Read Grebo, Northern 2 Timɛtě 3 Bible Online

2 Timɛtě 3 - Grebo, Northern bible

2 Timɛtě 3

¹Tèà nì bi beěè wlò jleě ɛ̈ moo klě kmɔ̌à ɛɛ demǒ bɔɔ̌ chnɛ̀ jlǒ wě wlòmo, tǐ jakě miǎě diba keǒ Tentǎn Jǔu wǎn mɔ̀.

²Dɛ ɛ nuu nɛ̀ moo nyopò miǎ uu chɛ̀ mǒ noɛɛma, u miǎ wlě mǒ noɛɛ ne, u miǎ wun fòɛ le po, u miǎǒ uu chɛ̀ le jaě le, u miǎ nyopò tùu fla wan po klee uǔ diǎǒ uu naǎ klee gbeǐpò tù. Se nyuu nynɛ̌ le popoɛ kɔn kmɔ̌ ɛ seǎě u ja nema mu klee u seǎ uu chɛ̀ ngmà je tùba mu,

³u seǎ chnechně wlògbae kɔnma mu keǒ nyopò tùu mɔ̀ klee ně poo nyuu tè wlò le kmɔ̌, sen le tmɔtmɔ̌ klee slɛ̀ mɔ̀ ne kmɔ̌ nɛ̀ miǎě u ja nema, se dìee wlò kwa bleblɛ̌ ji kmɔ̌ plě klee u miǎ kàan dɛ wùɛ faen ne.

⁴U miǎě nyopò tùu be deměne sàba, u miǎ bobo kmɔ̌ le nu klee u miǎě uu chɛ̀ le jaě le chɔɔ. U miǎ kmɔ̌ɔ plɔɔ bloblɛ mǒ noɛɛma, u seǎ Nyesoa mǒ noɛɛma mu.

⁵U mi ɛ numa keà u sɛ̀ɛ Nyesoaa wɛ̀, kɛɛ u mi Ɔɔ kpěe tè mǒ chnɛ̀ma. Nyopò taeǒ tmɔɔ u mɔ̀.

⁶Uu tìe miě nyopò tùu tà ǔ gbee plɔɔ kokǒ nyno mǒ ü kpni kukwǐ kɔnʼɔ win kwa klee ü nɛɛ kpni kukwǐi ble po noǎa doědoe wùɛ de.

⁷U gbee nyopò mǒ ü tǐ wùɛ mɔ̀ ü tɛ̀n ɛɛ mǒ bü cheěn, kɛɛ u slě wɔ̀ bu jbo kàan dɛǒ le kpe ɛ̈ kwɛɛǒo Tentǎn Jǔ jleě mǒ bo.

⁸Nyopò taeǒ u sà kàan dɛ mɔ̀ jleě wòje keǒ nynoà uu ka neaa je ü moo Jɛnɛ̌ klee Jɛnblɛ̌ ü sàlaa Mɔ̀sě jleě mɔ̀. Umo nyopòǒ u sea tè wlò popoɛ kɔn klě Tentǎn Jǔ mǒ, ii tè dɛ kukǔ sosǒ nɛ̀ u sìɛnʼa dlǒ mɔ̀le, nɛ̀ nua nɛ Nyesoa sàla u jleě mɔ̀.

⁹Kɛɛ u se nyopò mǒ booaǒ nya kpaeba mu klě dɛ pɛ̀tu wlòmo. Keǒ ɛ nuaa tùɔn kpokpa keǒ Jɛnɛ̌ klee Jɛnblɛ̌ mɔ̀, kě nyopò wùɛ mi ɛ jejeɛ̌ numa ke u nuu boboɛ.

¹⁰Jì ně teeaà ɛɛ tè měne klee kmɔ̌ Ě nee klee dɛ ně kmɔ̌ neneɛ sɛ̀nʼɛ nynɛ̌ klee ně tè wlò popoɛ klee ně wlò dbadbǎ klee mǒ noɛnoɛ plě klee ke Ě nii sònwɛ jejeɛ̌ jebo nynanyna.

¹¹Jì jǐlenymi tè mɔ̀ tèteɛ klee sònwɛ jejeɛ̌ Ě nynaa jebo ii tè měne klě deě fòeǒ monoo Ɛntìa klee Akonìa klee Lesètla kɛn, kɛɛ kaǒ Koɔn Nyesoa gblàǎ le klě ii wùɛǒ slè.

¹²Nyu wùɛ ɔ̈ sòɛɛ bɔ̈ nenee tè wlò popoɛ kmɔ̌ klě Tentǎn Jǔ Jùsu mǒ, ɔ mi tè mɔ̀ tèteɛ jěba ke.

¹³È dɛ kukǔ nu nyo klee nyopò kɛn jlǐ nyo mi uu kmɔ̌ǒ dlǒ mɔ̀ kpaba chɔɔ, u mǐ nyopò mǒ boo lo klee u mǐ uu chɛ̀ mǒ boo lo ke.

¹⁴Kɛɛ kàan dɛǒ chèen nɛ̀ bò neǒ kɛn plě mì ɛɛ kàan tè po kpankpa. Jì ɛle ɛ̈ moo nè tee nyo tee leè kàan dɛ.

¹⁵Sɔɔnʼě nè jǔ dɛ jleě mǒ jì Nyesoaa ngmà je ne winʼà ne ï wɔ̀le je bï nu mòo mìi tɔ̀n kɔn ɛ̈ di ɛɛ numa mì gblàe le klě kpni kukwǐi plɔɔ tu kɛn bo maěa bobo ɛ̈ blɛɛ mòo je. Ɛmo gblàgblaǒ ɛ diiě nè tè wlò popoɛ kɔ̀nʼɔ mǒ klě Tentǎn Jǔ Jùsu mǒ.

¹⁶Nyesoaa win wùɛ i sɔnʼě mǒ Ɔɔ chɛ̀ mɔ̀, è nì ä ni ä tee nyopò klee ä pe sen le tmɔ̌ noǎa tee nyo kaen wan klee ä peě wlawlǎ nyo snǔ mɔ̀le plě klee ä tee nyopò ke bu nuu kàan kmɔ̌ neneɛ.

¹⁷Nyesoaa win ni nyuà ɔ̈ nii Nyesoaa konkwa ɔ̌ wɛ̀ mɔ̀le kpǎkpǎ ɔ̌ wɔ̀le ɛ keǒ bɔ nu kàan konkwaa doědoe wùɛ.