Read Grebo, Northern Hiblǔ 1 Bible Online

Hiblǔ 1 - Grebo, Northern bible

Hiblǔ 1

¹Klě tɔn tǐ wlòmo Nyesoa boɛaě äa gbeǐpò mɔ̀ klě Ɔɔ wnɔsàɔpo mǒ klě tǐ fòfoa wlòmo klě dɔ̌ɔdɔ̌ wakě wlòmo,

²kɛɛ klě demǒ bɔɔ̌ tǐà wlòmo Ɔ boɛě ä mɔ̀ klě Ɔɔ Jǔ mǒ Ɔ̈ Ɔ mii win kwa kɔn Nyu mǒ numa keǒ tùonyopo klee noǎ wùɛ mɔ̀. Nɔ̀ kɔn mǒ Nyesoa nuuě kmɔ̌ wùɛà.

³Nɔ̀ moo Nyu Ɔ̈ tee ɛɛ ɛ̈ moo Nyesoa ne kɛn tùɔn plě Nyesoaa kmɔ̌ nɛ̀ neě Ɔ ja teěn. Nɔ̀ ni kmɔ̌à ɛ̌ neǒ klě Ɔɔ kpě kɛne win wlòmo. Tà Ɔ nu ɛɛ ɛ wɔ̀le ɛɛ keǒ tùonyugbee dɛ kukǔu tè bi poo loo wlò le, è Ɔ ne bo klě jɔkɛn klě Ja Tmɔ Nyesoaa dilǎ son mɔ̀ keǒ tùɔnʼǒ kɔnʼǒo tùtuɛ fòɛ kɛn.

⁴Keǒ Ɔɔ nynɛ̌ǒ Nyesoa nye Ɔɔ ɛ nuu kunkuɛn ɛ̌ sìnʼǒ najiǒpòo nyneǎ mǒ, kě Ɔɔ tè nù kunkuɛn ɛ̌ sìnʼǒ najiǒpò mǒ.

⁵Nyesoa sěɛlǎ najiǒpòi tmɛɛ̌ ne ɛ̈ moo, “Mòà Mò moo Ně Jǔ, Mǒ moo Gbèǐ kekɛɛà,” (Ps 2.7) deě najiǒpòi tae Ɔ tmɔɔ̌ noǒa kɛ ɛ̈ moo, “Mǒ mi Gbèǐ tùba, è mò mǐ Ně Jǔ tùba?” (2 Sam 7.14) Ɔɔ win je dɛǒ nɛ̀ Ɔ boɔla Ɔɔ Jǔǒ je. Ii tè ä ji ɛle ɛ̈ moo Ɔɔ Jǔǒ Nɔ̀ neǒ najiǒpò dlǒ mǒ.

⁶Tà Nyesoa wɛ̀aa mɔ̀ Bɔ dboa Ɔɔ Nyǐsajuǒ kělɔ kmɔ̌ɔ mɔ̀, kě Ɔ dǎla ke Ɔ je, “Ně najiǒpò wùɛ u kɔn bu sà Ɔɔ wɛ̀.” (Deut 32.43)

⁷Tà Nyesoa boɛɛaa najiǒpòo tè kɛn Ɔ je, “Ě nu Ně najiǒpò ǔ moo sìsi plě Ě nu Ně na wien po nyebajle klee nynejlu ǔ moo napèpɛlo.” (Ps 104.4)

⁸Kɛɛ kě Nyesoa dɛ̌a Ɔɔ Jǔ je Ɔ je, “Nyesoa, Nè win kwa konkɔn sie kmɔ̌ ke ɛ mii kɛ̀ɛ jleě mǒ bo tonma! Mì Nè deplě win kwa kɔnma klě mǒ slɛɛ̌ tǔn wlòmo.

⁹Jebo siǐan nɛ̀ nòɛɛ mǒ, È faen dɛ kukǔ, dɛǒ nɛ̀ kɔn tè Mǒ Nyesoaà Ɔ̈ moo Nèe Nyesoa Ě poò chnɔ̌ dlǒ Ě nu ɛ Nè plɔ mǐ blo, ke Ě nu ɛɛ nunuɛ nɛ̀ moo Ě nyeè tùɔn ɛ̈ kɔn tè boǎa jǐ chɔɔ ɛ̀ sìnʼǒ Nèe mɔ̀niapo mǒ.” (Ps 45.6, 7)

¹⁰Kě Nyesoa dǎ Ɔ je ke ɛ̈ moo, “Koɔn, sɔɔnʼě ɛɛ wlò tùla mǒ Mò nua kmɔ̌ klee jɔkɛn.

¹¹Ii wùɛ i mi bo wɛ̀ba, kɛɛ Mòà Mò se bo wèwɛ kɔn. Ii wùɛ i mi dakě mǒ paba wòje keà dale pɛɛ dakě mǒ,

¹²mì i plǎba wòje keà nyu plɛ̌ɛ dale, i mi mɔ̀ sìnsiɛma wòje keà nyu sìnsiɛɛ dale mɔ̀, kɛɛ Nè do Mò miǐ jè seɔɔn nema, sèǎ kǒ kpe.” (Ps 104.4)

¹³Nyesoa sěɛlǎ najiǒpòi wùɛ tmɛɛ̌ ne ɛ̈ moo, “Neeà Ně dilǎ son mɔ̀ bo ɛ mǐ ɛ kpa kpa Ě mǐ nè jlae nyo wan du keǒò mɔ̀.” (Ps 110.1) Kɛɛ dɛǒ nɛ̀ Ɔ boɔla Ɔɔ Jǔ je.

¹⁴Deě najiǒpò wùɛ u se kɛ sìsi sosǒ ï nii Nyesoaa konkwa Ɔ̈ dbe lee keǒ bï mǎǒo nyopòà mɔ̀ üà Ɔ wɔ̀ɔ mɔ̀le Bɔ gblàa klě uu kpni kukwǐi plɔɔ tu kɛn bo maěa bobo?