Read Grebo, Northern 1 Tɛseloniǎ 5 Bible Online

1 Tɛseloniǎ 5 - Grebo, Northern bible

1 Tɛseloniǎ 5

¹Ně bǐì Tentǎn Jǔu wǎn ane, ä se dɛ jě kɔn tè bä chleě amoo mɔ̀ keǒ tǐ tae klee chnɛ̀ jlǒ waě tae Koɔn miǎa je tbaeba.

²A ji ɛle tɛɛ ɛ̈ moo Koɔnʼɔ de di chnɛ̀ jlǒ waěǒ ɛ miǎ je wǒba keà jliɔ̌ diěe klě tǒn wlòmo nyu ně ji lii.

³Tà nyopò miǎ bòo dǎba ɛ̈ moo, “Noǎ wùɛ i nu tɛɛ, tè se tà neò,” bǔ muǎ jǐ kapǒba, è gbè sùesuɛ nɛ̀ǒ palǎ u bobo wòje keà kwlě jɛɛ lee kmàe nynɔ. U seǎ ɛ je plùuba mu.

⁴Kɛɛ amoà moo ně bǐì Tentǎn Jǔu wǎn a slě ɛmo dɛ kukǔ kmɔ̌ǒ slè ne. Ii tè ɛmo waěǒ ɛɛ tè biǐ kèenʼa a mǒ wòje keà jliɔ̌ kèen nee nyu mǒ.

⁵Aa wùɛ a moo Pepěe jlǔ plě ǎ moo Chnɛ̀ɛ jlǔ. Ä se tǒn klee kwijlěe jlǔ.

⁶Tèǒ nì kɔn tè a nɛ bäǎ wě je nyopò tùu ü see mɔ̀le wɛ̀ keǒ Koɔnʼɔ de didiɛ mɔ̀, kɛɛ a nɛ bä wɛ̀ mɔ̀le ä miǒ äa chɛ̀ mɔ̀ kwa blě.

⁷Jlǔà kɔn lěe kwijlě slè u se mɔ̀le wɛ̀ plě kpni kukwǐi nunu noǎ nì kɔn tè u kɔnʼě mɔ̀,

⁸kɛɛ ämoà ä kɔnʼě Chnɛ̀ mǒ. Ii tè keǒ tabɔ̀ nii ǔ kɔnʼɔ chnu paě ɛ̈ u mɛ̌ǒo wùlee bo keǒ to wònwɔn mɔ̀, kě bä nu bä wɛ̀ mɔ̀le bä kɔn tè wlò popoɛ klee mǒ noɛnoɛ i mǐ ä jǐ mɔ̀ tù keǒ dɛ kukǔ mɔ̀. È keǒ tabɔ̀ nii ǔ tùii pně gbàkla dlǒ keǒ to mɔ̀, kě bä nu ke bä kɔn wowa dɛɛ wlò je kunkuɛn ɛ̈ tùi ämoo jǐ mɔ̀.

⁹Mɛ kɔɔ̌n tèǒ joo nɛ̀ moo Nyesoa se ä tba keǒ bä jě sònwɛ klě Ɔɔ plɔɔ tu kɛn bo maěa bobo, kɛɛ keǒ bä jě wowa dɛ ɛ̈ diiě äa Koɔn Jùsu Tentǎn Jǔ mǒ

¹⁰Ɔ̈ kǒaa keǒ äa tè mɔ̀ ɛ̈ di ɛɛ numa Bɔ̌ diǎ de, bɛ̀ Ɔ jɛɛǎ ä kmɔ̌ ɔ̀ɔ̌ bɛ̀ ä kǒa le, Ɔ klee ämo ä miǎǒ tàa do ne.

¹¹Tèǒ nì kɔn tè a kpa ɛ dlǒ mɔ̀ a popoo kbě ja le klee a memǎeǒ mɔ̀ wòje dɛǒ a nii.

¹²Ně bǐì Tentǎn Jǔu wǎn ane, ä bɛ̀te ale, nyopòǒ neě amoo slè ü nii konkwa a kɔnʼǒ u tùtuɛ klee nyopòǒ neěe Tentǎn Jǔu wǎn slè üǒ Koɔn tbaa bü moo aa tee nyo.

¹³A nyeǒ u tùtuɛ fòɛ klee a noɛɛ u mǒ keǒ uu konkwaǒ ɛɛ tè mɔ̀. È bo ně bo wnawna bɛ neě a slè.

¹⁴Ně bǐì Tentǎn Jǔu wǎn ane, ä bɛ̀te ale, a wa nyopòǒ fnàa wlò je ɛ̈ moo ɛ se kɔn bɛ ne bò je, è nyopòà ü slɔ̀ɔ loo je a po u kbě ja le plě nyopòà see kbě mǒ ne a sɛ̀ɛ u mǒ, è a kɔn wlò dbadbǎ keǒ nyu wùɛ mɔ̀.

¹⁵Ba jě ɛ ɛ̈ moo nyu wùɛ ɔɔ̌ sɛ̀ kpa, kɛɛ tǐ wùɛ mɔ̀ a tɛ̀n ɛ mǒ keǒ ba nunuu kàan dɛ měne klee keǒ nyopò wùɛ mɔ̀.

¹⁶Tǐ wùɛ mɔ̀ chǒn bɛ nu amo.

¹⁷Tǐ wùɛ mɔ̀ ba boɔě Nyesoa mɔ̀.

¹⁸Dɛ wùɛ Nyesoa mi amoo nyema ba pe Ɔ tàto. Mɛ̌oǒ joo nɛ̀ moo amoà poo Tentǎn Jǔu tè kàan tè dɛǒ nɛ̀ Nyesoa jlɛ̌ ba nu.

¹⁹Baǎ kenkɛɛ Ngmà Je Ne Sùsu jele.

²⁰Baǎ sɛ̀ɛǒ Nyesoaa wnɔsà winʼi tè le.

²¹A chechlǎ win wùɛǒ a mǐ ɛ jě bǐ moo kàan, ii dɛǒ monoo kàan nɛ̀ ba nee kmɔ̌,

²²è ba tmɔɔ dɛ kukǔ wùɛ mɔ̀.

²³Nɛ bo Nyesoaa chɛ̀ Ɔ̈ nye ämoo ně bo wnawna Bɔ nu a ngmà je ne nyo mǒ kpǎkpǎ ɛ̈ di ɛɛ numa äa Koɔn Jùsu Tentǎn Jǔ Bɔ̌ tbaeǎ je, aa kmɔ̌ wùɛ klee sùsu klee fǒ iǐ diǎ tè jɛɛa kɔn.

²⁴Nyesoaǒ da amoo Ɔ moo Wlò Kpae Nyu, Nɔ̀ mi a numa a mǐ ngmà je ne.

²⁵Ně bǐì Tentǎn Jǔu wǎn ane, a bàte Nyesoa keǒ äa tè mɔ̀.

²⁶Ä gbà Tentǎn Jǔu wǎn wùɛ ü neě amoo mɔ̀ wan klě gbìgblii tǔn wlòmo.

²⁷Ě tmɛɛ̌ ane klě äa Koɔn Jùsuu nynɛ̌ wlòmo, chněedɛ̌à a slèe ɛ Tentǎn Jǔu wǎn wùɛǒ neěe tàě je.

²⁸Nɛ bo äa Koɔn Jùsu Tentǎn Jǔu wlòo jlajlǎ dɛà ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya.