Read Grebo, Northern 1 Tɛseloniǎ 1 Bible Online

1 Tɛseloniǎ 1 - Grebo, Northern bible

1 Tɛseloniǎ 1

¹Mǒ Pɔ̀ɔ̌ klee Salě klee Timɛtěà chlě chněedɛ̌à, ä chleě ɛ amo Tentǎn Jǔu wǎnʼǒ mɔ̀ ü neěe dě fòɛǒ moo Tɛslonikà wlòmo ü kɔnʼǒo Nyesoa mɔ̀ Ɔ̈ moo äa Gbeǐ klee äa Koɔn Jùsu Tentǎn Jǔ. Nɛ bo Nyesoaa wlòo jlajlǎ dɛ ɛ̈ɛ̌ sà Ɔɔ wlò kǔ mǒ klee Ɔɔ ně bo wnawna keǒ a mɔ̀ bi muu nya.

²Tǐ wùɛ mɔ̀ ä pe Nyesoa tàto keǒ aa tè mɔ̀ plě ä boɛě Nyesoa mɔ̀ aa tè.

³Bä keě äa Gbeǐ Nyesoa mɔ̀ boɛ, ä pe aa tè wlò mɔ̀ ke a nii konkwa nunuɛ keǒ Tentǎn Jǔ mɔ̀ Ɔ̈ kɔn tè a poo kàan tè klee ke aa mǒ noɛnoɛ a kɔnʼɔ keǒ Nyesoa klee nyopò tùu mɔ̀ ni amoo nunuɛ ǎ peě kbě le ǎ nii konkwa plě klee ke aa wlò je kunkuɛn a kɔnʼɔ klě äa Koɔn Jùsu Tentǎn Jǔ mǒ ni amoo nunuɛ ǎ nynɛɛ měne tèntɛn jebo.

⁴Ně bǐì Tentǎn Jǔu wǎn ane, ä ji ɛle ɛ̈ moo Nyesoa noɛɛ a mǒ no plě Nɔ̀ sà amo.

⁵Mɛ kɔɔ̌n tèǒ joo nɛ̀ moo tà ä jalaě ɛmoo tuposàà ɛ̈ kwɛɛǒo Jùsu jleě mǒ bo klě a mɔ̀, ä seaě win sosǒ ja, ä jalaě Nyesoaa kpě ï monoo Ngmà Je Ne Sùsu plě ä sɛ̀nʼa ɛ nynɛ̌. Tèǒ nì kɔn tè a ji ɛle ɛ̈ moo tà ä neaě amoo mɔ̀, ä nia konkwa keǒ aa kàan dɛɛ tè mɔ̀.

⁶Kàan tè u tèa aa tè mɔ̀, kɛɛ Ngmà Je Ne Sùsu nua amo ǎ nua chǒn le ǎ kmea tuposàà bo ɛ̈ kwɛɛǒo dɛ Jùsu nuu keǒ a mɔ̀ jleě mǒ bo. È a sàlaě ä klee Koɔnʼɔ fì le,

⁷dɛǒ nɛ̀ nua nɛ ǎ moo ɛɛ tee nyo keǒ Jùsuu kàan tè po nyo wùɛ mɔ̀ ü neěe Masedonìa klee Akeà wakě kɛn.

⁸Koɔnʼɔ winʼà ï sɔnʼě amoo mɔ̀ mǒ i gbɛ̀tɛɛ blě kɛne, ɛ slě Masedonìa klee Akeà wakě kɛnʼɛ do, kɛɛ aa tè wlò popoɛǒ a kɔnʼɔ klě Nyesoa mǒ u boɔ ɛɛ tè le ǐ gbɛ̀tɛɛ blě wùɛ kɛne. Ii tè ɛ se dɛ kɔn ä mǐi boɔ keǒ aa tè wlò popoɛǒ jleě mǒ.

⁹Uu chɛ̀ tmɛɛ̌ äne ke a nua ämoo jebo kmekmɛ plě ke a nuaǒ nǔkpuǐi wɛ̀ sèsa dɛ demǒ sonsɔn a nii kàan kmɔ̌ ne Nyesoa konkwa mɔ̀ nuua.

¹⁰U tmɛɛ̌ äne ke a ni Ɔɔ Jǔ Jùsu kɛn mǒ fofoɛ Bɔ sɔn lěe jɔkɛn mǒ Ɔ̈ Nyesoa dǔaa jemǒ Ɔ sàla lěe kǒla mǒ plě Ɔ̈ gblà ämoo klě Nyesoaa jlo bobo ɛ̈ diěe keǒ nyopòo kpni kukwǐ mɔ̀.