Read Grebo, Northern 1 Pitɛ̌ 2 Bible Online

1 Pitɛ̌ 2 - Grebo, Northern bible

1 Pitɛ̌ 2

¹Tèǒ nì kɔn tè noǎ kukwǐ wùɛ a sàě i aa kmɔ̌ neneɛ mǒ, jà sen le tmɔtmɔ̌ klee ä jěè kɛn ä daà kàan chènyɔ Nyesoa nyo kmɔ̌ klee chea kmɔ̌ plě klee sadoě popoɛ.

²Ba wǒ je jijlǎe, tǐ wùɛ mɔ̀ a sòa Nyesoaa win ï snǎ lěe mɔ̀le wòje keà jijlǎe sòɛ ɔɔ naǎa nyia ně ɛ̈ di ɛɛ numa i mǐ aa tè wlò popoɛ kuɛn klee a mǐ gblàe le klě aa kpni kukwǐi plɔɔ tu kɛn bo maěa bobo.

³Bɛ̌ nu sɛjesɛ bǎ jě ɛ ɛ̈ moo Koɔn nu kàan keǒ a mɔ̀, è ba nu ɛmo dɛǒ.

⁴A diě kělɔ Koɔn mɔ̀ Ɔ̈ monoo Tiblě Ɛ̈ Nyesoa poo Ɔɔ wǎn. Tùonyopo sàla Ɔ mɔ̀ jleě, kɛɛ Nyesoa Nɔ̀ tbala Ɔ plě Ɔ̈ jěa Lɔ ɛ̈ moo Ɔ nea mǒ dɛ.

⁵Ba diě wòje kmɔ̌ ne tiblě, è a sɔnʼǒ Nyesoa mɔ̀ mǒ Ɔ mǐ a Ɔɔ koǔ poo lo ɛ̈ di ɛɛ numa a mǐ Ɔɔ ngmà je ne kpatòapoo wǒ ü nyee nee sùsuu nyee noǎ ï Nyesoa kmee jebo ï monoo chɔ̀no ï diiě aa tè wlò popoɛ a kɔnʼɔ klě Tentǎn Jǔ Jùsu mǒ.

⁶È kě Nyesoaa win dɛ̌ i je, “A tanà le, Ě mi Tiblěà kɔn tè kmaa bo nynaema klě Ně koǔ wlòmo ɛ̈ neěe dě fòɛǒ moo Sàna wlòmo ɛ̈ Ně chɛ̀ Ě tbaa. Nyu wùɛ ɔ̈ mi Ɔɔ tè kàan tè poba ɔɔ wlò se wɔ̀ɔn bebeɛ kɔn kpe.” (Is 28.16)

⁷Ɛmo Tiblěǒ Ɛɛ tè kma chɔɔ keǒ amo nyopòà poo Nyesoaa tè kàan tè mɔ̀, kɛɛ keǒ nyopòǒ see kàan tè po mɔ̀, kě Nyesoaa win dɛ̌ i je, “Tiblěǒ keǐ po nyo sàlaa jleě mɔ̀ Nɛ̀ klě demǒ bɔɔ̌ tǐ wlòmo Ɛ̈ kɔn tè kma chɔɔ.” (Ps 118.22)

⁸È kě Nyesoaa win dɛ̌ de i je, “Ɛmo Tiblěǒ Nɛ̀ nyopòo tìe mi bòba, è Nɛ̀ mi u wɔ̀ɔn le poba.” (Is 8.14) U se Nyesoaa win kàan tè po, ii tè u bò bojoɛɛ. Dɛǒ nɛ̀ moo Nyesoaa ble po dɛ keǒ u mɔ̀.

⁹Kɛɛ amo moo nyopò Nyesoaa chɛ̀ sàǒo bü moo Ɔmo Klɔ̀ba Nyesoaǒ Ɔɔ kpatòapoo klee ngmà je ne dakɔ̌ klee Ɔɔ nyopò Ɔ sàǒo keǒ bü poo sàe ɛ̈ kwɛɛǒo wlòlekaen noǎà Ɔ nuu jleě mǒ bo Ɔ̈ da amoo ǎ sɔn lěe kwijlě slè mǒ ǎ diɔ Ɔɔ wlòlekaen pepěɔ slè.

¹⁰A se pnɔ Ɔɔ nyopò, kɛɛ klě tǐà wlòmo a moo Ɔɔ nyopò. A se pnɔ Nyesoaa wɔle je jbojbɛ kɔn, kɛɛ klě tǐà wlòmo Ɔ kɔn ɛ ne keǒ a mɔ̀.

¹¹Ně mǒ noɛɛ nyopò ane, Ě bɛ̀te ale, ɛ̈ kɔn amo monoo dakpě klee nyopò se lɔɔ kmɔ̌ɔ mɔ̀ kɔn, ba sà kpni kukwǐ jleě mɔ̀ ï kpɛ amoo to mɔ̀.

¹²A ne kàan kmɔ̌ klě se Nyesoa ji nyo slè ɛ̈ di ɛɛ numa bɛ̌ nu uu nyu bɔ̌ wǒ a lee chɛ̀ ɛ̈ moo a ni kenkan dɛ klě tǐ gbei wlòmo, u mi aa kàan dɛǒ a nii jěba uu wlè mǐ bo bitǐ, è chnɛ̀ jlǒ waěǒ Nyesoa miǎa je tbaeba, u miǎ Ɔɔ nynɛ̌ le po.

¹³Keǒ Koɔnʼɔ tè mɔ̀, a nyeǒ nyopò tùtuɛ ü moo kmɔ̌ɔ kpě win kwa kɔn. A nyeǒ klɔ̀ba tùtuɛ ɔ̈ kɔnʼɔ kpě.

¹⁴Ba nyeǒ kòngmna nyefòapo tùtuɛ ü klɔ̀ba dboo bü maěǒo nyopòà nii kenkan noǎ uu plɛ tu kɛn bo plě bü bae lee nyopòà nii mǒ slɛɛ̌ dɛ.

¹⁵Mɛ̌oǒ joo nɛ̀ moo dɛǒ nɛ̀ moo Nyesoaa kɛn wɔɔn dɛ ɛ̈ moo ba nu kàan dɛ, dɛǒ nɛ̀ bǎ nu, nɛ̀ mi nyopòà kaen wan poba ü kɔn plɛ kǒo ü see dɛɛ tè měne ji.

¹⁶Aa kmɔ̌ neneɛ bɛ wǒ je nyopò wanʼa dbǐ mǒ, kɛɛ aa dbǐ mǒ wonwanʼǒ aǎ ni ɛ keǒ ba kan dɛ kukǔ kɛn. Ba ne kmɔ̌ wòje Nyesoaa na wien po nyebajle klee nynejlu.

¹⁷Ba nyeǒ nyu wùɛ tùtuɛ, ba noɛɛ aa bǐì Tentǎn Jǔu wǎn mǒ, ba nyeǒ Nyesoa tùtuɛ plě ba nyeǒ klɔ̀ba tùtuɛ.

¹⁸Na wien po nyebajle klee nynejlu ale, a tìeǒ aa chɛ̀ ja keǒ aa chì kpa ämopò mɔ̀, è tǐ wùɛ mɔ̀ a nyeǒ u tùtuɛ ɛ̈ se bǔ nu a kàan dɛ mǒo do klee bǔ kɔn wlèe sɔ̌n keǒ a mɔ̀ plě, kɛɛ bɛ̌ nu buǔ nu mǒ slɛɛ̌ dɛɛ chɛ̀ keǒ a mɔ̀, a tùǒ u.

¹⁹Nyuà ɔ̈ jěe sònwɛ keǒ bu se ɔ mǒ slɛɛ̌ dɛ mǒ nu keǒ Nyesoaa nynɛ̌ɛ tè mɔ̀, ɔ mi ngmna kɔnma.

²⁰Bɛ̌ nu bǎ nu kenkan dɛ ɛɛ tè bǔ be amo, bo jě kɛ de bìsea tae a mii kɔnma? Kɛɛ bɛ̌ nu bɛ̌ moo kàan dɛɛ tè bǎ ke sònwɛ jě, Nyesoa mi a ngmna mɔ̀ poba.

²¹Dɛǒ nɛ̀ kɔn tè sɛje Nyesoa dala amo ba nu. Tentǎn Jǔ jě sònwɛ keǒ a mɔ̀ Ɔ̌ tee ɛ amo bɛ moo jboo dɛ keǒ a mɔ̀ ɛ̈ di ɛɛ numa a miě Ɔɔ fì le sà

²²wòje ke Nyesoaa win dɛ̌ɛ ɛ̈ moo, “Ɔ sea dɛ kukǔ nu plě Ɔ sěɛlǎ sen tmɛ̌.” (Is 53.9)

²³Tà u tùa Lɔɔ sadoě, Ɔ sea wun de ja Ɔ sea u le cheaě le. Tà Ɔ jěaa sònwɛ, Ɔ seaě nyu wùɛ fano měne poo lo, kɛɛ Ɔ kpaea Nyesoa wlò Ɔ̈ moo Jebo Siǐn Tè Tùɔ̌.

²⁴Tentǎn Jǔu chɛ̀ Nɔ̀ blěa äa kpni kukwǐ gbɛ̀ɛ keǒ pète bɛ̌ tu jleě ɛ̈ di ɛɛ numa ä mǐ dɛ kukǔ nunuɛ bɔ̌ ä mǐ jebo siǐn kmɔ̌ ne. Noǎǒ tbaea Ɔɔ le nì pean ämo.

²⁵A mǎna ne wòje keà blablɛ̌ mɛ̌ɛ, kɛɛ klě tǐà wlòmo a jae de kělɔ aa Jǐ Mɔ̀ Tùɔ̌ mɔ̀ klee Ɔ̈ moo aa sìsii nae Nyu.