Read Grebo, Northern Wlɛ̀velesɔ̌n 11 Bible Online

Wlɛ̀velesɔ̌n 11 - Grebo, Northern bible

Wlɛ̀velesɔ̌n 11

¹È Ě nyeea dɛ ble dbee tu ǔ tmɔɔ̌a mǒ u je, “Sɔn mǒ mì Nyesoaa kǎ fòɛà ble dbe klee chɔ̀no tògbee kǒngmà plě mì nyopò wùɛà sɛ̀ɛ Nyesoaa wɛ̀ kělɔ kǎ fòɛɔ bo slè.

²Kɛɛ kǎ fòɛǒ ɛɛ pàntoǒ ɛ kɔnʼǒ kuodakwɛ̌ mɔ̀ ü mii ngmà je ne diěà batě kɛn ble tùba klě jlěe tan ne bɔ̀tie le wlòmo, tèǒ nì kɔn tè nè dbe ɛ.

³Ně sàsepo kplěe sɔ̌nʼà Ě mi u kpě nyema, u mi chìnchin dale měne poba u mǐ Ně win wan sà klě jlěe tan ne bɔ̀tie le wlòmo.”

⁴Sàsepoo sɔ̌nʼǒ nù ɔlè tii sɔ̌n klee nǎpea tii sɔ̌n nynaǒ pènmo bo ï nynaǒo Koɔn jemǒ bo Ɔ̈ kɔnʼɔ kmɔ̌ win kwa.

⁵Bɛ̌ nu nyu wùɛ bɔ̌ tɛ̀n ɛ mǒ keǒ bɔ nu u dɛ kukǔ mǒ, na sonwɛě u wan mǒ nɛ̀ sùe uu jlae nyo gbè. Kě nyu wùɛà pɛ̀n lɛɛ le bɔ̈ nu uu dɛ kukǔ mǒ ɔ kɔn bɔ nu kokoɛ̌.

⁶Tǐǒ jleě sàsepoo sɔ̌nʼǒ u mii Nyesoaa win wan sàba, u kɔn kpě keǒ bu kan nǔ je klě jɔ mǒ ɛɛ̌ di dba plě u kɔn kpě ke keǒ bu bitǐ ně bo bɛ nu nymɔ plě u kɔn kpě bu poɔ dɛ kukǔ jakǎ wùɛ kělɔ kmɔ̌ɔ mɔ̀ ke u mi ɛɛ sòasoa numa.

⁷Bɛ̌ nu bǔ wɔ̀ uu sàse dɛǒ mɔ̀, nmi kukǔ fòɛ ɔ̈ miěe bǐtìe fòɛǒ see mɔ̀ kɔn wan mǒ sɔnma, nɔ̀ mi u tùngmaema ɔ̈ mi u ja jǎba, ɔ mi u wan duba ɔ mǐ u dbǎ.

⁸Uu kokǒ dɛ miǒ blɛblě mɔ̀ bo pɛnma klě dě fòɛǒ moo Jlǔsnɛ wlòmo tà u kɔɔaǒ uu Koɔn pète bɛ̌ tu jleě. Jlǔsnɛ nɛ̀ nynaǒ Sedɔ̀n diě klee Ǐjɛ̀te blǒ pènmo bo.

⁹Klě chnɛ̀ jlǒ wěe tan ne bɔ̀tie le wlòmo nyopò miě nyopò slè mǒ sɔnma u mǐ blě kɛn měne sɔn u miě dɔ̌ɔdɔ̌ nyoà pee dɔ̌ɔdɔ̌ win slè měne sɔn plě u mǐ dakwɛ̌ mɔ̀ měne sɔn u mǐ uu fěǒ jěba mu. U jlɛ̌ bu po u pà mǒ, ii tè uǔ wɔɔn ɛ kɛn keǒ bu kpa u bo tùba.

¹⁰Nyopòà neɔɔ blǒɔ mɔ̀ u mi chǒn le numa keǒ uu kokoɛ̌ mɔ̀. U mi le ngmněma u mǐ nyenye noǎ nyenyee ne. Mɛ̌oǒ joo nɛ̀ moo wnɔsàɔpoo sɔ̌nʼǒ u nua nyopòà neɔɔ kmɔ̌ɔ mɔ̀ ǔ jěa sònwɛ.

¹¹Kɛɛ tà chnɛ̀ jlǒ wěe tan ne bɔ̀tie le sìnʼaa, Nyesoa poa u fònfno mǒ ǔ nynana bo de, è nyopò wùɛà jěa luu ɛ poa u wan bo kètekee.

¹²È wnɔsàɔpoo sɔ̌nʼǒ u wɔ̌na win ï peaa sàe klě jɔ mǒ ï dɛ̌a bò uu je ɛ̈ moo, “A diɔ jɔ mǒ!” Uu jlae nyo keaǒ u mɔ̀le tɛn, è nùǒ mua jɔkɛn klě nukpǎ kɛn.

¹³Klě tǐi doǒ wlòmo, è kpě kɛne blǒ sèkea bea bo, è dě fòɛǒ ɛɛ wakǎ peǎn gbe nɛ̀ wlɛ̀a blǒ mǒ, è nyopòo taslěwɛɛ nyiɛta nù kǒa. Nyopòǒ siaa kmɔ̌, dɛǒ ɛ jaěa uu fě dlǐ, è nùǒ nyea Nyesoa tè jǐ boaboǎ Ɔ̈ kɔnʼɔ jɔkɛn win kwa.

¹⁴Dɛǒ nɛ̀ mooa sɔ̌n nenɛ tǐ jakěe dlǒ chlɛ̀chlɛ. È ba gbɛ̀ɛ le, tan nenɛ tǐ jakě i miě diba pase!

¹⁵Tà najiǒpòo nyiɛta nonɔǒ ɔ bea ɔɔ nokpa, Ě wɔ̌na slɛ̀ ɛ̈ peeaa le klě jɔkɛn, kě ɛ dɛ̌a ɛ je, “Kmɔ̌à ɛɛ win kwa kɔn kpě kɔnʼǒ äa Koɔn Nyesoa klee Ɔɔ Tentǎn Jǔ mɔ̀ plě Nɔ̀ mi ɛ win kwa kɔnma ke ɛ mii kɛ̀ɛ jleě mǒ bo tonma!”

¹⁶È kunkunyoo wlò tùo hɛ̀nʼǒ ü neaǒ uu klɔ̀ba gbèsɛiǒ kɛn ble keǒ Nyesoa jemǒ nùǒ kɔa uu jigbè ble keǒ Nyesoa jemǒ ǔ sàla Ɔɔ wɛ̀,

¹⁷kě u dɛ̌a u je, “Kpě kɛne Koɔn Nyesoa Ɔ̈ ɛ tùu plě ɛ tùaa, ä peè tàto keǒ Bò di Nè kpě fòe nu bi di kmɔ̌ wùɛà win kwa kɔn.

¹⁸Dakwɛ̌ wùɛ nù pea jlo, kɛɛ klě tǐà wlòmo Nè jlo neà ne plě ɛ nu tǐ keǒ Bò tù blilǐ keǒ kokǒ nyo mɔ̀ klee Bò sà Nè na wien po nyebajle klee nynejlu klee wnɔsàɔpo klee Nè nyopò tùu snǒ, jà nyefòe klee nyeflabutupò ü nyeǒ Mòo tùtuɛ. Ɛ nu tǐ de keǒ Bò sùe nyopòà gbè ü nymiaa kmɔ̌à jǐ le!”

¹⁹È Nyesoaa kǎ fòɛǒ neěe jɔkɛn ɛ knana ne, è Nyesoaa ngmà je ne blɔ̀kunʼǒ Ɔɔ kuo win neěe wlòmo ï neǒo Ɔ klee tùonyopo pǎnpe ɛ̀ jeěa le klě Ɔɔ kǎ fòɛǒ bo. È tɛ̀n ngmněa ne ɛ̌ kwlia ɛ̌ bea ble plě blǒ sèkea klee chɛn kpěn fòee pìpia dia le.