Read Grebo, Northern Klasɔ̌n 4 Bible Online

Klasɔ̌n 4 - Grebo, Northern bible

Klasɔ̌n 4

¹Chì kpa ämopò ale, a nu kàan keǒ aa na wien po nyebajle klee nynejlu mɔ̀ plě dɛǒ wɛɛnʼǒ le nɛ̀ ba nu u mǒ. Bi beě a wlòmo ɛ̈ moo a kɔn Chì Kpa Ämo ke Ɔ̈ neěe jɔkɛn.

²Tǐ wùɛ mɔ̀ aa wùɛ a boɔě Nyesoa mɔ̀, a tù aa chɛ̀ jǐ mɔ̀ plě a pe Nyesoa tàto.

³A bàteǒ äa tà ke ɛ̈ di ɛɛ numa Nyesoa mǐ ä fɔ̌ nye keǒ bä boɔ Ɔɔ win klee ä mǐ nyopò tùu tmɔɔ̌ no keǒ je wɛ̌ dɛà ɛɛ tè mɔ̀ ɛ̈ kwɛɛǒo Tentǎn Jǔ jleě mǒ bo ɛ̈ kɔn tè u po mǒo wùlo.

⁴A bàteǒ ně tà ɛ̈ di ɛɛ numa Ě mǐ i kɛne sèsae le i mǐ le jboo lo ke Nyesoa jlɛ̌ bo nu ɛɛ nunuɛ.

⁵A kɔn tɔ̀n keǒ aa nunu noǎ mɔ̀ ï a mii nyopòà ü see Tentǎn Jǔu wǎn mǒ numa, è fɔ̌ wùɛ bɛ̈ nyee amo keǒ u klee amo ba neǒ tà bo, a nu fɔ̌ǒ kàan dɛ miě ɛ wlòmo sɔn.

⁶Dɛǒ a mi nuu je boɔba bɛ mooě uu tè mɔ̀ konkɔn tǐ wùɛ mɔ̀ plě bi nmɔ wan wòje keà tmɔ̌ neěe dɛ mɔ̀ ɛ̈ di ɛɛ numa a mǐ ke ba nuu nyu wùɛ kɛ̀ɛn tùtuɛ ji.

⁷Äa mǒ noɛɛ wǎnpòi Tekèkɔ mi a tmɔɔ̌ma dɛ wùɛ ɛ̈ kwɛɛǒ mǒo jleě mǒ bo. Ɔ moo konkwa nuɔ ɔ̈ kɔnʼɔ wlò je kunkuɛn plě klee ɔ̌ moo äa bě nyebajlo keǒ Koɔn mɔ̀.

⁸Dɛǒ nɛ̀ kɔn tè Ě dbe ɔ klě a mɔ̀ ɛ̈ di ɛɛ numa a mǐɔ ä mɔ̀le wɔ̌n plě ɔ mǐ a kbě ja le po.

⁹Ɔ klee Onisìma nù diě a mɔ̀ ɔ̈ mooäa mǒ noɛɛ wǎnpòi ɔ̈ kɔnʼɔ wlò je kunkuɛn ɔ̈ sonwɛě amoo tàkpɔ̌ǒ slè mǒ. Nù mi a noǎ wùɛà kpɛɛ tùɔn kělɔ tàɔ tmɔɔ̌ma.

¹⁰Awletakɔ̀ ɔ̈ klee mǒo sɔ̌n u poo wùlo ɔ dbo wan le gbògba klě a mɔ̀. È Mǎkè ɔ̈ moo Banàbɔɔ mamǔu jǔ ɔ dbo wan le gbògba ke. U tmɔɔ̌a ale ɛ̌ wɛ̀ mɔ̀le keǒ ɔɔ tè mɔ̀, ii tè bɛ̌ nu bɔ̌ diě a mɔ̀, a kme ɔ jebo.

¹¹Jùsuà u dɛɛ Jɔsètɔ ɔ dbo wan le gbògba ke klě a mɔ̀. Uu tàii tanʼà nù kɔn do sosǒ moo Jùwɛ nyo ü moo Tentǎn Jǔu wǎn, nù klee mǒo sɔ̌n ni konkwaà ɛ̈ moo Nyesoaa win kwa konkɔn. U moo mǒ sèsɛ fòɛ kěàǎ mɔ̀.

¹²Ɛpaflɔ̀ ɔ̈ moo Tentǎn Jǔu nyebajlo tɔ̀ɔ ɔ̈ sɔnʼě amoo tàkpɔ̌ǒ slè mǒ ɔ gbà a wan le ke. Tǐ wùɛ mɔ̀ ɔ mǎě sèn bo ɔ̌ bɛ̀teeǒ aa tà ɛ̈ di ɛɛ numa a mǐ bo nyna kpankpa a miǒ Nyesoa bo tù keǒ noǎ wùɛ Ɔ jlɛ̌ ba nuu mɔ̀.

¹³Mǒà mǒ moo sàse keǒ Ɛpaflɔ̀ mɔ̀ ɛ̈ moo ɔ peě kbě ɔ̌ ni konkwa keǒ aa tè mɔ̀ klee keǒ Tentǎn Jǔu wǎn mɔ̀ ü neěe Lodisìa klee Hawlapolè deě wlòmo.

¹⁴Äa kàan mɔ̀nai dɛjǐɔ Lǔkù klee Dimǎse dbo wan le gbògba ke klě a mɔ̀.

¹⁵Wan le gbògba nɛ̀ Ě dbo klě Tentǎn Jǔu wǎnʼǒ mɔ̀ ü neěe Lodisìa diě wlòmo klee klě nynɔǒ monoo Nyefà mɔ̀ plě klee Tentǎn Jǔu wǎnʼǒ gbèe le klě ɔɔ koǔ bo.

¹⁶Bǎ wɔ̀ chněedɛ̌à slèslɛ mɔ̀, ba jě ɛ ke ɛ mǐ slèe le klě Nyesoa wǎnʼǒ mɔ̀ ü neěe Lodisìa. È chněedɛ̌ǒ Ě chleěa uu mɔ̀ ba sà lɛ u kwa a mǐ ɛ slè ke.

¹⁷A tmɔɔ̌ Achèpɔ bɔ jě konkwaǒ ɛɛ dɛ ɛ̈ǒ Koɔn nye ɔɔ, ɔ mǐ ɛ mɔ̀ wɔ̀.

¹⁸Mǒ Pɔ̀ɔ̌ɔ chɛ̀à sɛ̀ pěnsnètuà dɛ chlě nyu kwa ɔ̈ chlě wlu kpa winʼà klě a mɔ̀. Aǎ snì ni ɛ̈ moo Ě neɔ wùlo. Nɛ bo Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya.