Read Grebo, Northern Ifisiɛ̌n 2 Bible Online

Ifisiɛ̌n 2 - Grebo, Northern bible

Ifisiɛ̌n 2

¹Klě tǐà sìin wlòmo kmɔ̌ sie kokoɛ̌ blɛɛa a je keǒ aa kpni kukwǐ klee seǒ Nyesoa bo tùtuɛ kɔn kmɔ̌ a niaa mɔ̀.

²Klě tǐǒ wlòmo kpni kukwǐà neɔɔ kmɔ̌ɔ mɔ̀ nì a neea kmɔ̌ ǎ tùiaǒ sùsuu win ɔ̈ moo sìsi kukwǐà nea lěe jɔ mǒ ii win kwa kɔn sùsu, ɔɔ doǒ nɔ̀ kɔn nyopòà seǒo Nyesoa bo tùtuɛ kɔn win kwa.

³Sɛjesɛ klě tǐǒ sìin wlòmo plě ä mǐa tè wlò popoɛ kɔn keǒ uu ka nee je kě äa wùɛ äa ka nea je. Noǎ kukwǐà äa kpni kukwǐ kmɔ̌ jlɛ̌ɛ nì ä kwɛa mɔ̀le ä nia dɛ wùɛ äa fǒ klee dlǒ le sìɛnsiɛn jlɛ̌ bä nuaa. Ɛmo kmɔ̌ taeǒ ä neaa, Nyesoaa plɔ tu kɛn bo maěa blɛɛa ä je wòje keǒ nyu wùɛɛ ka nee je.

⁴Kɛɛ Nyesoa kɔn wɔle je jbojbɛ chɔɔ plě Ɔ̌ noɛɛ ä mǒ chɔɔ dɔ̌,

⁵ii tè kàan tè kmɔ̌ sie kokoɛ̌ blɛɛa ä je keǒ äa kpni kukwǐi tè mɔ̀, Nyesoa nyea ä kmɔ̌ sie fònfno keǒ äa tè wlò popoɛ ä kɔnʼɔ klě Tentǎn Jǔ mǒ ɛɛ tè mɔ̀. Nyesoa kɔn Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀, ii tè a gblàe le klě aa kpni kukwǐi tè jɛɛa bobo.

⁶Äa tè wlò popoɛ ä kɔnʼɔ nɛ̀ kɔn tè Nyesoa mǎ Nɔ ä kɛn bo Ɔ sàě ä kǒla mǒ Ɔ̌ tùǒ Ɔ klee ämoo sɔ̌n tàa do bo klě jɔkɛn.

⁷Nyesoa nu kàan keǒ ä mɔ̀ Ɔ̌ dbo Tentǎn Jǔ kělɔ ä mɔ̀ ɛ̈ di ɛɛ numa Ɔ mǐ ɛ nyopò wùɛ tee le ü neěe kmɔ̌ɔ nya ke Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ nuu kunkuɛn chɔɔ keǒ tùonyugbe mɔ̀.

⁸Ɛ moo Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀ ɛ̌ nu amo ǎ kɔn wowa dɛ ɛ̈ diiě tè wlò popoɛ a kɔnʼɔ mǒ, ɛ se aa chɛ̀ a se ɛ nu. Wowa dɛ moo Nyesoaa nyee dɛ Ɔ nye amoo.

⁹A se ɛɛ konkwa nu, tèǒ nì kɔn tè nyu wùɛ bɔɔ̌ pe wun le ɛ̈ moo uu chɛ̀ɛ dɛ u nuu nɛ̀ǒ nye ɛ nù.

¹⁰Mɛ kɔɔ̌n tèǒ joo nɛ̀ moo Nyesoa Nɔ̀ nu ämo ä neě tǔnʼà wlòmo keǒ ba kɔn tè wlò popoɛ klě Tentǎn Jǔ Jùsu mǒ ɛ̈ di ɛɛ numa ä mǐ kàan dɛ kmɔ̌ nee ne ke Ɔ jlɛ̌ bä nee, dɛǒ nɛ̀ Ɔ poa ble seela keǒ ä mɔ̀ bä nu.

¹¹Tèǒ nì kɔn tè amoà moo kuodakwɛ̌ ü nyopòà bɛ̌ luu chɛ̀ foeě u dɛɛ se foeě bɛ̌ nyo, bi beě a wlòmo ke a nea pnɔɔ

¹²tǐǒ jleě a seaa Tentǎn Jǔ ji. A seaǒ Nyesoaa nyopò wakǎ jleě mǒ kɔn ü moo Ǐsòwɛ̌ kwɛɛn. A seaǒ Nyesoaa kuo winʼǒ Ɔ peeaě Ɔɔ nyopò wakǎ jleě mǒ kɔn. A sea wlò je kuun dɛ kɔn klee Nyesoa ǎ nɛaɔ kmɔ̌ɔ mɔ̀le.

¹³A tmɔɔa pnɔ Nyesoa mɔ̀ piauun, kɛɛ klě tǐà wlòmo a kɔn tè wlò popoɛ klě Tentǎn Jǔ Jùsu mǒ, è Ɔɔ kokoɛ̌ nɛ̀ jaě amo ǎ mǎ Nyesoa debo.

¹⁴Klě ɛmo dɛǒ mǒ Tentǎn Jǔ jaě ně bo wnawna klě Jùwɛ nyo klee kuodakwɛ̌ slè. Ɔ nu ä kplěe sɔ̌n wùɛ ä moo dɛɛ do, è Ɔɔ kokoɛ̌ nɛ̀ Ɔ nu Ɔ̌ sùe teteǎ gbè ï nua ämoo ä moo jejlae nyo ngmì kpǎ neaǒ ämoo pǎnpe.

¹⁵Nɔ̀ kan teteǎǒ je, jà noǎà Ɔ tmɔɔ̌a ämoo bä nuaa klee ngmè ɛ̈ di ɛɛ numa Ɔ miě ně bo wnawna ja keǒ ä slè Ɔ miǒ äa kplěe sɔ̌nʼà nee dɔ̌ɔdɔ̌ le tàa do po, ä mǐ tàkpɔ̌ jajlo nu ɛ̈ mi Ɔɔ konkwa numa.

¹⁶Keǒ Bɔ koǒǒ pète bɛ̌ tu jleě, nɛ̀ Ɔ nu Ɔ̌ sàǒ jejlaeǒ ne pnɔǒ Nyesoa klee Jùwɛ nyo klee kuodakwɛ̌ pǎnpe Ɔ̌ jae u de klě Nyesoa mɔ̀.

¹⁷Tà Tentǎn Jǔ dia lěe, Ɔɔ tuposàà kwɛɛaǒo ke nyu bɔ nuu ně bo wnawna konkɔn keǒ ɔ klee Nyesoaa sɔ̌n slè nɛ̀ Ɔ pea amo kuodakwɛ̌ je ü tmɔɔaa Nyesoa mɔ̀ klee amo Jùwɛ nyo ü konwaěaa Nyesoa le.

¹⁸Tentǎn Jǔǒ Nɔ̀ kɔn tè Ngmà Je Ne Sùsuu doǒ Ɛ nu ɛ ämo Jùwɛ nyo klee kuodakwɛ̌ ä wɔ̀le ɛ keǒ bä boɔě Nyesoa mɔ̀ Ɔ̈ moo äa Gbeǐ.

¹⁹Dɛǒ nɛ̀ nu ɛ amo kuodakwɛ̌ ǎ see kɛ̀ dakpě keǒ Nyesoa mɔ̀, kɛɛ a klee Nyesoaa nyopò a moo dɛɛ do.

²⁰È a nynaǒ kɛn bo kǎngmà ɛ̈ Nyesoaa tuposà kpa nyo klee Nyesoaa wnɔsàɔpo poo ble, Tentǎn Jǔ Jùsu Nɔ̀ moo ɛɛ tiblě.

²¹Nɔ̀ moo Nyu Ɔ̈ blěǒ Nyesoa wǎn mɔ̀ kwa kpankpa ǔ kenkmeeǒo mɔ̀ ble Ɔ̌ ni ɛ ǔ bebee kɛne plě Ɔ̌ ni ɛ ǔ moo ngmà je ne nyo keǒ Koɔn Nyesoa mɔ̀.

²²Aa tè wlò popoɛ a kɔnʼɔ klě Tentǎn Jǔ mǒ nɛ̀ ni amo ǎ kwinʼǒ tàa do wòje tùɔn ɛ̈ kɔn kɛn Nyesoaa Sùsu Bɛ tǐnʼǒo.