Read Grebo, Northern 3 Jɔ̀ɔ̌n 1 Bible Online

3 Jɔ̀ɔ̌n 1 - Grebo, Northern bible

3 Jɔ̀ɔ̌n 1

¹Mǒ Tentǎn Jǔu wǎnʼa bòlibopoià chlě chněedɛ̌à klě ně nenawai Kèɔse mɔ̀ ɔ̈ Ě noɛɛ nee mǒ chɔɔ.

²Ně mǒ noɛɛ nyu, Ě kuun ɛ je wlò ɛ̈ moo noǎ wùɛ nu tɛɛ keǒò mɔ̀ klee nè fǒ nu seɔɔn keǒ ɛ nuu klě nè sùsu mǒ.

³Tà ně nenawa tùu dia lěe u tmɔɔ̌a mǒo ke nùu Nyesoaa kàan dɛ wlò kpaea plě è nee ɛɛ kmɔ̌, ně plɔ bloa chɔɔ.

⁴Dɛ nii mǒo chǒn nɛ̀ moo keǒ bo di ɛ wɔ̌n ɛ̈ moo nyopòà Ě jaeɔɔ Koɔn mɔ̀ u nee Nyesoaa kàan dɛ kmɔ̌.

⁵Ně mǒ noɛɛ nyu, u tmɔɔ̌ noǒ no ke nùu tè wlò popoɛ konkɔn chɔɔ klee ke nii Tentǎn Jǔu wǎn kàan dɛ mǒ nunuɛ ü sèe jii chɛ̀ɛ.

⁶U tmɔɔ̌ Tentǎn Jǔu wanʼà neɔɔ tàɔ lo keǒ nè mǒ noɛnoɛǒ ɛɛ tè mɔ̀. Pèě le kbě keǒ bò mi u snǔ mɔ̀ tù bu diě di klě tǔnʼà wlòmo ɛ̈ blee Nyesoaa wlò.

⁷U bea blě kɛn keǒ bu nua Jùsuu sàse dɛ, nyu wùɛ nɔ̀ sea u dɛ nye klě kuodakwɛ̌ slè.

⁸Tèǒ nì kɔn tè bä mǎǒ u mɔ̀ wòje dɛǒ nùu ɛ̈ di ɛɛ numa u klee ämo ä miǒ konkwa tàa do nu keǒ Nyesoaa kàan dɛǒ mɔ̀.

⁹Ě chleěa Tentǎn Jǔu wǎnʼǒ neěe mɔ̀, kɛɛ Daetlòfɔ ɔ̈ noɛɛ mǒ bɔ moo uu je si nyu ɔ seǎǎ nɔkǔ jebo poba mu.

¹⁰Tèǒ nì kɔn tè bɛ̌ nu bo diě, Ě mi Tentǎn Jǔu wǎnʼǒ tmɔɔ̌ma ɛ̈ kwɛɛǒo noǎ kukwǐǒ Daetlòfɔ nii jleě mǒ bo klee senʼǒ ɔ gbɛ̀tɛɛ lee le keǒ ä jleě mǒ. Dɛǒ ɔ nii ɛ se fò, ii tè bɛ̌ nu Nyesoa nyoà bǔ diě ɛmo tàě ɔɔ̌ kme u jebo plě ɔ̌ tmɛɛ̌ nyopòà jlɛ̌ bu kme uu jebo buǔ ni ɛ, ɔ̌ sɛ̀ě nyopòǒ ni ɛɛ Tentǎn Jǔu wǎn slè.

¹¹Ně mǒ noɛɛ nyu, nyuà nii kàan dɛ ɔ sɔnʼě mǒ Nyesoa mɔ̀, kɛɛ nyuà nii dɛ kukǔ ɔ sěɛ Nyesoa jě, ii tè nè sɛ̀ě dɛ kukǔu fì le, kɛɛ sàě kàan dɛɛ fì le.

¹²Nyu wùɛ nɔ̀ boɛ Demitlìa kàan nynɛ̌, Nyesoaa kàan dɛà ɛ boɛ ɔɔ kàan nynɛ̌ɛ chɛ̀. Ä moo ɛɛ sàsepo ɛ̈ moo ɔ moo kàan nyu plě jì ɛle ɛ̈ moo tèà ä boɛɛ i moo kàan tè.

¹³Ě kɔn noǎ fòfoa tìi keǒ bo tmɔɔ̌ mò, kɛɛ Ě se jlǎ bo nu chněedɛ̌ bo chlě li klěè mɔ̀.

¹⁴Kɛɛ Ě kuun ɛ je wlò keǒ bo diěè mɔ̀ pase, mǒ klee mò ä mǐ jeja popoo lo ä mǐ boɔ.

¹⁵Ně bo wnawna keǒò mɔ̀. Nè mɔ̀niapo dbo wan le gbògba klěè mɔ̀. Ně mɔ̀niapoǒ neěe Ě gbà u wan le do do.