Read Grebo, Northern Klasɔ̌n 1 Bible Online

Klasɔ̌n 1 - Grebo, Northern bible

Klasɔ̌n 1

¹Mǒ Pɔ̀ɔ̌à chlě chněedɛ̌à ɔ̈ moo Tentǎn Jǔ Jùsuu tuposà kpa nyu ɛ̈ monoo Nyesoaa kɛn wɔɔn dɛ, mǒ klee äa bě Timɛtě ämo chleě

²amo Tentǎn Jǔu wǎn mɔ̀ ü neěedě fòɛǒ moo Kolasà wlòmo ü moo äa bǐì ü mǎ lěe sèn bo keǒ Tentǎn Jǔ mɔ̀. Nɛ bo Nyesoa Ɔ̈ moo äa Gbeǐ Ɔɔ wlòo jlajlǎ dɛǒ ɛ̈ɛ̌ sà Lɔɔ wlò kǔ mǒ klee Ɔɔ ně bo wnawna keǒ a mɔ̀ bi muu nya.

³Bɛ̌ nu bä klě Nyesoa mɔ̀ boɛ Ɔ̈ moo Gbeǐ keǒ äa Koɔn Jùsu Tentǎn Jǔ mɔ̀, tǐ wùɛ mɔ̀ ä pe Ɔ tàto keǒ aa tè mɔ̀.

⁴Mɛ̌oǒ joo nɛ̀ moo ä wɔ̌n aa tè wlò popoɛɛ tè le ɛ̈ a kɔnʼɔ klě Tentǎn Jǔ Jùsu mǒ plě klee ke a nu Ɔɔ wǎn wùɛ mǒ noɛnoɛ.

⁵Dɛ nu ɛɛ nɛ̀ moo a tɔɔn ɛ wlò keǒ ba jě dɛǒ Nyesoa tùu bo keǒ a mɔ̀ ɛ̈ neěe jɔkɛn ɛ̈ kɔn tè a wɔ̌naa klě Ɔɔ kàan tuposà wlòmo. Ɔɔ tuposàǒ ɛ̈

⁶dia lɔ amoo mɔ̀ ɛ gbɛ̀tɛɛ kmɔ̌ wùɛà kɛn le ɛ̌ ni dɛɛ doǒ ɛ nuaa kělɔ a slè sɔɔnʼě chnɛ̀ jlǒ waěǒ kɔn wlòmo a wɔ̌naa Nyesoaa wlòo jlajlǎ dɛà ɛ̈ɛ̌ sà Lɔɔ wlò kǔ mǒ keǒ a mɔ̀ ɛɛ tè plě ǎ jboa ɛɛ le dɛ wlòo jlajlǎ dɛǒ sɛje ɛ monoo.

⁷Ɛpaflɔ̀ ɔ̈ moo äa debo mǎ kàan konkwa nuɔ ɔ̈ nii Tentǎn Jǔ konkwa mɔ̀ klě tè wlò popoɛ mǒ keǒ aa kàan dɛɛ tè mɔ̀ nɔ̀ tee a Nyesoaa wlòo jlajlǎ dɛǒ ɛ̈ɛ̌ sà Lɔɔ wlò kǔ mǒ.

⁸Ɔ tmɔɔ̌ äne ke Ngmà Je Ne Sùsu ni ɛɛ nunuɛ ǎ wɔ̀ě ɛɛ ba noɛɛ nee Nyesoa klee nyopò mǒ.

⁹Dɛǒ nɛ̀ kɔn tè sɔɔnʼě chnɛ̀ jlǒ waěǒ kɔn wlòmo ä wɔ̌na aa tè, ä dǔaǒ aa tà bàtea mǒ kaǒ. Ä gbɛ̀ɛ ɛ Nyesoa wan Ɔ mǐ a Ɔɔ kɛn wɔɔn dɛɛ de jijiɛ nye klee tɔ̀n wùɛ plě klee Ɔɔ Sùsuu dɛɛ tè měne jbojbɛ

¹⁰ɛ̈ di ɛɛ numa a mǐ kmɔ̌ ne wòje keǒ Ɔɔ nyopò blɛɛ je bu nuu klee a mǐ Ɔɔ wlò bloo lo klě wakǎ wùɛ mǒ klee a mǐ Ɔɔ konkwa nu ɛ̈ monoo kàan noǎ wùɛɛ nunuɛ klee a miǒ Ɔ noǎ fòfoa jleě mǒ ji kaǒ.

¹¹Ä bɛ̀te Nyesoa Ɔ mǐ a kbě nye ï sonwɛě Ɔɔ tè jǐ boaboǎ kpě wlòmo ɛ̈ di ɛɛ numa a miě ɛ wɔ̀ keǒ ba nyna dɛ wùɛ jebo klě wlò dbadbǎ klee chǒn mǒ.

¹²È a mǐ Nyesoa tàto pe Ɔ̈ moo aa Gbeǐ Ɔ̈ nu amoo ǎ wɔ̀ě ɛɛ keǒ ba kɔnʼǒo noǎ wùɛ Ɔ peea lěe Ɔɔ nyopò wakǎ jleě mǒ klě Ɔɔ deplěǒ miěe jɔkɛn nema slè.

¹³Nyesoa Nɔ̀ gblà ämo klě kpni kukwǐi kpě bobo Ɔ̌ jaě ämo klě Ɔɔ mǒ noɛɛ Jǔu win kwa konkɔn bobo.

¹⁴Klě Ɔɔ Jǔu kokoɛ̌ wlòmo äa kpni kukwǐi tè poo le wlò, dɛǒ nɛ̀ nu ɛ ä wan dbǐ mǒ klě plɔɔ tu kɛn bo maěǒ blɛɛ ämoo je bobo.

¹⁵Tentǎn Jǔ wǒ je Nyesoa Ɔ̈à nyu ně jěe, plě Nyesoa mǐa kmɔ̌à nu Ɔ nea kmɔ̌, Nɔ̀ kɔn tè boǎ jǐ ï sìnʼǒ dɛ wùɛɛ tè mǒ.

¹⁶Mɛ̌oǒ joo nɛ̀ moo Nɔ̀ nu dɛ wùɛ ɛ̈ neěe jɔkɛn klee kělɔ blǒɔ mɔ̀, jà noǎà ä jěe klee noǎà äǎ jěe klee sìsià neěe jɔ mǒ ï nee kpě kɛn klee ï nɛɛ nee nyopò klee ï kɔnʼɔ win kwa plě klee ï blěe kpě. Ii wùɛǒ Nyesoa nuuě i Tentǎn Jǔ mǒ plě Nɔ̀ kɔn tè Ɔ nua ni.

¹⁷Nɔ̀ kɔn tè boǎ jǐ Ɔ̈ sìnʼǒ dɛ wùɛ mǒ plě Ɔ̌ blěǒ dɛ wùɛ mɔ̀ kwa keǒ tàa do.

¹⁸Nɔ̀ moo Ɔɔ wǎnʼa dlǒ jleě ne Nyu ü moo Ɔɔ fǒ, Nɔ̀ moo wǎnʼǒ ɛɛ wlò le tù Nyu plě Nɔ̀ moo klekle Nyesoa dǔa jemǒ Ɔ sàlaě kǒla mǒ ɛ̈ di ɛɛ numa Ɔ mǐ nyane Nyu tù keǒ dɛ wùɛ mɔ̀.

¹⁹Mɛ kɔɔ̌n tèǒ joo nɛ̀ moo Nyesoa poa ɛ ble keǒ bo Tentǎn Jǔ Bɔ wǒa Ɔmo Nyesoaa chɛ̀ je teěn

²⁰plě Ɔ̌ poa ɛ ble keǒ Bɔ jaea nyu wùɛ de klě Ɔɔ chɛ̀ mɔ̀, jà nyu wùɛ neɔɔ kmɔ̌ɔ mɔ̀ klee klě jɔkɛn, Ɔ̌ nu ně bo wnawna keǒ u klee Ɔ̀ slè ɛ̈ diiěe Tentǎn Jǔu kokoɛ̌ mǒ keǒ pète bɛ̌ tu jleě.

²¹Dlǒ le sìɛnsiɛnʼǒ a blěaa klee noǎ kukwǐǒ a niaa nì nua amo ǎ tmɔɔ Nyesoa mɔ̀ plě ǎ mooa Ɔɔ jlae nyo.

²²Kɛɛ klě tǐà wlòmo Nyesoa ja a de kělɔ Ɔɔ chɛ̀ mɔ̀. Ɔ nuuě ɛ Ɔ̀ɔ Jǔu kokoɛ̌ mǒ ɛ̈ di ɛɛ numa a mǐ ngmà je ne klee a mǐ sìnɛ wɛ̀ plě klee tè jɛɛa ɛɛ̌ diǒ a jleě mǒ ne keǒ Ɔmo Nyesoa jemǒ.

²³Ke ɛ toon jleě mǒ bo ǎ nynaa bo kpankpa klě aa tè wlò popoɛ mǒ ɛ̈ a kɔnʼɔ klě Tentǎn Jǔ Jùsu mǒ klee ǎ se aa wlò je kuuan bo tɛba mu ɛ̈ kɔn tè a wɔ̌naa klě Nyesoaa kàan tuposà mǒ. Ɛmo tuposàa doà ɛ̈ dǔaa pooa mǒ klě nyopò wùɛ mɔ̀ ü neɔɔ kmɔ̌ɔ mɔ̀ nɛ̀ mǒ Pɔ̀ɔ̌ Ě pe ke.

²⁴Ɛ̈ kɔn mǒ dii sònwɛ jejeɛ̌ǒ dlǒ chlàba ɛ̈ Tentǎn Jǔ jlɛ̌ bo jěe keǒ Ɔɔ wǎnʼa kàan dɛ mɔ̀ ü moo Ɔɔ fǒ, ně plɔ blo lo keǒ ɛmo sònwɛà Ě dǔaa jejeɛ̌ mǒ mɔ̀ keǒ aa tè mɔ̀.

²⁵Tà Nyesoa tba mǒo bo boɔɔ Ɔɔ win wùɛ keǒ a mɔ̀, Ě moo wǎnʼǒ uu na wien po nyebajlo.

²⁶Klě tǐǒ sìnʼaa wlòmo imo winʼǒ Ɔ wɛ̌a pnɔ ini keà je wɛ̌ dɛ keǒ nyopò wùɛ mɔ̀, kɛɛ klě tǐà wlòmo Ɔ po i mǒ pepě keǒ Ɔɔ nyopò mɔ̀.

²⁷Ɔ jlɛ̌ Bɔ poa wlòlekaen je wɛ̌ dɛ fòɛǒ pepě mǒ keǒ Ɔɔ nyopò mɔ̀ ɛ̈ Ɔ kɔnʼɔ ɛ̈ neǒo keǒ dakɔ̌ wùɛ mɔ̀. Ɛmo je wɛ̌ dɛǒ nɛ̀ moo Tentǎn Jǔ neě a mǒ, dɛǒ nɛ̀ nye a wlò je kunkuɛn ɛ̈ moo a miǎ tè jǐ boaboǎ kɔnma.

²⁸Ä boɛɛ kɛn Tentǎn Jǔu tè klě nyopò wùɛ mɔ̀, ä wɛ uu wùɛ wlò je plě ä tee u Nyesoaa tɔ̀n ɛ̈ di ɛɛ numa ä mǐ nyopò wùɛ nu u miě mɔ̀le snǎ klě uu tè wlò popoɛ mǒ ɛ̈ u kɔnʼɔ klě Tentǎn Jǔ mǒ.

²⁹Ɔɔ kpě fòeǒ Ɔ nye mǒo nì Ě ni Ě peě kbě Ě sukwi chɔɔ keǒ bo nu Ɔɔ konkwaà.