Read Grebo, Northern 2 Tɛseloniǎ 3 Bible Online

2 Tɛseloniǎ 3 - Grebo, Northern bible

2 Tɛseloniǎ 3

¹Ně bǐì Tentǎn Jǔu wǎn ane, demǒ bɔɔ̌ dɛ nɛ̀à, a bàte keǒ äa tè mɔ̀ ɛ̈ di ɛɛ numa tuposàà kwɛɛǒo äa Koɔn Jùsu jleě mǒ bo ɛ mǐ nya muu nu, ɛ mǐ le gbɛ̀tɛɛ le klě le wlewlě tǔn wlòmo klee ɛ miǒ tùtuɛ kɔn wòje keǒ ɛ nuaa klě a slè.

²Ɛ se nyu wùɛ ɔ se tè wlò popoɛ kɔn klě Jùsu mǒ, ii tè a bàte Nyesoa ke Ɔ mǐ a gblà klě wlè jakě klee kpnii jǐlenymi nyo kwete mǒ.

³Koɔn mǎě bo sèn keǒ a mɔ̀ plě Ɔ mi a kbě nyema klee Ɔ mǐ a jǐ mɔ̀ tù klě kpnii jǐlenymi nyu kwete mǒ ɔ̈ moo kǔ.

⁴Ä ji ɛle tɛɛ ɛ̈ moo a kɔn tè wlò popoɛ plě ǎ ni dɛǒ kɔn tè ä tmɔɔ̌a amoo ba nuu plě a miǐ jè ɛ nya kpaeba a mǐ ɛ nu.

⁵Nɛ bo Koɔn Bɔ nae amo ɛ̈ di ɛɛ numa a mǐ nyopò tùu mǒ noɛɛ ne keǒ Nyesoa nii klee a mǐ wlò dbadbǎ kɔn keǒ nyopò tùu mɔ̀ keǒ Tentǎn Jǔ nii.

⁶Ně bǐì Tentǎn Jǔu wǎn ane, klě äa Koɔn Jùsu Tentǎn Jǔu nynɛ̌ wlòmo ä tmɛɛ̌ ane ɛ̈ moo Tentǎn Jǔu wǎnpòi wùɛ ɔ̈ fnàa klee ɔ̈ɔ̌ nuu dɛǒ ä tee amoo, baǎ kwɛnʼǒ ɔɔ nunu noǎ wakǎ jleě mǒ.

⁷Aa chɛ̀ a ji ɛle ɛ̈ moo a kɔn ba sàě äa fì le. Tǐǒ jleě ä neaě amoo slè ä sea fnà

⁸plě äǎ dia nyu wùɛ digbaǐ ï ä seaa tɔ̀n, kɛɛ tǒn klee chnɛ̀ ä peaě kbě ä nia konkwa ɛ̈ di ɛɛ numa äǎ dia nyu wùɛ wlò le popa keǒ dɛ ä sòɛaa mɔ̀.

⁹Ä blěa kpě keǒ bä gbàla a wan keǒ mǒ sɛ̀ɛa mɔ̀, kɛɛ ä sea ɛ nu ɛ̈ di ɛɛ numa ä mǐa ɛɛ tee dɛ tù keǒ a mɔ̀, a mǐaě äa fì le sà.

¹⁰Tǐǒ jleě ä neaě amoo slè, tetě ä nyea amoo nɛ̀ moo bɛ̌ nu nyu bɔ̌ se konkwa nunuɛ jlǎ, è aǎ sonwɛǒ ɔ mɔ̀ mǒ ɔɔ̌ di dɛ.

¹¹Dɛ kɔn tè ä nyea amoo tetěǒ nɛ̀ moo ä wɔ̌na dɛà ɛ̈ moo aa tìe tùu fnàna ne uǔ nua konkwa wùɛ, kɛɛ u nia kpasùjasu dɛ.

¹²Dɛà nɛ̀ ä tmɛɛ̌ umo nyopò taeǒ plě ä tbɛ u saěn klě äa Koɔn Jùsu Tentǎn Jǔu nynɛ̌ wlòmo ɛ̈ moo bu dbǎ tùɔn bu ne bo u mǐ konkwa nu, u mǐ uu chɛ̀ mǒ sɛ̀ɛ le.

¹³Kɛɛ amoà moo něe bǐì Tentǎn Jǔu wǎn ane, aǎ seɛ keǒ kàan dɛɛ nunuɛ mɔ̀.

¹⁴Bɛ̌ nu bo nyu wùɛ bɔ̌ seǒ chněedɛ̌à ä chleě amoo mɔ̀ ɛɛ win tù, ba maě ɔmo nyuǒ jleě kɛn bo, è ɔ klee amo aǎ bebee mɔ̀ aǎ niǒ dɛ tàa do ɛ̈ di ɛɛ numa tònwe miǒ ɔ je be.

¹⁵Aǎ ni ɔ wòje keà jlae nyu, kɛɛ keǒ bɔ sà ɔɔ kmɔ̌ de mɔ̀, a tba ɔ saěn keà mɔ̀nai.

¹⁶Tǐi pɛpɛ mɔ̀ nɛ äa Koɔn Jùsu Ɔ̈ nye Ɔɔ nyopò ně bo wnawna Bɔ nye a ně bo wnawna klě wakě wùɛ wlòmo. Nɛ Bɔ neeǒ aa wùɛ mɔ̀.

¹⁷Mǒ Pɔ̀ɔ̌à dǔ pěnsnètuà mǒ ɔ̈ sà ɛ dɛ chlě nyu kwa ɔ̈ chlě imo wan le gbà winʼà. Dɛà nɛ̀ moo ně chɛ̀ɛ chlechlě kwete plě kě Ě ni chněedɛ̌ wùɛ son kɛn popoɛ.

¹⁸Nɛ äa Koɔn Jùsu Tentǎn Jǔu wlòo jlajlǎ dɛà ɛ̈ɛ̌ sà Ɔɔ wlò kǔ mǒ keǒ aa wùɛ mɔ̀ bɛ muu nya.