Read Grebo, Northern Wlɛ̀velesɔ̌n 12 Bible Online

Wlɛ̀velesɔ̌n 12 - Grebo, Northern bible

Wlɛ̀velesɔ̌n 12

¹È Ě jěa jboo dɛ fòɛ tɛ̀ɛ nɛ̀ beaě jɔkɛn, ɛ mooa nynɔ tɔ̀ɔ ɔ̈ peaa wɛn mǒ wòje keà nyu pee wlawlǒ mǒ. Sòbae neaě ɔ bobo plě ɔ̌ tùa klɔ̀ba flɛ̌ dlǒ ɛ̈ u nuua jɔtnèe pù tùo sɔ̌n.

²Ɔ nea mǒ kwlě ɔ̌ fìnʼa keǒ tà kwlě nunuɛɛ chnechně noǎa gbàla ɔɔ kanǐ tè.

³È jboo dɛ tɛ̀ɛ nɛ̀ beaě jɔkɛn. Ɛ mooa dɔsmɛ chǒ fòɛ ɔ̈ neaa dlěe nyiɛta je klee ngmèe pù dlǒ. Klɔ̀ba fleǎa nyiɛta nì ɔ tùa dlǒ.

⁴Ɔ nia ɔɔ wòn ɔ̌ chlìa jɔtnè fòfoa klě jɔkɛn ɔ̌ tunwiǐa nɔ i blǒ mɔ̀le. È ɔ nynanaǒ nynɔǒ nya bo ɔ̈ wɛ̀aa mɔ̀ keǒ bɔ̈ kmàeaa ɛ̈ di ɛɛ numa nynɔǒ bɔ̌ kɔɔ̌nʼa bò Jǔǒ ɔ mǐa Jǔǒ di.

⁵Tà ɔ kmàeaa, ɔ̀ kɔna Jbɛjuju Ɔ̈ miaa kmɔ̌ wùɛà win kwa kɔnma klě kpě kɛne tǔn wlòmo. Kɛɛ u flǎla Jǔǒ Ɔ̌ kpaea jɔkɛn klě Nyesoa mɔ̀ Ɔ̈ neaǒ Ɔɔ klɔ̀ba gbèsɛɛ kɛn bo.

⁶È nynɔǒ ɔ kpalaě kpatekpǎ blǒ kɛn plùplɛ klě tùɔnʼà Nyesoa wɔ̀laa mɔ̀le kɛn, tà ɔ miaǒo nema Nyesoa mǐaě ɔɔ tè mɔ̀ kɔn klě jlěe tan ne bɔ̀tie le wlòmo.

⁷È to tòala le klě jɔkɛn, Maekɔ̌ ɔ̈ moo najiǒpòi fòɛ klee ɔɔ najiǒpò nù tùngmaea dɔsmɛǒ mɔ̀ wònwɔn. È dɔsmɛǒ ɔ klee ɔɔ nablewa u wɛ̀na u mɔ̀ ke,

⁸kɛɛ dɔsmɛǒ ɔ klee ɔɔ nablewa sea kpě mǒ ne, ii tè ǔ dua u wan ǔ plùa u mɔ̀le klě jɔkɛn.

⁹Dɔsmɛ fòɛǒ ǔ sàlaě ɔ jɔkɛn. Nɔ̀ moo smɛ kpaklǎà u dɛɛ kǔ ɔ̀ɔ̌ Setɛ̀n ɔ̈ boo kmɔ̌ wùɛà mǒ. U tuǔnʼa lɔɔ klee ɔɔ nablewa blǒ mɔ̀.

¹⁰È Ě wɔ̌na win ï jɛ̌a lěe klě jɔkɛn, kě i dɛ̌a i je, “Klě tǐà wlòmo Nyesoa diě keǒ Bɔ mǐ Ɔɔ nyopò gblà klee Ɔ mǐ Ɔɔ kpě nyopò tee le plě Ɔ mǐ kmɔ̌à win kwa kɔn. Klě tǐà wlòmo Ɔɔ Tentǎn Jǔ tee Ɔɔ kpě Ɔ kɔnʼɔ no. Kǔǒ ɔ̈ nynanaǒo Nyesoa jemǒ bo ɔ̈ jɛɛa äa bǐì Nyesoa nyo tè tǒn klee chnɛ̀ u sàlaě ɔ jɔkɛn ne.

¹¹Blajǔu nymɔ klee Nyesoaa win ï u tmɛɛ̌aa nyopò tùu nì u nua ǔ dua lɔ. U pooa uu chɛ̀ɛ fònfno kla kɛn keǒ winʼǒ ii boɔboɔ tè mɔ̀.

¹²Tèǒ nì kɔn tè jɔkɛn klee nyopò wùɛǒ neěe a nu chǒn le! Kɛɛ chlǒ keǒ blǒ klee jbǒ mɔ̀. Mɛ̌oǒ joo nɛ̀ moo klě a mɔ̀ wɔ̀ɔn klě kǔǒ ɔ diě. Ɔ ji ɛle ɔɔ tǐ see kɛ̀ jleě mǒ bo tmɔ, ii tè ɔ pe jlo ɛ̌ sìnʼǒ le.”

¹³Tà dɔsmɛǒ ɔ jěa lɛɛ ɛ̈ moo u tuǔnʼa nɔɔ blǒ mɔ̀, ɔ tùaǒ ɛ nynɔǒ demǒ ɔ̌ plìa ɔ mɔ̀le ɔ̈ kmàea ɔ̈ kɔnaa Jǔǒ.

¹⁴Kɛɛ nynɔǒ ɔ nyeea ke fòɛɛ kpakpeaa sɔ̌n nì neaǒ ɔ kɛn ɛ̈ di ɛɛ numa ɔ mǐa wan ɔ mǐaě tùɔnʼǒ wɛ̀aa mɔ̀le keǒ ɔ mɔ̀ kɛn mu klě kpatekpǎ blǒ kɛn tàà bɔ̌ nea lěe dɔsmɛǒ ɔɔ̌ dia ɔɔ mɔ̀ gbè klě jlěe tan ne bɔ̀tie le wlòmo.

¹⁵È dɔsmɛǒ ɔ wlàla ně ɛ̈ sonwɛaě ɔɔ wan mǒ ɛ̈ wǒaa ně fòɛ, nɛ̀ tùaǒ ɛ nynɔǒ demǒ ɛ mǐa ɔ kpa,

¹⁶kɛɛ blǒà nɛ̀ mǎnaǒ nynɔǒ mɔ̀ ɛ̈ kàla wan ɛ̈ ngmnana ně fòɛǒ.

¹⁷È dɔsmɛ nɔ̀ǒ bea jlo měne chɔɔ keǒ nynɔǒ mɔ̀, ii tè ɔ mua ɔ̌ tòala to keǒ nynɔǒ ɔɔ jlǔu jlǔ tùu mɔ̀ ü tùiǒo dɛà Nyesoa tmɛɛ̌ uu bo klee ü nii Jùsuu sàse dɛ keǒ nyopò tùu mɔ̀.

¹⁸Tà Ě nynanaǒo jbǒ wien bo,