Read Grebo, Northern Hiblǔ 4 Bible Online

Hiblǔ 4 - Grebo, Northern bible

Hiblǔ 4

¹Tèǒ nì kɔn tè ke ɛ toon jleě mǒ bo Nyesoa peeě ämoo tùɔnʼɔ doǒ Ɔ wɔ̀ɔ mɔ̀le keǒ ä mɔ̀, ä blɛɛ je bä tùě jǐ bo plě Ɔɔ̌ se äa nyu jě ɔɔ̌ seǒ ɛ jleě mǒ kplɛɛ le.

²Ke kɔn doǒ tuposàà ɛ nuaa pooa klě Jùwɛ nyo mɔ̀, kě ɛ nua pooa kělɔ ä mɔ̀. U wɔ̌na tuposàǒ lo, kɛɛ ɛ seaǒ u kàan dɛ jleě mǒ nu. Tà u wɔ̌na nii, u sea i jebo kme plě u sea ii tè kàan tè po.

³Ämoà poo Nyesoaa kàan tuposàà ɛɛ tè kàan tè ämo nyniě tùɔnʼǒ kɛn ɛ̈ kɔn tè Ɔ boɛɛaa kɛn Ɔ̌ dɛ̌a bòo ɛ̈ moo, “Ě beea u jlo měne Ě poa Ně chɛ̀ win kɛne ɛ̈ moo tùɔnʼǒ Ě wɔ̀ɔ mɔ̀le keǒ u mɔ̀ u miǒo kɛn fɛɛ le, u seǎǒ ɛ kɛn nynima mu.” (Ps 95.7-11) Nyesoa boɔa dɛǒ seela tà Ɔ wɔ̀a Ɔɔ konkwa mɔ̀ ɛ̈ mooaa kmɔ̌à ɛɛ nunuɛ. Ii tè ä ji ɛle ɛ̈ moo ɛ se chnɛ̀ jlǒ wěe nyiɛta nenɛɛ defɛ tè Ɔ se kɛn boɔɔ lo, kɛɛ ɛ moo fefɛ tùɔn tɛ̀ɛ.

⁴Ä ji ɛle ɛ̈ moo i moo kàan tè. Mɛ̌oǒ joo nɛ̀ moo klě Nyesoaa win wlòmo klě ii wakǎ tɛ̀ɛ mɔ̀ i boɛɛ kɛn wěe nyiɛta nenɛǒ, kě i dɛ̌ i je, “Nyesoa fɛa le keǒ wěe nyiɛta nenɛǒ mɔ̀ keǒ Ɔɔ konkwa wùɛ Ɔ nuaa mɔ̀.” (Gen 2.2)

⁵Klě winʼǒ ii wakǎ tɛ̀ɛ mɔ̀ kě i dɛ̌ ɛ̈ moo, “Tùɔnʼǒ Ě wɔ̀ɔ mɔ̀le keǒ u mɔ̀ u miǒo kɛn fɛɛ le nɛ̀ u seǎě kɛn nynima mu.” (Ps 95.11)

⁶Tèǒ nì kɔn tè Nyesoa nye ɛmo fɔ̌ǒ nyopò tùu keǒ bu nyniě ɛmo tùɔnʼǒ kɛn. Nyopòǒ wɔ̌naa tuposàǒ klekle u seaě mu. Dɛ u nuu nɛ̀ moo u seaǒ Nyesoa bo tùtuɛ kɔn.

⁷Tèǒ nì kɔn tè Nyesoa tbala waě tɛ̀ɛ de ɛ̈ Ɔ dɛɛ Kekɛɛ ɛ̈ kɔn mǒ nyu bɔ paeěe fɛla tùɔnʼǒ kɛn. Seela tǐ jleě tà klɔ̀ba Dèběse boɔɔa ɛmoo waěǒ ɛɛ tè kɛn, kě ɔ dǎla ɔ je, “Bɛ̌ nu bǎ wɔ̌n Nyesoaa win Bɔ̌ ke a dɛ kekɛɛà, aǎ ni dlǒ jakǎ.” (Ps 95.7,8)

⁸Bɛ̌ nu bo Jàsuwě bɔ̌ kpaalaě Ǐsòwɛ̌ kwɛɛn klě fɛla tùɔnʼǒ kɛn ɛ̈ kɔn tè Ě boɛɛ, è tà Jàsuwě kǒaa Nyesoa seela waě tɛ̀ɛ tè boɔba mu.

⁹Ii tè ɛ kɔɔ̌n jè fefɛ ɛ̈ neǒo nya keǒ Nyesoaa nyopò mɔ̀ wòje Nyesoaa defɛ chnɛ̀ jlǒ waě.

¹⁰Nyu wùɛ ɔ̈ miěe Nyesoaa fɛla tùɔnʼǒ kɛn muma, ɔ mi fɛba keǒ ɔɔ konkwa wùɛ mɔ̀ ɛ̈ ɔ dǔaa nunuɛ mǒ wòje dɛɛ doǒ Nyesoa nuaa tà Ɔ wɔ̀laa kmɔ̌à nunuɛ mɔ̀ Ɔ̌ fɛaa le.

¹¹Tèǒ nì kɔn tè a nɛ bä poě kpě le ä miě fɛla tùɔnʼǒ kɛn nyni ɛ̈ di ɛɛ numa äa nyuu do tɔ̀ɔ ɔɔ̌ di dɛǒ Ǐsòwɛ̌ kwɛɛn nuaa nu ǔ seaǒo Nyesoa tùtuɛ nye, ii tè ǔ seaě ɛmoo fɛla tùɔnʼǒ kɛn nyni.

¹²Nyesoaa win ne kmɔ̌ ǐ ni konkwa. I wɛ̌n ǐ sìnʼǒ panʼà kɔnʼɔ jǐi sɔ̌n mǒ. Bǐ paě nyu mǒ, i klɛ̌ klɛ̌ ǐ nyniě nyuǒ mǒ klě ɔɔ fǒo tàa sùsu klee fǒ ngmɛ̀ɛǒo plě klee tàa kbě klee tɛni ngmɛ̀ɛǒo. Nyesoaa win wɔ̀ě ɛle keǒ bi tù tùonyuu dlǒ mɔ̀le sìɛnʼɛ dɛ blilǐ mɔ̀ klee ɔɔ jlajlǎ dɛ ï neǒ ɔɔ wlò kɛn.

¹³Dɛ seɔ kmɔ̌ɔ mɔ̀ ne ɛ̈ wɛɛ̌ lee Nyesoa jǐ kɛn. Noǎ wùɛ i be mǒ pepě Ɔ̌ jě li. Nyesoaà Nɔ̀ ä kɔn bä nynanǎǒ jemǒ bo ä miǎ äa kmɔ̌ neneɛ wùɛ ɛɛ kɔ̌ntèɛ po.

¹⁴Ke ɛ toon jleě mǒ bo ä kɔnʼɔ Nyesoaa Jǔà Ɔ̈ moo Jùsu Ɔ̌ moo äa Bodiɔ Ɔ̈ muěe jɔkɛn, a nɛ bä blěǒ äa tè wlò popoɛ mɔ̀ kwa kpankpa ɛ̈ kɔn tè ä boɛɛ nyopò tùu je.

¹⁵Äa Bodiɔ se nyuà ɔɔ̌ jěe nyopò wɔle je keǒ äa kbě ja le wòwɛ mɔ̀, kɛɛ u tɛ̀naě Ɔ měne klě wakě wùɛ wlòmo wòje keà äa ka nee je ǔ tɛ̀nʼě ämoo měne, kɛɛ Ɔ sea kpni kukwǐ nu.

¹⁶Tèǒ nì kɔn tè a nɛ bä kɔn kponkpɛ bä muě klě Nyesoa mɔ̀ Ɔ̈ kɔnʼɔ wlòo jlajlǎ dɛà ɛ̈ɛ̌ sà Ɔɔ wlò kǔ mǒ keǒ ä mɔ̀ ɛ̈ di ɛɛ numa bä ke mǒ sèsɛ jlɛ̌ Ɔ mǐ ä wɔle je jbo klee Ɔ mǐ ä Ɔɔ wlòo jlajlǎ dɛǒ nye.