǐ slě nyu mǒ ne, mɔ wɔ̀le je bɔ̈ nuǔ kɛ ɛmo konkwa taeǒ?

¹⁷Nyesoaa winʼà ä boɛɛ äǎ tba nyopò dɛ mǒ wòje keǒ nyopòo dɛ fòfoa nii, kɛɛ keǒ nyopòà Nyesoa dboo u nuu, kě ä nu ä mǎě sèn bo ä boɛ klě Tentǎn Jǔu kpě wlòmo keǒ Nyesoa jemǒ.