Read Grebo, Northern 2 Kwnɛtiɛ̌ 6 Bible Online

2 Kwnɛtiɛ̌ 6 - Grebo, Northern bible

2 Kwnɛtiɛ̌ 6

¹Amoà moo äa bǐì Nyesoa konkwa mɔ̀ nuu nyo, ä bɛ̀te ale aǎ ni Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ Ɔ nye amoo ɛɛ̌ moo putu.

²È kě Nyesoa dɛ̌ klě Ɔɔ win wlòmo Ɔ je, “Tǐ diě le ï kɔn mǒ Ě mi amoo nɔkǔ jebo poba Ě mǐ amoo kàan dɛ mǒ nu, klě tǐǒ wlòmo Ě miǎ a mǒ sɛ̀ɛba Ě miǎ a wa.” (Is 49.8) A po nɔkǔ bo, tǐà nì moo tǐ keǒ Bɔ nu a kàan dɛ mǒ, è tǐà nì moo tǐ keǒ Bɔ wa amo.

³Äǎ ni dɛ ɛ̈ nyu wùɛ mii dɛ kukǔ mǒ jěba ɛ̈ di ɛɛ numa nyu wùɛ ně diǒ äa konkwaà tè jleě mǒ boɔ.

⁴Dɛ wùɛ ä nii nɛ̀ tee ɛ ɛ̈ moo ä moo Nyesoaa na wien po nyebajle, ɛɛ jboo dɛ nɛ̀à, bo tǐ jakě bǐ diě klee wɔle le nunuɛ klee sònwɛ jejeɛ̌, ä kwɛn wlò dbadbǎ fòɛ.

⁵U be ä le ǔ pe ä wùlo le klɔ̀ wɛ̀ɛ ä kɛn de, ä ni konkwa jakǎ, momnɔ klee didi dɛ se tà ne.

⁶È noǎ tìi kɔn mǒ ä teeě lɛɛ ɛ̈ moo ä moo Nyesoaa na wien po nyebajle nì moo tè jɛɛa seǒ ä jleě mǒ ne klee äa tè le jbojbɛ klee äa wlò dbadbǎ plě äa kàan dɛ plě mɔ̀le snasnǎ klě äa wlè jleě plě kàan mǒ noɛnoɛ keǒ tùonyopo mɔ̀.

⁷Äǎ tmɔ̌ sen plě ä blě Nyesoaa kpě. Jebo siǐn kmɔ̌à ä nee nɛ̀ nu ɛ ä wɔ̀ě ɛ keǒ bä

⁸bɛɛ̌ě tǐ wùɛ wlòmo tìe bo bǔ keǒ ä tùtuɛ nye klee tìe bǔ keǒ äa tè le sɛ̀ɛ le klee bǔ ke ä tè jɛɛ le plě tìe bǔ ke ä nynɛ̌ le pe. U kpɛ ä tǐ kɛn wòje sen le tmɔ̌ nyo, kɛɛ ä boɛ dɛǒ monoo kàan tè.

⁹U ji äle, kɛɛ u ni ämo wòje keà u se ämoo ji. U ni ämo wòje keà u nu wiěn kokǒ nyuǒ, kɛɛ a ji ɛle ɛ̈ moo ä neě jè kmɔ̌. Kàan tè u be ä le, kɛɛ äǎ kǒ.

¹⁰Nyopò jě ɛ ɛ̈ moo wɔle ni ämo, kɛɛ tǐ wùɛ mɔ̀ ä ni le chǒn. Nyopò jě ɛ ɛ̈ moo sònwɛ ni ämo, kɛɛ ä ni nyopò fòfoa ǔ pɛ̀n klě Nyesoaa tè de jbojbɛ mǒ. U jě ɛ ɛ̈ moo ä se dɛ kɔn, kɛɛ ä kɔn noǎ wùɛ.

¹¹Amo nyopòà neěe dě fòɛǒ moo Kownɛ̀ kɛn, ä kna äa chɛ̀ɛ wlè je sɛjesɛ ä boɛě a mɔ̀.

¹²Äa mǒ noɛnoɛ ä kɔnʼɔ keǒ a mɔ̀ ɛ se kɛn nae ne, kɛɛ amo kɔn mǒ noɛnoɛ nae kɛn keǒ ä mɔ̀.

¹³Ě tmɛɛ̌ ane wòje keà Ě tmɛɛ̌ něe jlǔ, a tee ä mǒ noɛnoɛɛ doǒ ä kɔnʼɔ keǒ a mɔ̀.

¹⁴Aǎ be se kàan tè po nyo slè. È ke mǒ slɛɛ̌ dɛ klee kenkan dɛ wɔ̀le je bi nuǔ kɛǒ tàa do nena bi nuǔ dɛ? È ke kwijlě klee pepě miǐ kɛǒ tàa do paěan numa?

¹⁵È kɛn wonwɔɔa tae neě kɛǒ Tentǎn Jǔ klee kǔ slè? Dɛɛ doǒ nɛ̀ ɛ mono, nyuà poo Tentǎn Jǔu tè kàan tè klee nyuà se Ɔɔ tè kàan tè popoɛ kɔn, bo jě ke u nu kɛɛ dɛɛ do nunuɛ?

¹⁶Bo jě dɛ tae nǔkpuǐ klee Nyesoaa kǎ fòɛ paěn nee mǒ? Nyesoa neɔ ä mǒ, tèǒ nì kɔn tè ä wǒ je kmɔ̌ ne Nyesoaa kǎ fòɛ wòje keǒ Ɔɔ win dɛ̌ɛ ɛ̈ moo, “Ě miě Ně nyopò slè nema, Ě mǐ uu Nyesoa tù u mi Ně nyopò tù.” (Lev 26.12)

¹⁷Tèǒ nì kɔn tè kě Koɔn dɛ̌ Ɔ je, “Nyopòǒ moo se kàan tè po nyo a tɛ u bo plě a sàě u aa chɛ̀ slè. (Is 52.11) Dɛà see sìnɛ wɛ̀ aǎ gbè ɛ mɔ̀, Ě mi a kwa blěba (Ezek 20.34)

¹⁸plě Ě mǐ aa gbeǐ tù plě a mǐ Ně jbɛjujlu klee nynejujlu tù.” (2 Sam 7.8,14) Dɛǒ nɛ̀ kpě kɛne Koɔn boɔ.