Read Grebo, Northern 2 Tɛseloniǎ 1 Bible Online

2 Tɛseloniǎ 1 - Grebo, Northern bible

2 Tɛseloniǎ 1

¹Mǒ Pɔ̀ɔ̌ klee Salě klee Timɛtěà chlě chněedɛ̌à, ä chleě ɛ amo Tentǎn Jǔu wǎnʼǒ mɔ̀ ü neěe dě fòɛǒ moo Tɛslonikà wlòmo ü kɔnʼǒo Nyesoa mɔ̀ Ɔ̈ moo äa Gbeǐ klee äa Koɔn Jùsu Tentǎn Jǔ.

²Nɛ äa Gbeǐ Nyesoa klee äa Koɔn Jùsu Tentǎn Jǔ Uu wlòo jlajlǎ dɛ ɛ̈ɛ̌ sà Uu wlò kǔ mǒ klee Uu ně bo wnawna keǒ a mɔ̀ bi muu nya.

³Tǐi pɛpɛ mɔ̀ ä kɔn bä pe Nyesoa tàto keǒ aa tè mɔ̀. Ɛ wɛɛnʼǒ le keǒ bä nu ɛ. Mɛ̌oǒ joo nɛ̀ moo aa tè wlò popoɛ a kɔnʼɔ klě Jùsu mǒ ɛ kwin ni ɛ̌ bebee kɛn le plě aa měne nonoɛɛa bebee kɛn le.

⁴Tèǒ nì kɔn tè bä klě nyopò tùu mɔ̀ boɛ ü monoo Tentǎn Jǔu wǎn ä pneě u je aa tè keǒ aa tè wlò popoɛ a kɔnʼɔ mɔ̀ klee ke a nuu bo nynanyna kpankpa klě aa tè wlò popoɛ mǒ tǐǒ jleě a neěe tè mɔ̀ tèteɛ wùɛ klee sònwɛ jejeɛ̌ǒ slè.

⁵Aa tè wlò popoɛ tee ɛ ɛ̈ moo Nyesoa nua mǒ slɛɛ̌ dɛ keǒ Bɔ chlàla ɛ ɛ̈ moo a blɛɛǒ je keǒ ba neě Ɔɔ win kwa konkɔn bobo ɛ̈ kɔn tè a jěe sònwɛ klě nyopò tùu kwete mǒ ü Ɔ see win kwa kɔn.

⁶Nyesoa ni mǒ slɛɛ̌ dɛ, tèǒ nì kɔn tè nyopòǒ ü tè aa tè mɔ̀ Ɔ miǒ uu plɔ tu kɛn bo maěma.

⁷Bɛ̌ nu bo Koɔn Jùsu Bɔ̌ wǒǎ tàmo Bɔ̌ sɔnǎě jɔkɛn mǒ, Ɔ klee Ɔɔ kpě kɛne najiǒpò, Nyesoa miǎě a klee ämo sònwɛ jejeɛ̌ǒ slè sàba.

⁸È nyopòǒ se Ɔ ji Ɔ miǎ na numa Ɔ miǎǒ uu plɔ tu kɛn bo maě ne klee nyopòà se Ɔɔ kàan tuposàa tè kàan tè po ɛ̈ kwɛɛǒo äa Koɔn Jùsu jleě mǒ bo.

⁹Ɔ miǎǒ uu plɔ tu kɛn bo maěma ke ɛ mii jleě mǒ bo tonma klee Ɔ miǎǒ u äa Koɔn Jùsu klee Ɔɔ kpě fòe jleě mǒ sà

¹⁰klě waěǒ kɔn mǒ Ɔ miǎa de diba Ɔɔ nyopò miǎ Ɔɔ tè jǐ boaǎ le klee nyopòà po Ɔɔ tè kàan tè u miǎǒ Ɔɔ tùtuɛ nye. A poa tuposàǒ ä poa amoo je ɛɛ tè kàan tè ɛ̈ kwɛɛǒ Ɔɔ jleě mǒ bo, ii tè a miǎǒ Ɔ tùtuɛ nyema klě waěǒ wlòmo.

¹¹Dɛǒ nɛ̀ kɔn tè tǐ wùɛ mɔ̀ ä bɛ̀te keǒ aa tè mɔ̀, äa Nyesoa mǐ a nu a miǒ je blɛɛ le keǒ Ɔɔ deda mɔ̀, è Ɔ mi a Ɔɔ kbě nyema a mǐ kàan dɛ wùɛ nu ɛ̈ aa tè wlò popoɛ jlɛ̌ ba nuu.

¹²Klě ɛmo dɛǒ ɛɛ nunuɛ mǒ a mi äa Koɔn Jùsu Tentǎn Jǔu nynɛ̌ tè jǐ boaboǎ nyema, è Ɔ mi aa tè jǐ boǎba ke. Äa Nyesoaa klee äa Koɔn Jùsu Tentǎn Jǔu wlòo jlajlǎ ɛ̈ɛ̌ sà Uu wlò kǔ mǒ keǒ ä mɔ̀ nɛ̀ nu ɛ ɛ̌ wɔ̀le ɛ.