Read Grebo, Northern 1 Tɛseloniǎ 4 Bible Online

1 Tɛseloniǎ 4 - Grebo, Northern bible

1 Tɛseloniǎ 4

¹Ně bǐì Tentǎn Jǔu wǎn ane, dɛ tɛ̀ɛ neǒo de nɛ̀ moo ä teea ale ke ba nuu kmɔ̌ neneɛ klee ba nuu Nyesoaa plɔ blooa. Kmɔ̌ǒ nɛ̀ a ne klě tǐà wlòmo, kɛɛ ä gbɛ̀ɛ ɛ a wan chɔɔ dɔ̌ klě Koɔnʼɔ nynɛ̌ wlòmo keǒ ba ne kmɔ̌ bɛ̈ sìnʼǒo dɛǒ ä tee amoo mǒo chɛ̀.

²A ji noǎ ä te amoo kwete mǒ ble le ba nuu ï sɔn lěe äa Koɔn Jùsu mɔ̀ mǒ.

³Nyesoa jlɛ̌ ba ne ngmà je plě ba tmɔɔ se wòn mɔ̀ɔ wɛ̀ kmɔ̌ǒ mɔ̀.

⁴Amo jbɛjlu aa do do aa kmɔ̌ a mii nema keǒ aa nyno mɔ̀ bɛ ne ngmà je klee kmɔ̌à kɛɛ seǒo jleě mǒ ne.

⁵Ɛ slě kpni kukwǐ kmɔ̌ǒ moo jě nynɔ nè wlò wa ɛɛ tǔn wlòmo wòje dɛǒ kuodakwɛ̌ nii ü see Nyesoa ji.

⁶Keǒ ɛmo kmɔ̌ taeǒ ɛɛ dɛ kɛn, aa nyu wùɛ ɔɔ̌ wlɛ̌ tè keǒ nyopò tùu mɔ̀ plě ɔɔ̌ jlǐǒ u kɛn. Mɛ kɔɔ̌n tèǒ joo nɛ̀ moo Koɔn miǎǒ nyopòǒ uu plɔ tu kɛn bo maěma tǐ wùɛ mɔ̀ ü ni ɛmoo dɛ kukǔ taeǒ wòje ke ä nua amoo tmɔɔ̌a klee ä nua amoo wlò je wowa.

⁷Nyesoa se ä da keǒ bä ne se wòn mɔ̀ɔ wɛ̀ kmɔ̌, kɛɛ keǒ bä mǐ ngmà je ne.

⁸Tèǒ nì kɔn tè nyu wùɛ ɔ̈ mi imoo winʼà jleě mɔ̀ sàba, ɛ se tùonyugbe ɔ se jleě mɔ̀ sà, kɛɛ Nyesoaa chɛ̀ǒ ɔ sà jleě mɔ̀ Ɔ̈ nye amoo Ngmà Je Ne Sùsu.

⁹Ɛ seǒ le wɛɛn ne keǒ bä chleě a mɔ̀ ɛ̈ kwɛɛǒo Tentǎn Jǔu wǎnʼa mǒ nonoɛɛa tè jleě mǒ bo. Mɛ̌oǒ joo nɛ̀ moo Nyesoaa chɛ̀ tee ale keǒ ba nonoɛɛ měne.

¹⁰Ä ji ɛle a noɛɛ Tentǎn Jǔu wǎn wùɛǒ mǒ no ü neěe Masedonìa wakǎ kɛn, kɛɛ ně bǐì Tentǎn Jǔu wǎn ane, ä pe a ja le kbě a mǐ u mǒ noɛɛ ne chɔɔ chɔɔ.

¹¹Bɛ moo aa chlàchla dɛ a kɔn lěe dlǒ wlòmo keǒ ba ne tɛɛ kmɔ̌ klee aǎ ni kpasùjasu dɛ klee aa chɛ̀ mǐ dɛ tàmo sà keǒ aa kmɔ̌ neea mɔ̀ wòje ke ä nua amoo tmɔɔ̌a.

¹²Dɛǒ nɛ̀ bǎ ke ni, è nyopòǒ moo se Tentǎn Jǔ kàan tè po nyo u miǒ a tùba plě a se dɛ wùɛ sòaba mu.

¹³Ně bǐì Tentǎn Jǔu wǎn ane, ä jlɛ̌ ba ji dɛǒ kpaa tùɔn keǒ nyopòǒ kǒo jleě mǒ ɛ̈ di ɛɛ numa aǎ di wɔle le nu wòje nyopòà ü see wlò je kunkuɛn kɔn keǒ kmɔ̌ sie fònfno mɔ̀.

¹⁴Ke ɛ toon jleě mǒ bo ä po lii kàan tè ɛ̈ moo Jùsu kǒa le Ɔ̌ dǔa jemǒ Ɔ̌ sɔnaě kǒla mǒ, ä po i mǒ kàan tè ke ɛ̈ moo bɛ̌ nu Bɔ̌ tbaeǎ je, Nyesoa miǎě Ɔ klee nyopòà po Ɔɔ tè kàan tè ü kǒaa snǔ mǒ jaeba.

¹⁵Dɛɛ doà Koɔn Jùsu boɔlaa nɛ̀ kɔn tèà ä tmɛɛ̌ amo ɛ̈ moo ämoà mii kmɔ̌ bo kɛ̀nma Koɔn mǐi je tbae le, ä seǎě nyopòǒ kǒo nya kɛ̀nma mu ä seǎ Ɔ nya bɛ̌ba mu.

¹⁶Bɛ̌ nu Nyesoa Bɔ̌ pnǎnǎ dɛ jleě klee Ɔɔ nokpa bɛ̌ boɔlǎ plě najiǒpòi fòɛ bɔ̌ pnǎnǎ dɛ jleě, è Koɔnʼɔ chɛ̀ miǎě jɔkɛn mǒ sɔnma Ɔ miǎ tè. È nyopòà poa Ɔɔ tè kàan tè plě ü kǒaa nù Nyesoa miǎ jemǒ dǔba klekle.

¹⁷È ämoà neě jèe kmɔ̌ ä miǎ jemǒ duǔba ä miǎě nukpǎ kɛn kpae le ä klee nyopòǒ kǒaa, ä miǎ äa Koɔn nya bɛ̌ba mu klě jɔ mǒ. È ä miǎě Ɔ mɔ̀ nema ke ɛ mii jleě mǒ bo tonma.

¹⁸Ii tè imo winʼà nì ba nu a mǐ kbě ja le popoo lo.