Read Grebo, Northern Wlɛ̀velesɔ̌n 15 Bible Online

Wlɛ̀velesɔ̌n 15 - Grebo, Northern bible

Wlɛ̀velesɔ̌n 15

¹Ě jěa wlòlekaen je te dɛ fòɛ tɛ̀ɛ de klě jɔkɛn, ɛ mooa najiǒpòo nyiɛta ü blěaa demǒ bɔɔ̌ sònwɛ jěe noǎa nyiɛta kwa, nù kɔn dɛ bɛ wɛ̀aǒo le, è Nyesoaa jlo nɛ̀ǒ sieaǒ.

²È Ě jěa dɛ ɛ̈ wǒaa jělae jbǒ ɛ̈ klee na chìseea klee nyopò ü nynanaǒo jbǒǒ wien bo ü duaa nmiǒ wan klee ɔɔ sùsu tu plě klee ɛɛ nynɛ̌ɛ tìɛn, u blěa kanǐkài kwa le ï Nyesoa nyea nuu.

³U blea Nyesoaa nyebajlo Mɔ̀sěe wlɛ̌ plě klee Blajǔu wlɛ̌, kě uu bleble win dɛ̌a i je, “Kpě kɛne Koɔn Nyesoa, dɛà nìi ɛ kun nu plě ɛ̌ moo wan bo kàe dɛ! Dakɔ̌ wùɛɛ Klɔ̀ba, Nè kmɔ̌ slɛɛ̌ mǒ no plě ɛ̌ nu kàan.

⁴Koɔnʼò, Nè do Mò ne ngmà je, ii tè nyu wùɛ miì dɛ mǒ jěba ɔ mǐ Nè nynɛ̌ le bìse. Nè jebo siǐan be mǒ pepě, ii tè dakɔ̌ wùɛ miě diba u mǐ Nè wɛ̀ sà!”

⁵Tà dɛǒ ɛ sìnʼaa Ě jěa Nyesoaa kǎ fòɛ ɛ̈ moo Nyesoaa tè mɔ̀ sà ble ɛ neěe jɔkɛn ɛ̌ knana je,

⁶è najiǒpòo nyiɛta nùǒ pěa ǔ blěa nyopò dɛ wan le pae noǎa nyiɛtaǒ klee ǔ pea dale plǐ měne plě klòo jlǐ papɔ̌ bɛɛ̌aě u kekeě jleě tìe le.

⁷È soa fòee hɛ̀nʼǒ i dɛɛ do nyea najiǒpòǒ fuii nyiɛta ï jǐaa kmɔ̌ ne Nyesoaa jlo je Ɔ̈ nee kmɔ̌ ke ɛ mii jleě mǒ bo tonma.

⁸Kǎ fòɛǒ ɛ jǐa jele nǎno ɛ̈ sɔnaěe Nyesoaa tè jǐ boaboǎ mǒ klee kpě. Nyuu doo chɛ̀ nɔ̀ seaě wɔ̀ bɔ̈ palaě kǎ fòɛǒ bo ɛ̌ kpala ɛ kpa dɛɛ wan le pae noǎa nyiɛtaǒ najiǒpòo nyiɛtaǒ u blěaa ǐ wɛ̀a mɔ̀.