Read Grebo, Northern Jìmǐse 2 Bible Online

Jìmǐse 2 - Grebo, Northern bible

Jìmǐse 2

¹Ně bǐì Tentǎn Jǔu wǎn ane, ɛ̈ kɔn amo moo kàan tè po nyo klě Jùsu Tentǎn Jǔ mǒ Ɔ̈ moo tè jǐ boǎ Koɔn, baǎ chlɛ̌ ɛ měne keǒ nyu wùɛ mɔ̀.

²È bɛ̌ nu bo pònpan nyu ɔ̈à poo klò bɔjoɛ̌ɛ chìi mǒ plě ɔ̈ poo jǐlenmɔ wlawlě měne bɔ̌ diě aa Nyesoa koǔ bo, è plě sònwɛ nyuà poo dale blebli měne bɔ̌ diě ke,

³bɛ̌ nu nyuǒ poo jǐlenmɔ wlawlěǒ měne aa jleě bɛ̌ neǒ ɔ mɔ̀ chɔɔ, a pɛ̀n kɛn bo ne dɛ le ǎ dɛ̌ bò ɔ je ɛ̈ moo, “Neà tàa bo.” Kɛɛ nyuǒ moo sònwɛ nyuǒ nɔ̀ a tmɛɛ̌ ne ɛ̈ moo, “Nynaě tàě bo ɔ̀ɔ̌ dià tàà Ě tùiàa be bo ne.”

⁴Ɛmoǒ bǎ ke ɛ ni, ɛ se kɛ měne chlachlǎa do aǎ nu ɛ klě aa dlǒ le sìɛnsiɛn kukǔ mǒ le?

⁵A po nɔkǔ bo ně kàan Tentǎn Jǔu wǎn ane, Nyesoa Nɔ̀ sà sònwɛ nyo ü neɔɔ kmɔ̌ mɔ̀ ɛ̈ di ɛɛ numa u mǐ tè wlò popoɛ jakǎ kɔn u mǐ Ɔɔ deplě kɔn ɛ̈à Ɔ peeěe nyopò wùɛ ü noɛɛ Ɔɔ mǒ.

⁶Kɛɛ a sɛ̀ɛǒ sònwɛ nyoo tè le. Sɔ̌noka, ɛ se kɛ pònpan nyo uǔ chean a le plě uǔ kpaě a tè tù nyo mɔ̀ le?

⁷Ɛ se kɛ Nyuà Ɔ̈ kɔn wɛ̀ a sɛ̀ɛ uǔ bɛtɛ̌ɛ Ɔɔ tè je le?

⁸Kɛɛ bǎ keǒ Nyesoaa teteǎ bo tùi ï neě Ɔɔ Win wlòmo ï dɛ̌ bòo ɛ̈ moo, “Noɛɛ nyopò tùu mǒ keǒ nù nèe chɛ̀ mǒ noɛnoɛ,” (Lev 19.18) è kàan dɛ nɛ̀ǒ a ni.

⁹Kɛɛ bɛ̌ nu bǎ ke ɛ měne chlɛ̌, è ɛ moo dɛ kukǔ ǎ ni ɛ, è Nyesoaa tè jɛɛa neǒ a kɛn keǒ Ɔɔ teteǎ wlawlǎ mɔ̀.

¹⁰Nyu wùɛ ɔ̈ mi ɛɛ mǒ tɛ̀nma keǒ bɔ tùǒo Nyesoaa teteǎ wùɛ bo, kɛɛ ɔ̈ miě ii dɛɛ do snǔ mɔ̀ sàba, è tè jɛɛa nɛ̀ neǒ ɔ kɛn keǒ bɔ sàě ii wùɛǒ snǔ mɔ̀.

¹¹Nyesoaǒ Ɔ dǎ bò moo je, “Nè ni wlawle,” Ɔɔ doǒ de Nɔ̀ dɛ̌ bò, “Nè pe mnùngma.” (Ex 20.13-14, Deut 5.17-18) Tèǒ nì kɔn tè bɛ̌ nu bò nè nu wlawle, kɛɛ bò ke mnùngma pe, è Nyesoaa teteǎǒ wlɛ̀.

¹²Tèǒ nì kɔn tè a gbɛ̀ɛ aa boɔboɔ win klee nunu noǎ keà nyu wɛ̀ɛ mɔ̀ bɔ nynaa tè tù nyo jebo teteǎ iǐ di ɔɔ kme.

¹³Mɛ kɔɔ̌n tèǒ joo nɛ̀ moo Nyesoa Bɔ̌ keǎ blilǐ tùi, Ɔ seǎ wɔle je jbojbɛ kɔnma mu keǒ nyopòà mɔ̀ ü see wɔle kɔn keǒ nyopò tùu mɔ̀. Nɛ̀ kɔn tè baǎ jɛɛ nyopò tùu tè, kɛɛ ba kɔn wɔle keǒ u mɔ̀.

¹⁴Ně bǐì Tentǎn Jǔu wǎn ane, è kàan dɛ tae ɛ miǐ kɛ numa bò nyu bɔ̌ dǎ bò ɛ̈ moo ɔ kɔn tè wlò popoɛ klě Jùsu mǒ, kɛɛ ɔɔ̌ nu kàan dɛ? Tè wlò popoɛ taeǒ ɛ wɔ̀le je bɛ gblà kɛ ɔ lo klě kpni kukwǐ slè le?

¹⁵Bɛ̌ nu bo Tentǎn Jǔu wǎnpòi ɔ̈ moo jbɛju ɔ̀ɔ̌ nynɔ bɔ̌ se dalo klee didi dɛ kɔn,

¹⁶bɛ̌ nu aa nyu bɔ̌ dǎ bò ɔ je ɛ̈ moo, “Nyesoa Bɔ poò ngmna mɔ̀, mu fèflɛ bɛɛ̌ pɛɛ̀ fǒ mǒ, mò dɛ di nè kwlě miě jǐ,” è kàan dɛ tae ɛ miǐ kɛ ɔ mǒ numa?

¹⁷Dɛɛ doǒ nɛ̀ tè wlò popoɛ mono, bɛ̌ nu ɛɛ do bɛ̌ nynae dɔ̌ bo kàan dɛ bɛ̌ se ɛ debo mǎ, ɛ̀ slěè mǒ ne.

¹⁸Kɛɛ tǐ tìi tà nyu tɔ̀ɔ mi chɛtlǐiba, kě ɔ miǐ je dǎba ɛ̈ moo, “Mò kɔn tè wlò popoɛ, è mǒà mǒ ni kàan dɛ.” È kě Ě mi ɔ je dǎba ɛ̈ moo, “Tee leě nè tè wlò popoɛǒ ɛ̈ǒ kàan dɛ see debo mǎ, è ně nunu dɛ mi ɛɛ̀ teeba ɛ̈ moo Ě kɔn tè wlò popoɛ.”

¹⁹Po kɛ i mǒ kàan tè ɛ̈ moo Nyesoa ne do sosǒ le? I moo kàan tè, kǔ sìsii chɛ̀ po i kàan tè, ii fě sèn le keǒ fano sosǒ mɔ̀.

²⁰Nyuu tè wlò popoɛà ɔ kɔnʼɔ ɛ̈ see kàan dɛ debo mǎ, ɛ se tè wlò popoɛ. Deě mò plɔɔ kokǒ nyuà jlɛ̀ kɛ ɛɛ bò měne po dɛ keǒ ɛmoǒ mɔ̀le?

²¹Tà äa gbeǐ Eblɛ̌hɛ̀mo nua ɔɔ jǔ Aesěè chɔ̀no mǒ keǒ chɔ̀no tògbee dlǒ, keǒ ɔmo Eblɛ̌hɛ̀mo nuaǒo Nyesoa tùtuɛ nɛ̀ǒ Nyesoa jěa nɛ̀ kɔn tè Ɔ daea ɔ jebo siǐn nyu.

²²È nè jěe lɛ ɛ̈ moo ɔɔ tè wlò popoɛ klee kàan dɛ i beaǒ tàa do, ii tè dɛǒ ɔ nuaa nɛ̀ nua ɔɔ tè wlò popoɛ ɛ̌ wɛ̀aě jele kpǎkpǎ.

²³È dɛ Nyesoaa win sɛ̀nʼɛ nynɛ̌ nɛ̀ǒ ï dɛ̌ bòo ɛ̈ moo, “Eblɛ̌hɛ̀mo poa Nyesoaa tè kàan tè, ii tè Nyesoa dɛɛa ɔ jebo siǐn nyu.” (Gen 15.6) Tèǒ nì kɔn tè Nyesoa dɛɛa Eblɛ̌hɛ̀mo Ɔɔ bě nenawai.

²⁴Ii tè ba jeě lɛ, ɛ se nyuu tè wlò popoɛà ɔ kɔnʼɔ sosǒ ɛɛ̌ nu ɔ Nyesoa ně dae ɔ jebo siǐn nyu, kɛɛ ɛ moo kàan dɛà ɔ nii ke.

²⁵Tà kuadakɔ̌ gblà nynɔǒ ɔ̈ moo Wlehɛɛ̀ ɔ kmeaa Jùwɛ nyoo wònwɛɛ nyo jebo ɔ sɛ̀ɛa uu mǒ u plùaa u kpalaa kɛn bɛɛ̌ snǔ, ɔɔ kàan dɛǒ nɛ̀ǒ Nyesoa jěa nɛ̀ kɔn tè Ɔ daea ɔ jebo siǐn nyu.

²⁶Dɛɛ doǒ nɛ̀ ɛ mono, keǒ fǒ nuu bo sùsu bɛ̌ slě ɛɛ mǒ ne ɛ̌ kwěe, kě nyu wùɛɛ tè wlò popoɛ ni, bo kàan dɛ bɛ̌ se ɛ debo mǎ, ɛ se tè wlò popoɛ.