Read Grebo, Northern Flepiɛ̌n 4 Bible Online

Flepiɛ̌n 4 - Grebo, Northern bible

Flepiɛ̌n 4

¹Tèǒ nì kɔn tè ně bǐì Tentǎn Jǔu wǎn ane ü Ě noɛɛ nee mǒ plě ü kɔn pnǒ ni mǒo, a nu mǒ chǒn ni mǒ plě Ě kun le kɛn keǒ aa tè mɔ̀. Dɛǒ nɛ̀ kɔn tè a nyna bo kpankpa klě aa tè wlò popoɛ mǒ ɛ̈ a kɔnʼɔ klě Koɔn mǒ.

²Ě bɛ̀te nynoo sɔ̌nʼà monoo Iwlodìa klee Sentèki bu wonwɔɔ kɛn ɛ̈ kɔn nù monoo dɛɛ do klě Koɔn mǒ.

³Ě bɛ̀teè le ně bě Sesèkɔ, mǎǒ nynoǒ mɔ̀ ü nuu konkwa keǒ tuposàà ɛɛ popoɛ mɔ̀ ü mǎa mǒ klee Klɛmɛ̀ klee ně bǐì konkwa nu nyo tùu debo ü kɔn nyneǎ chleě lee klě fònfno chněedɛ̌ wlòmo.

⁴Tǐ wùɛ mɔ̀ aa plɔ bɛ blo klě Koɔn mǒ! È kě Ě dɛ̌ de Ě je, aa plɔ bɛ blo!

⁵A kɔn wlèe sɔ̌n keǒ nyu wùɛ mɔ̀. Koɔn miě diba pase.

⁶Dɛ wùɛɛ tè ně tùi a kèjle, kɛɛ tǐ wùɛ mɔ̀ a sɔnʼǒ Nyesoa mɔ̀ mǒ Bɔ ji dɛ tae a jlɛ̌ɛ klě aa bàtea wlòmo klee noǎ kɔn tè a miǒ Ɔɔ jemǒ bo poba. È bǎ ke bɛ̀te, a pe Ɔ tàto keǒ dɛ Ɔ nii mɔ̀ keǒ a mɔ̀.

⁷È Nyesoaa ně bo wnawna ɛ̈ nyu wùɛ slě wɔ̀ bɔ̈ jboo le nɛ̀ mi a kwa blěba klě tè wlò popoɛ mǒ ɛ̈ a kɔnʼɔ klě Tentǎn Jǔ Jùsu mǒ.

⁸Ně bǐì Tentǎn Jǔu wǎn ane, demǒ bɔɔ̌ dɛ nɛ̀à, aa dlǒ le sìɛnsiɛn bɛ neǒ dɛà monoo kàan dɛ kɛn klee dɛà kɔn tè boǎa jǐ klee dɛà monoo mǒ slɛɛ̌ dɛ klee dɛà snǎ lěe mɔ̀le klee dɛà monoo jǐlenmɔ dɛ klee dɛà blee lee plɔ plě dɛ wùɛ ɛ̈ nyu bɔ̌ nuu ɛ̈ nii tɛɛ ɛ̈ kɔn tè u bɛɛ ɔɔ klee dɛà nyu bɔ̌ nuu ɛ̈ nii kàan tɛɛ.

⁹A nu noǎǒ a chěnʼe klee noǎǒ Ě nye amoo klee dɛǒ a wɔ̌nʼɔ Ě boɔɔ klee dɛǒ a jě mǒo Ě nuu, è Nyesoa Ɔ̈ nye ämoo ně bo wnawna Ɔ miǒ a mɔ̀ neema.

¹⁰Ɛ niniǐ chǒn chɔɔ plě Ě pe Koɔnʼɔ nynɛ̌ le keǒ ba diě ně tè mɔ̀ kɔn klě demǒ bɔɔ̌ tǐ wlòmo. Kàan tè a kɔnaě ně tè mɔ̀, kɛɛ fɔ̌ sea tà ne a mǐa ɛ tee le keǒǒ mɔ̀.

¹¹Ě se dɛà boɔ tà Ě sòɛɛ dɛ tè, ɛ̈ kɔn mǒ chěn ɛɛ keǒ ně plɔ bɛ bloo dɛ Ě blěe kɛn.

¹²Ě ji ke ɛ nee je le keǒ bo sònwɛ bɛ nu nyu klee bo nyu bɔ pàn. Ě chěn ke nyuu plɔ bɛ nuu bloblɛ ɛɛ je wɛ̌ dɛ le klě tà wùɛ klee klě tǐ wùɛ wlòmo, baǎje mǒ di digbaǐ fòfoa ɔ̀ɔ̌ sàno ni plě baǎje mǒ kɔn noǎ fòfoa ɔ̀ɔ̌ bo ke dɛ sòɛ.

¹³Bo Tentǎn Jǔà nye mǒo kpě Bɔ̌ sɛ̀ɛ leě mǒ, è Ě wɔ̀le ɛle keǒ bo nu dɛ wùɛ.

¹⁴Ɛ mooa kàan dɛ keǒ ba mǐaǎ mǒ sɛ̀ɛ le klě ně feanfeǒ noǎa slè.

¹⁵Amo Flepà nyo, a kɔn ɛ jijiɛ tɛɛ ɛ̈ moo klekle tà Ě poa amoo Nyesoaa tuposàà je plě Ě sɔna lěe Masedonìa wakǎ kɛn mǒ, Tentǎn Jǔu wǎn tùu nù seaǎ wlěe nyee dɛ nye ɛ̀ sìnʼǒ aa do.

¹⁶Sɔ̌noka, tà Ě nea lěe dě fòɛǒ moo Tɛslonikà wlòmo Ě sòɛaa mǒ sɛ̀ɛa, a dboa wlě klěě mɔ̀, ɛ sea waěe do, kɛɛ a wɛ̀a ɛ kɛn sɔ̌n.

¹⁷Ɛ se aa nyee dɛǒ ɛɛ tè i seě kmaa ne chɔɔ, kɛɛ Ě jlɛ̌ bo jě kàan dɛǒ miǒ ɛɛ dlǒ mǒ beba keǒ a mɔ̀ ɛ̈ miěe Nyesoa mɔ̀ mǒ sɔnma.

¹⁸Ě kɔn dɛ wùɛ Ě sòɛɛ le plě Ě kɔn ii fòfoaa chɛ̀ ǐ sìn dɛ Ě sòɛɛ kɛn. Nyee noǎǒ a dbo mǒo mɔ̀ ïǒ Apaflɔdetà ja mǒo nì nu ɛ Ě kɔnʼɔ kɛ̀ ii fòfoa. Keǒ Nyesoa mɔ̀ i wǒ je sonsnǒ nyee dɛ klee plɔ bloo chɔ̀no.

¹⁹Ně Nyesoa pàn ne, ii tè Ɔ mi a noǎ wùɛ a sòɛɛ nyema. Mɛ̌oǒ joo nɛ̀ moo Tentǎn Jǔ Jùsu nye Ɔ tè jǐ boaboǎ keǒ Bɔ koǒǒ äa tà.

²⁰Nɛ bo Nyesoaa Ɔ̈ moo äa Gbeǐ Bɔ kɔn tè jǐ boaboǎ tǐ wùɛ mɔ̀, kě bɛ ne.

²¹Wan le gbògba keǒ Nyesoa nyo wùɛ mɔ̀ ü kɔnʼɔ tè wlò popoɛ klě Tentǎn Jǔ Jùsu mǒ. Tentǎn Jǔu wǎnʼà klee mǒo sɔ̌n neɔɔ tàɔ u dbo wan le gbògba klě a mɔ̀.

²²Nyesoa nyo wùɛ u gbà a wan le, sɛjesɛ nyopòà ü neɔɔ klɔ̀baa kǎ fòɛ bo.

²³Nɛ bo Koɔn Jùsu Tentǎn Jǔu wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya, kě bɛ ne.