Read Grebo, Northern Kalesiɛ̌n 4 Bible Online

Kalesiɛ̌n 4 - Grebo, Northern bible

Kalesiɛ̌n 4

¹A nɛ bo po ɛ dɛ je keǒ a mɔ̀, kàan tè jbɛjujuà ɔɔ gbeǐi konkɔn noǎ wùɛ miǎǒo mɔ̀ kɔnma, nɔ̀ kɔn noǎ wùɛǒ, kɛɛ tǐǒ jleě ɔ monoǒ jèe jǔ, ɔɔ gbeǐ ni ɔ wòje keà kèi.

²Tǐǒ jleě ɔ monoǒ jèe jǔ, ɛ kɔn nyopò tùu ü kɔnʼě ɔɔ tè mɔ̀ ü tùi ɔɔ noǎǒ jǐ mɔ̀ ɛ mǐ ɛ kpa kpa tǐǒ ɔɔ gbeǐ tbaa i miǒ nyni noǎǒ i miě ɔ kwete mǒ be.

³Dɛɛ doǒ nɛ̀ ɛ mono keǒ ä mɔ̀, plě ä mǐa kàan tè po nyo tù klě Tentǎn Jǔ mǒ, ä mooa kmɔ̌ kukǔ nyo.

⁴Kɛɛ tà tɛɛ tǐ nyniaǒo, Nyesoa dboa Ɔɔ Jǔ. Nynɔ nɔ̀ kmàea Nɔ plě Ɔmo Jǔǒ Ɔ̌ tùiaǒ Nyesoaa teteǎ ble kpǎkpǎ

⁵ɛ̈ di ɛɛ numa Ɔ mǐa nyopòǒ nea lěe teteǎǒ bobo gblà plě Ɔ mǐa ɛ nu ɛ mǐaě ɛ wɔ̀ keǒ bä mooa Nyesoaa jlǔ.

⁶Ke ɛ toon jleě mǒ bo ǎ moo Nyesoaa jlǔ, Nyesoa dbo Ɔɔ Jǔu Sùsu klě aa wlè jleě. Ɛ pnɛ̌ dɛ jleě le klě Nyesoa mɔ̀ kě Ɛ dɛ̌, “Abà!” ɛ̈ sɛ̀nʼɛ nynɛ̌ Ně Gbeǐ.

⁷Tèǒ nì kɔn tè sè kèi klě teteǎ boboo kɛ̀, mòo Nyesoaa jǔ. Ke ɛ toon jleě mǒ bo Nyesoa nu mòo Ɔɔ jǔ mǒ, Ɔ nuù mǒ nyu ɔ̈ kɔnʼǒo noǎ wùɛǒ wakǎ jleě mǒ ï Ɔ peeě Ɔɔ jlǔ.

⁸Klě dɛà sìnʼi wlòmo, tǐǒ jleě a seaa Nyesoa ji a mooa kèiapo keǒ nyesoeà see fònfno mǒ ne ii wɛ̀ sèsa mɔ̀.

⁹Klě tǐà wlòmo a ji Nyesoa le plě Ě kɔn bo boɔ lɛ ɛ̈ moo Nyesoa ji ale. È mɛ kɔɔ̌n tè a bitǐǐ kɛ bo a tbɛɛ leě je a miěe kbě ja le wɛ̀ noǎ klee noǎà see dɛ mǒ ne mɔ̀? A jlɛ̌ ba moo kɛ kèiapo de keǒ i mɔ̀le?

¹⁰A kɔn sɛje chnɛ̀ jlǒ wě klee sòbai klee tǐ a sàǒo klě jlǒ wlòmo a tùiǒo bo.

¹¹Ɛ ni niǐ fano ɛ̈ moo tǐ tìi tà ně konkwaà Ě nuu kělɔ a slè ɛ moo kbě Ě wlǎla i ble.

¹²Ně bǐì Tentǎn Jǔu wǎn ane, Ě bɛ̀te ale, a wǒǒ je ɛ̈ di ɛɛ numa Ě mǐ a je wǒ. A sěɛlǎǎ dɛ kukǔ wùɛ mǒ ni, è aǎ tùi ɛ wlò klě tǐà wlòmo.

¹³A ji ɛle ɛ̈ moo kmakmaǒ Ě blěaa nɛ̀ nua nɛ Ě wɔ̀laě ɛ keǒ bo poa a Nyesoaa tuposàǒ je klekle.

¹⁴Kàan tè ně kmakmaǒ ɛ paea a wan le dɛ, a seaǒ ně tè le sàe le plě a seaǎ jleě mɔ̀ sà, kɛɛ a kmeaǎ jebo wòje keà Nyesoaa najiǒpòi ɔ̀ɔ̌ Jùsu Tentǎn Jǔu chɛ̀.

¹⁵È mɛ kpaǎ kɛ tùɔn de keǒ aa chǒn le nunuɛǒ mɔ̀? Ně chɛ̀ mǒ moo sàse keǒ a mɔ̀ ɛ̈ moo bɛ̌ nu bɛ̌ wɔ̀ɔa lě ɛ, a miia lě aa chɛ̀ɛ jǐ sàba a miǐa i mǒ nye i miǐaǒ mǒ mɔ̀ mǎ.

¹⁶Tà Ě tmɛɛ̌ kɛ amoo kàan tè nɛ̀ kɔn tè Ě moo aa jlae nyu klě tǐà wlòmo le?

¹⁷Nyopòǒ moo nye kukwǐ u tee ɛ ɛ̈ moo u kɔnʼě aa tè mɔ̀, kɛɛ dɛǒ u kɔnʼě uu dlě wlòmo ɛ se kàan nu keǒ a jleě mǒ. U sòɛ bu sèsae a klee ämo jele ɛ̈ di ɛɛ numa a mǐ u ja chè.

¹⁸Ɛ moo kàan dɛ keǒ a mɔ̀ keǒ ba kɔn lě kàan noǎa tè mɔ̀ tǐ wùɛ mɔ̀ ɛ̈ see bo neǒ a gbàa plě.

¹⁹Ně jlǔ ale, ɛ moo ɛ blěe chnechně dɛ ɛ̌ neěě fǒ mɔ̀ aa tè wòje keà nynɔ neǒo kmàeaa chnechně noǎa slè ɛ mǐ ɛ kpa kpa Tentǎn Jǔu kmɔ̌ miě a mǒ be.

²⁰Aa kèjle niǐ ni, ii tè Ě jlɛ̌ bo neeě amo slè klě tǐà wlòmo ɛ̈ di ɛɛ numa Ě mǐ ně boɔboɔ winʼà bo bitǐ.

²¹Amoà sòɛ bu beěe Nyesoaa teteǎ bobo, a tmɔɔ̌ mǒ, aǎ wɔ̌n kɛ tèǒ teteǎ boɛɛ le?

²²Kě i dɛ̌ ɛ̈ moo, Eblɛ̌hɛ̀mo kɔna jbɛjujluu sɔ̌n, ɔɔ kèi nynɔ kɔna do, è ɔɔ slòslo nynɔ kɔna do.

²³Ɔɔ jǔǒ kèi nynɔǒ ɔ kɔnaa ɔ kɔɔnaě tǔnʼu doǒ kɔn wlòmo jlǔ tùu kwɛɛnʼě, kɛɛ ɔɔ jǔǒ ɔɔ slòslo nynɔ kɔnaa ɛ mooa Nyesoaa poo dɛ keǒ Eblɛ̌hɛ̀mo mɔ̀ ɛ̌ nua nɛ ɔ̌ kɔɔnʼa.

²⁴Ä wɔ̀le je bä dǔ nynoo sɔ̌nʼǒ mǒ bä tùǒ u Nyesoaa kuo winʼi sɔ̌nʼǒ pènmo ï Ɔ poaa keǒ tùonyugbe mɔ̀. Hekà nɔ̀ nynaǒ kuo winʼǒ Nyesoa poaa keǒ togbeeǒ moo Sanàe dlǒ pènmo bo, imo kuo winʼǒ nì nu nyopò kèiapo mǒ klě Nyesoaa teteǎ bobo.

²⁵Ɛmo togbee chɛ̀ǒ ɛ neě Awlebìa nyoo blǒ kɛn klě Hekàa jlǔu jlǔ tǐn kekɛɛ lě. Hekà nynaǒ pènmo bo Jùwɛ nyoǒ ü ne kekɛɛ lěe Jlǔsnɛ. Mɛ̌oǒ joo nɛ̀ moo u neě Nyesoaa teteǎ bobo ke.

²⁶Kɛɛ Selɔ̌ nynaǒ pènmo bo sɔ̌n nenɛ kuo winʼǒ ï sàa nyopò dbǐ mǒ klě Nyesoaa teteǎa win kwa konkɔn bobo, nɔ̀ nynaǒ Jlǔsnɛǒ neěe jɔkɛn pènmo bo. Kuo winʼǒ nì ä neě bobo.

²⁷Ɛ chleě le klě Nyesoaa win wlòmo ɛ̈ moo, “Nynɔà sěɛlǎa jǔ kwɛn klee ɔ̈à kmàeaa chnechně noǎa sěɛlǎa kanǐ gbɛ̀ bɔ nu chǒn le bɔ jaěě win bɔ tùngmae chǒn le nunuɛ ɛ̈ moo nynɔà u bɔ̌ɔ ɔ mi jlǔ fòfoa kɔnma ɔ miǒ nynɔà kɔnʼɔ jbe mǒ sìn.” (Is 54.1)

²⁸Ně bǐì Tentǎn Jǔu wǎn ane, Nyesoaa pee dɛ nɛ̀ nu ämo ä moo Ɔɔ jlǔ wòje keǒ Aesěè ka nee je.

²⁹Klě tǐǒ wlòmo Isèmae ɔ̈ u kɔnaa ke jlǔ wùɛ nii kɔɔan nɔ̀ tèa Aesěèe tè mɔ̀ ɔ̈ u kɔnaa klě Nyesoaa Sùsuu kpě wlòmo. Dɛɛ doǒ nɛ̀ ɛ mono kekɛɛ, nyopòà ü tɛ̀n nɛɛ mǒ bü tùǒo Nyesoaa teteǎ bo ɛ̈ di ɛɛ numa u miě Ɔɔ jǐ kɛne wɛɛn ne, u tè nyopò tùuǒ uu tè mɔ̀ ü uu tè wlò popoɛ nuu ü wɛɛnʼě Nyesoa jǐ kɛn le.

³⁰Kɛɛ ke tae Nyesoaa win dɛ̌ɛɛ̌ kɛ? I je, “Poě kèi nynɔǒ plomǒ ɔ klee ɔɔ jbɛjujuǒ. Mɛ̌oǒ joo nɛ̀ moo ɔɔ jǔ klee slòslo nynɔà ɔɔ jǔ u se uu gbeǐi konkɔn noǎ ploba mu.” (Gen 21.10)

³¹Ii tè ně bǐì Tentǎn Jǔu wǎn ane, ä se kèiapo keǒ Nyesoaa teteǎ mɔ̀ wòje keǒ kèi nynɔǒ ɔɔ jlǔu ka nee je, kɛɛ ä wan mǒ dbǐ klě teteǎ bobo keǒ slòslo nynɔɔ jlǔ ka nee.