Read Grebo, Northern 2 Tɛseloniǎ 2 Bible Online

2 Tɛseloniǎ 2 - Grebo, Northern bible

2 Tɛseloniǎ 2

¹Ně bǐì Tentǎn Jǔu wǎn ane, dɛǒ kwɛɛǒ äa Koɔn Jùsu Tentǎn Jǔu de di tè jleě mǒ bo klee äa de bòboɛ Ɔ klee ämoo sɔ̌n, Ě bɛ̀te ale,

²wnɔsà win klee u je win klee chněedɛ̌ǒ u je ɛ̈ sɔn nɔ ämoo mɔ̀ mǒ ɛ̈ boɔ lii ɛ̈ moo chnɛ̀ jlǒ waěǒ Koɔn mii de jaba ɛ sìn ni ɛ̌ wɛ̀ mɔ̀le, iǐ ni aa wlè iǐ sɛkɛ jǐ měne plě iǐ pe a fano mǒ.

³Ɛmo waěǒ ɛ seǎǒ nynima mu ɛ mǐ ɛ kpa kpa Nyesoaa demǒ bɔɔ̌ tèe le sàea fòɛ miǎ tùɔn kpa klee ɛ mi ɛ kpa kpa nyuǒ moo dɛ kukǔ nuɔ ɔ̈ miěe na slè ɔ miǎ tàmo wǒ, ii tè aǎ sonwɛǒ nyu wùɛ mɔ̀ mǒ ɔɔ̌ gbee a mǒ klě wakǎ wùɛ wlòmo.

⁴Dɛ kukǔ nuɔǒ ɔ miǎ dɛ wùɛ je wɔ̀nma ɛ̈ kɔn wɛ̀ nyopò sɛ̀ɛ ü dɛɛ nyesoa. Ɔ miǎ ɔɔ chɛ̀ɛ nynɛ̌ kuɛnma ɛ̈ di ɛɛ numa ɔ miǎ bo ne klě Nyesoaa kǎ fòɛ bo klee ɔ miǎ ɔɔ chɛ̀ Nyesoa dae le.

⁵Tǐǒ jleě Ě neaě amoo mɔ̀ Ě tmɔɔ̌a ane ɛɛ tè. Iǐ be kɛě a wlò jleě le?

⁶Aa chɛ̀ a ji ɛle ke ɛ̈ moo ɛ kɔn dɛ tɛ̀ɛ nɛ̀ kɛɛ̌n jè ɔmo dɛ kukǔ nuɔǒ je ɔ̌ sěɛ tàmo wě klě tǐà wlòmo ɛ̈ di ɛɛ numa bɛ̌ nu tɛɛ tǐ bǐ nyniǎǒ Nyesoa miǎ ɔ pepě mǒ po.

⁷Dɛ kukǔu kpě kpɛ tùɔn no ɛ̌ wɛ̀ mɔ̀le klě je wɛ̌ tǔn wlòmo kělɔ kmɔ̌ mɔ̀. Kɛɛ nyuǒ kenkɛɛ ɛɛ jele ɔ miǐ jè ɛ jele kenkaema ɛ mǐ ɛ kpa kpa Nyesoa miǎǒ ɔ sà.

⁸È nyuǒ ɔ̈ɔ̌ tùǒo teteǎ Nyesoa miǎ ɔ pepě mǒ poba. Äa Koɔn Jùsuu winʼǒ Ɔ miǎa boɔba nì miǎ ɔ dbǎba klee bɛ̌ nu Ɔmo Koɔn Bɔ̌ diǎ le, Ɔɔ tùɔn kɛn neneɛ nɛ̀ miǎ ɔ gbè sùeba.

⁹Bɛ̌ nu nyuà ɔ̈ɔ̌ tùǒ teteǎ bɔ̌ diǎlě, Setɛ̀n ɔ̈ moo kǔ sìsi klɔ̀ba nɔ̀ miǎ ɔ kbě nyema ɔ miǎ sen le tmɔ̌ sàlesaa doědoe nu klee wlòlekaen noǎ klee je te noǎ.

¹⁰Dɔ̌ɔdɔ̌ noǎa kukwǐ wùɛ nì ɔ miǎ numa, ɔ miǎ tùonyopo mǒ boo lo ü miěe na slè. Tè kɔn tè u miěe na slè nɛ̀ moo u se kàan tuposàà ɛɛ tè kàan tè po ɛ̈ kwɛɛǒo Jùsu jleě mǒ bo ɛ̈ mi uu gblàba klě uu kpni kukwǐi plɔɔ tu kɛn bo maěa bobo.

¹¹Tèǒ nì kɔn tè Nyesoa mi kbě dboba i mǐ u mǒ boo lo ɛ̈ di ɛɛ numa u mǐ dɛ kukǔ nuɔǒ ɔɔ senʼǒ ɔ tmɛ̌ɛ ii tè kàan tè po.

¹²È ɛ blěe dɛ miě ɛɛ wlòmo sɔnma nɛ̀ moo nyu wùɛ ɔ̈ see Nyesoaa kàan tuposàà ɛɛ tè kàan tè po, kɛɛ ɔ̈ kwɛnʼɛ plɔɔ bloblɛ keǒ dɛ kukǔ nunuɛ mɔ̀, ɔ mi na slè mumuɛɛ wun kɛn bɛɛ̌ba.

¹³Ně bǐì Tentǎn Jǔu wǎn ane, tǐ wùɛ mɔ̀ ä kɔn bä pe Nyesoa tàto keǒ aa tè mɔ̀, amoà Koɔn noɛɛ nee mǒ. Mɛ̌oǒ joo nɛ̀ moo sɔɔnʼě kmɔ̌à ɛɛ wlò tùla mǒ Nyesoaa chɛ̀ Nɔ̀ tbala amo a mǐa wa klě aa kpni kukwǐi plɔɔ tu kɛn bo maěa bobo ɛ̈ǒ Ngmà Je Ne Sùsu klee aa tè wlò popoɛ nuu a kɔnʼɔ klě Nyesoaa kàan tuposàà mǒ ɛ̈ kwɛɛǒo Jùsu jleě mǒ bo.

¹⁴Kàan tuposàà ä pe amoo je nɛ̀ Nyesoa daeě a mǒ keǒ ba kɔn tè wlò popoɛ ɛ̈ diɛɛ numa a miě äa Koɔn Jùsu Tentǎn Jǔu tè jǐ boaboǎà wakǎ jleě mǒ kɔn.

¹⁵Tèǒ nì kɔn tè ně bǐì Tentǎn Jǔu wǎn ane, a nyna bo kpankpa klě aa tè wlò popoɛ mǒ. A muu nya noǎǒ ä tee amoo a kpa i dlǒ mɔ̀ ï sɔnʼǒ äa chɛ̀ wien mǒ plě klee ä chlěe.

¹⁶Äa Koɔn Jùsu Tentǎn Jǔ klee äa Gbeǐ Nyesoa noɛɛ ä mǒ no plě Ǔ kɔn Uu wlòo jlajlǎ dɛ ɛ̈ɛ̌ sà Uu wlò kǔ mǒ keǒ ä mɔ̀. Ii tè U mii nya Ǔ pe ä kbě ja le klee Ǔ nye ä kàan wlò je kunkuɛn.

¹⁷Nɛ Bu po a kbě ja le klee Bu nye a kbě a mǐ kàan dɛ nu klee a mǐ kàan dɛ wùɛ boɔ.