Read Grebo, Northern Ifisiɛ̌n 3 Bible Online

Ifisiɛ̌n 3 - Grebo, Northern bible

Ifisiɛ̌n 3

¹Dɛǒ nɛ̀ kɔn tè kwɛǒ je mǒ Pɔ̀ɔ̌à Ě moo kekɛɛ wùlo po nyu keǒ bo boɔ Nyesoaa win ɛ̈ moo Tentǎn Jǔ Jùsu kɔnʼǒ amo kuodakwɛ̌ mɔ̀. Mɛ̌oǒ joo nɛ̀ moo Jùwɛ nyo jě lɛ ɛ̈ moo uu do nù Nyesoa kɔnʼǒ mɔ̀.

²I moo kàan tè a wɔ̌na ini ɛ̈ moo Nyesoaa wlòo jlajlǎ dɛ ɛ̈ɛ̌ sà Lɔɔ wlò kǔ mǒ ɛ̈ Ɔ kɔnʼɔ keǒ a mɔ̀ nɛ̀ kɔn tè Ɔ nyeaǎ konkwaà bo nu nɛ keǒ a mɔ̀.

³Nyesoa po Ɔɔ je wɛ̌ dɛǒ mǒ pepě keǒǒ mɔ̀ ɛ̈ kɔn tè Ě chɛɛn nee kɔno dlǒ sosǒ Ě tmɔɔ̌ amoo.

⁴Bɛ̌ nu bǎ slè chněedɛ̌à, a mi ɛ jiba ke Ě nuu je wɛ̌ dɛǒ kwɛɛǒo Tentǎn Jǔ jleě mǒ bo le jbojbɛ.

⁵Klě tǐà sìin wlòmo Nyesoa sea je wɛ̌ dɛǒ pepě mǒ po keǒ tùonyugbe mɔ̀, kɛɛ klě tǐà wlòmo Ɔɔ Sùsu Nɛ̀ po ɛ pepě mǒ keǒ Ɔɔ ngmà je ne tuposà kpa nyo klee wnɔsàɔpo mɔ̀.

⁶Ɛmo je wɛ̌ dɛ nɛ̀à, klě Nyesoaa kàan tuposà mǒ kuodakwɛ̌ mi ngmnaa doǒ Jùwɛ nyo kɔnʼɔ kɔnma. Uu wùɛǒ u beě tàa do ǔ nu dɛɛ do wòje fǒ, è kmɔ̌ sie fònfnoǒ Nyesoa peea lěe keǒ nyopòà kɔnʼɔ tè wlò popoɛ klě Tentǎn Jǔ Jùsu mǒ, uu wùɛ u mi ɛ mǒ paěnma.

⁷Nyesoaa kpěà nii konkwa kělɔɔ̌ mǒ nì nu ɛ Ě kɔn Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ bo nu Ɔɔ konkwa ɛ̈ moo Ɔɔ tuposà blě kɛne gbɛ̀tɛɛa.

⁸Kàan tè kě ně tè se kma klě Nyesoaa nyopò wùɛ slè, Ɔ nyeě fɔ̌ keǒ bo tmɔɔ̌ kuodakwɛ̌ wlòlekaen noǎ ï sɔn lěe Tentǎn Jǔ mɔ̀ mǒ

⁹plě Ɔ̌ nyeě fɔ̌ keǒ Ɔɔ je wɛ̌ dɛà Ɔ poo ble boǒ po ɛ pepě mǒ keǒ nyu wùɛ mɔ̀ ɛ̈ Ɔmo Nyesoaà monoo noǎ wùɛɛ nunu Nyu Ɔ tùaa bo klě tǐà sìin wlòmo

¹⁰ɛ̈ di ɛɛ numa Tentǎn Jǔu wǎn mǐ Nyesoaa tɔ̀n pepě mǒ po keǒ win kwa kɔn najiǒpò klee najiǒpòà kɔnʼɔ kpě mɔ̀ ü neěe jɔkɛn, u mǐ ɛ ji ke Nyesoa nuu tɔ̀n konkɔn keǒ dɛ wùɛ mɔ̀.

¹¹Dɛǒ nɛ̀ Nyesoa poa ble seela plě Ɔ nu ɛ̈ kpa tùɔn klě äa Koɔn Tentǎn Jǔ Jùsu mǒ.

¹²Keǒ dɛǒ Tentǎn Jǔ nuu ɛɛ tè mɔ̀, bɛ̌ nu bä kɔn tè wlò popoɛ klě Ɔ mǒ, ä miě ɛ wɔ̀ba bä boɔě Nyesoa mɔ̀, è ä mi wlò kpaea kɔnma kpǎkpǎ ɛ̈ moo Ɔ mi ä nɔkǔ jebo poba.

¹³Tèǒ nì kɔn tè Ě bɛ̀te ale, aa wlè biǐ be wɔ̀ɔn. Mɛ̌oǒ joo nɛ̀ moo Ě jě sònwɛ keǒ a mɔ̀, ɛmoǒ ɛ miǒ a dɛ bo po.

¹⁴Tèǒ nì kɔn tè kwɛǒ je Ě kɔ kwne bo Ě bɛ̀te äa Gbeǐ Nyesoa

¹⁵Ɔ̈ nuu dakɔ̌ wùɛ neěe jɔkɛn klee kělɔ kmɔ̌ɔ mɔ̀ ǔ nee kmɔ̌.

¹⁶Ě gbɛ̀ Ɔ wan keǒ Ɔɔ Sùsu Bɛ nye a kpě ï sonwɛ lěe Ɔɔ kpě fòe mǒ ɛ̈ di ɛɛ numa aa tè wlò popoɛ mǐ kbě mǒ ne

¹⁷ɛ mǐ ɛ nu Tentǎn Jǔ miě aa wlè jleě ne. Ě bɛ̀te Nyesoa keǒ ba mǐ Ɔ mǒ noɛɛ ne klee tùonyopo tùu

¹⁸ɛ̈ di ɛɛ numa a klee aa bǐì Tentǎn Jǔu wǎn tùu a mǐ kpě blě keǒ tèe de jbojbɛ mɔ̀, a mǐ ɛ jě ke Tentǎn Jǔu mǒ noɛnoɛ Ɔ kɔnʼɔ keǒ a mɔ̀ ɛ nuu kunkuɛn.

¹⁹Ɛ se nyu kɔn bɔ̈ jbo ɛɛ le kpǎkpǎ. È Nyesoaa chɛ̀ miě a měne jǐba kpǎkpǎ.

²⁰Tè jǐ boaboǎ keǒ Nyesoa mɔ̀ Ɔ̈ kɔn kpě ï nii konkwa klě ä mǒ äǎ wɔ̀le ɛɛ keǒ bä nuu noǎ fòfoa ï ä slě wɔ̀ bä sìɛn nee dlǒ mɔ̀le klee bä gbàa wan.

²¹Nɛ bo Tentǎn Jǔu wǎnʼa jlǔu jlǔǒ neě kmɔ̌ɔ nya ü kɔnʼɔ tè wlò popoɛ klě Ɔ mǒ bu nye Nyesoa tè jǐ boaboǎ ke ɛ mii jleě mǒ bo tonma, kě bɛ ne.