Read Grebo, Northern Flepiɛ̌n 3 Bible Online

Flepiɛ̌n 3 - Grebo, Northern bible

Flepiɛ̌n 3

¹Ně bǐì Tentǎn Jǔu wǎn ane, klě tǐà ä neěe wlòmo aa plɔ bɛ blo keǒ tà a klee Koɔn nyenymae nee mǒ. Ɛɛ̌ tùǔ kèjle keǒ boǒ chleě amo de bo wɛ̀ dɛà kɔn tè Ě chleěa amoo mɔ̀ sɔ̌n kɛn, imoǒ nì miǒ a mɔ̀ mǎma ï mi a kpni kukwǐ mɔ̀ tmɔɔma.

²Ba tù gbùoǒ jǐ mɔ̀ ü moo dɛ kukǔ nyoǒ ü tɛ̀n ɛ mǒo bü bɛ̌ luu chɛ̀ foeě u mǐi wa.

³Ämoà ämo sɛje u moo foeě bɛ̌ nyopò. Mɛ kɔɔ̌n tèǒ joo nɛ̀ moo ämo sɛ̀ Nyesoaa wɛ̀ klě Ɔɔ Sùsu mǒ plě ä kun kɛn le Tentǎn Jǔ Jùsuu tè plě äǎ kuun foeě bebɛ̌ wlò je ɛ mǐ ä jebo siǐn nyo mǒ nu.

⁴I moo kàan tè Ě wɔ̀le je bo kɔn wlò je kunkuɛn taeǒ lo, kɛɛ ɛ seě kàan dɛ wùɛ mo numa mu. Bɛ̌ nu bo nyu tɔ̀ɔ bɔ̌ jě lɛ ɛ̈ moo ɛ kɔn tè kɔn tè ɔ kɔnʼɔ wlò je kunkuɛn klě ɔɔ chɛ̀ mǒ ɛ̈ mi ɔɔ jebo siǐn nyu mǒ numa, è Ě kɔn noǎ fòfoa ï kɔn tè bo kuun nuu wlò je ɛ̌ sìnʼǒ ɔ mǒ.

⁵Tà Ě kɔɔnʼaa, keǒ ně chnɛ̀ jlǒ wěe nnyɛɛ̀ nenɛ mɔ̀ Ě bɛ̌a foeě. Ě moo Ǐsòwɛ̌ kwɛin, Ě kɔnʼě dakɔ̌ dlǒǒ monoo Bɛ̀chemɛ̌ slè plě Ě moo Hiblǔ nyu. Bä diěǒ Nyesoaa teteǎa bo tùtuɛ dɛ kɛn, Ě kɔnʼě Fɛlesǐi wǎn slè ü sleěe jebo keǒ teteǎ ble tùtuɛ mɔ̀.

⁶Ě nea kbě kɛn Ě mɛ̌aǒ Jùwɛ nyo mɔ̀ ǔ tèa Tentǎn Jǔu wǎnʼa tè mɔ̀. Ě wɔ̌na jebo siǐn tè, nyu wùɛ ɔɔ̌ jěa mǒ keǒ bo tè bi kmea mǒ keǒ Nyesoaa teteǎa dɛɛ doo chɛ̀ wlawlǎ mɔ̀.

⁷Kɛɛ keǒ Tentǎn Jǔ Jùsuu tè mɔ̀ imo noǎǒ Ě jěa pnɔɔ ɛ̈ moo i peaǒǒ bo dɛ, klě tǐà wlòmo iǐ poǒo dɛ boo kɛ̀.

⁸Bɛ̌ nu bo po imo noǎǒ kàan dɛǒ neǒo nyu bɔ ji Tentǎn Jǔ Jùsu wlòmo je Ɔ̈ moo ně Koɔn, ii wùɛ Ě jě li ɛ̈ moo i se dɛ mǒ ne. Keǒ Ɔɔ tè mɔ̀ Ě sàǒ noǎ wùɛ mɔ̀ jleě plě Ě jě li ɛ̈ moo i moo wɔ̀te ɛ̈ di ɛɛ numa Ě mǐ Tentǎn Jǔ kɔn

⁹plě Ě mǐ tè wlò popoɛ kɔn klě Ɔ mǒ. Dɛǒ nɛ̀ bo nu, è Ě se ně jebo siǐan kɔn klě teteǎa ble tùtuɛ mǒ, kɛɛ Ě kɔn nɛ klě tè wlò popoɛ mǒ. A jě lɛ, Nyesoa nu ä mǒ jebo siǐn nyo klě tè wlò popoɛ ä kɔnʼɔ mǒ.

¹⁰Tèǒ nì kɔn tè Ě jlɛ̌ boǒ ji Tentǎn Jǔ klee kpěǒ sàlaě Ɔɔ kǒla mǒ plě Ě jlɛ̌ bo kɔnʼǒ kàan noǎǒ Ɔɔ kokoɛ̌ klee sònwɛ jejeɛ̌ nye ämoo wakǎ jleě mǒ.

¹¹Klě ɛɛ nunuɛ mǒ, Ě kuun ɛ je wlò Ě miǎ jemǒ dǔ Ě miǎ lě kǒla mǒ sɔn.

¹²Ě se bo dǎ ɛ̈ moo Ě nu dɛ wùɛ Ě kɔnʼɔ nunuɛ ne klee Ě snǎě le mɔ̀ kpǎkpǎ, kɛɛ Ě mɛɛ̌ǒ bo je Ě pɛ̀n imo noǎǒ le. Mɛ kɔɔ̌n tèǒ joo nɛ̀ moo Tentǎn Jǔ nuǔ mǒ Ɔɔ chɛ̀ɛ nyu ɛ̈ di ɛɛ numa Ě mǐ ɛmo dɛǒ nu.

¹³Ně bǐì Tentǎn Jǔu wǎn ane, Ě ji ɛle ɛ̈ moo Ě sěɛɛ̌ jè dɛǒ Ě pɛ̀nʼɛ le kɛn jɛɛ le, kɛɛ noǎ kukwǐ wùɛ Ě nuaa Ě snù ii tè le i be de, Ě tɛnʼě nya le keǒ dɛǒ neěe mɔ̀.

¹⁴Dɛǒ Ě pɛ̀nʼɛ le nɛ̀ Ě peě kbě Ě miě mɔ̀ Ě mǐ ɛɛ snǒ sàe dɛǒ monoo kmɔ̌ sie fònfno kɔn ɛ̈ neěe jɔkɛn ɛ̈ kɔn tè Nyesoa da ämoo klě Jùsu Tentǎn Jǔ mǒ.

¹⁵Ämoà snǎ lěe mɔ̀le ɛmo dɛǒ nɛ̀ bä sìɛn dlǒ mɔ̀le. Bɛ̌ nu aa tìee dlǒ le sìɛnsiɛn bɛ̌ ne dɔ̌, Nyesoa mi a de jaeba a mǐ dɛǒ monoo mǒ slɛɛ̌ dɛ dlǒ mɔ̀le sìɛn ne.

¹⁶È a nɛ bä muu nya bä na snǔà nyniiɔ ämoo tàɔ mɔ̀.

¹⁷Ně bǐì Tentǎn Jǔu wǎn ane, a sàě ně fì le a mǐ nyopòǒ gbɛ̀ɛ le üà nee kmɔ̌ wòje je te dɛǒ ä nyea amoo ke ɛ je ba nuu.

¹⁸Ě tmɔɔ̌a ane klě wě fòfoa wlòmo plě Ě tmɛɛ̌ ane de klě fìɛn win wlòmo ɛ̈ moo nyopò fòfoa sɛ̀ dɛà mɔ̀ jleě ɛ̈ moo Tentǎn Jǔ kǒa le keǒ Bɔ mǐ u jebo siǐn nyo mǒ nu.

¹⁹Klě ɛɛ dlǒ chlɛ̀ɛa mǒ u mi gbè sùeba. Mɛ̌oǒ joo nɛ̀ moo uu nyesoa nɔ̀ moo dɛ uu wlè jlɛ̌ɛ. U jɛɛě uu chɛ̀ le keǒ dɛà kɔn tònwe blɛɛ je bɛ̈ nu nuu mɔ̀ plě dɛ wùɛ u sìɛn nee dlǒ mɔ̀le nɛ̀ moo kmɔ̌ɔ noǎà ii tè sosǒ.

²⁰Kɛɛ ämoà ä kɔn lě jɔkɛn plě ä pɛ̀n Tentǎn Jǔ Jùsu snǔ mɔ̀le Ɔ̈ moo äa Koɔn klee Gblàgbla Nyu Ɔ̈ ä fee Ɔ̈ sonwɛ lěe jɔkɛn mǒ.

²¹Ɔ mi äa fǒà mii kǒba numa ɛ mǐ ponpnɔɔ no Ɔ mǐ ɛ tè jǐ boǎ fǒ mǒ nu wòje keǒ Ɔɔ nenɛ nuu. Ɔɔ kpěǒ nu Ɔɔ Ɔ̌ wɔ̀le ɛɛ Bɔ poě noǎ wùɛ Ɔɔ win kwa konkɔn bobo nì Ɔ mi numa.