Read Grebo, Northern 1 Tɛseloniǎ 3 Bible Online

1 Tɛseloniǎ 3 - Grebo, Northern bible

1 Tɛseloniǎ 3

¹Tèǒ nì kɔn tè tà äǎ wɔ̌naě amoo mɔ̀le ä seaa kɛ̀ wlò dbadbǎ kɔn, è dɛ ä poaa ble nɛ̀ moo keǒ bä sia bo kělɔ dě fòɛɔ moo Atɛ̀n kɛn,

²è Timɛtě nɔ̀ ä dboa klě a mɔ̀ ɔ̈ moo äa mɔ̀nai klee äa bě konkwa nuɔ keǒ Nyesoa mɔ̀ ɔ̈ pee kàan tuposà ɛ̈ kwɛɛǒo Tentǎn Jǔ jleě mǒ bo. Ä dboa ɔ lo ɔ mǐa a kbě ja le po klee ɔ mǐa aa tè wlò popoɛ nu ɛ mǐa kbě kɛn ne

³ɛ̈ di ɛɛ numa aa nyu wùɛ ɔɔ̌ diaǒ Nyesoa demǒ sɔn klě aa tǐ jakěǒ a jěe slè. Aa chɛ̀ a ji ɛle ɛ̈ moo Nyesoa jlɛ̌ bä jě měne tèntɛn.

⁴Bo wa wèe bo nye a konwě, tǐǒ jleě ä neaě amoo slè ä tmɔɔ̌a amo ɛ̈ moo u mia äa tè mɔ̀ tèba plě aa chɛ̀ a ji ɛle ɛmoǒ nɛ̀ kpa tùɔn.

⁵Dɛǒ nɛ̀ kɔn tè Ě seaa kɛ̀ǒ tǐ fòfoa po Ě dboa Timɛtě klě a mɔ̀ ɔ mǐa ɛ jě ke aa tè wlò popoɛ nuu. Ě pea fano, Ě je bo Setɛ̀n ɔ̈ moo měne tɛ̀nɔ̌ bɔɔ̌ tɛ̀naě a měne aa nyu bɔɔ̌ sɔnaǒ snǔ mɔ̀ mǒ klě wakǎ tɛ̀ɛ wlòmo, è ɛmoǒ ɛ miia äa konkwaà numa ɛ mǐaa putu mono.

⁶Kɛɛ Timɛtě nɔ̀à kèkeà ɔ̈ tbae je ɔ̈ sɔnʼě a mɔ̀ mǒ, ɔ jaě kàan win ï kwɛɛǒ aa tè wlò popoɛ klee mǒ noɛnoɛ a kɔnʼɔ jleě mǒ bo. Ɔ je a boɛǒ ä kàan tè jleě mǒ plě ǎ jlɛ̌ ba jě ämo wòje keà ä nii.

⁷Ii tè ně bǐì Tentǎn Jǔu wǎn ane, kàan tè ä neɔ tǐ jakě klee tèe mɔ̀ tèteɛ slè, kɛɛ aa tè wlò popoɛǒ a kɔnʼɔ nɛ̀ tùiě ä wlò wlòmo ble.

⁸Ke ɛ toon jleě mǒ bo ǎ nynaa bo kpankpa klě aa tè wlò popoɛ mǒ ɛ̈ a kɔnʼɔ klě Koɔn mǒ, ä wɔ̀le je bä nyna sònwɛ jejeɛ̌ wùɛ jebo lo.

⁹Tàto fòɛ tae ämoà niǒo Nyesoa jemǒ konkwa ä wɔ̀le je bä peě kɛ Lɔ keǒ chǒnʼà a nu ämoo ä nii mɔ̀?

¹⁰Tǒn klee chnɛ̀ ä mɛ̌ě sèn bo ä gbɛ̀ Ɔ wan Ɔ miě ä mɔ̀ mǒ sɔn ä mǐ a jě de klee ä mǐ aa tè wlò popoɛ kbě ja le po keǒ tàǒ ɛ̈ jlɛ̌ bɛ kplɛɛǒo.

¹¹Nɛ bo Nyesoa Ɔ̈ moo äa Gbeǐ klee Koɔn Jùsu Tentǎn Jǔ Bu kna fɔ̌ je keǒ ä mɔ̀ ä miě a mɔ̀ di.

¹²Keǒ äa mǒ noɛnoɛà ä kɔnʼɔ keǒ a mɔ̀ nuu, kě Koɔn Bɔ nu aa mǒ noɛnoɛ kɛne popooa ɛ̈ a kɔnʼɔ klě a slè klee keǒ nyu wùɛ mɔ̀.

¹³Nɛ Bɔ po aa tè wlò popoɛ kbě ja le ɛ̈ di ɛɛ numa bɛ̌ nu äa Koɔn Jùsu Tentǎn Jǔ Bɔ̌ diǎ de, Ɔ klee Ɔɔ mɔ̀ na nyo wùɛ tè jɛɛa ɛɛ̌ diǎǒ a jleě mǒ ne plě a miǎ ngmà je ne keǒ äa Gbeǐ Nyesoa jemǒ.