Read Grebo, Northern 1 Pitɛ̌ 1 Bible Online

1 Pitɛ̌ 1 - Grebo, Northern bible

1 Pitɛ̌ 1

¹Mǒ Pitɛ̌à chlě chněedɛ̌à ɔ̈ moo Tentǎn Jǔ Jùsuu tuposà kpa nyu, Ě chleě ɛ amo Nyesoaa nyopò mɔ̀ ü Ɔ sà lěe ü nee kmɔ̌ wòje dakpě ü gbɛ̀tɛɛ lee blěe wakě wùɛ kɛn le, jà Pɔntɔ̀ klee Kalesìa klee Kapodosìa klee Esìa klee Betimiǎ wakě wùɛǒ.

²Nyesoa Nɔ̀ sàlaǒ amo Ɔ̈ moo äa Gbeǐ wòje ke Ɔ nua ɛɛ ble popoɛ, Ɔɔ Ngmà Je Ne Sùsu nua amo ǎ nea ngmà je keǒ ba mǐaǒ Jùsu Tentǎn Jǔ bo tùtuɛ kɔn klee Ɔɔ nymɔ mǐaě a mɔ̀le snǎ. Nɛ bo Nyesoaa wlòo jlajlǎ dɛà ɛ̈ɛ̌ sà Ɔɔ wlò kǔ mǒ keǒ a mɔ̀ bɛ muu nya plě Bɔ nye a ně bo wnawna fòɛ.

³De bìsea keǒ Nyesoa mɔ̀ Ɔ̈ moo äa Koɔn Jùsu Tentǎn Jǔu Gbeǐ Ɔ̈ kɔnaa wɔle je jbojbɛ chɔɔ keǒ ä mɔ̀ plě Ɔ̈ nyea ämoo wlò je kunkuɛn keǒ kmɔ̌ sie fònfno mɔ̀ ɛ̈ Ɔ jaeěe Tentǎn Jǔ Jùsuu jemǒ duduɛ̌ mǒ keǒ Bɔ sɔnʼě kǒla mǒ.

⁴Dɛǒ nɛ̀ nu ɛ ǎ kɔn snǒ sàe dɛ ɛ̈ siee kmɔ̌ ɛ̈ slěe wɔ̀ bɛ nymii jǐ le ɛ̈ Nyesoa tùu bo keǒ a mɔ̀ klě jɔkɛn.

⁵Tè wlò popoɛǒ a kɔnʼɔ klě Tentǎn Jǔ mǒ nɛ̀ nu ɛ Nyesoaa kpě ǐ tùi a jǐ mɔ̀ ɛ mǐ ɛ kpa kpa a mǐ gblàgbla kɔn ɛ̈ wɛ̀ɛ mɔ̀le ɛ̈ mǐi pepě mǒ be klě kmɔ̌ɔ dlǒ chlɛ̀ɛa mǒ.

⁶Kàan tè klě tǐà wlòmo a mi sònwɛ jěba klě měne tèntɛnʼɛ doědoe slè ï kɔn tǐ konwǎa jebo, kɛɛ gblàgbla dɛǒ nɛ̀ bɛ̈ nu amo a mǐ chǒn le nu chɔɔ.

⁷Tè kɔn tè měne tèntɛn diěe nɛ̀ moo ɛ mǐ ɛ tee le ɛ̈ moo a kɔn kàan tè wlò popoɛ. Aa tè wlò popoɛɛ tè boǎ jǐ ɛ̌ sìnʼǒ klò mǒ ɛ̈ kɔn dɛ ɛ̈ɛ̌ wlɛ̀ǒo sìna mǒ. Klòo chɛ̀ǒ u peě ɛ tǎn klě na slè ɛ mǐ tɛɛ klò nu. Dɛɛ doǒ nɛ̀ ɛ mono, měne tèntɛn pe aa tè wlò popoɛ kbě ja le ɛ̈ di ɛɛ numa Jùsu Tentǎn Jǔ Bɔ̌ tbaeǎ je a miǎ baea kɔn klee tè jǐ boaboǎ klee bo tùtuɛ.

⁸Kàan tè a sěɛlǎ Tentǎn Jǔ jě, kɛɛ a noɛɛ neě jè Ɔ mǒ no. È kàan tè aǎ jě Ɔ klě tǐà wlòmo, kɛɛ a poǒ jè Ɔɔ tè kàan tè. Ii tè ɛ nu ɛ chǒn fòɛ jǐ a jele ɛ̈ tùonyugbe slě wun mǒ sèsa wɔ̀.

⁹Dɛ ɛ nuu nɛ̀ moo a jě wowa dɛ klě aa kpni kukwǐi plɔɔ tu kɛn bo maěa bobo. Wowa dɛǒ nɛ̀ sɔnʼě aa tè wlò popoɛ wlòmo.

¹⁰Nyesoaa wnɔsàɔpo tùaě jǐ bo ǔ pɔ̀nʼa wowa dɛǒ le klee ǔ chechlǎla ɛɛ tè plě ǔ sàla ɛ wan seela tǐ jleě ke Nyesoa mia Ɔɔ wlòo jlajlǎ dɛà ɛ̈ɛ̌ sà Ɔɔ wlò kǔ mǒ konkɔn numa keǒ a mɔ̀.

¹¹U tɛ̀na ɛ mǒ bu pɔ̀nʼa ɛ le tǐ tae ɛ miaa tùɔn kpaeba klee ke tae ɛ miaa tùɔn kpokpa numa. Ngmà Je Ne Sùsu Nɛ̀ niiaě u konkwa mǒ. Ɛ sɛ̀a ɛ wan ɛ̈ kwɛɛaǒo sònwɛ jejeɛ̌ jleě mǒ bo ɛ̈ Tentǎn Jǔ mia lěe slè tìe bɛɛ̌ba klee tè jǐ boaboǎ neaǒ ɛmoo sònwɛ jejeɛ̌ǒ demǒ.

¹²Tǐǒ jleě wnɔsàɔpo sɛ̀a imoo noǎǒ wan ï a wɔ̌naa ï sɔna lěe Nyesoaa win boɔ nyo tùu wan mǒ ü Ngmà Je Ne Sùsuà Nyesoa dboaa Ɛ̈ sɔna lěe jɔkɛn mǒ nea lěe ja, Nyesoa teea ɛ wnɔsàɔpoǒ ɛ̈ moo uu konkwaǒ u niaa ɛ mooa aa kàan dɛ tè, ɛ sea u chɛ̀ɛ kàan dɛɛ tè. Najiǒpòo chɛ̀ jlɛ̌ bu jboa imo noǎǒ le.

¹³Tèǒ nì kɔn tè ba wɔ̀ aa chɛ̀ mɔ̀le keǒ dɛ nunuɛ mɔ̀, a jiǒ aa chɛ̀ɛ wlò mɔ̀ kwa bleblɛ̌ plě a poě aa wlò je kunkuɛn klě wlòo jlajlǎ dɛ ɛ̈ɛ̌ sàa wlò kǔ mǒ ja bo kpǎkpǎ ɛ̈ Nyesoa mi amoo nyema tǐǒ jleě Jùsu Tentǎn Jǔ miǎa de diba.

¹⁴A tùǒ Nyesoa bo wòje Ɔɔ jlǔ, è aǎ ne kmɔ̌ kukǔǒ a ne pnɔɔ plě ǎ jii kàan dɛɛ tè.

¹⁵Dɛ wùɛ a mii numa a ne ngmà je keǒ Nyesoa nuu Ɔ̈ da amoo.

¹⁶Ɛ chleě le klě Ɔɔ win wlòmo ï dɛ̌ bòo ɛ̈ moo, “Ě ne je ngmà, ii tè ba ne ngmà je.” (Lev 11.44-45, 19.2, 20.7)

¹⁷Ke ɛ toon jleě mǒ bo ǎ boɛ lěe aa Gbeǐ Nyesoa mɔ̀ Ɔ̈ tùii nyu wùɛɛ konkwa ɔ nuu ɛɛ blilǐ Ɔ̈ɔ̌ chlǎ lɛɛ měne ɛ̈ moo nyuà ɔɔ tè se bo wan ne, a nyeǒ Ɔ tùtuɛ kmɔ̌ wùɛ a mii nema.

¹⁸Mɛ kɔɔ̌n tèǒ joo nɛ̀ moo a ji dɛ Ɔ sàa le keǒ Bɔ sà amoo dbǐ mǒ klě kmɔ̌ kukǔà slè ɛ̈ see dɛ mǒ ne ɛ̈ aa gbeǐpò teea amoo. Ɔ se dɛà see wlɛ̀ɛa kɔn nu wòje keà sěbla klee klòo ka nee je,

¹⁹kɛɛ Ɔ nua Tentǎn Jǔu nymɔ Ɔ̈ snǎ lěe mɔ̀le wòje blajǔ u dbɛ̌ɛ keǒ Dlǒ Mǒ Sìin Didi Dɛɛ de ngmnengmnɛ̌ mɔ̀ ɔ̈ kɔɔ̌ dɛ klee kɛɛ seǒo jleě mǒ ne.

²⁰Plě Nyesoa mǐa kmɔ̌à ɛɛ nunuɛ wlò tù, Tentǎn Jǔ Nɔ̀ Ɔɔ chɛ̀ tbala Bɔ̈ nua ɛmo konkwaà, kɛɛ Nyesoa po Ɔ pepě mǒ keǒ aa tè mɔ̀ klě kmɔ̌à ɛɛ demǒ bɔɔ̌ chnɛ̀ jlǒ wě wlòmo.

²¹Tentǎn Jǔ Nɔ̀ nu ɛ ǎ kɔn wlò kpaea klě Nyesoa mǒ Ɔ̈ dǔa Ɔɔ jemǒ Ɔ̈ sàlaě Ɔɔ kǒla mǒ Ɔ̌ nyea Ɔ tè jǐ boaboǎ ɛ̈ di ɛɛ numa a mǐ Ɔmo Nyesoa wlò kpae le klee a mǐ Ɔ wlò je kuun nu.

²²Klě tǐà wlòmo ɛ̈ kɔn amo tùiǒ imoo Nyesoaa kàan tèǒ bo, aa kpni kukwǐi tè poo le wlò. Dɛǒ nɛ̀ nu ɛ ǎ wɔ̀le ɛ ba sɛ̀n ɛ nynɛ̌ ba nonoɛɛ měne. Tǐ wùɛ mɔ̀ a nonoɛɛ měne keǒ aa wlè wùɛ mɔ̀ wòje Tentǎn Jǔu wǎn.

²³Mɛ̌oǒ joo nɛ̀ moo kmɔ̌ sie Nyesoaa winʼà nì nu amo ǎ tù kmɔ̌ jajlo wlò le. Aa Gbeǐ jajloǒ Ɔ̈ moo Nyesoa Ɔ se kǒba mu wòje keǒ aa kmɔ̌ mɔ̀ gbeǐpòo ka nee je.

²⁴Nɛ̀ kɔn tè Nyesoaa win dɛ̌ bò ɛ̈ moo, “Nyopò wùɛ u wǒ je kwlǎ ɛ̈ɛ̌ wlɛ̀ǒo chechɛ̌ɛa mǒ, è uu tè jǐ boaboǎ wùɛ ɛ wǒ je tichɛble ï neěe kwlǎ slè bï chechɛ̌ɛ ï bleǒo le,

²⁵kɛɛ Koɔn Nyesoaa win ne kmɔ̌ ke ɛ mii jleě mǒ bo tonma.” (Is 40.6-8) Dɛǒ nɛ̀ moo tuposà ɛ̈ pooa a je.