Read Grebo, Northern 1 Jɔ̀ɔ̌n 5 Bible Online

1 Jɔ̀ɔ̌n 5 - Grebo, Northern bible

1 Jɔ̀ɔ̌n 5

¹Nyu wùɛà mi nii kàan tè poba ɛ̈ moo Jùsu Nɔ̀ moo Tentǎn Jǔ Ɔ̈ Nyesoa peea lěe Bɔ dboaa, ɔmo nyuǒ ɔ moo Nyesoaa jǔ. Nyu wùɛ ɔ̈ noɛɛ nee Nyesoa mǒ Ɔ̈ moo äa Gbeǐ, ɔ noɛɛ Ɔɔ Jǔ mǒ no ke.

²Bä noɛɛ Nyesoa mǒ, è dɛà Ɔ tmɛɛ̌ ämoo ä tùiǒ ɛ bo. Dɛǒ nɛ̀ bä nu, è ä ji ɛle ɛ̈ moo ä noɛɛ Nyesoaa jlǔ mǒ no.

³Nyesoa mǒ noɛnoɛ sɛ̀n nynɛ̌ dɛǒ Ɔ tmɛɛ̌ ämoo bä tùǒ ɛ bo. Noǎǒ Ɔ tmɛɛ̌ ämoo ii ble tùtuɛ se wan jakǎ dɛ.

⁴Dɛ ɛ nuu nɛ̀ moo nyu wùɛ ɔ̈ moo Nyesoaa jǔ ɔ du kmɔ̌ɔ měne tèntɛn wùɛ wan. Äa tè wlò popoɛ nɛ̀ du i wan.

⁵Mɔ wɔ̀le je bɔ̈ duǔ kɛ kmɔ̌à wan, ɛ̀ sìnʼǒ nyuà po lii kàan tè ɛ̈ moo Jùsu moo Nyesoaa Jǔ?

⁶Jùsu Tentǎn Jǔ Nɔ̀ moo Nyu Ɔ̈ diɔ ämoo mɔ̀ klě ně dlǒ popoɛ klee Ɔɔ kokoɛ̌ mǒ. Ɔ slě ně dlǒ popoɛɛ do mǒ dii li, kɛɛ Ɔ diiě ně dlǒ popoɛ klee kokoɛ̌ mǒ. Ngmà Je Ne Sùsu Nɛ̀ moo Sàse keǒ ɛ jleě mǒ plě Nɛ̀ tmɛɛ̌ ä kàan tè.

⁷Ɛ kɔn sàsepo tan,

⁸I moo Ngmà Je Ne Sùsu klee ně dlǒ popoɛ klee Tentǎn Jǔu kokoɛ̌, ii tan wùɛǒ i wonwɔɔ kɛn.

⁹Bɛ̌ nu bä kme tùonyopoo sàse win bo, è bä wɔɔn ɛ kɛn keǒ bä kme Nyesoaa sàse win bo ɛ miǒ sìn. Sàse dɛǒ Nyesoa nuu ɛ̈ kwɛɛǒ Ɔɔ Jǔ jleě mǒ bo nɛ̀ moo

¹⁰nyu wùɛ ɔ̈ mi Ɔɔ Jǔu tè kàan tè poba, ɔ tmɛɛ̌ ɛ nyopò tùu, kɛɛ nyu wùɛà se lii kàan tè poba mu, ɔ jě Nyesoa mǒ sen. Mɛ̌oǒ joo nɛ̀ moo ɔ se dɛǒ kɔn sàse dɛ Ɔ nuu ɛɛ tè kàan tè po.

¹¹È äa sàse dɛ ä nii nɛ̀ moo Nyesoa nye ä kmɔ̌ sie fònfno. Fònfnoǒ nɛ̀ moo dɛǒ Ɔɔ Jǔ Jùsu nu ämoo mǒ ɛɛ dɛ sɔnʼě ɛɛ mǒ.

¹²Nyu wùɛà mii tè wlò popoɛ kɔnma klě Nyesoaa Jǔǒ mǒ, ɔ kɔn kmɔ̌ sie fònfno, kɛɛ nyu wùɛ ɔ̈ se ɛɛ kɔnma mu, ɔ se fònfnoǒ kɔn.

¹³Ě chleě a mɔ̀ imo noǎà ii tè ɛ̈ di ɛɛ numa amoà poo Nyesoaa Jǔu nynɛ̌ɛ tè kàan tè a mǐ ɛ ji ɛ̈ moo a kɔn kmɔ̌ sie fònfno.

¹⁴Dɛà nɛ̀ moo wlò je kunkuɛn ä kɔn klě Nyesoa mǒ ɛ̈ moo bɛ̌ nu bä gbàa Ɔ dɛ wan klě Ɔɔ kɛn wɔɔan mǒ, tǐ wùɛ mɔ̀ Ɔ wɛ̌n äa win ni.

¹⁵Ke ɛ toon jleě mǒ bo ä ji ɛɛ ɛ̈ moo bä gbàa Ɔ dɛ wan Ɔ wɛ̌n äa win ni, ä ji ɛle ke ɛ̈ moo ä mi ɛmo dɛǒ kɔn tè ä gbà Lɔɔ wan jěba.

¹⁶Bɛ̌ nu nyu bɔ̌ jě nyu tɔ̀ɔ bɔ̌ ke kpni kukwǐ ni ï slě ɔɔ kmɔ̌ sie kokoɛ̌ slè poba mu, bɔ bàteeǒ ɔɔ tà Nyesoa mǐ ɔ kmɔ̌ sie fònfno nye. Ɛmo dɛǒ Ě boɛě mɔ̀ kpni kukwǐi doà slěe nyu kmɔ̌ sie kokoɛ̌ slè poba mu. Ě se ɛ boɔ ɛ̈ moo ba bàteeǒ nyuà ɔ̈ nii kpni kukwǐà miě ɔɔ kokoɛ̌ slè poba ɔɔ tà.

¹⁷Kenkan dɛ wùɛà nyu nii ɛ moo kpni kukwǐ, kɛɛ kpni kukwǐ neǒ ïǐ kpa lěe nyu kmɔ̌ sie kokoɛ̌ slè.

¹⁸Ä ji ɛle ɛ̈ moo nyu wùɛ ɔ̈ moo Nyesoaa jǔ ɔɔ̌ nee dɛ kukǔ nunuɛ kmɔ̌. Mɛ̌oǒ joo nɛ̀ moo Nyesoaa Jǔ Nɔ̀ tùi ɔ jǐ mɔ̀ ɛ̈ di ɛɛ numa kǔ ɔɔ̌ di ɔ mɔ̀ gbè.

¹⁹Ä ji ɛle ɛ̈ moo ä moo Nyesoaa jlǔ, è kmɔ̌ wùɛà ɛ neě kǔu win kwa konkɔn bobo.

²⁰Ä ji ɛ de ɛ̈ moo Nyesoaa Jǔ diě le Ɔ̌ nye ä tèe le jbojbɛ, nɛ̀ ni ɛ ä ji kàan Nyesoa. Ä neeě kàan Nyesoa mǒ klee Ɔɔ Jǔ Jùsu Tentǎn Jǔ. Dɛǒ nɛ̀ moo kàan Nyesoa klee kmɔ̌ sie fònfno.

²¹Ně jlǔ ale, a tmɔɔ aa chɛ̀ nǔkpuǐi wɛ̀ sèsa mɔ̀.