Read Grebo, Northern 1 Jɔ̀ɔ̌n 4 Bible Online

1 Jɔ̀ɔ̌n 4 - Grebo, Northern bible

1 Jɔ̀ɔ̌n 4

¹Ně mǒ noɛɛ nyopò ane, aǎ pe nyu wùɛɛ tè kàan tè ɔ̈ dɛ̌ bòo ɛ̈ moo ɔ kɔn Ngmà Je Ne Sùsu, kɛɛ ba tɛ̀n ɔ mǒ a mǐ ɛ jě bɛ̌ nu bo Sùsuǒ Bɛ̌ sɔnʼě Nyesoa mɔ̀ mǒ. Dɛ ɛ nuu nɛ̀ moo sen le tmɔ̌ wnɔsàɔpo fòfoa nù neɔ kmɔ̌ɔ mɔ̀.

²Dɛ a wɔ̀le je ba jboo loo Nyesoaa Sùsu nɛ̀ moo nyu wùɛà mi ɛ boɔba ɛ̈ moo Jùsu Tentǎn Jǔ diiaě tùonyugbe tǔn wlòmo, ɔ kɔn Sùsuǒ lo Ɛ̈ sɔn lěe Nyesoa mɔ̀ mǒ.

³Kɛɛ nyu wùɛà chnɛ̀ nii mǒ keǒ Jùsu Bɔ diiě tǔnʼǒ wlòmo, ɔ se Sùsuǒ kɔn Ɛ̈ sonwɛ lěe Nyesoa mɔ̀ mǒ. Ɛmo sùsu taeǒ ɛ sɔnʼě mǒ Tentǎn Jǔu jlae nyu mɔ̀ ɔ̈ moo kǔ. A wɔ̌na ini ɛ̈ moo Tentǎn Jǔu jlae nyu miǎě diba, klě tǐà wlòmo u neɔ kmɔ̌ɔ mɔ̀ no.

⁴Ně jlǔ ale, a sɔnʼě mǒ Nyesoa mɔ̀ plě a du Tentǎn Jǔu jlae nyo wan. Mɛ̌oǒ joo nɛ̀ moo Sùsuǒ neě amoo ja Ɛ kun nu Ɛ̌ sìnʼǒ sùsuǒ neěe kmɔ̌ɔ nyopò ja mǒ.

⁵Tentǎn Jǔu jlae nyo kɔn lě kmɔ̌ wlòmo, dɛǒ nɛ̀ kɔn tè u boɛɛ noǎa tè kɛn ke nyopòǒ sɔn lěe noǎ kukwǐǒ neěe kmɔ̌ mɔ̀ mi nii tè boɔboɔ numa plě nyopòǒ ǔ pe uu win nɔkǔ jebo.

⁶Kɛɛ ämoà ä sɔnʼě mǒ Nyesoa mɔ̀, nyu wùɛà jii Nyesoa ɔ pe ä jebo nɔkǔ. Nyu wùɛà seǒo Nyesoa mɔ̀ mǒ sɔn ɔɔ̌ po äa win nɔkǔ jebo. Dɛǒ nɛ̀ ä jbee Nyesoaa kàan Sùsu klee sùsuà gbee lee nyopò mǒ.

⁷Ně mǒ noɛɛ nyopò ane, mǒ noɛnoɛ sɔnʼě mǒ Nyesoa mɔ̀, è nyu wùɛ ɔ̈ mii nyopò tùu mǒ noɛɛma, ɔ moo Nyesoaa jǔ plě ɔ̌ ji Nyesoa. Ii tè bä nonoɛɛ měne.

⁸Nyesoa Nɔ̀ moo mǒ noɛnoɛɛ Mǎ, ii tè nyu wùɛ ɔ̈ see nyopò tùu mǒ noɛɛ ne, ɔ se Nyesoa ji.

⁹Ke Nyesoa ni Ɔɔ mǒ noɛnoɛ teea keǒ ä mɔ̀ nɛ̀ moo Ɔ dbo Ɔɔ Jǔu do kělɔ kmɔ̌ɔ mɔ̀ ɛ̈ di ɛɛ numa ä mǐ kmɔ̌ sie fònfno kɔn klě Ɔ mǒ.

¹⁰Mǒ noɛnoɛǒ neě ɛɛ mǒ ɛ se bä noɛɛ Nyesoa mǒ, kɛɛ ɛ moo Nyesoa Ɔ̌ noɛɛ ä mǒ, ii tè Ɔ dbo Ɔɔ Jǔ keǒ Bɔ moo äa kpni kukwǐi Chɔ̀no.

¹¹Ně mǒ noɛɛ nyopò ane, bɛ̌ nu bo Nyesoa Bɔ̌ nu bo ä mǒ noɛnoɛ, è bä nonoɛɛ měne ke.

¹²Nyu wùɛ nɔ̀ sěɛlǎ Nyesoa jě, kɛɛ bɛ̌ nu bä nonoɛɛ měne, è Nyesoa neě ä mǒ no, è Ɔɔ mǒ noɛnoɛ wɛ̀ě le je klě ä mǒ.

¹³Ke ä nu ɛɛ jijiɛ ɛ̈ moo ä neě Nyesoa mǒ Ɔ̌ neeě ä mǒ nɛ̀ moo Ɔɔ Ngmà Je Ne Sùsuǒ Ɔ nye ämoo Nɛ̀ ni ɛ.

¹⁴Äa chɛ̀ ä jě Nyesoaa Jǔǒ lo plě ä moo sàsepo keǒ nyopò tùu mɔ̀ ɛ̈ moo Nyesoa Ɔ̈ moo äa Gbeǐ Ɔ dbo Ɔɔ Jǔ Ɔ mǐ tùonyopo gblà klě uu kpni kukwǐi plɔ tu kɛn bo maěa bobo.

¹⁵Nyu wùɛà mi nii kàan tè poba ɔ̈ boɛ lii ɛ̈ moo Jùsu moo Nyesoaa Jǔ, Nyesoa neeě ɔ mǒ no plě ɔ̌ neeě Nyesoa mǒ.

¹⁶Äa chɛ̀ ä ji ɛle plě ä po i kàan tè ɛ̈ moo Nyesoa noɛɛ ä mǒ no. Nyesoa Nɔ̀ moo mǒ noɛnoɛɛ Mǎ, è nyu wùɛà mii mǒ noɛnoɛ kmɔ̌ neema ɔ neeě Nyesoa mǒ plě Nyesoa neeě ɔ mǒ.

¹⁷Dɛ kɔn tè Nyesoa nu Ɔɔ mǒ noɛnoɛ ɛ wɛ̀ lěe jele kělɔ ä slè nɛ̀ moo ɛ̈ di ɛɛ numa ä miǎ wlò je kunkuɛn kɔn klě blilǐ tù chnɛ̀ jlǒ waěǒ mɔ̀. Äa kmɔ̌ neneɛ snǎě le mɔ̀ wòje keǒ Tentǎn Jǔ nuaa, ii tè ä miǎ wlò je kunkuɛn kɔnma.

¹⁸Bo Nyesoa Bɔ̌ noɛɛ neè mǒ, sè kɔn mì fano pe, kɛɛ Ɔɔ mɔ̀le snǎ mǒ noɛnoɛ sàà mǒ fano keǒ plɔɔ tu kɛn bo maěa mɔ̀. Plɔɔ tu kɛn bo maěa jɛě fano, ii tè nyu wùɛà kɔnʼɔ fano keǒ Nyesoa mɔ̀, ɛ sɛ̀n nynɛ̌ Nyesoa se ɔ mǒ noɛɛ ne.

¹⁹Nyesoa Nɔ̀ moo klekle Ɔ noɛɛ ä mǒ, ii tè bä noɛɛ Ɔ mǒ.

²⁰Bɛ̌ nu bo nyu bɔ̌ nu ɔ noɛɛ Nyesoa mǒ no plě bɔ̌ faen nyu tɔ̀ɔ, ɔ̀ moo sen le tmɔ̌ nyu. Mɛ kɔɔ̌n tèǒ joo nɛ̀ moo bɛ̌ nu bɔ̌ se nyuǒ mǒ noɛɛ ne ɔ̈ ɔ jěe, ɔ slě wɔ̀ bɔ noɛɛ Nyesoa mǒ Ɔ̈ ɔ sěɛlǎa jě.

²¹Dɛà nɛ̀ moo tè Nyesoa tmɔɔ̌ ämo ɛ̈ moo nyu wùɛ ɔ̈ mi Ɔɔ mǒ noɛɛma bɔ noɛɛ nyopò tùu mǒ.