Read Grebo, Northern 2 Kwnɛtiɛ̌ 3 Bible Online

2 Kwnɛtiɛ̌ 3 - Grebo, Northern bible

2 Kwnɛtiɛ̌ 3

¹Ä wǒ kɛ win mǒ nyopòà ü pee wun fòɛ le ü pe uu chɛ̀ɛ nynɛ̌ lee? Dɛ̌ɛ̀ äǎ sòa chněenoǎ ï mǐ ämoo kwlǎ mǒ sà klě a mɔ̀ò ɔ̀ɔ̌ bi sɔnʼě amoo mɔ̀ mǒò?

²Aa chɛ̀ a wǒ je chněenoǎ ï chleě le klě äa wlè jleě keǒ bï sà ämoo kwlǎ mǒ ï nyu wùɛ jěe ɔ̈ slèe.

³Ɛ pàe le chnɛ̀ ɛ̈ moo a moo Nyesoa nyo, è aa tè wlò popoɛ wǒ je chněedɛ̌à Tentǎn Jǔ chlěe ɛ̈ diiě ämoo mǒ. Ɛ sea pěnsnètu Ɔ sea ɛ chleě le, kɛɛ ɛ mooa kmɔ̌ sie Nyesoaa Ngmà Je Ne Sùsu Ɛ̌ chlěa lɛ plě ɛ se chleě le keǒ wɔ̀nfu kɛn, kɛɛ ɛ chleěě aa wlè jleě.

⁴Ä kɔn wlò je kunkuɛn klě Nyesoa mǒ keǒ Tentǎn Jǔu dɛ Ɔ nuu ɛɛ tè mɔ̀.

⁵Ä slě wɔ̀ bä dǎ bò ɛ̈ moo, “Äa nunu noǎa kbě sɔnʼě äa chɛ̀ mɔ̀ mǒ,” kɛɛ i sonwɛě mǒ Nyesoa mɔ̀.

⁶Nɔ̀ nye ä kbě ä moo Ɔɔ win boɔ nyo keǒ Ɔɔ kuo win jajle mɔ̀ ï neǒo Ɔ klee tùonyopo pǎnpe ï moo Ɔɔ Sùsu, ɛ se Ɔɔ teteǎ ï chleěaa. Ɔɔ teteǎ bɛ̌ tùonyopo kmɔ̌ sie kokoɛ̌ɛ wun kɛn, kɛɛ Ɔɔ Sùsu Nɛ̀ nye nyopò kmɔ̌ siee fònfno.

⁷Tà Nyesoa nuaa teteǎǒ ii jliwlě keǒ seɔ̌ paě kɛn Ɔ nyea nii Mɔ̀sě, Ɔɔ tè jǐ boaboǎ nua Mɔ̀sěe jigbà ɛ̌ wnea. È tà Mɔ̀sěe jigbàǒ ɛɛ wnewnɛ keaa dlǒ le tè, Ǐsòwɛ̌ kwɛɛn ně chèa ɔ ja kaǒ uǔ tanaǒ ɔ je le. Ke ɛ toon jleě mǒ bo konkwaà ɛ̈ moo Nyesoaa teteǎ teea ï bɛ̌ɛ nyu wùɛ kmɔ̌ sie kokǒ wun kɛn ǐ nia bo lěe tè jǐ boaboǎ taeǒ jeja,

⁸è ä ji ɛle ɛ̈ moo Ngmà Je Ne Sùsuu konkwaa tè mi jǐ boǎba ɛ miǒ le sìn chɔɔ.

⁹Nyesoaa teteǎà ï bɛ̌ɛ tùonyugbe kokǒ wun kɛn ii tè bǐ kea jǐ boɛɛ̌ le, è ä ji ɛle ɛ̈ moo Nyesoaa kàan tuposàà ɛ̈ nii tùonyopo ǔ siǐnʼǒo jebo ɛɛ tè boǎ jǐ dɔ̌ ɛ̌ sìnʼǒ le.

¹⁰Bɛ̌ nu bä popoo i je, è kàan tuposàà ɛ̈ kɔn tè boǎa jǐ klě tǐà wlòmo ɛɛ tè jǐ boaboǎǒ ɛ̀ sìnʼǒ Nyesoaa teteǎa tè jǐ boaboǎǒ i kɔnaa mǒ no.

¹¹Nyesoaa teteǎǒ ï kɔn dɛ kɔnʼǒo le wèwɛ bǐ kea tè jǐ boaboǎ kwɛn, è ä ji ɛle kàan tuposàà neǒo tǐ wùɛ mɔ̀ ɛɛ tè jǐ boaboǎ nɛ̀ sìnʼǒ le dɔ̌.

¹²Ke ɛ toon jleě mǒ bo ä kɔnʼɔ wlò kpaea taeǒ, a kɔn kponkpɛ chɔɔ dɔ̌,

¹³ä se kɔn bä wɛ̌ dɛ wùɛ wòje dɛǒ Mɔ̀sě nuaa ɔ̌ kɛɛnʼa ɔɔ jigbà tata dalo kɛn ɛ̈ di ɛɛ numa Ǐsòwɛ̌ kwɛɛn ně dia lɔɔ jele tan tà Nyesoaa tè jǐ boaboǎǒ ɛ keaǒ ɔɔ jele wɛ̀.

¹⁴Ɛ pàe le chnɛ̀ ɛ̈ moo sɔɔnʼaě tǐǒ wlòmo Ǐsòwɛ̌ kwɛɛn tè le jbojbɛ kana kɛn. Mɛ̌oǒ joo nɛ̀ moo klě tǐà wlòmo bǔ slè Nyesoaa kuo win dakěǒ Ɔ poaa keǒ Ɔ klee tùonyopo pǎnpe, ɛ wǒ je keà tata daloo doǒ ɛ kan uu tè le jbojbɛ kɛn. Tentǎn Jǔu do Nɔ̀ wɔ̀le je Bɔ kna uu dlě je le.

¹⁵Klě tǐà wlòmoo chɛ̀ bǔ slè teteǎǒ Nyesoa nyeaa Mɔ̀sě, tata daloǒ ɛ kaǎn jè uu jǐ kɛn.

¹⁶Kɛɛ nyu wùɛ ɔ̈ miɔɔ Koɔn mɔ̀ diba, ɔɔ se kàan tè po wlògbaeǒ Nyesoa mi ɛ ɔ̀ kwa sàba.

¹⁷Koɔnʼǒ u diɔ mɔ̀ Ɔ moo Nyesoaa Sùsu, è tà wùɛà Koɔnʼɔ Sùsu neǒo, kpni kukwǐ slè gblàgbla neǒ.

¹⁸Ä se äa jigbè tata je kaen ne, ii tè ä jě Koɔnʼɔ tè jǐ boaboǎ le, ɛmo tè jǐ boaboǎǒ ɛ̈ǒ sɔn lěe Koɔn mɔ̀ mǒ Ɔ̈ monoo Sùsu nɛ̀ sɛ̀ äa kmɔ̌ de le, ä wǒ Ɔ je chɔɔ plě ä kɔn Ɔɔ tè jǐ boaboǎǒ ɛɛ kpɛntɛɛ̌.