Read Grebo, Northern Hiblǔ 12 Bible Online

Hiblǔ 12 - Grebo, Northern bible

Hiblǔ 12

¹Ke ɛ toon jleě mǒ bo sàsepo fòfoa tìn bòo ǔ tbɛɛ ämoo dǐ, a nɛ noǎà miě ämoo de le kpaba keǒ bä nuu Nyesoaa konkwa bä tɛ i bo, jà kpni kukwǐà ïǐ wlɛ̀ǒ ämoo pìnpian mǒ. È a nɛ bä poě kbě bä nu Nyesoaa konkwa ɛ̈ pɛnʼǒ ämoo jemǒ bo.

²A nɛ bä mǎǒ Jùsu jleě mǒ bo Ɔ̈ nɛɛ ämoo klě äa tè wlò popoɛ mǒ plě Ɔ̈ nu ɛɛ ɛ̌ wɛ̀ lee jele. Tǐǒ jleě Ɔ jěaa sònwɛ keǒ pète bɛ̌ tu jleě, Ɔ kɔna wlò dbadbǎ Ɔ̌ sàla tònwe dɛǒ jleě mɔ̀ keǒ plɔɔ bloblɛ Ɔ miaa kɔnma klě kmɔ̌ɔ nya ɛɛ tè mɔ̀. Sɔɔnʼaě tǐǒ wlòmo Ɔ neě Ɔɔ Gbeǐ Nyesoaa klɔ̀ba gbèsɛɛ dilǎ son mɔ̀ bo ɛ̈ moo tùɔn ɛ̈ kɔnʼǒo tùtuɛ fòɛ.

³Ba sìɛn ɛ dlǒ mɔ̀le ke kpni kukwǐ nyoǒ jlaea Lɔɔ u nua Ɔɔ sònwɛ tùtuɛ ɛ̈ Ɔ nynanaa jebo. Bɛ̌ nu bǎ sìɛn ɛ dlǒ mɔ̀le, è aa wlò se wɔ̀ɔn beba mu, a se Nyesoa wlò kpaea bɔ̌ba mu.

⁴Sɔ̌noka, keǒ aa sukua a sukwii mɔ̀ keǒ kpni kukwǐ jleě mǒ, a sěɛɛ̌ jè ɛɛ wònwɔn wɛ̀n ɛ̈ wɔ̀le je bɛ jɛɛ lee kokoɛ̌ kɛn.

⁵Nyesoaa wlò wlòmo ble tù winʼà Ɔ boɔ kɛ amoo je a snù ii tè le kpǎkpǎ le amoà moo Ɔɔ jlǔ? Ɔ je, “Ně jǔ, bɛ̌ nu Boǒ klěè le sɛ̀, nè jɛɛ ɛ jleě dlǒ měne plě ɛɛ̌ pe nè wlò wɔ̀ɔn Boǒ keè jǐ měne pnɛɛ̌ ne.

⁶Mɛ kɔɔ̌n tèǒ joo nɛ̀ moo nyopò wùɛà Ě noɛɛ mǒo nù Ě sɛ̀ě le plě nyuǒ Ě nu Něe chɛ̀ɛ jǔ mǒ nɔ̀ kɔn plɔ Ě mɛɛ̌ǒ tu kɛn bo bɔ̌ nu dɛà see mǒ slɛɛ̌ le.” (Prov 3.11,12)

⁷A kɔn wlò dbadbǎ keǒ sònwɛ jejeɛ̌ mɔ̀ wòje aa le sèsa ɛ̈ sonwɛ lěe Nyesoa mɔ̀ mǒ. Nyesoa kpɛ a tǐ kɛn wòje Ɔɔ jlǔ. À gbeǐ tae kɔɔ̌n kɛ jǔ ɔ̈ noɛɛ ɔ mǒ plě ɔɔ̌ sà lěe ɔ le?

⁸Bɛ̌ nu bǎ slě le sàe le wòje ke Ɔ ni Ɔɔ jlǔ wùɛǒ, è a se Ɔɔ wlòmo sà jlǔ.

⁹Sɔ̌noka, äa wùɛ ä kɔn gbeǐpò ü sàě ämoo wlòmo kělɔ kmɔ̌ɔ mɔ̀ ü sɛ̀ě ämoo le plě ä nyeǒo tùtuɛ keǒ ɛ mɔ̀. Tèǒ nì kɔn tè bä tìeǒ äa chɛ̀ chɔɔ keǒ äa Gbeǐ Ɔ̈ neěe jɔkɛn mɔ̀ ɛ̈ di ɛɛ numa ä mǐ kmɔ̌ ne ke ɛ mii jleě mǒ bo tonma.

¹⁰Äa gbeǐpòà sàě ämoo wlòmo u sɛ̀ě ä le klě tǐ gbei wlòmo ɛ̈ u jii ɛ̈ nuu tɛɛ, kɛɛ Nyesoa sɛ̀ě ä le keǒ äa kàan dɛɛ tè mɔ̀ ɛ̈ di ɛɛ numa ä mǐ ngmà je ne wòje keǒ Ɔ nuu.

¹¹Nyu le sèsa wùɛ se wan nmɔ dɛ klě tǐǒ u sɛ̀ɛě nyuǒ le wlòmo, ɛ moo sònwɛ jejeɛ̌. Kɛɛ nyopòǒ bɛɛ̌ě ɛɛ wlòmo tìe bɛ̌ sìn, ɛ ni nu ǔ kwɛn ně bo wnawna klee jebo siǐan ï monoo dɛ sonwɛě ɛɛ wlòmo.

¹²Tèǒ nì kɔn tè ba po aa tè wlò popoɛǒ wɛ̀ɛ kbě kɛn kbě ja klee aa wlè bi bɔ̌ wɔ̀ɔn bebeɛ!

¹³A ne ngmà je ne kmɔ̌ ɛ̈ di ɛɛ numa nyuà kɔn tè wlò popoɛ see kbě kɛn ne bɔ̌ keě nè fì le sɛ̀ ɔɔ̌ diě kpni kukwǐ slè be, kɛɛ ɛ mǐ ɔ kbě ja le po.

¹⁴Nyu wùɛ ɔ̈ see ngmà je ne, ɔ se Koɔn Nyesoa jěba mu. Ii tè a tɛ̀n ɛ mǒ keǒ ně bo wnawna bɛ neǒ a klee nyopò tùu slè plě a tɛ̀n ɛ mǒ keǒ ba ne ngmà je.

¹⁵Ba tùě jǐ bo plě aa nyu ɔɔ̌ di Nyesoaa wlòo jlajlǎ dɛà ɛ̈ɛ̌ sà Ɔɔ wlò kǔ mǒ keǒ a mɔ̀ kɛn tbɛ, è aǎ sonwɛǒ kpni kukwǐ nyu mɔ̀ mǒ ɔɔ̌ neě a slè ɔɔ̌ seě a kmɔ̌ kukǔ ja po wòje momae tu.

¹⁶A jě ɛ ɛ̈ moo nyu wùɛ ɔɔ̌ kwɛn se wòn mɔ̀ɔ wɛ̀ kmɔ̌ klě ɔ ja klee se Nyesoa ji kmɔ̌ wòje Isɔ̀ ɔ̈ ploa ɔɔ jǔ dlǒ dɛ keǒ didi dɛ tè mɔ̀.

¹⁷Aa chɛ̀ a ji ɛle, tà ɛmo dɛǒ ɛ sìnʼaa, Isɔ̀ jlɛ̌ ɔɔ gbeǐ bɔ poa ɔɔ ngmna mɔ̀, kɛɛ ɔ sàeaǒ mɔ̀ jleě. Kàan tè ɔ fìnʼa ɔ̌ bɛ̀tea ɛɛ tè, kɛɛ fɔ̌ seaǒ ne keǒ bɔ bitǐa dɛ ɔ nuaa bo.

¹⁸A seɔ dɛ tɛ̀ɛ mɔ̀ di ɛ̈ a jěe wòje keǒ Ǐsòwɛ̌ kwɛɛn nua lěe togbeeǒ moo Sanàe mɔ̀ didiɛ ɛ̈ napèpɛlo nea lěe dlǒ plě kwijlě kpǎ fòɛ tbɛɛa dǐ klee pìpia.

¹⁹U wɔ̌na nokpa ɛ̈ boɛaa ǔ wɔ̌na Nyesoaa win Ɔ̌ boɛa wien le, ii tè nyopòǒ wɔ̌na Ɔɔ winʼǒ ǔ bɛ̀tea ǔ dɛ̌a bò ɛ̈ moo, “Ä se jlǎ bä wɔ̌ɔn kɛ̀ winʼǒ de.”

²⁰Dɛ nua nɛɛ nɛ̀ moo u pea fano keǒ bu nua dɛǒ Nyesoa tmɔɔ̌a nuu. Ɔ tmɔɔ̌a nu Ɔ je, “Bɛ̌ nu nmii chɛ̀ bɔ̌ gbè togbeeǒ mɔ̀, ba bee ɔ seɛ̌ bɔ kǒ.” (Ex 19.12,13)

²¹Ɛmo tùɔnʼǒ ɛ moo ɛ blěe mǒ bo kètee tùɔn ɛ̈ nua nɛɛ Mɔ̀sě dɛ̌a bòo ɛ̈ moo, “Ně fě sèn le keǒ fano mɔ̀.” (Deut 9.19)

²²Aa nenɛà ɛɛ ka se bò je ne, a diɔ togbeeà moo Sàna dlǒ ɛ̈ moo Jlǔsnɛ ɛ̈ neěe jɔkɛn klee ɛ̈ moo kmɔ̌ sie Nyesoaa dě fòɛ ɛ̈ najiǒpòo taslěwɛ bòoě kɛn u mǐi de ngmnengmnɛ̌ kɔn.

²³A diɔ Nyesoaa Nyǐsajuà Ɔɔ wǎn slè ü kɔn nyneǎ chleě lee klě jɔkɛn. A diɔ Nyesoa mɔ̀ Ɔ̈ monoo Tè Tùɔ̌ keǒ tùonyopo wùɛ mɔ̀. A diɔ jebo siǐn nyoo sìsi mɔ̀ ü Nyesoa snǎ lěe mɔ̀le kpǎkpǎ.

²⁴A diɔ Jùsu mɔ̀ Ɔ̈ neǒo Nyesoaa kuo win jajle klee tùonyopo pǎnpe. A diɔ Jùsuu nymɔà gblɛ̀ɛ le mɔ̀ ɛ̈ boɛɛ tɛɛ win ɛ̈ sìnʼǒo Ebòo nymɔ mǒ.

²⁵Ba jě lɛ ɛ̈ moo aa wlè biǐ jɛkɛ̌ keǒ ba po Nyesoaa win nɔkǔ jebo. Tǐǒ jleě Ɔ boɛa Ɔɔ winʼǒ klě kmɔ̌ mɔ̀, nyopòǒ je ü sea Ɔɔ nɔkǔ jebo po, Ɔɔ plɔɔ tu kɛn bo maěaǒ u sea ɛ je plùu lu. Bɛ̌ nu bä tbɛ Ɔ kɛn Ɔ̈à sèsɛɛ ämoo wlòmo jɔkɛnʼɛ tè, a mi plɔɔ tu kɛn bo maěa fòɛ kɔnma.

²⁶Nyesoaa win tutuǒa blǒ bo klě togbeeǒ moo Sanàe dlǒ, kɛɛ klě tǐà wlòmo dɛà nɛ̀ Ɔ peeě ɛ̈ moo, “Ě mi blǒà bo tutuǒba waě do de plě ɛ̈ see blǒà ɛɛ do, kɛɛ klee jɔkɛn ke.” (Hag 2.6)

²⁷Bɛ̌ nu Bɔ̌ dǎ bò ɛ̈ moo, “Waěe do de,” ɛ sɛ̀n nynɛ̌ nunu noǎà Ɔ nuu nì Ɔ mi bo tutuǒba i mǐ tùɔn měne wǒ. È noǎà see bo tutuǒa kɔn nì kɔn bi ne ii tùnwɛ kɛn ble.

²⁸Ii tè ke ɛ toon jleě mǒ bo ɛ̌ monoo Nyesoa Ɔ̌ nye ämoo deplěà ɛ̈ see bo tutuǒa kɔn, a nɛ bä pe Ɔ tàto ä mǐ Ɔɔ wɛ̀ sà klě tǔnʼà Ɔ jlɛ̌ɛ wlòmo, bä nuuě ɛ tùtuɛ klee fano pepeɛ mǒ.

²⁹Mɛ̌oǒ joo nɛ̀ moo äa Nyesoa moo Napèpɛlo Ɛ̈ sùee nye kukwǐ gbè.